Matius 23
23
Yesus nofodhaga pande-pande Kitabi bhe miendo Farisi
23:1-36
Mrk 12:38-40; Luk 11:37-54; Luk 20:45-47
1Nopugaumo Yesus ne mie bhahi bhe anaguhuꞌino ambano, 2“Pande-pande Kitabi bhe miendo Farisi dengkoha ne kaengkohaꞌano anabii Musa, dokokuasa damaꞌanaki pahintano. 3Dadiꞌanomo angkafieꞌomu bhe dhalangieꞌomu kosasawiꞌae nefoinaꞌuꞌaondo, tamaka koise sandahaomu podiundo, kapaꞌamo andoa itu miina dadhumalangiea nefoinaꞌuꞌaondo. 4Sabhaha tubho nehabundo tapedamo wowoꞌo mobhie, dotapue maka dofewowoꞌonie ne mie bhaindo, tamaka wutondo dongahe bhe dadumingkue. 5Kosasawiꞌae kahadhaa nehabundo patudhundo so kaowu daoha mie bhaindo. Kawawe kasambaheaꞌando dofekawahe-waheꞌie, #23:5 Kawawe kasambaheaꞌa maitu bhe gambi-gambino dofosingiꞌiane aeati Kitabino Musa; dowawee ne kondaꞌi bhe ne limando. dhambe-dhambeno dhubando dofekawanta-wantaꞌie. 6Weo kahame doasiane dengkoha ne kaengkohaꞌando kabhala, weo lambu kasambaheaꞌa dengkoha te wise-wise. 7Doasiane dua dofosibhalada we wuntano daoa bhe dokonada guru.
8Tamaka hintimiu koise undaomu dakumonakoomu guru, kapaꞌamo seemie kaowu gurumiu; kosasawimiu itu sebhahi-bhahitieꞌomu. 9Koise fokoamaomu ne laꞌae maka dua ne dhunia ini, kapaꞌamo seemie kaowu Amamiu, Amamiu te surugaa. 10Koise undaomu dakumonakoomu neangka, kapaꞌamo seemie kaowu neangkamiu, Mesias Omputo Fosalamatino. 11Laꞌae moindalono nafoliu kabhalano soda ne olotamiu itu, tabeano naꞌumondofao kafaraluundo mie bhaindo. 12Kotika mekalangkeno wutono namekapandae Ompu, kotika mekapandano wutono namekalangkee.
13Balaamoomu, pande-pande Kitabi bhe miendo Farisi, hintimiu mie mehaaꞌulano, kapaꞌamo songkoemoomu fointono Kafopahintaꞌano Lahataꞌala ne wisendo mie bhaimu. Hintimiu mokiidoomu mesuaꞌomu pakade meꞌontomiomu mie so mesuano.
14[Balaamoomu, pande-pande Kitabi bhe miendo Farisi, hintimiu mie mehaaꞌulano, kapaꞌamo mebhohe-bhoheꞌiomu bhihinanda maka rampasiomu lambudo. Sambaheamiu fekawanta-wantaeꞌomu mbali kaowu powohando mie. Dadiꞌanomo nasedhuluꞌa dua kabhie kahukumu so neꞌawamiu.]
15Balaamoomu, pande-pande Kitabi bhe miendo Farisi, hintimiu mie mehaaꞌulano, kapaꞌamo mebhosekiomu teꞌi bhe mepalintangianeomu wite so kaowu mefopesuaꞌaoꞌomu naseemie weo agamamiu; tamaka sapesuano habuemoomu so mieno narakaa, kadaino podiuno sangke haa paku bhe podiumiu.
16Balaamoomu, hintimiu kabunto fotondano. Ambamiu, ‘Ane dopodhandi bhe dofemata dosambili Lambuno Lahataꞌala, podhandi maitu miina nakoꞌuluꞌa. Tamaka ane dopodhandi bhe dofemata dosambili bulawano Lambuno Lahataꞌala, podhandi maitu tabeano tetewei dadhumalangie.’ 17Hintimiu mie bhohe bhe kabunto! Ingka noliuꞌe Lambuno Lahataꞌala bhe bulawa, kapaꞌamo katifekangkiloꞌano bulawa hampano neate weo Lambuno Lahataꞌala. 18Ambamiu, ‘Ane dopodhandi bhe dofemata dosambili medha kaetunuꞌa kapopanga, podhandi maitu miina nakoꞌuluꞌa. Tamaka ane dopodhandi bhe dofemata dosambili kapopanga te wawono medha maitu, podhandi maitu tabeano tetewei dadhumalangie.’ 19Hintimiu mie kabunto! Ingka noliuꞌe medha aitu bhe kapopangano, kapaꞌamo katifekangkiloꞌano kapopanga hampano neate te wawono medha aitu. 20Dadiꞌanomo ane dopodhandi bhe dofemata dosambili medha kaetunuꞌa kapopanga, ingka dosambilimo medha anaꞌa bhe kosasawiꞌae kapopanga netei te wawono medha aitu. 21Ane dopodhandi bhe dofemata dosambili Lambuno Lahataꞌala, ingka dosambilimo Lambu anaꞌa bhe Lahataꞌala meateno ne itu. 22Ane dopodhandi bhe dofemata dosambili surugaa, ingka dosambilimo dua kaengkohaꞌano Lahataꞌala bhe Wutono mengkohano ne kaengkohaꞌa aitu.
