Markus 14
14
Tomwat Yahudyar nir mangsomp ulnir rfat ma lese ma rfen Yesus
14:1-2
(Mat. 26:1-5; Luk. 22:1-2; Yoh. 11:45-53)
1Bait lerar du a nbal ni tewat ma tomwat Yahudyar nir ler silai Paskah ma ler silai roti ma to ragi. Mangsomp ulnir ma mangaftutu Musa ni faretar rareke ma romat Yesus nema bise ma rfen ramudim I.
2Ne sir rfalak, “Ka kete tomat I a na ler silai, nema tomwat ngayadin kete rares ma rose mimiri.”
Batar sa nbui ngule angat ngafele na Yesus uluny
14:3-9
(Mat. 26:6-13; Yoh. 12:1-8)
3Noak ma Yesus namin pnu Betania, I nti Simon ni das ma ntame. Simon ye ma luryain e maninik mpaul diat i. Noak ma rtame e batar sa nma ma nakmat Yesus. I nma e nonry ngul narwastu ma kotkyan desar na botal marmer angkir sa. Ne nfefar botal epat betno nbui mpane ngule ne na Yesus uluny.
4Nempa tomwatar ketnir ma ramin iane rares ma rafalak ber sir, “Safema bate ne nabyate motak ngule angat ngafele ne? 5Ngule ne kotkyan desar a ma, farlan tfenri e, kotkyan a nlengan dinar raty tel. Mpa ni ngafele e nfenri motak ngule ne, nema bise ma nsaman dotyar a ne ber tomwatar ma rawatan.” Ne rtampu bate ne. 6Nempa Yesus nfalak ber sir, “Msyalan lonri motak i! Ma kete nroke nraki kmi fali safe ma nose ber Yakw ne nangafel desar.” 7Tomwatar ma rawatan a ne dedesar ma ror a kmi mpa bise ma mtyulung sir na ler mpeye motak. Nempa Yakw e keta to kor a kmi dedesar. 8Bate ne nose ngamone ber Yakw nlarat safe ma boany nal ma nose. I nbui ngule angat ngafele na tenangw la ndaf lere ma ror Yakw far Ningw kubur. 9Mdyengar fen ngamone safe ma kfwalak ye, “Ni botuan e noak ma tomwatar rafwibar Ibar Ngamone na mpenempen na saryamprene ye, keta rasaur a nbal safe ma bate ye nose la ranremi i dedesar.”
Yudas Iskariot nfenri Yesus
14:10-11
(Mat. 26:14-16; Luk. 22:3-6)
10Yudas Iskariot ye tomwatar sa nof Yesus Ni manglarat buti resin du a ne. I nti nakmat mangsomp ulnir ma nose ma nfenri Yesus ber sir. 11Lama rdengar ma Yudas nfalak farane sir rsenang resi ma ryoding feti keta ral doit ber i. Mpe Yudas nanriak let ngamonar sa ma nanrenre Yesus ber sir.
Yesus nor Ni manglartar rane tnyam Paskah
14:12-21
(Mat. 26:17-19; Luk. 22:7-13)
12Nait ni tewat lo ma ler silai roti ma to ragi#14:12 Tomwat Yahudyar biase rose nir Ler silai roti ma to ragi a ne terik lerar itw.. Ma biase na ni ler pertama e tomwatar ka rfen domba ma rane na ler silai Paskah. Na lere ne Yesus Ni manglartar renrat I, “Tuangguru, mpweang ma kam mti masusan ninr tnyam Paskah na mpe?”
13Ne I nfalak ber Ni manglartar du, “Midu a mtyi kote Yerusalem. Na iano keta mtyungan merwanar sa ma nabare weye na ngusi, ma ka mlyarat i. 14Noak ma nsung far dasar sa ka mlyarat i far das a ne nbal. Ma mfyalak ber das nruany a ne, ‘Tuangguru nenrat feti ain ma keta nor Ni manglartar rane tnyam Paskah ne na mpe?’ 15Mpe keta das nruany a ne nfatutu ain silayar sa na loteng ber a kmi. Na ain a ne kabanir monuk ramin lo, mpa misusan tnyam Paskah na iano.”
