II Korintho 12
12
1Nilinganila kwilumba koma nukunogela lepa; koma yaniyiche kwa filoto ni mafunukuliko ga Bambo. 2Nimmanya mundu mwa Kristo, yilutile miaka kumi ni ncheche (pangi pa mbili, nimanya lepa; pangi kunja kwa mbili, nimanya lepa; Mulungu amanya), yuyu akatoliki mpaka kunani kwa kadatu. 3Ni nimmanya mundu wa ntundu uwu (pangi pa mbili, pangi kunja kwa mbili, nimanya lepa; Mulungu amanya), 4kukita akatoliki mpaka pa Paradiso, na akayufwini malowe gangajoweka, gala nukuyitikalika lepa kwa mundu kugalongela. 5Pa mundu wa ntundu uwu yanilumbe: koma pa nenga yanilumbe lepa, lema pa fya ulegelefu fyangu. 6Pakuya wona nganilonditi kwilumba yaniye lepa mhimu; pakuya yanilongele fya chakaka: koma nikotoka nausi mundu asiwalanga ga nenga kulutila gala agalolesa pa nenga, pangi ayufwana pa nenga. 7Ni kwa ndawa ya kulutila mafunukuliko — mumu, nausi nisiyikwesa kilutile, mwiwa upelekiki kwa nenga pa nyama ntenga wa Shetani kunitowa, kukita nisikweseka kulutila. 8Pa iki nikampembisi Bambo kadatu, nausi kiwuke pa nenga. 9Ni akanikokosili, Neema yangu yikulinganila: pakuya mbafu yangu yimalakila pa ulegelefu. Mumu kinogile nyamhope mbanga yanilumbe pa fya ulegelefu fyangu, nausi mbafu ya Kristo yanifunakile. 10Kwa iki nisangaluka pa fya ulegelefu, pa mitowo, pa fya kulemuka, pa mahyungiko, pa mahumbuso, kwa ndawa ya Kristo: pakuya apa nilegeleka, bahapa niyii wa makakala.
11Nikitika mhimu: mukanikikisi; pakuya nilinganila kwilumba nu mwenga: ndawa nikalemwiki lepa kandu nisiwachila maapostolo wa palongolo, haka niyilepe kandu. 12Chakaka fiwalalilo fya apostolo fikahengiki pa mwenga pa luyumalakilo, pa fiwalalilo ni finyantiti ni fya mbafu. 13Pakuya kiki iki mukakitiki wakuyuyuka pa makanisa gangi, lema kukita nenga namwene nikawatopalisi lepa? munilekelekese kuhoka uku.
14Lola, pakadatu mwanja uwu niyii tayari kuwachila mwenga; leka yaniye wangali kuwatopalesa; pakuya nilalukila lepa finu koma mwenga mwawene: ndawa wana nakulinganila kuwawikila wala wakuwahogola fikokoli, koma wakuwahogola kuwawikila wana. 15Leka nenga kinogile nyamhope yaniyambanisike pa mihalo ya mawumi ginu. Wona niwagana kiyolokile, mukepa pa kunigana? 16Leka yiye wiwi, nenga namwene nikawatopalisi lepa, koma pakuya wakuchenjela nikawakamwili ni kukonga. 17Wila pa mundu ayi yoha nikampeliki kwinu nikankitila ung’eng’ena? 18Nikampembisi Tito, ni nikamtumiti ndongo yula pamonga nako. Wila Tito akawakitili ung’eng’ena? wila tikagenditigenditi lepa pa Roho yuyulayula? pa njayo sisilasila?
19Muhola kukita pa ifi tigwala kwa mwenga. Pa miho ga Mulungu tilongela mwa Kristo. Leka fyoha, wakuganika, fiyii kwa kwajengela. 20Pakuya niyogopa kwali, apa niyicha, yaniwakolele nukuya wa ntundu uwu nilonda, nu nenga namwene nikoleleke namu nakuya umu mulonda; pangi kwali kutumbulana, wifu, kudada, mapatukano, kuhehelaga, fya kupwepwelela, kwitupisa, matimbilikano; pangi, 21apa nihicha kawili, Mulungu wangu yaniselese pa miho ga mwenga, na yaniwakitile malilo awa wa mahele wahokiti mwandi, na wapeliti lepa pa wafu nu ukeme nu usokosi wula wakitaga.
Currently Selected:
II Korintho 12: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.