23Balaamoomu, pande-pande Kitabi bhe miendo Farisi, hintimiu mie mehaaꞌulano! Kapaꞌamo taꞌolentu-lentuomu pehapimiu mohobuꞌino peda sabhaha kagule. #23:23 Sabhaha kagule, sakotuꞌuno: o selasi, o adas bhe dhinta. Feompulu dawueꞌomu maka sedawu gaatiemoomu so kapopanga ne Lahataꞌala. #Im 27:30 Gahaꞌa fofoliuꞌano kafaraluu weo tubhono agama miina konamianeomu. Foliuꞌano kafaraluu anaꞌa peda kaꞌadhili, pomobhe-mobhelaꞌao lalo bhe kataino lalo. Tolu hondano aini tetewei dhalangieꞌomu, tamaka sehondano saꞌituini koise dua molimpuꞌaneomua. 24Hintimiu kabunto fotondano! Konunu weo kafohoꞌumiu tiisangieꞌomu, tamaka ane o kahumbau taꞌotolomoomu. #23:24 Sakotuꞌuno: o unta.
25Balaamoomu, hintimiu pande-pande Kitabi bhe miendo Farisi, mie mehaaꞌulano! Kapaꞌamo kampohoꞌuꞌa bhe kampomaaꞌa fewaniuꞌeomu kundono, tamaka we lalo nohaku, noponoꞌao hasilino karampasiꞌa bhe kakadau-daumiu. 26Miendo Farisi mobuntono, fewaniuꞌomu kadeki we lalono kampohoꞌuꞌa itu maka we kundono naonggelamo dua.
27Balaamoomu, pande-pande Kitabi bhe miendo Farisi, mie mehaaꞌulano! Kapaꞌamo hintimiu itu tapedamo kobuhu neꞌefii, we simbali nokesa wohaꞌano, gahaꞌaitumo we lalo sanea buku bhe sabhaha giu mohaku sigaoꞌano. 28Pedamo dua hintimiu itu, ne pomatando mie wohaꞌamiu mie banara, gahaꞌaitumo we lalomiu sanea fekihi mehaaꞌulano bhe isikadhi modai.
29Balaamoomu, pande-pande Kitabi bhe miendo Farisi, hintimiu mie mehaaꞌulano! Kapaꞌamo mehabuomu kobuhu mokesaꞌano so ana-anabii bhe mefekakesaꞌiomu bhata kafeꞌulaindo mie lumebeno. 30Ambamiu, ‘Ane tadumadi ne dhamanindo awuaꞌi mani, tetewei paise tamangkafi habundo tamongko anabii andoa maitu.’ 31Tamaka hampano pugaumiu naꞌa, ingka akuiꞌemoomu hintimiu itu sampuꞌando mongkono ana-anabii. 32Dadiꞌanomo fopansuhumoomu, fosangkaeꞌomu dhosa-dhosando awuaꞌimiu, fopono kasukando! 33Hintimiu ule, sampuꞌando ule modai! Koe fehoo-hooꞌomu lumapaomu ne kahukumuno narakaa. 34Dadiꞌanomo, amohatokoomu: mada kaowu aetuduangkoomu ana-anabii, mie kotimbangi bhe pande-pande Kitabi. Andoa maitu sigaꞌa mongkodaomu bhe kumantaidaomu te sau salipu, sigaꞌa humambisiandaomu habuta weo lambu kasambaheaꞌa, maka umamba-ambadaomu dapontaala-ala ne amai kota. 35Pedamo anaꞌa tumongkuomu dhosano limbano heando mie nepongko tapa kokaꞌala, notanda ne Habel ampa ne Zakaria anano Berekya. Habel ini mie banara; Zakaria pongkoeꞌomu ne kadeteno Lambuno Lahataꞌala, ne olotano boloku mongkilo bhe medha kaefoampeꞌa. #Habel Kej 4:1-8; Zakaria 2Taw 24:20-22 36Amohatokoomu, kotu-kotuꞌu kahukumuno kosasawiꞌae dhosa aini damotongkuandae mie dhamani aini!”
Yesus nofedeeꞌao kotano Yerusalem
23:37-39
Luk 13:34-35
37“Yerusalem, Yerusalem! Hintumo mongkono ana-anabii bhe bhatumbulino mie netudu ne hintu. Nentuhumo nokamba laloku ne hintu, amohompu raꞌeatimu, kanggetu inano manu nofohompu anano we towawano panino, tamaka hintimiu mokiidoomu. 38Dadiꞌanomo lambumu ini natihunsamo bhe naolino. 39Amohatokoomu, notanda aitu paemo moha kanauꞌomu, ampa mugauꞌomu,
‘Notibarakati maino weo neano Ompu.’ ” #Mzm 118:26
Currently Selected:
Matius 23: mnbSD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