16Ne manglartar du a ne rti kote ne. Na iano sir rtungan safe-safe monuk far ma Yesus nfalak ber sir. Mpe rasusan nir tnyam Paskah na iano.
17Ni nronram e, Yesus nor Ni manglartar buti resin du rti das a ne. 18Noak ma rtame e Yesus nfalak, “Mdyengar safe ma kfwalak ye, ni botuan e tomwatar sa nof a kmi ye keta nfenri Yakw. Tomwate ne ma lere ye ntame nor Yakw!”
19Lama rdengar farane sir dalmir suse ma leles mpane rfalak ber Yesus, “Tuangguru, yakw tate nre?”
20Ne Yesus nfalak ber sir, “Tomwate ma keta nfenri Yakw ne nof buti resin du kmi ye. Ma i ye ma madu a msob roti na mangkok ye.” 21Botuan feti Yakw, Tomwate Anaky, keta kmwat farlan safe ma rarengi na Kitap Lelerap dalam. Nempa suse maberat desar ber tomwate ma nfenri Yakw Tomwate Anaky! Ni ngafele e kete ramtoranbabe desar i a na saryamprene ye.
Yesus nal roti ma anggur ber Ni manglartar
14:22-26
22Noak ma Yesus nor Ni manglartar rane tnyam Paskah, I nal roti ma nose alang ber Ratu, betno napuse ma nsaman ber sir. Ma nfalak, “Roti ma kal ber a kmi ye, iane Yakw tenangw, myal ma mine!”
23Mpene I nal kompi ma anggur ma namin a ne ma nose alang ber Ratu, ma nal ber sir ma renum mpane nof kompi ne. 24Ne I nfalak ber sir, “Anggur ye iane Yakw darangw ma ntarbui ber a kmi noak ma kmwat. Yakw darangw a ne ma nafkoran Ratu Ni yoyoding nor tomwatar. 25Yakw kfwalak ber a kmi, ni botuan e keta to kwenum anggur ye lo terik lere ma kwenum anggur beberi kor a kmi a na Ratu Ni farete dalam. Na lere ne betno kwenum anggur beberi na Ni farete dalam.”
26Ne sir rbeu la rdangin Ratu, betno rti lenran Zaitun.
Yesus nafbotin feti keta Petrus namsoal I
14:26-31
(Mat. 26:31-35; Luk. 22:31-34; Yoh. 13:36-38)
27Ne Yesus nfalak ber sir, “Kmi monuk keta to milele Yakw ma mifla mtyate Yakw. Fali rarengi na Kitap Lelerap dalam farye: ‘Keta Yakw kfwen mangajak domba, ma Ni dombayar ne rafla buiyefar sir.’ 28Nempa noak ma Ratu nafmorip a nbali Yakw, keta kbwalun kof a kmi far propinsi Galilea.”
29Ne Petrus nfalak ber Yesus, “Boloka sir monuk to ralele Ko ma rafla rtate Ko, nempa yakw e to kswue yakw.”
30Ne Yesus a nfalak, “Petrus, mdwengar fen ngamone! Ni botuan e nronram ye sife to nkikyeu lain du a fuky e, ko mumsoal Yakw lain tel e lo.”
31Nempa Petrus ntafal ma nfalak, “Tuangguru, boloka kmwat kor Ko, keta to kumsoal Ko.” Ne Ni manglarat walyetar a ne leles mpane rfalak farane nbal.
Yesus nsampayang na Getsemani
14:32-42
(Mat. 26:36-46; Luk. 22:39-46)
32Yesus nor Ni manglartar rait ain sa ma ngarany Getsemani. Ne I nfalak ber Ni manglartar, “Mimtoran ma mnyengar Yakw na ye ma ktwi kswampayang.”
33Ne I nti e nor Petrus, Yohanes ma Yakobus. Noak a ne Yesus namtaut ma dalamy suse desar. 34Mpe nfalak ber sir, “Yakw dalangw suse desar, ma krwase feti ketla kmwat. Mpa mimin ye ma ka mbyatar myor Yakw.”
