Jěnisis 1
1
1O jali ka Anyambě a vela oba na he.
2He yu diyaka n‘ uvela, e diyaki naně; ivitit‘ i diyakind‘ o boho bwa ndiba. Ka Ilina ja Anyambě ja muwa o boho bwa miba.
3¶ Ka Anyambě a vâ, na, Bwe e diyake: na bwe na diyaka.
4Ka Anyambě a yěně bwe, na e ndi bwamu; na Anyambě na palwakidě bwe o ivititi.
5Ka Anyambě a tuba bwe na Mwehe, ka Mâ‐a tuba ivititi na Bulu. Ka yâ‐ya diya kolo na ubwa, — buhwa bwâkâ.
6¶ Ka Anyambě a vâ, na, Njanjo e diyake o hanganě ya miba, na yâ e ka palwakidě miba oviya miba.
7Ka Anyambě a vela njanjo, ka Mâ‐a paludě miba ma diyakidi ibomako ja njanjo oviya ma diyakidi oba ya njanjo: ka yâ‐ya diya nonaně.
8Ka Anyambě a vangidě njanjo Oba. Ka yâ‐ya diya kolo na ubwa, — buhwa bwa ibalě.
9¶ Ka Anyambě a vâ, na, Miba ma jadi ibomako ja oba ma yolanakě iboko vyâkâ, na ya yaheyahe ya puma: ka yâ‐ya diya nonaně.
10Ka Anyambě a vangidě ya yaheyahe, na, He; ka Mâ‐a vangidě iyolaně ja miba, na, Manga: ka Anyambě a yěně, na, e bwamu.
11Ka Anyambě a vâ, na, He e pumakě mbusanga, na behavu be lângâkě ibângâ, na ele ya bebuma e lângâkě bebuma bea jângâ jaju, ibângâ i na yâ mětě, o he: ka yâ‐ya diya nonaně.
12Ka he ya běkidě mbusanga, na behavu be lângâkě ibângâ ja jângâ jaju, na ele e lângâkě bebuma, ibângâ jaju i diyakite na yâ mětě, ya jângâ jaju: ka Anyambě a yěně, na, e bwamu.
13Ka yâ‐ya diya kolo na ubwa, — buhwa bwa ilalo.
14¶ Ka Anyambě a vâ, na, Bwe i diyake o njanjo ya oba i ka paludě mwehe oviya bulu; na jâ i ka diyaka ja ndembo, na ja begombe, na ja hwi na mepuma:
15Na jâ i ka diyaka bwe o njanjo ya oba ivě ja bwe o he: ka yâ‐ya diya nonaně.
16Ka Anyambě a vela bwe iněně ibale; bwe eněně e pangakiyě mwehe, na bwe ehâlě e pangakiyě bulu: ka Mâ‐a vela tepě nyětěti.
17Ka Anyambě a tědě jâ o njanjo ya oba, ivě ja he bwe,
18N‘ ipangiya ja mwehe na bulu, n‘ ipaludě ja bwe oviya ivititi: ka Anyambě a yěně, na, e bwamu.
19Ka yâ‐ya diya kolo na ubwa, — buhwa bw‘ inai.
20¶ Ka Anyambě a vâ, na, Miba ma běkěkidě na bwinge bekeha be ninganakě be di na eměnâ, na lonâni lo věvěkě oba ya he o bwe ya njanjo ya oba.
21Ka Anyambě a vela benyamagali bea manga beněně, na ekeha e ninganakě yěhěpi e di mihâ ya miba e pumakidě na bwinge, ya mangâ mabu, na lonâni la mapěpu lěhěpi jângâ jaju: ka Anyambě a yěně, na, e bwamu.
22Ka Anyambě a vambiya beâ ibâtâ, na, Janakani, n‘ inyěni o ka vuhakani, n‘ inyěni o ka londaki miba ma manga, na lonâni lo ka vuhaka o he.
23Ka yâ‐ya diya kolo na ubwa, — buhwa bw‘ itano.
24¶ Ka Anyambě a vâ, na, He e běkěkidě ekeha ya mihâ ya jângâ jaju, bembe, na elombo e landakě, na tito ya he ya jângâ jaju: ka yâ‐ya diya nonaně.
25Ka Anyambě a vela tito ya he ya jângâ jaju, na bembe bea jângâ jabu, na elombo yěhěpi e landakě o he ya jângâ jaju: ka Anyambě a yěně na e bwamu.
26Ka Anyambě a vâ, na, Ho velake moto wa egâlan‘ ’ahu, a kwanakě hwě: na bâ‐ba ka pangakiya bejaka bea manga, na lonâni la oba, na bembe, na he yěhěpi, na elombo yěhěpi e landakě o he.
27Nonaně nd‘ o Anyambě a velaki moto na egâlan‘ ’aju, egâlani ya Anyambě nd‘ eaju e velanaki mâ; a velaki bâ momo na mwajo.
28Ka Anyambě a vambiya bâ ibâtâ, ka Anyambě a vâ na bâ, na, Janakani, n‘ inyěni o ka vuhakani, wa londani o he, na inyěni wa bali yâni: o ka pangakiyani bejaka bea manga, na lonâni la oba, na elombo yěhěpi e di mihâ e landakě o he.
29¶ Ka Anyambě a vâ, na, Umbwakiya, mbi věndi ’nyěni ehavu yěhěpi e jakě ibângâ, e jadi o boho bwa he yěhěpi, na ele yěhěpi e jadi na ebuma ya ele e lângâkě ibângâ: e ka diyi beja o ’nyěni‐o jadi.
30Na tito ya he yěhěpi, na lonâni la oba lěhěpi, na elombo yěhěpi e landakě o he e jadi na eměnâ, nd‘ ibiamě be vědi ehavu ya etongo yěhěpi ya beja: ka yâ‐ya diya nonaně.
31Ka Anyambě a yěně elombo ’aju e velakidi yěhěpi, na umbwakiya, e diyakindi bwamu mětě. Ka yâ‐ya diya kolo na ubwa, — buhwa bw‘ utoba.
Currently Selected:
Jěnisis 1: BNG1895
Highlight
Share
Compare
Copy
Want to have your highlights saved across all your devices? Sign up or sign in
Published by the American Bible Society in 1895, 1926.
