Jěnisis 3
3
1Nandi mbamba e diyakindi ukândâ wa na tito ya ’hiki yěhěpi ya Jěhova Anyambě e velakidi. Ka mâ‐a vâ na mwajo, na, E, Anyambě a vângo, na, O jakeni bele bea mwanga beěhěpi?
2Ka mwajo a vâ na mbamba, na, Ho ka jate bebuma bea bele bea mwanga:
3Ndi kabo bebuma bea ele e jadi o hanganě ya mwanga, Anyambě a vâki, na, O jaki yâni, n‘ inyěni o kupanaki yâni, o banga wa wani.
4Ka mbamba ya vâ na mwajo, na, pâkwěpâkwě wa ka wani.
5Kabojana Anyambě a yowuděte na buhwa bwanyu bo ka jě yâ, vâkâna mihâ manyu ma bumuwendi, n‘ inyěni wa běni ka beanyambě, iyowě ja bwam‘ na bobe.
6Nandi, o mwajo a yěněki na ele e ndi bwamu n‘ ija, na bwamu o mihâ, na na ele e vahakwě o panga moto iyowě, na mâ na nângâkâ ebuma ya omě ka mâ‐a ja, ka mâ‐a vě tepě momi ’aju na ju; na mâ na jaka.
7Ka mihâ mabu ma babale ma bumuwa, ka bâ‐ba yowě na ba ndi mehamba; ka bâ‐ba tuma bekai bea fig, ka bâ‐ba ha bepukě o pěl‘ ’abu.
8Ka bâ‐ba yoka joi ja Jěhova Anyambě a tamwaka o mwanga o tâ ya buhwa: ka momo na mwad‘ ’aju ba kutamiya Jěhova Anyambě o bele bea mwanga.
9Ka Jěhova Anyambě a ndiya momo, ka Mâ‐a vâ na ju, na, O lě ově?
10Ka mâ‐a vâ, na, Mbi ma yokate joi jâvě o mwanga, k‘ umba‐mba banga, ikabojana mbi ndi uhamba; k‘ umba‐mba kuta nyolo ’amě.
11Ka Mâ‐a vâ, na, Nja a ma languwa ’vě na o ndi uhamba? O jendi ele tě eamě e sombiyakid‘ âvě, na, o jake?
12Ka momo a vâ, na, Mwajo tě uwâvě a věkidi na a diyake n‘ umba, mâ ndi a ma vě ’mba ele, k‘ umba‐mba ja.
13Ka Jěhova Anyambě a vâ na mwajo, na, E lě nd‘ eâvě e di hango ekae? Ka mwajo a vâ, na, Mbamba nd‘ e kândâki ’mba, k‘ umba‐mba ja.
14Ka Jěhova Anyambě a vâ na mbamba, na, O hâkwěngo wa na bembe beěhěpi, na tito ja ’hiki jěhěpi, ikabojana âvě‐o had‘ ekae; o ka tamuwi n‘ ihuhu jâvě, na nâvě o ka ji mahě o hwi ja eměnâ ’âvě jěhěpi:
15Mbi ka vaměndi ndoba o hanganě ’âvě na mwajo, na o hanganě ya ibângâ jâvě na ijaju; i ka nyingandi molo mwâně, na nâvě o ka nyingandi ekikindi ’aju.
16O pělě ya mwajo a vâki, na, Mbi ka keněndi ngěbě ’âvě n‘ ikaha jâvě: o ka ji bana na ngěbě; ivaha jâvě i ka diyandi o mom‘ ’âvě a jadi; na mâ‐a ka pangiyand‘ âvě.
17A vâki na Adam, na, Kabojana o yokakiyendi joi ja mwad‘ ’âvě, na nâvě wa ja ele ’amě e sombiyakidě âvě, na, O jake: jâki na he o pěl‘ ’âvě: na nâvě o ka ji bea omě na ehavu hwi ja eměnâ ’âvě jěhěpi;
18E ka puměndi mbângě na mabo o âvě‐o jadi: o ka ji behavu bea pindi.
19Na ebabadi ya boho bwâvě nd‘ eâvě e ka janě beja, kwanga na o âvě‐o ka timbě o he; kabojana omě nd‘ eâvě e nângâkudwě: o ndi mahě, o ka timba tepě o mahě.
20Ka momo tě a vangidě mwad‘ ’aju dina na Ivi; ikabojana mâ ndi nyangwě ya ba diyakě běhěpi.
21Ka Jěhova Anyambě a ha tepě o pělě ya Adam na mwad‘ ’aju ngâi ja bekoto, ka Mâ‐a bâtidě bâ.
22¶ Ka Jěhova Anyambě a vâ, na, Umbwakiyateni, momo tě a běndi pani‐ka hwě mětě, iyowě ja bwam‘ na bobe; nandi, o banga a hambidě enâ ’aju, na mâ‐a nângâ tepě ele ya ’měnâ, na mâ‐a ja, na mâ‐a diya egombe yěhěpi;
23Jâ ndi ja Jěhova Anyambě ja duma mâ oviya o mwanga mua Iděn, ka liya he eaju e nângâkudwě.
24Ka Mâ‐a duma momo tě: ka Mâ‐a diyidě o mbuhwa ya mwanga mua Iděn chěryubim, na ugonyi mua ukwala‐mua‐ibâtâ u ’luwakě pělě jěhěpi, itata ja njea ya ele ya ’měnâ.
Currently Selected:
Jěnisis 3: BNG1895
Highlight
Share
Compare
Copy
Want to have your highlights saved across all your devices? Sign up or sign in
Published by the American Bible Society in 1895, 1926.