35Yesus nkatar I nof sir betno nsatngur ma nbon ompak ma nsampayang. I nsampayang ma ntak Ratu, nema farlan Ratu nmpeang e ka kete suse ne diat I. 36Ne I nfalak, “Amo o Amo, Ko bise ma mose safe-safe motak mpa farlan Ko mpweang e mwalin suse ye mof Yakw nre la? Ma ka kete mose mlwarat Ningw mpempeang, nempa mose mlwarat Ko Nim mpempeang.”
37Lama Yesus nsampayang monuk e, nbali I far Ni manglartar tel a ne. Nempa nsalan e rarwa lo. Ne nfalak ber Simon, “Simon safema murwa? To bise ma mbwatar fen jamar sa e?” 38Ne Yesus nfalak a nbal, “Ka mijak dedesar ma msyampayang, nema nait ma smwangat yatkar nir ulun nteman a kmi e kete mfyufw far sale dalam. Botuan feti dalmir rmpeang ma myose mlyarat Ningw mpempeang, nempa koko kmi e to bomir myal ma myose.”
39Ne I nti nsampayang a nbal ma ntak Ratu farlan luryain ma ntak a ne. 40Noak ma nbali I ma nsalan sir e, lolone rarwa nbal fali to bonir ral matnir tutumpe ne. Mpe npangun sir, ma to rafai feti rfalak safe ber I.
41Mpene Yesus nti nsampayang a nbal fen lain tel. Noak ma nbali I e nfalak ber sir, “Lolone mirwa mbyal e! Ali to dengan a fuky e! Msyalan, ni tewat lo ma ranrenre Yakw, Tomwate Anaky ber tomwat salar. 42Mpyote kmi ma ti. Tomwate ma nfenri Yakw ne nma lo!”
Tomwatar romat Yesus
14:43-52
(Mat. 26:47-56; Luk. 22:47-53; Yoh. 18:1-11)
43Noak ma Yesus lolone natanuk e, Yudas nma nor tomwatar yadin. Yudas ye Yesus Ni tomwatar sa nof Ni manglarat buti resin du a ne. Tomwatar yadin a ne rma e ronr smadar ma ebnar. Ma mangsomp ulnir, mangaftutu Musa ni faretar ma mangfaret Yahudyar rsiduk sir ma romat Yesus. 44Yudas ma nfenri Yesus a ne nafbotin faniak ber tomwatar a ne farye, “Tomwate ma keta kbwon I e, I a ne lo ka myomat I. Ma myor I, ma mijake I fen ngamone.”
45Lama rait ain a ne, Yudas nal far lury ma nlosir Yesus ma nfalak, “Tuangguru,” betno nkoke ma nbon I. 46Mpe tomwatar ma ror Yudas a ne romat Yesus. 47Nempa Yesus Ni manglartar sa ma namdir iane nles smade la nsabit tomwatar sa tlingany ma namosit. Tomwate ne Mangsomp Silai Ni mangkaryae. 48Ne Yesus a nfalak ber tomwatar ne, “Kmi mifliak feti tomwat yatak Yakw e, mpa mya ma myomat Yakw e myonr smadar ma ebnar e. 49Lerar monuk ma kor a kmi, ma kuftutu kmi a na Ratu Ni Das Silai e to myomat Yakw. Nempa lere ye kmi myomat Yakw la mifdiat safe ma rarengi na Kitap Lelerap dalam. 50Ne Yesus Ni manglartar monuk a ne rafla rtate I.” 51Na lere ne tabweryar sa nlarat Yesus a nbal. I nal maloly ngafele la nbebe tenany. Noak a ne tomwatar rose ma romat i, 52mpa ntuni kalin ni maloli ne ma nafla e namlus motak.
