Yohana 10
10
Yesu nə Majinə feme
1Yesu a pɨrə humwa a sa, “Diyalə na dɨ boyownə, ma kat aa kwaɗa dɨ kwatɨfe a pɨrə vor doomo mbage, nda liya dɨ pwa, mangɨn mahɨrə, nzə-ɓodəkha. 2Ma koɗi dɨ kwatɨfe, sɨnə majinə mbage. 3Ite ma dɨ nidə kwatɨfe a wunan a haa majinəngɨn a pɨrə dooməngɨn, nda dɨ wa mbagee hɨnggən nə ka kwakingrən, mbage a dɨ kɨl kormɨngɨn a leyə. Majinəngɨn a dɨ luwo mbage dan kwamətə a dɨmə kaarən. 4Ndi kana dɨmə kaarən a luu humwa, təna dɨ koɗə beesən gəkɨlə tən lee kormɨngɨn. 5Tənaa dɨ koɗə beetɨ ome, a ma tənaa leerən. Ka diyale tən ɓa gyebgə mangɨn gəkɨlə tənaa lee kormɨngɨn.” 6Yesu a ɗa mingɨn byelə səɗe, shezə tənaa lee la nda dɨ boyərən.
7Gə ləngɨn Yesu a mɨna sarən atɨ, “Diyalə na dɨ boyownə, hɨnə kwatɨfə doomo mbage. 8Myee kat pɨragi a kwamətə 'ye laya dɨ pwa, mingɨn kat mahəryi ka ji-ɓodəkha, shezə mbage aa kɨltɨrən. 9Hɨnə kwatɨfe, ma pɨra dɨ hake ɓa ɗɨm mbətə. Mangɨn ɓa pɨra, nda dɨmə, a ɗɨm haa zəmtə. 10Sa dɨ shi ka mahɨre ɓəmbə nə gə nda hɨrə, nda ɓɨl we, nda kɨɗa shee. Hɨnggi na shi gə təna ɗɨm myentə ka nzaa pepetə, taa ɗongə sə də.
11“Hɨnə Majinə feme. Majinə feme a dɨ vədə myensən gə le da mbage dan. 12Ma nzə-jinshi moonə, a ma aa hɨnggən nə mbage, wule mangɨn kana naa alehawe dɨ shi, ndi ɓa ɗaka mbage a giɓə, alehawe a kər mbage a gbararən təna təkəsə hyeɗə-hyeɗə. 13Mangɨn a giɓə a muɗə gəkɨlə ndi nzə-jinshi moonə, asə aa pɨrdən ka mbagengɨn.
14“Hɨnə Majinə feme, hɨn lee mbage de, mbage de mgban leeri, 15naya ɓətɨ Baatə a leeri, hɨn mgban sə na lee Baatə. Na mwa ɓa vədə myenshi gə le da mbage de. 16Hɨnə ka i mbage 'ye tam a vor dooma nə. Mbak-mbak hɨn ɓa shikarən a vor doome, tən mgban ɓa kɨl korma, doome ɓa gə hiɗə majine mgban hiɗə. 17Baagi a mwori gəkɨlə na mwa ɓa vədə myenshi gə na mɨna lutɨrə. 18Ama aa dɨ mbe a ɓɨlti, hɨnggi hɨnə mwa ɓa mbɨrə. Hɨnə ka gətə na vədə myenshi, hɨnə ka gətə mgban na mɨna də. Gɨrahanə nə Baagi a vi.”
19Ite Yesu a bwe lanə, Yawude a mɨna təkə kpe. 20Hananang dɨ vorsərən a sa, “Sɨne ka pɨle ji-dwatə a sɨsən, səngɨn ɗɨki nda dɨ byelə wak, gə mɨnə hwuna kangə a dɨ kɨltən?”
21Imi mgban a sa atɨ, “Wule byela, ma ka pɨle ji-dwatə a sɨsən aa dɨ byelə sə. Nzə-dwatə ɓa mba dii wele a wanarən?”
