Markus 15

Yesus ne wiseno Pilatus

15:1-15

Mat 27:1-2, 11-26; Luk 23:1-5, 13-25; Yoh 18:28—19:16

1Nohaha kamentae neangkaꞌindo imamu, kamu-kamungkulaꞌi, pande-pande Kitabi bhe kosasawindo Sahano Agama noseꞌisemo fekihindo. Yesus dotapuemo maka doowae ne wiseno Pilatus. 2Pilatus nofeenae ambano, “Nokotuꞌu hintu inia omputo miendo Yahudi?” “Pedamo pugaumu naꞌa,” ambano Yesus. 3Nobhahi sepaliꞌa kasangkati nesungkuꞌaondo neangkaꞌindo imamu naꞌa. 4Pilatus nofeenaemo toha ambano, “Pae tumobhoosia gahaꞌa? Ingka fetingkee naꞌa kabhahino kasangkatindo ne hintu!” 5Tamaka Yesus miina sepaliꞌa natumobhoosia, sampe Pilatus tanomente.

6Kaneano ne hohaeaꞌa peda naꞌa Pilatus sadhia nefolimba seemie katohongku, ampa kamesalondo mie bhahi. 7Ne naꞌa nandoo seemie koneaꞌano Barabas, notitohongku bhe sabhangkaꞌino mbaꞌinomo dehabu kahungga weo liwu doewangi pamarinta. Weo kahungga anaꞌa andoa dofopongko. 8Dohato mie bhahi desalomo ne Pilatus so namangkafiꞌao kaneano maitu. 9Pilatus notobhoosida ambano “Poindaloomu bhahaa amolimbaangkoomu omputomiu ini?” 10Kapaꞌamo Pilatus nopandeꞌaane neangkaꞌindo imamu doowa Yesus se anoa hampano dokonduaꞌane lalo. 11Tamaka neangkaꞌindo imamu lasao dowudhu mie bhahi daesalo ne Pilatus namolimbaanda Barabas. 12Pilatus nofeenadamo toha ambano, “Ane peda naꞌa amafaꞌiane mie nekonamiu omputo miendo Yahudi ini?” 13Mie bhahi dokei ambado, “Dakumantaiꞌe te sau salipu!” 14“Podiu modai ae gahaꞌa nehabunoa?” ambano toha Pilatus. Tanodhulu kaꞌosa dokei ambado, “Dakumantaiꞌe te sau salipu!”

15Panda-pandano Pilatus nofolimbamo Barabas doꞌiaꞌao kaowu mie bhahi maitu. Pada aitu Yesus dohambisianemo habuta maka nowaꞌandae dakumantaiꞌe te sau salipu

Yesus doele-elee

15:16-20

Mat 27:27-31; Yoh 19:2-3

16Pada peda naꞌa, tantara doowamo Yesus we kamali kaebhotusiꞌa parakara. Maka kosasawindo tantara dosaliꞌida dapofoꞌo-foꞌonu. 17Yesus dofopakeane dhuba wungo, pada aitu dekinianemo songkono omputo maiꞌao ne haꞌano sau kokihi maka dofokanae ne fotuno. 18Pada anaꞌa dopahasomba-sombaiꞌemo ambado, “Somba waompu, Omputo miendo Yahudi!” 19Fotuno dohambisiane wulu, dokapehasie bhe dosudhu ne wiseno dotaohao sombado. 20Pada doele-elee peda naꞌa, dhuba wungo saꞌituini dolembiemo maka dofopakeane toha pakeano wutono. Nopalusi anaꞌa dofolimbaemo, dakumalamo dakumantaiꞌe te sau salipu.

Yesus dokantaiꞌe te sau salipu

15:21-32

Mat 27:32-44; Luk 23:26, 33-43; Yoh 19:17-24

21We laano sala nandoo seemie lumalono koneaꞌano Simon. Simon ini miendo Kirene, amando Aleksander bhe Rufus. Anoa ini kaneꞌo nosuli nomaiꞌao we simbalino kota, lasao dofosuhue natumongku sau salipuno Yesus. 22Yesus doowae te kabhawo nekonando Golgota; maꞌanano kaꞌuada. 23Dohato ne itu dowaꞌanemo angguru dosaloane kaago nekonando mur, tamaka Yesus nongahe naohoꞌu.