Mangtetak agamar rsidang Yesus
14:53-65
(Mat. 26:57-68; Luk. 22:54-55; 22:63-71; Yoh. 18:12-14; 18:19-24)
53Ne tomwatar ror Yesus ber Mangsomp Silai. Na iano Mangsomp ulnir, tuanggurw agamar ma mangfaret Yahudyar rafburat sir lo. 54Ma Petrus nlarat Yesus nof dodo motak terik ma nait Mangsomp Silai ni das ni latyompur. Na iano i nor suldadwar ramtoran rlosir au ma raflaran. 55Ne Mangsomp ulnir ma mangtetak agamar rareke ma ranriak mangtungnar ma rfasale Yesus, nema bise ma ral tetetak mamate ber I. Nempa to rtungan fen lese nbal. 56Noak a ne tomwatar yadin reluk mangtungan lepuskwar nempa safe ma leles mpane rfalak a ne to feleles. 57Ne mangtungnar ketnir ramdir ma rfalak nir lepuskwar la rfasale Yesus. 58Ma rfalak, “Kam mdengar ma tomwate ye nfalak feti keta I nsose Ratu Ni Das Silai ma tomwatar rose. Ma ni lerar tel e keta nafdiri nbali Ratu Ni Das Silai beberi, nempa tomwatar to rose.” 59Boloka rfalak farane nempa safe ma leles mpane rfalak a ne to feleles a nbal. 60Mpe Mangsomp Silai namdir tomwat ngayadin sonirlury ma nfalak ber Yesus, “Ko mdwengar ma mangtungnar a ne rfalak ma rfasale Ko nre! Ma safema Ko to mbwali sir?” 61Nempa Yesus namlin motak ma to nfalak sasaf. Ne Mangsomp Silai nfalak a nbal, “Ko ye Ray Silai ma Ratu nyoding I a ne e? Ma Ratu ma tomwatar rdangin I a ne Anaky ber Ko e?” 62Ne Yesus nfalak, “Au, Yakw ye lo. Ma keta msyalan Yakw, Tomwate Anaky ma kumtoran Ratu ma Ni kuase ma nlie nlengan a ne seriny fian. Ma keta msyalan ma ktwompur kof surga na mutan dalam.” 63Mpe Mangsomp Silai ne nares desar ma nbis ni rabit fali ndaun feti I nafbwere Ratu lo. Ne nfalak, “Kit tdengar monuk safe ma koko I a nfalak lo, mpa to tperlu mangtungan lo! 64Kmi mdyengar monuk lo nre feti I nafbwere Ratu. Mpa tose farpe I?” Mpe sir monuk rfat ma lese ma ral tetetak mamate ber I. 65Ne tomwatar ketnir rdikat I, ma ral maloli la rteri matnir betno rtut I. Ne rkosy a rmalip I ma rfalak, “Hei nabi Ko no mbwet feti ise ma ntut Ko ye?” Ne suldadwar ma rajake I a ne rbabal I a nbal.
Petrus namsoal Yesus
14:66-72
(Mat. 26:69-75; Luk. 22:56-62; Yoh. 18:15-18; 18:25-27)
66Na noak a ne Petrus lolone namin Mangsomp Silai ni das ni latyompur. Ne Mangsomp Silai ni mangkarya batar sa nma iane. 67Ne i nsalan e Petrus naflaran au mpa nsalan naflyair i a betno nfalak, “Ko ye ma biase mor Yesus ma nof Nasaret a ne nbal nre?” 68Nempa Petrus nulak ma nfalak, “Yakw to kufai tomwate ne ma to kufai feti mfwalak safe ye!” Ne Petrus nmpan far das a ne ni finru matan. (Noak a ne sife nkikyeu.) 69Noak ma bat kawar a ne nsalan Petrus a nbal e, i nfalak ber tomwatar ma ramin iane, “Tomwate ye Yesus Ni manglartar sa nbal nre!” 70Nempa Petrus nulak a nbal ma nfalak feti to nafai Yesus! Mpene tomwatar ma ramin iane rfalak ber i, “Au, botuan feti ko ye mweluk Yesus Ni manglartar sa nbal nre? Fali ko mof Galilea nbal!” 71Nempa Petrus nangoak a nbali i ma nsompe ma nfalak, “Ratu das ye, yakw to kufai desar tomwate ma mfyalak I a ne!” 72Lama nfalak farane sife nkikyeu fen lain du. Mpe Petrus nanremi safe ma Yesus nfalak ber i feti, keta sife to nkikyeu fen lain du a fuky e ko mumsoal Yakw lain tel lo. Mpa Petrus ntasing ma nasmetur.
Currently Selected:
Markus 14: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
