Markus 13

Yesus nokowambaꞌao so kahansuruꞌano Lambuno Lahataꞌala

13:1-2

Mat 24:1-2; Luk 21:5-6

1Yesus nolimbamo nomaiꞌao weo Lambuno Lahataꞌala. Gahaꞌa seemie anaguhuno nopugaumo ambano, “Guru, soba ondo! Kabhalaꞌino bhe katangkaꞌino kontu aini! Kakesa maka Lambuno Lahataꞌala ini!” 2Tamaka Yesus notobhoosie ambano, “Ingka wohae padaa kabhalaꞌino bhe katangkaꞌino lambu aini? Bhe nasepoi kontu pae bhe so tumapiꞌano te wawono kontu bhaino, kosasawiꞌae damadae damohansurue!”

Kasabha bhe kafodee-dee

13:3-13

Mat 24:3-14; Luk 21:7-19

3Yesus nokalamo te kabhawono Zaitun. Ne itu nengkohamo nofewise we Lambuno Lahataꞌala, dopobhaiane Petrus, Yakobus, Yohanes bhe Andreas. Andoa ini dofeenaemo ambado, 4“Fohato kainsami, naefie gahaꞌa kosasawiꞌae naꞌa nakumadhadhia? Maka o ae so katandainoa, ane nahumatomo tempono?”

5Yesus nofohatodamo ambano, “Kodhagaomu bhahaa dofokolilino totono lalomiu! 6Kapaꞌamo mada kaowu dabhahi so maino damake neaku bhe damugau ambado, ‘Idimo ini Mesias’, maka dabhahi sepaliꞌa so tibhohe-bhoheꞌino. 7Ane metingkeomu popahisaꞌa bhahaꞌi meꞌawaomu bhihitano popahisaꞌa, koemo notikendaa handamiua. Ingka kosasawiꞌae maitu tetewei nakumadhadhia, tamaka suanoꞌo dua kafetompaino dhamani. 8Liwu dapoewangi bhe liwu, kafopahintaꞌa dapoewangi bhe kafopahintaꞌa. Neꞌamai-neꞌamai nandumandoo luali bhe gaba. Kosasawiꞌae maitu kaneꞌomo kafetompunaꞌino dhamani buꞌou, nopototo bhe kaleano so koanano.

9Tamaka hintimiu ini posiꞌondoomu! Mada kaowu dahumakofikoomu maka dabhitahakikoomu Sahano Agama. Damepekikoomu weo lambu kasambaheaꞌa. Pakade damowakoomu ne wisendo kafeompuꞌa bhe omputo, hampano membaliomu anaguhuꞌiku. Aini seꞌise dua katolala membaliomu sakusiiku ne wisendo. 10Ampamo kaowu Bhihita Metaa tetewei damoleleandae kadeki sabhaha liwu we dhunia ini. 11Ane dahumakokoomu maka damowakoomu ne fobhitahakino, koe nekenda-kenda handamiua bhahaꞌi mugauꞌomu ae! Tapugaumoomu ampa kafohatoꞌaomiu wakutuu anaꞌa; hampano suano hintimiu so mugauno, tamaka Rohino Lahataꞌala. 12O mie damowa kakutaꞌando ne kokuasano damongkoeꞌao, pedamo dua o ama damowa anando damongkoeꞌao. O anaꞌi damewangi kamungkulando sampe damongkoda. 13Hintimiu ini dabansikoomu sabhaha mie hampano neaku. Tamaka ane dakosabaha dapotaami ampa namalusi, dasumalamati.”

Fofekabinasano Timohakuno

13:14-23

Mat 24:15-28; Luk 21:20-24

14“Weo kasabha maitu mohaomu Fofekabinasano Timohakuno naeehe-ehe ne pata mantasiꞌano. (Hintimiu mebasano tabeano motindaeꞌomu maꞌanano!) #Dan 9:27, 11:31, 12:11 Maka miendo Yudea tabeano damilei te kokabhawoꞌano so dasumalamatiꞌao. 15Mie we tambi koemo dopesua dakoniala weo lambu. #13:15 Sakotuꞌuno: ndumandoono te ato ⸤ potateꞌano⸥ koemo dosampu damesua dakoniala weo lambu. 16O mie te kaampo koemo dosuliki pakeando we liwu. 17Kadaino maka kolaundo hobhine fowoowano tawa fofotitino wakutuu anaꞌa. 18Sambaheaꞌaneomu kosasawiꞌae maitu koise nokadhadhia weo wulano use. 19Wakutuu anaꞌa nandumandoo kasabha foliuno kabhibhiisa. Kasabha pedando naꞌa miinaꞌo nakumadhadhia, notanda Ompu Lahataꞌala nofokonandoo dhunia inia, ampa haꞌoleo ini, pakade paemo dua namendua nakumadhadhia. 20Ane ibahano Ompu pae nakumuhangi tempono, kotika dumadino pae bhe so sumalamatino. Tamaka mbaꞌinomo nandoo umati tipilino, Ompu Lahataꞌala nakumuhangi tempono.

