Acts 5
5
Ananias laua ma Sapphira umake
1Kela hekama kemale aia Ananias ia keꞌavana aia la Sapphira. Koꞌolua la eau aꞌe keeleꞌele laua la isui kelaa kama. 2Kena inuu pela laua meikaohi kela oina i namoni keeleꞌele la, kena iau aꞌe kelaa oina namoni la i nakama heheaꞌu Jesus la. 3Kena Peter ume aꞌe Ananias, “Aꞌoe eau aꞌe keeleꞌele aꞌoe la isui kelaa kama. Ia Satan eusuusu aku aꞌoe ikaohi alamoni kesui keeleꞌele la, ihailavaꞌa Keanana Kapu. 4Keualoko aꞌoe elolosi keeleꞌele na, kena hemea aꞌoe. Ia keualoko aꞌoe eau aꞌe keleꞌele na isui lia, ala nimoni aꞌoe oia. Okea aꞌoe nukulaoi penei? Aꞌoe sehailavaꞌa kekama. Aꞌoe ehailavaꞌa Keakua avale.”
5Keualoko Ananias elono nakakala nei, kama la usina ilalo nomake. Kena nakama hakoa kela elono hea eapihi aꞌe la umakaꞌu haeꞌo. 6Kena nakaupeala la uo aꞌe nomini kinokama kama la, kena isau nokanu.
7Kamasaika oia,*f4* keꞌavana Ananias la uhaele aꞌe i hale, ia semakino hea eapihi aꞌe la. 8Kena Peter uvasili aꞌe kehine la, “Aꞌoe ime mai. Kenei keꞌoina olua eko i kesui keleꞌele olua la?” Kena iko Sapphira ime aꞌe, “Ei, kena kesui na oia.”
9Kena Peter ume aꞌe kehine la, “Okea olua ehakaꞌoko ihahani Keanana Kapu? Nakama nikanu keꞌavana aꞌoe la ekuu mai i kokoꞌa la. Ia nakama la meisau aꞌoe i makaaho hoi!” 10Vahola oia kehine la usina imua Peter nomake. Keualoko nakaupeala la nio mai iloko hale, nakama la eꞌike Sapphira umake. Kena isau kehine la nokanu i kevahi keꞌavana aia la. 11Kena nakama keloku la ma alakama kela elono hea eapihi aꞌe la umakaꞌu haeꞌo.
Nakama heheaꞌu Jesus ehuli aꞌe namahi Keakua
12Nahakina ana la uꞌuku hakoa i keꞌina emale ma “Haaseꞌe Solomon.” Kena nakama heheaꞌu Jesus la ehuli aꞌe komaꞌi nahaꞌaku ia ma namea kaualeꞌa imua keonohenua la. 13Nakama kela sehakina la emakaꞌu kesuꞌui aꞌe ma nahakina ana la. Ia keonohenua la ehamaha nahakina ana la. 14Kena komaꞌi nakanaka ma nahine ehakina i Kealiꞌi, kena isuꞌui aꞌe i keukulana nahakina ana la. 15Keonohenua la uko iho nakama lavea lakou la nohanoho iluna namoena ia ma naꞌapiki i kevahi keala. Nakama la ehakaꞌoko pela ma Peter meihaele halaꞌa vakeala, kena kemalu aia ame haele valuna nakama la. 16Kena naonohenua namakaꞌina hakiꞌe Jerusalem la uko iho nakama lavea lakou la, ia ma nakama kela ekau lia nakipua saꞌino la. Kena nakama la hakoa ukaualeꞌa.
Na{Jiu} epui nakama heheaꞌu Jesus isekaukaꞌu
17Pohoulu hamakua namaakua ia ma naSatiusi kela eheheaꞌu maia la usano haeꞌo nakama heheaꞌu la. 18Kena nakama la uhapiꞌi nakama heheaꞌu Jesus la noꞌave nopono kelokapu kemakaꞌina la. 19Ia kepo la, ke{enselo} Keakua ukalaꞌi kokoꞌa kelokapu la, ihakaꞌi nakama heheaꞌu Jesus la imaka aho, kena ime aꞌe, 20“Kaꞌa nokuu iloko hale kapu la, kena kakala aꞌe keonohenua la nakipukipu keola hamaoni.” 21Nakama la ehalono ke{enselo} la. Kena keualoko kelaa la esopo aꞌe, nakama la ukaꞌa iloko hale kehale kapu la, kena iaoaꞌo keonohenua la.
Pohoulu hamakua namaakua la ehapaa ma nakama heheaꞌu aia, kena ianaa nakama hamakua keonohenua Israel la io aꞌe noꞌuku. Kena ihaunalia napulepule aia la ihakaꞌi aꞌe nakama heheaꞌu Jesus la ikaha ma kelokapu. 22Napulepule la ukaꞌa nokae i kelokapu, nolave pela nakama heheaꞌu la useai. Kena ivaꞌai muli nome aꞌe, 23“Makou elave kelokapu la epui nomau, ia nakama lolosi kelokapu la ekuu imua nakokoꞌa la. Ia keualoko makou nikalaꞌi nakokoꞌa la, makou sehikama eꞌike.” 24Pulepule hamakua kela elolosi hale kapu la ia ma namaakua hamakua la ulono nakakala nei. Nakama la umasalo, ia semakino hea ameapihi aꞌe imuli.
