II Korintho 7
7
1Mumu pakutama nafyo filago ifi, wakuganika, tiyiguyule pa wafu wa nyama ni roho, kumalakisa uwalafu pa woga wa Mulungu.
2Mutipele tenga pandu: haka mundu timhokili lepa, haka mundu tikanjaningi lepa, haka mundu tikambonili lepa. 3Nijowa lepa kuwapisa uwifu: pakuya najowiti palongolo, kukita muyii pa mioyo yitu kufwa pamonga nu kulama pamonga. 4Kukulungu kuyii kusindimala kwa kujowa kwangu kwa mwenga, kukulungu kuyii kwilumba kwangu kwa ndawa ya mwenga: nimemiti ni kunyamasa, niyoloka kulutila nu kuhekelela pa mahumbuso gitu goha.
5Pakuya apa tikachiti pa Makedonia, nyama yitu yikapumusiki lepa, koma tikahumbusiki pa kiyi kyoha; kunja mapindikano, mgati woga. 6Leka uyu awanyamasa wakwiselesa, yuyu Mulungu, akatinyamisi pa kuyicha kwake Tito; 7ni nakuya pa kuyicha kwake kwakape, koma kawili pa kunyamasa kula akanyamasiki nako pa mwenga, apa akatikokosili kulalukila kwinu, kuniongoneka kwinu, wifu winu kwa nenga; mpaka nikalutalili kuhekelela. 8Pakuya haka nikawaniongonisi pa epistola yangu, nakwigamba lepa, koma nikigambiti; ndawa niwona kukita epistola yila yikaniongonisi, leka kwa lukumbi. 9Hino nisangaluka, si ndawa mwaniongonasiki, koma ndawa mwaniongonasiki mpaka pa kupela: pakuya mwaniongonasiki kwa ndingo wa Mulungu, nausi musitaga kandu pa tenga. 10Pakuya liniongoneko kwa ndingo wa Mulungu lihengela kupela mpaka pa uyokosi, lila litola kwigamba lepa: koma liniongoneko lya ndima lihengela kufwa. 11Pakuya lola, iki kyene, kukita mwaniongonasiki kwa ndingo wa Mulungu, kuwahengela kulolela kwa chakaka, ena, kuwina mwoyo nu kwombe, woga nu wombe, wifu nu wombe, kulalukila nu kwombe, ukiki nuwombe, kukilawusa mihalo nu kwombe! Pa kiyi kyoha mukayilingi wanofu kutama wakuguyulika pa mhalo uwu. 12Mumu haka nikawalembili, nakuya kwa ndawa ya uyu akahokiti, haka nakuya kwa ndawa ya uyu akakitiki kiwifu, koma ndawa kugana kwinu kwa tenga kulasike pa mwenga pa miho ga Mulungu. 13Kwa ndawa iyi tinyamasiki: na pa kunyamasa kwitu tikahekalili kulutila muni ndawa ya kuhekelela kwake Tito, ndawa roho wake ukalamasiki nu mwenga mwawoha. 14Pakuya wona pa kandu nikahikalili kwa yombe kwa ndawa ya mwenga, nalekaliki lepa lihamu; koma umu tikalongili kwinu fyoha pa fya chakaka, wiwi kawili kwilumba kwitu, kula nikakiti pa miho ga Tito, kwawoniki kuya kwa chakaka. 15Nu mwoyo wake wa lukolo uyolokela kwinu, kikumbukile kuyufwa kwinu mwawoha, umu mukanjupiti ni woga ni kudigidila. 16Nihekelela kukita pa kiyi kyoha niyii nya mwoyo pa mwenga.
Currently Selected:
II Korintho 7: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.