21Wakutuu anaꞌa, ane bhe so mugauangko ambado, ‘Ondoe, ainiꞌaemo Mesias, Omputo Fosalamatino’ tawa, ‘Ondoe, atatuꞌae Mesias’, koe parasaeaꞌomua. 22Kapaꞌamo dabhahimo mabhino wutono Mesias, gahaꞌaitu suano. Dabhahi dua mpahaana-anabiino. Andoa naꞌa daehabu tanda-tanda tapa mentela bhe giu timenteꞌaono, patudhundo ane naembali damokolilino dua totono lalondo umati tipilino. 23Dadiꞌanomo hintimiu kodhagaomu! Kosasawiꞌae padamo afohatoangkoeꞌomu wawo inia.”

Kahatoꞌano Anano Manusia

13:24-27

Mat 24:29-31; Luk 21:25-28

24“Wakutuu anaꞌa, namalusi sabhaha kasabha naꞌa, o oleo nahohondomo, o wula paemo nakotilangaa. 25O kulipopo dapondawuti damaiꞌao te lani bhe kosasawiꞌae waweno alamu naohungga. 26Wakutuu anaꞌa Anano Manusia - Idimo ini - damohae namai te olu, natiwoha weo kakalabhiano bhe kuasa bhalano. 27Natumudu malaꞌekatino damoꞌonu umatino tipilino, damaiꞌao ne kofatowalaꞌae alamu, damaiꞌao te bheteꞌano oleo ampa we sooꞌano.”

Dopoguhu ne puꞌuno wohaꞌa

13:28-32

Mat 24:32-35; Luk 21:29-33

28“Soba poguhuomu ne puꞌuno wohaꞌa! #13:28 Sakotuꞌuno: puꞌuno ara. Ane notawomo haꞌano, pandeꞌaanemoomu nomaꞌomo nakoꞌoleo. 29Pedamo dua aitu, mohaomu kaowu kadhadhia nepulaoꞌaoku saꞌituini, mandeꞌaanemoomu nomaꞌomo sepaliꞌa tempono, ingka te wisenomo fointo. 30Amohatokoomu! Kotu-kotuꞌu mie dhamani aini paeꞌo daopulia damate, nakumadhadhiamo kosasawiꞌae naꞌa. 31O lani bhe dhunia naosali, tamaka wambaku ini pae bhe kasalia. 32Ampamo kaowu oleono bhe tempono bhe seemie miina bhe mandeꞌaanea. O malaꞌekati te surugaa miina, Anano Manusia miina dua, mpahinomo wutono Amaku mandeꞌaanea.”

Kafodhaga

13:33-37

Mat 24:36-44

33“Dadiꞌanomo posiꞌondoomu! Kodhagaomu, kapaꞌamo miina mandeꞌaaneomu naefie nahumato tempono. 34Naembali doposandahaane bhe seemie kumalano we koliwuno. Lambuno noposahunaꞌaane mieꞌino. Seemie-seemie bhe takano, dhagano fointo nofohatoe naekamboto, nakodhaga sepaliꞌa. 35Dadiꞌanomo kodhagaomu, hampano miina natipandeꞌaoa so kahatoꞌano kolambuno. Bheanea nahumato sanimohondo, bheanea kafewuntaꞌino alo, bheanea nabhala nekundono alo tawamo sanimentaeno. 36Ane nasehatoꞌa kolambuno, kodhagaomu bhahaa nohafotikoomu tangasano moodoomu. 37Wambaku ne hintimiu ini, amohatoandae dua kosasawindo manusia: mantaa-ntaaꞌomu bhe kodha-kodhagaomu!”

Currently Selected:

Markus 13: mnbSD

Highlight

Copy