25Kena kela hekama uhaele aꞌe nome aꞌe nakama la, “Ila aꞌe! Nakama kela okou nipono i kelokapu la ekuu vahonei iloko hale kapu la noaoaꞌo keonohenua.” 26Kena pulepule hamakua la uhaele ma alapulepule kela heheaꞌu maia, noko aꞌe halaoi nakama heheaꞌu la. Ia nakama la uo semuu oia, maikinimea nakama la emakaꞌu ma keonohenua la memaꞌa lakou nahaku.
27Napulepule la ehakaꞌi aꞌe nakama heheaꞌu Jesus la, ihakuu imua nakama hamakua na{Jiu} la. Kena pohoulu hamakua namaakua la eme aꞌe nakama heheaꞌu la, 28“Makou ehamakaꞌu aku okou iseaoaꞌo keonohenua i kemale kama hamakua okou la. Ia naaoaꞌo okou ekoha i naꞌina hakoa i Jerusalem. Okou ehihai pela keonohenua la ihai mai makou i kemake kama la.”
29Ia Peter ma nakama heheaꞌu Jesus la ume aꞌe, “Makou ehalono Keakua, ia sehalono aku okou. 30Okou ekii Jesus iluna {kolosi} la. Ia Keakua kela nakipuna kakou imua la ehamasiꞌe Jesus ikaha ma kemake. 31Keakua esau kama la ialuna, kena ihanoho kama la i kelima laua aia, imea kama la mo kuꞌu kakou. Kama la ekonaꞌi kakou nakama Israel ikiꞌe ikaha ma nahaisala kakou, kena isolo nahaisala kakou la ikaha. 32Makou umakino pela nakakala nei ehamaoni. Ia Keanana Kapu ehuli mai namenei hoi. Keakua meihoꞌi aꞌe Keanana Kapu la i nakama kela ehalono i aia.”
33Keualoko nakama hamakua na{Jiu} la elono nakakala nei, nakama la eloko haeꞌo, kena ihihai ma lakou ikaa nakama heheaꞌu Jesus la imake. 34Ia kela hekama naFarasi enoho ilaa, kemale aia Gamaliel, hekama epolopolo nakuaa la. Nakama la hakoa ehamaha i Gamaliel. Kama la ekuu imua nakama hamakua la, kena ime aꞌe napulepule la ihakaꞌi nakama heheaꞌu la ikaha ma kehale lakou eꞌuku la, nohakali kamasaika imaka hale. 35Kena kama la ume aꞌe nakama hamakua la, “Okou nakama Israel. Lolosi hamakonu hea okou meipena nakama la. 36Kamasaika uoki la, kela hekama ehamamahi maia hekama hananiu, kemale aia Theudas. Kena ehaa nahuikalau nakanaka esuꞌui ma kama la. Ia kama la ukaia lia nomake. Kena nakama ekaukali aia la umaseu. 37Kela mea hoi. Kulana {kaumani} la eme aꞌe naonohenua ihamau namale lakou hakoa iloko kelauniu {kaumani}, kela hekama ehamai i Galilee, kanamale Judas. Kama la ehakaꞌi keukulana aia hoi. Ia kama la umake, kena nakama kaukali aia la umaseu. 38Kena vahonei anau eme aku okou ikiaꞌi nakama la, io ikaha. Amea nakama la ekaukali nahakaꞌoko lakou solakou, kemena meiselavaa. 39Ia amea kena nimea Keakua eau iho nakama la, okou meselavaa keseu nakama la. Aoki okou ame hakauoki ma Keakua.”
40Kena nakama hamakua na{Jiu} la uku aꞌe pela hea Gamaliel ekakala la. Kena ianaa aꞌe nakama heheaꞌu Jesus la ivaꞌai aꞌe i hale. Kena iliꞌi nakama la, ihamakaꞌu aꞌe nakama la isekaukaꞌu i kemale Jesus, kena ihakana nakama la nokaꞌa.
41Nakama heheaꞌu Jesus la uo ikaha ma kehale la. Ia nakama la ehihia lo. Maikinimea Keakua ehakaꞌoko pela lakou ekau kehalono lihu i kemale Jesus. 42Keaho ma keaho, nakama heheaꞌu la ekauhano keaoaꞌo keonohenua iloko hale kapu, ia iloko nahale lakou enoho la. Nakama la ekaukaꞌu kahi kelono kaualeꞌa, pela Jesus o keMesaea.
Currently Selected:
Acts 5: ojv
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
