Maruk 13
13
Yéesu nalob mara sílaam sara gunak gúsola
(Máca 24.1-35 ; Lúk 21.5-33)
1Nan Yéesu ápurulo mee nꞌyaŋ yaayu yara Atúuha, acee nꞌulagenaool narogool : « Aliiga, apa uñeer sílankiin sajak mee mee ! Guŋar so nguteep jak pak ! » 2Yéesu narogool : « Uñoñow bateeper baabu bareh mee mee, funak fucee mat ŋaño to haani ekenkereŋ yanur yájutenoore nꞌepaal yo. So peepe bu gárunkuli nsibehi. »
3Púr to, najow alako nꞌemontaañ yara uoliiw waawu jooŋoor yaŋ yaayu yara Atúuha. Piyeer, Saak, Saŋ nꞌAndere ngujow gutoogool bo, ngusonkenool gurogool : 4« Paañeer ugaanóli, néy dáaru bile ebaj, ban waa ubilóli ekaan númir mara waaf waawu peepe bu gakaano ? »
5Ñeer Yéesu narogiil : « Jíkaanum ! Jambil an abantenuul. 6Gameeŋe bu gakaanooro gajaom gútiiŋul nguroguul : “Injé emmee Apagena aahu.” Ban bu gabanten bugan gameeŋe. 7Nan jibil mee ejam gawel gara gutiik son gurim galobe mara go, jambil jitelen, mara waaf wabile ekaan. Bare let yo yommee gafaagoúm dúniya. 8Esúk bu gayiho netiigen epaal yo ésuk, jáyiih bu gayiho njitiigen jipaal jo jáyiih. Etaam bu gagoroor mꞌmof mameeŋe, bacaar may be élohul. Dáaru peepe mutaf mútiyaara déhooro, manogoonogoor naŋ mara akoña han farool fujooke gagoroor.
9Buguul fannauul, jíkaanum ! Bugo be eŋaruul mꞌbulago, nguteguul gúpalla nꞌgúrehoorum gara gawaare furim Atúuha. Gajaom be ecil nguyihenuul fácil unafaan sísuk bugo nꞌgúyiih, dó peepe mimbil bugo gujam báseedoeruul. 10Furim fásuum mee fubile gamundum fuwaarei nꞌsísuk saasu peepe sara dúniya. 11Nan guñum mee ejoguul nguŋaruul bu batalen, jambil jísebi mara wan jibil mee elob. Mbil jilob wabil mee éjool nꞌúyegehuul to bújooŋoor, mara mat kaan buguul jilobe, bare Búyeget Baset mee.
12An be ejok atiool asen bugan gumuk ; guleeh, sipaayiil be ejogiil gusen bugan gumuk. Guleeh gaagu may bu gayihoúl bu nꞌubajaiil ngukaan min gumugiil. 13Gajaom be ecil min bugan gaagu peepe gulahuul. Bare an abil mee gamuuyen najok to liŋ jaram faago, Atúuha bu gapagenool.
14Nan jiñum mee eñow waaf wasige tañaao mee#13.14 Jiñow Dañeel 9.27 ; 11.31 ; 12.11. ban ubileenut to gáani, (anooan abil mee gakaraŋ dáaru mbil ajam set) no ñeer gabil mee gáani mꞌmof mara Yúde mbil gutey bu nꞌsimontaañ saasu. 15Anooan abil mee gáani fatiya yaŋool, jambil awaloúl nanogen be eŋar dó waaf. 16Ban may an abil mee gáani nꞌurager waawu, jambil abaañ bu síndo'ool be eŋar gájuwo'ool. 17Mátaañie bu gáani nꞌukoña gammee mꞌbúteb bugo mꞌbugaagu gammee ngamooben dó nꞌgunak gaagu ! 18Jíciin Atúuha jambil dáaru baj nan ñook ñibil mee ebaj sembe. 19Gunak gaagu bu gáani gunak gara sílaam sáamak, samusut sibaj kábiriŋ nꞌfúcihum faafu nan Atúuha átuut mee dúniya káŋ bu jaat, ban may sañumut ebaj benen. 20Eéni Atúuha áŋesuleenut gunak gaagu ugu, an mat apak. Bare náŋesul go mara bugan gaagu bugoola gan acaap mee.
21No ñeer, éeni an aroguul “Apagena aahu umee”, acee naroguul “umaa”, jambil jíyinenool. 22Upagena bugo nꞌenabiyoŋ galet bugara maregen be épurul ngukaan waaf wabile gajaahali bugan be eliik gabanten bugan gan Atúuha acaap mee. 23Ñeer jíkaanum ! Nílobaaliuulobaali waaf waawu peepe ikat to. »
Ebáañul yara Aleeh An
24« Bare nan sílaam saasu sibil mee gafaago, nꞌgunak garoob to mee
bunak bu gamoocen bíb,
fujenna may be emooc.
25Siwuut be élohul fatiya nꞌémit
ban sembe sammee fatiya peepe bu gagoroor.
26No ñeer ngubil mee eñow Aleeh An awaloúl nꞌgátuul nꞌsembe sáamak son mújalako ró. 27Ñeer ho be éboñul simalayikaool nahomen buganool gan acaap mee nꞌupana waawu peepe wara dúniya.
28Jikaan úyegehuul nꞌwan nja bubak buliigolaal mee : nan nja bureeb mee, njímir mara ujooŋooraajooŋoor nꞌgátiiŋa. 29Mo may, nan jibil mee eñow waaf waawu peepe, njímir mara Aleeh An acigulo, maareer nátiiŋul nꞌgápeegum gaagu. 30Iroguulee, maregen gambac ge mat gufaago necet dáaru peepe bátiiŋuloot. 31Emít nꞌetaam bu ganiiho, bare gurimom mat gumus guniiho. »
Funak fan an ámirut mee
(Máca 24.36-44)
32« Bajut an ámire ewaato son funak faafu fan aleeh an abil mee ébaañul. Let simalayika san dó mee nꞌémit, let may Aleeh aahu. Paayolaal noonool ámire. 33Jíkaanum ! Jambil jiŋot mara jímirut nan mbile ekaan. 34Bu ganogoor naŋ amaañen an nejow gajaoor, nakat yaŋool újagagaool, naseniil anooan gújagagool, narok apooya aahu ñeer apooy. 35Jambil jiwaayen, mara jímirut nan ara yaŋ abile ébaañul. Teer ho be étiiŋul gárusa, teer nꞌetut fuk, teer nꞌurab, teer mꞌbújom. 36Jambil átiiŋul nagoncuul ngaŋot ! 37Wan emmee nelobuul, buguul peepe nen nelob wo : Jambil jiwaayen ! »
Currently Selected:
Maruk 13: gsl
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
