II Korintho 4
4
1Mumu pakuya nu kutumakila uku, umu tikapatili lipyana, tisinduka lepa: 2koma takaniti fyakufihika fya lihamu, nukugendagenda lepa pa uchenjefu, haka nukukongesa lilowe lya Mulungu; koma pa kulasa fya chakaka kwipeleka tawete kwa chengo kya pa mwoyo kya mundu ayi yoha pa miho ga Mulungu. 3Leka wona evangel yitu yifihika, yifihika kwa wala wayii mu kutagika: 4pa wala mulungu wa miaka iyi agakoyositi maholo ga wangali kukela, nausi lusimulika lulangalila lwa evangel lwa kukwisika kwake Kristo, uyu ayii kifwilifwili kyake Mulungu. 5Pakuya tiwandisa tawete lepa, koma Kristo Yesu Bambo, na tenga wawanda winu pa mihalo ya Yesu. 6Pakuwona kukita Mulungu akajowiti, Lulangalila yalumulike kipitile pa lwisi, uyu amulikili pa mioyo yitu, kulekela lulangalila lwa kumanya kukwisika kwake Mulungu pa kyene kya Yesu Kristo.
7Leka tiyii ni kikokoli iki pa fiwiga fya lidupi, nausi ukulungu wakulutila wa mbafu uye wake Mulungu, nukuya kipitile pa tenga; 8tifinyikisika payi poha, koma nakudigidisika; tiganagana, koma nakuya kutaga mwoyo; 9tihyungika, koma nakuya wakulekeka munyuma; tigwisika pasi, koma nakuya wakutagika; 10magono goha tikutwika kufwa kwake Yesu pa mbili witu, nausi kulama kwake Yesu kawili kulasike pa mbili witu. 11Pakuya tenga wakulama magono goha tifumbulika pa kufwa pa mihalo ya Yesu, nausi kulama nakwombe kwa Yesu kulasike pa nyama yitu ya kifwa. 12Mpaka kufwa kuhenga pa tenga, leka kulama pa mwenga. 13Koma pakuya ni roho iyi ya kiyitakiso, kwa ndingo wa kila kilembiki, Nakeliti, na kwa iki nalongili; tenga nati tikela, ni kwa iki tilongela; 14pakumanya kukita uyu akansyusiti Bambo Yesu, yatisyuse tenga kawili pamonga nu Yesu, ni yatipeleke pamonga na mwenga. 15Pakuya fyoha fiyii kwa ndawa ya mwenga, nausi neema iyi, wona yiyoloka kwa wingi, yayiyolokike kusengusa kwa kukwisika kwake Mulungu.
16Kwa iki tisinduka lepa; koma haka mundu witu wa panja uyanangika, leka uyu wa mgati ukitika wa hino ligono ni ligono. 17Pakuya mahumbuso gitu gayuyuka, aga galutalila, gatikitila fyakutopela fikulungu kulutila fya kukwisika fya miaka yoha; 18pala tilolesa lepa fila fiwoneka, koma fila fyangawoneka: ndawa fila fiwoneka fiyii fya lukumbi; leka fila fyangawoneka fiyii fya miaka ni miaka.
Currently Selected:
II Korintho 4: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.