24Pada anaꞌa dokantaiꞌemo te sau salipu. Pakeano dopodawu-dawue; mbali notipandeꞌaoane dawuno see-seemie, dopodaduane. 25Tempo katisalipuꞌano naꞌa hambi siua mata hangkowine. 26Tingkuno katisalipuꞌano dobuhie maka dofopikae te salipuno. Kabuhino peda ini, “ Omputo miendo Yahudi”. 27Nandoo dua dohodua mie modai nekantaindo te sau salipu, seemie ne kemano, seemie ne suanano. 28[Maka nokoꞌulamo tibuhino weo Kitabino anabii putae “Anoa natilentu mie modai.”] #Yes 53:12

29Mie lumalono ne itu doꞌumbue bhe dofoule-ule fotundo ambado, “Alee, hintumo ini gahaꞌa so humunggano Lambuno Lahataꞌala maka ne katolu oleono moeheemo toha! 30Soba fosalamati wutomu, sampuꞌo toha maiꞌao te salipu itu!”

31Pedamo dua aitu neangkaꞌindo imamu bhe pande-pande Kitabi doele-elee bhe dopugau sapada-pada andoa ambado, “Mie sigaoꞌano nofosalamatida, gahaꞌa itu wutono miina namooliea! 32Naetaa Mesias, Omputo Israel Fosalamatino maitu, nasumampumo namaiꞌao te sau salipu, dowohaꞌao bhe doparasaeaꞌao.” Mahingga mie hoduano tisalipuno ne sohihino dowambakie dua.

Kamateꞌano Yesus

15:33-41

Mat 27:45-56; Luk 23:44-49; Yoh 19:28-30

33Noꞌindotu oleo kosekadieꞌae naꞌa nohohondomo ampa hambi tolu mata. 34Hambi tolu mata, Yesus noloꞌoimo nofekandii-ndii ambano, “ Eloi, Eloi, lama sabaktani?” Maꞌanano, “Lahataꞌalaku, Lahataꞌalaku, noafa hunsa kanauꞌao?” #Mzm 22:1 35Dofetingke peda naꞌa, seemie hodua mie meehe-eheno ne itu dopugaumo ambado, “Fetingke kaitaomu, noloꞌoi anabii Elia!” 36Seemie lasao nelondo kapa #15:36 Sakotuꞌuno: spons , kambeano pasi motatano. weo angguru mokolo. Kapa maitu noteiꞌe ne wulu maka nofefohoꞌutiane Yesus, poowa nopugau ambano, “Hunsaꞌaonomo! Soba daꞌumondo-ondoe bhahaꞌi kaowua namai Elia namosampue.” 37Pada aitu Yesus nokeiꞌaomo pandano nafasi maka nobhotu.

38Wakutuu anaꞌamo dua kai bhalano mbali kahondomi weo Lambuno Lahataꞌala nopobhensi nomaiꞌao te wawo ampa we panda. #Kel 26:31-33 39Neangkando tantara meehe-eheno te wiseno nowoha kaowu mateno Yesus peda maitu, nopugaumo ambano, “Kotu-kotuꞌu mie aini Anano Lahataꞌala!”

40Nandoo dua hobhineꞌi umondono we kodoꞌono. Ne olotando hobhineꞌi maitu, nandoo Maria Magdalena, Salome bhe Maria inando Yakobus mohangkuꞌano dadi bhe Yoses. 41Andoa ini notanda we Galilea doangkafimo Yesus mbali umondofaono kafaraluuno. Ne itu dobhahi dua hobhine sigaoꞌano humatono we Yerusalem dopoowa-owa bhe Yesus.

Yesus dokobuhue

15:42-47

Mat 27:57-61; Luk 23:50-56; Yoh 19:38-42

42Oleo nohondomo. Oleo aitu kaefotokaꞌa oleono Sabat, mbaꞌinomo namentae matanomo. 43Seemie koneaꞌano Yusuf tanofekatangkamo lalono nokala nesalo maeatino Yesus ne Pilatus. Yusuf ini mieno Arimatea, seemie kamungkula tiangka, nopesua dua Sahano Agama. Anoa neantagi dua kahatoꞌano Kafopahintaꞌano Lahataꞌala. 44Pilatus nomente nofetingke Yesus nomatemo, lasao neloꞌoi neangkando tantara maka nofeenae bhahaꞌi nokotuꞌu Yesus nomatemo. 45Nofetingke kaowu bhihita kahatoꞌaono neangkando tantara maitu, Pilatus noꞌundaꞌaanemo maeatino Yesus namalae Yusuf. 46Pada aitu Yusuf neꞌolimo bhalatu moꞌalusu maka nofosampu maeatino Yesus maiꞌao te sau salipu. Pada anaꞌa nowaluanemo bhalatu saꞌituini maka nofopesuaꞌe weo kobuhu. Kobuhu anaꞌa dopatotae ne kabhawono kontu, ⸤ dohabue peda katuno lia⸥ . Mbali kasongkono wobhano lia naꞌa, nodoleane kontu bhalano. 47Katifondoleꞌano Yesus maitu, dowohae dua Maria Magdalena bhe Maria inano Yoses.

Currently Selected:

Markus 15: mnbSD

Highlight

Copy