II Korintho 11
11
1Wona ngamwisingiti nu nenga pa uhimu pachokope: ena, mwisinge nu nenga. 2Pakuya niwawonela wifu, wifu wa Mulungu: pakuya nikawahongili kwa ngosi yumonga, nausi niwapelekele kwa Kristo mwali mbalafu. 3Koma niyogopa, umu liyoka likankongili Hawa, pakuchenjela kwake, maholo ginu yagayanangike kwali kuwuka pa kumonga na kuwalafu kula kuyii mwa Kristo. 4Pakuya uyu ahicha wona awandisa Yesu wa ntundu wungi, uyu tikambwandisi lepa, pangi nganjupiti roho yingi, iyi mukayiyupiti lepa, pangi evangel ya ntundu wungi, iyi mukayiyupiti lepa, mukita wicho kwiselesa. 5Pakuya niyiwalanga namwene kuya wangalemuka kandu na maapostolo wa palongolo. 6Leka haka niyii wangawulika pa njowelo, koma nakuya pa kumanya; ni pa kiyi kyoha tilasiti pa woha kwa mwenga. 7Pangi nakiti sambi pakwiselesa namwene nausi mukweseke, ndawa nikawawandasili evangel ya Mulungu pangali kuyupa kandu? 8Nikanyakiti pa makanisa gangi, pakuyupa njombe nausi niwatumakile mwenga; 9na pakuya baho nu mwenga ni pa kulemuka, nikatopalisi lepa mundu ayi yoha; pakuya walongo wala, awa wakachiti kuhuma pa Makedonia, wakafwilanisi ndemuko yangu; ni pa kindu kiyi kyoha nikigohiti namwene wangali kuwatopalesa, ni yanigohe. 10Umu fya chakaka fyake Kristo fiyii pa nenga, pa waka mundu yanisiwilakise nenga pa kwilumba uku pa milima ya Akaya. 11Kwa kiki? ndawa nikawaganiti lepa? Mulungu amanya. 12Koma iki nikita, ni yanikite kawili, nausi nidumulile nyimu yawe awa walonda nyimu; kukita pa iki wayilumba nako, wakoleleke ngati tenga kawili. 13Pakuya wandu wa ntundu uwu wayii maapostolo wa mageya, wakuhenga kukonga, wayandungana waka matamilo gawe kuhwanangana na maapostolo wake Kristo. 14Ni pawaka kuganagana; pakuya haka Shetani mwene ayandungana matamilo gake kuhwanangana na malaika wa lulangalila. 15Mumu kikulungu lepa wona wakutumakila wake wayandungana matamilo gawe kihwanakiso kya wakutumakila wakugoloka; kwa awa pakumalakisa yapaye kwa ndingo wa makitiko gawe.
16Pakawili nijowa, mundu asihola kukita nenga mhimu; koma wona wiwi, muniyupe ngati mhimu, nausi nenga kawili nilumbe. 17Iki nilongela, nakulongela lepa pa Bambo, koma ngati mhimu, pa kuhuwalila uku kwa kwilumba. 18Pakuwona kukita wingi wayilumba kwa ndingo wa nyama, nenga nani yanilumbe. 19Pakuya mwisinga na wahimu mwakusangaluka, pakutama mwenga wa malango. 20Pakuya mwisinga nu mundu wona awakitila uwanda, wona awalya, wona awakamula, wona ikwesa, wona awatowa kyene. 21Nijowa kwa ndingo wa kwihepesa, ngati tikayili wakulegeleka. Koma pa kiyi kyoha mundu asindimala (nijowa pa kihimu), nenga nani nisindimala. 22Wa Hebrayo wayii? nenga nani. Wa Israel wayii? nenga nani. Wa mbeyu ya Ibrahim wayii? nenga nani. 23Wakutumakila wake Kristo wayii? (nilongela ngati wakupenga) nenga kulutila; pa mahengo kiyolokile, pakukungika kiyolokile, pa mitowo kiyolokile, pa kufwa kwingi. 24Na waYehudi kahano nikayupiti makumi ncheche kulemuka limonga. 25Kadatu natowiki ni mikongocho, kamonga nalekaliki maganga, kadatu nikayili pa ligalawa lyakukayuka, kilo ni musi nahwelaga pa kina kya nyanja; 26pa mianja mingi, ni filugu pa mikuka, ni filugu pa walugu, ni filugu pa nsafi wangu, ni filugu pa Mihuku, ni filugu pa likaya, ni filugu pa mapululu, ni filugu pa nyanja, ni filugu pa walongo wa mageya; 27pa mahengo na pa kutonda, pakutama miho kwingi, pa njala ni nywita, pa kwinota fyakulya kwingi, pa mbepo ni pa ukengele. 28Ndemuko pa ifi fya kunja iki kinifinyikisa ligono ni ligono, kugaholalela makanisa goha. 29Nani alegaleka, nu nenga nilegeleka lepa? nani akuwala nu nenga nukuwina lepa mwoyo? 30Wona kunilinganila kwilumba yanilumbe panani pa fya ulegelefu fyangu. 31Mulungu nu Dadi wa Bambo Yesu, uyu ahikalika kwa miaka yoha, amanya kukita nideta lepa. 32Pa Damasek nduna pasi pa Arete mutwa akagohiti likaya lya Damasek, nausi anikamule: 33ni pa dirisha nikaholosiwi mu likong’ondela pa luwumba, ni nikayokwiki pa mawoko gake.
Currently Selected:
II Korintho 11: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.