Markus 13
13
Yesus nafbotin feti Ratu Ni Das Silai keta namsos
13:1-2
(Mat. 24:1-2; Luk. 21:5-6)
1Noak a ne Yesus nor Ni manglartar rti a rtate Ratu Ni Das Silai dalam ma rti burit. Ne Ni manglarat sa nfalak ber I, “Tuangguru, no mswalan Ratu Ni Das Silai ma gedungar ma rangafel resi ye, fali rafdiri ror baty ngatesyar!” 2Ne Yesus nfalak ber i, “Au, botuan. Das silayar ma mswalan a ne nangafel resi. Nempa keta nait ni tewat e safe-safe monuk ma rangafel ma mswalan ye, ramsos monuk; ma to bati fen lese nbal ma namtoran ain!”
Lere ma keta tomwatar rkoman suse
13:3-13
(Mat. 24:3-14; Luk. 21:7-19)
3Nof a ne Yesus nor Ni manglartar rti lenran Zaitun. Na iano I namtoran ma nfon Ratu Ni Das Silai. Ne Petrus, Yakobus, Yohanes ma Andreas rma renrat I, 4“Tuangguru no mfwalak ber kam feti bengfir a betno kit tsalan safe ma mfwalak a ne? Ma farlan saryamprene ketla namsos e ni faniak farpe?”
5Ne Yesus nfalak, “Ka mijake kmi fen ngamone, nema tomwatar kete rma ma rfule kmi! 6Fali keta tomwatar yadin ral ngarangw ma rfalak, ‘Yakw ye Ray Silai’ la rfule tomwatar yadin. 7Farlan mdyengar ibar feti tomwatar ramdiri yayat na nusar sa, nre mdyengar prang na mpenempen e ka kete mimtaut. Botuan feti keta safe-safe monuk a ne rbotin, nempa iane to ni tewat ma saryamprene namsos a fuky. 8Ma keta nusar raale sir ma rayar raale sir a nbal. Ma keta ruku silai ma lafar silai na mpenempen. Nempa susar monuk ma mkyoman a ne betno tubun motak nof suse silai ma keta diat saryamprene noak ma to namsos a fuky. Iane farlan suse ma batar sa ma betno nkoman maninik noak ma nose ma namtoranbab.”
9Ma ka mijake kmi fen ngamone! Fali tomwatar keta romat a kmi ma ror a kmi ber mangtetak agamar ma rsidang a kmi. Ma keta rbabal a kmi a na das sampangar, ma ror a kmi ber mangfaretar ma rayar fali mlyarat Yakw. Nempa iane let ber a kmi ma mifwibar na Yakw ber tomwatar a ne.
10Fali Ratu Ni Ibar Ngamone ka nsor monuk ber tomwatar na mpenempen a fuky betno saryamprene ye namsos. 11Ma farlan romat a kmi ma ror kmi far mangtetak e, ka kete dalmir suse feti keta mfyalak safe. Fali noak ma renrat a kmi e, keta na lere ne nbal Ratu Smwangtany nafbotin safe ma ka mfyalak. Ma ngribatnir a ne to nof a kmi nempa nof Ratu Smwangtany. 12Ma keta tomwatar sa nfenri wainy ber tomwat walyetar ma rfen i. Ma amnir keta rose angkir farane nbal. Ma keta kangkir rbangal enir amnir ma ranrenre sir ber tomwatar ma rfen sir. 13Ma keta tomwatar monuk rkedan a kmi fali mlyarat Yakw. Nempa tomwatar ma ramkoran ma ralele Yakw terik ma saryamprene namsos, keta Ratu nfair sir.