Ɗongə mwadiyale da Yawude
22Ite kwalə dɨmdə takɨmtə gə Shafe a vor Urshelima a sɨka, itɨngɨn hangɨrati, 23Yesu mgban nee dɨ woyi pərəsə a vor kwakra da Solomon a Kwa-Shafe. 24Də i Yawude a paya a takadən a san, “Goɗinə hye ɓa dɨmaadə daasə diyale a boyena? Anda hyenə Ma Həmɨnpwa a Yaɓwarən, boyenə bwang a hina leyə pee.”
25Yesu a luwa a sarən atɨ, “Di hɨn boyowna, hwunaa mwa. Lyentɨ pepete na ɗa a vor kwakɨ Baagi bɨldi bwang, 26shezə hwunaa mwake, gəkɨlə hwun tam a vor mbage de. 27Mbage de a dɨ kɨl korma, hɨn leetɨrən mgban, təna dɨ koɗə beeshi. 28Na vərən myente kaaru-kaaru, tənaa dɨ ga mbərə a yerə ɓaa, ama mgban aa dɨ mbarən a nggəlgərən gə puka. 29Ndi Baagi a vitɨrən pɨrgə nagi ndo ma, taa ndəng ma də ɓa mbarən a nggəlgərən gə pukəngɨn. 30Hɨn ka Baatə hinə kat hiɗə.”
31Yawude a mɨna por fare ɓa kalarən. 32Yesu a sarən, “Hɨn bɨləwnə zərgi shikoshopye kɨr-kɨr dɨ haka Baatə. Ndoɗinə hwuna dɨ mwo atɨ hwuna kalari gə ləngrən?”
33Yawude a san, “Aa gəkɨlə zərgi shikoshopye hye ɗa hina dɨ mwa hina kalara, ə'ə, gə hye ɓwaara kpamləmənti, kat ka angɨn hye dɨ kɨɗa kwakɨ Həmɨnpwa atɨ hyenə ndi.”
34Yesu a luwa a ɗiyərən, “Myaa doro vor Malɨmtɨ ɓashitɨ dəwnə atɨ Həmɨnpwa a sa atɨ, ‘Hwunə ɓətɨ kwa həmɨnpwayi’?#10.34 Naasə: Dyemshe 82.6. 35Anda Həmɨnpwa a watɨrən atɨ tən ‘həmɨnpwayi,’ a myee le da Həmɨnpwa a shi hakarən (Malɨmtɨ Ɗəmɗəmtə mgban aawa byelə ɓaa), 36ɓə she ma Baatə a nggɨltən a kəpdən atɨ sɨnə hɨnggən, nda lyanarən a vɨrata? Mɨnə ɗa hwuna sa atɨ na kɨɗa kwakɨ Həmɨnpwa gə na boyo atɨ, ‘Hɨnə Nze da Həmɨnpwa’? 37Anda taa ɗa lyente Baagi a dɨ ɗa, ɓe hwunaa mwake. 38Anda hɨne dɨ ɗa lyente Baagi a dɨ ɗa, nagi hwunaa mwake, zə mwam ke gə zərgi shikoshopye hwuna naarən gəkɨlə hwun leyə atɨ Baatə nee a sɨshi, hɨn mgban hɨne a sɨtɨ Baatə.” 39Təna mɨna ɓərə ɓa gbamrən a kɨsə, nda dɨmgə vorsərən a muɗə.
40Yesu a mɨnə a wudə a nggɨrə ɓayatɨ gbɨnuwo Urdun a haa Yohana a nza də a dɨ ɗa batisɨmatə kɨnɨnɨng. Nda nza hangɨn, 41ɓwaare hananang a shi hakan. Təna sa atɨ, “Nagi ka sate atɨ Yohana aa ɗa i zərgi shikoshopi, kat ka angɨn ləməgyee nda boyə nə manə diyalə.” 42Ɓwaare furi-furi a hangɨn a mwadiyale ka Yesu.
Currently Selected:
Yohana 10: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
