Jon 12
12
1An nian katilum makarena ramarik to Napitean Iesu neterua Bethani, iken Lasaras remarik iken, ierem Iesu ramosit mun le neki nerem kamaremis.
2An netakarol nauganan kam in iken, an Martha ramol atkokun nar, mero Lasaras ker le ilar nerem kamaiwata to nauganan ilar min.
3An Meri neteros nihinar nepukaman tahan rauker in paund karena spaiknard nemrin ribor, neterametepi neliki Iesu lan, an neteramrai nelikin le nowanun; an nimawa neteret le nemieua nihinar.
4Mero Judas Iskariot karena le tan ieremim min, ierem terepaurai in, netereni,
5Retol nihinar uk kamesaurean le 300 peni an kofen kam navantat?
6An remesenian nar uk moma nekin rakahmo nevantat, mero in iakihla mamlul karam mamieleg nar kavaipen lan.
7An Iesu netereni, Arpas in, moma teramehlau in to nian tukrenam io lan.
8Mero in ka navantat kamairik to kamiar mian min, mero io tiesarikan to kamiar nian min.
9An nahuto ribor le Ju min netakarhinatin mama in iken, an netakarua, mero resolan moma to Iesu am mero moma takaihm mun Lasaras ierem ramosit mun le neki nerem kamaremis.
10Mero neremera le nuhwasigenan netakaikar was ton mama takarhwapnin mun Lasaras,
11Mero in ka Ju min ribor kamaruan mamani nuparhienan le Iesu mero in ka lan.
12Lauk in nahuto ribor le nerem kamaruan to nauganan netakairou mama Iesu rakava Jerusalem,
13Netakaros numali napuok marier mama takailil tosig in, an netakaisak apahm, Hosana! Ierem keikei ierem rakava le netige Ieremera, mene Ieremera te Israel.
14An Iesu neterahm as vi neterowata lan, rolkoma kamrai,
15Asaginan, beresuas neri Saion;
Ahm ru, Ieremera taham rakava,
Mamowata le neri as.
16Naremnar min uk tan ieremim min kamesarhinatinan paupan, mero Iesu remier le nevitan an nekin ilar neterakahmo moma nar min uk kenamrai lan, an (moma) kamarol nar min uk lan
17An nahuto, ierem min kamemairik ilar min nian ramaunin Lasaras lan le nimil mosit in le neki nerem kamaremis, ilar netakamaiusito in.
18An le nar uk mun nahuto netakaruan mailil tosig in, mero in ka kamairou mama ramol nimtatin ka.
19An Farisi min netakani to ilar min, Neknailhm mama nesesaisanenan le nar ker; aihm ru, ten uk rekanmai oatisig in.
20An nerem Krik nevin le neki nerem kamaret maruan mama takaihwak le nauganan.
21An ilar netakarua to Filip ierem Bethsaida le Kalili, netakaihrapuk ton, mamani, Ieremerea, iakarolkeikei mama tiakaihm ru Iesu.
22Filip neterua meni to Andru; Andru mene Filip netikiava muani to Iesu.
23An Iesu neteraram to ilau meni, Aur reknua Neri Ieremim terepier le nevitan.
24Nuparhien, nuparhien, tiakani to Kamair, takama nowa hwit terapas nesasan le nemapten memis teramarik pusen am; mero takama teremis terepowa in nowan ribor.
25Ierem rolkeikei newihwan tahan teriapatou in, an ierem teramakin nemihwan tahan le ten uk terepos le nemihwan lilen.
26Takama ierem rol atkokun nar tonio pas reroupa io, an iken io iken iolatkokun nar tahak iken mun. Takama ierem rol atkokun nar tonio Tata terepsiai in.
27Towek nanumok ramahmapuk, an neta tiakani? Tata os miuh io to aur uk. Mero to nar uk iava to aur uk. Tata, ol nevitan le netigam.
28An nakaran netersipe le neai, Iamol nevitan lan, an tiapol mun nevitan lan.
29An nahuto kamailil netakairou, netakama kalualua ramakar; nevin mun netakani, Agelo ker ramakar pen kam in.
30Iesu neteraram mameni, Resolan moma nakaran uk rava tonio mero to kamiar.
31Towek nuhwapraian te ten uk, towek Ieremera te ten uk kehnaliatou.
32An io takama taposit io le nemapten, tiapuipa neremim petum tonio.
33An netereni nar uk metikun le nemisan tahan moma teremis maka.
34An nahuto netakairam ton, Kamar iemairou le nowa asul moma Kristo teramarik lilen, an ik tenakatua meni moma Neri Ieremim tapakeikei kosit? In uk pehe Neri Ieremim?
35An Iesu netereni to ilar, Ie noanverin am nian nisia ramarik to kamiar. Amaivan loanian hnakakan ramarik to kamiar, moma napinapan tereseroatisan kamiar; an ierem teraliwak le napinapan retiktik am iken rakava iken.
36Loanian hnakakan ramarik to kamiar, ani nuparhienan le hnakakan, moma kamiar teneparol nereri hnakakan. Iesu netereni nar min uk, an neteruan mamel aken to ilar.
37An ramol nimtatan rapus mok lan le nemrin ilar, mero kamesanian nuparhienan lan.
38Moma nakaran te Aiseia terepet ierem rameni,
Ieremera, pehe rameni nuparhienan le nausitoan tetar?
An pehe Ieremera ramhin nelimin kam in?
39Le nar up riakis to ilar moma takani nuparhienan lan, mero in ka Aiseia rameni mun,
40Reknol nemrin ilar rou, an ramol nekin ilar riakis,
Moma tesaihman nar le nemrim ilar, an mesarinehikan le nekin ilar, an meselelegan, an tiesolutan ilar.
41Aiseia rameni nar min uk mero in ka ramahm nevitan tahan, an remamakar in.
42Mero le neremera mun nevin netakani nuparhienan lan, mero kamesaniapuan mero in ka Farisi min, mama takashalitouan ilar le nimwa ahwak.
43Mero in ka kerolkeikei nevitan te neremim resolan kama nevitan taha Wuhgin.
44An Iesu neterasak apahm mameni, Ierem tereni nuparhienan lak, resenian nuparhienan lak mero le ierem rehmalipa io.
45An ierem terahm io, terahm ierem rehmalipa io.
46Io iava hnakakan le ten uk, moma ierem tereni nuparhienan lak teresarikan le napinapan.
47An takama ieremim ker tererou nakaran min tahak mesolan, io tieshwapraian in, mero in ka iemesuean moma tiakhwaprai ten uk mero noma tiakos miuh ten uk.
48Ierem terapas io mesosan nakaran tahak, ramos ker terhwaprai in; Nakaran ierem io iemeni in terefhwaprai in le nian oatisig.
49Mero in ka iemesakaratuan lak, mero Tata ierem rehmalipa io in ramofa nowa kam io moma neta tiakani an moma neta tiakakar lan.
50An iakhinatin moma nowa tahan in nemihwan lilen. An nar min tiakani, rolkoma Tata rameni tonio, rol mok lan taikani.
Currently Selected:
Jon 12: LEN1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902, reprinted in 1935.