Yesus nfalak na lerar ma keta tomwatar rkoman suse silai
13:14-23
(Mat. 24:15-28; Luk. 21:20-24)
14Luryain e nabi Daniel nafbotin lo feti tomwat mangafyatak sa ma nayatak desar keta nma. Tomwate ne keta namdir Ratu Ni Das Silai, iane ain ma to bise ma namin. Ma nafngeryai ain a ne nor kabain yatkar ma i nose. (Ise ma nbaca safe ma nafbotin a ne ka nkaul nal ngrie ne fen ngamone.) Na noak a ne tomwatar ma ramin propinsi Yudea ka rafla rbie ain a ne ma rti buburir.#Dan. 9:27; 11:31; 12:11 15Tomwatar ma ramin bubungan das#13:15 Tomwat Yahudyar nir bubungan a ne rata. Ma rose fnite ma rafdiri na das seriny lo ma rfangat far das. Ma biase lerdayar e rti das ma ramtoran, ma bise nbal ma rafwari safe safe na iane. ka kete rtompur ma rti das dalmir ma ral safe safe. Nempa ka rasnyalik ma rtompur ma rafla rbie ain a ne. 16Ma tomwatar ma ramin letar, ka kete rbali sir ma ral nir rabtyar a nbal. 17Na lere ne yore desar ber batar ma rlenr ma rasusw a ne fali keta rkoman suse desar. 18Ka msyampayang ber Ratu nema kabanir monuk a ne kete diat a kmi noak ma udan a mnaur. 19Yakw kfwalak farane fali na are ne keta tomwatar rkoman suse maberat resi. Ntabw nof ma Ratu nose saryamprene terik lere ye to lain sa ma tomwatar rkoman suse ma farane fuky. Ma keta to rkoman a rbali suse ma farane lo. 20Ratu ntetak ma naftukar lerar ma rkoman suse ne. Fali farlan Ratu to naftukar lerar a ne botuan feti keta tomwatar monuk a rmat. Mpa I naftukar lerar a ne fali nlompang Ni tomwatar ma nfil a nkese sir a ne.
21Ma na lerar a ne farlan tomwatar rfalak ber a kmi, “Msyalan, Ray Silai namin ye! Nre rfalak feti msyalan, ‘I namin iano! Ka kete milele sir.’” 22Fali na lerar a ne keta tomwatar yadin rose felnir farlan rai silai ma nabyar. Ma keta sir rma ma rose fanikar ma kabain mpasalnar la rfule tomwatar. Ma nlengan e sir rareke ma rfule nbal tomwatar ma Ratu nfil sir a ne. 23Mpa, ka mijake kmi fen ngamone, fali Yakw kfwalak kabanir monuk ye ber a kmi lo.
Yesus nfalak na Ni mamae
13:24-27
(Mat. 24:29-36; Luk. 21:25-33)
24Ne Yesus nfalak a nbal, “Lama susar monuk ne omp, keta lere to nbet ma bulan to idak. 25Ma keta ftunar rfufw rof langit, ma kabanir monuk na langit a ne ramyefar. 26Noak a ne tomwatar keta rsalan Yakw, Tomwate Anaky kmwa kof mutan dalam. Ma Yakw kmwa e kor Ningw kuase ma nlie nlengan ma snyaingw ma idak resi. 27Ne I keta nluan Ni malaektar ma rafburat Ni tomwatar ma nfil sir a ne, rof monuk saryamprene ni kateman. Iane feti nof timur terik barat ma nof trangan terik marmar.
Tnyanuk pupule na katutun ara
13:28-31
28Ka tnyanuk pupule na katutun ara ye neluk contoh ber a kmi. Farlan kmi msyalan katutun ara ne sangnir a ratrisan lo, iane kmi mifai feti ler metyefu sesedin lo. 29Feleles farlan ma msyalan fanikar a ne nbal, iane mifai feti ni tewat ma Yakw Tomwate Anaky sesedin ma kmwa saryamprene. 30Mdyengar fen ngamone safe ma kfwalak ye: Ni botuan e tomwatar na are ye keta to rmat monuk a fuky terik ma rsalan kabanir monuk ma kfwalak a ne. 31Keta langit numur saryamprene rlie, nempa Ningw ngribatnir rmon titerik ma dedesar.”
Ka tajak dedesar la tdaf Yesus Ni mamae
13:32-37
(Mat. 24:36-44)
32Yesus nfalak a nbal, “Boloka farane to tomwate fen lese ma nafai feti bengfir e Yakw, Tomwate Anaky kmwa saryamprene. Malaektar ma ramin surga e to rafai, Ratu Anaky to nafai nbal, lan Amany ma nafai.
33Mpa ka mijake kmi ma mdyaf dedesar Ningw mamae! Fali kmi to mifai ni tewat ma kmwa. 34Iane feleles farlan tomwatar sa nti a ntate ni das ma naflolwain far nus dodo. Ne i nal ni das ber mangkaryayar ma rajake, ma nsaman karyayar mpane ber sir. Ma nluan ni mangajak fofolat ma ka najake fofolat a ne dedesar terik ma nbali i. 35Mpa ka mijak dedesar, fali kmi to mifai feti keta das nruany a ne nma e lere da, nronram nre nronram fetwalan, nre bobolisin makrokap. 36Ka mijake kmi nema nre kete metryat ma i nma e nsalan feti lolone mirwa. 37Safe ma kfwalak ye to ber lan kmi, nempa kfwalak a nbal ber tomwatar monuk ma ka rajake sir!”
Currently Selected:
Markus 13: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
