Jěnisis 2
2
1Ka oba na he bea hânjâbudwě, na ndumb‘ ’abu yěhěpi.
2O buhwa bwa hěmbwědi, ka Anyambě a hânjâbidě ehavu ’aju e hakidi; ka Mâ‐a yâjâ o buhwa bwa hěmbwědi oviya ehavu ’aju eaju e hakidi yěhěpi.
3Ka Anyambě a vambiya buhwa bwa hěmbwědi ibâtâ, ka Mâ‐a nyěvidě bwâ: kabojana bwâ nd‘ ibwaju bo yâjâkidi oviya ehavu ’aju ya Anyambě e velakidi na e hakidi.
4¶ Mbamba ja oba na he nd‘ ekadi o beâ be velakudwě, o buhwa bwa Jěhova Anyambě bo velaki he na oba.
5Na e kěkěkě o pindi yěhěpi yu diyaka o he, behavu bea pindi be diyakite be te o tombuwa; kabojana Jěhova Anyambě a diyakite a t‘ o panga mbwiya e nâkâ o he, na moto a liyakě o he au diyaka.
6Ndi bengumbe be betakindi oviya o he, ka beâ‐bea bâhě ibati ja he jěhěpi.
7Ka Jěhova Anyambě a vela moto n‘ ubulubulu mua he, ka Mâ‐a veguma o mepemba meaju pudi ya ’měnâ; ka moto a diya ilina ja mihâ.
8¶ Ka Jěhova Anyambě a liya mwanga o mbuhwa ya Iděn; omě nd‘ o Mâ‐a dikaki moto ’aju a velakidi.
9Oviya he nd‘ o Jěhova Anyambě a tombwakidě ele yěhěpi e jadi bwamu n‘ iyěně, na e jadi bwamu n‘ ija; na ele ya ’měnâ tepě o hanganě ya mwanga, na ele y‘ iyowě ja bwam‘ na bobe.
10Ka viho via vala oviya Iděn ka bâhě mwanga; ka viâ‐via pěhě oviya omě, via bě paha inai.
11Dina ja via bohoboho ndi Paisân: vině ndi vi ’luanakidě ehe ya Havila yěhěpi, o hika e jadi.
12Hika ya ehe těně e ndi eyamu; omě nd‘ o jadi na dělum na malale ma âniks.
13Dina ja viho via lobalě ndi Gaihân: viâ ndi vi uluanakidě ehe ya Cush yěhěpi.
14Dina ja viho via lolalo ndi Hidikěl: viâ ndi vi kěkě o pělě ya mbuhwa ya Asiria. Viho via lonai ndi Ufratis.
15Ka Jěhova Anyambě a nângâ momo, ka mâ‐a dika mâ o mwanga mua Iděn, ibonguwa na itata ja muâ.
16Ka Jěhova Anyambě a sombiyě momo, na, O ka jaka ele ya mwanga yěhěpi bojaka:
17Nd‘ o jake ele y‘ iyowě ja bwam‘ na bobe: kabojana o buhwa tě ibwâvě bo ka jě yâ, pâkwěpâkwě o ka wandi.
18¶ Ka Jěhova Anyambě a vâ, na, E bě bwamu na momo a diyaka dipâ: Mbi ka veli mâ uhani mua lukango na ju.
19Oviya o he nd‘ o Jěhova Anyambě a velaki tito ya ’hiki yěhěpi, na inâni via oba viěhěpi: ka Mâ‐a vana beâ o momo a jadi ka yěně nyang‘ ’aju e ka tubě beâ, na nyanga ya momo tě e tubakidi ekeha e di mihâ yěhěpi, vâkâna dina jaju ndi dině.
20Ka momo tě a vangidě bembe beěhěpi mina, na lonâni la oba, na tito ja ’hiki jěhěpi; nd‘ o pělě ya momo tě yu duwanakiya uhani mua lukango na ju.
21Ka Jěhova Anyambě a panga momo tě a kwaka o viyâ viněně, ka mâ‐a ya. Ka Mâ‐a nângâ mbanj‘ ’aju pâkâ, ka Mâ‐a diba mehoni o maihana ma omě.
22Mbanja tě ya Jěhova Anyambě e nângâkidi o momo tě a jadi, nd‘ eaju e velanaki mwajo: ka Mâ‐a vana mâ o momo tě a jadi.
23Ka momo tě a vâ, na, Nandi, ekae ndi evehe ya bevehe beamě, na uhoni mua uhoni muamě: a ka tubwi, na, Mwajo, ikabojana a nângâkudwěndi o momo a jadi.
24Ovaně nd‘ o momo a ka dikě hangwě na nyangwě, na mâ‐a lata na mwad‘ ’aju: na bâ‐ba ka diyaka uhoni umbâkâ.
25Momo tě na mwad‘ ’aju bâ běhěpi ba diyakite mehamba, ba yoke ihâni.
Currently Selected:
Jěnisis 2: BNG1895
Highlight
Share
Compare
Copy
Want to have your highlights saved across all your devices? Sign up or sign in
Published by the American Bible Society in 1895, 1926.
