Jěnisis 4
4
1Ka momo tě a yowě mwad‘ ’aju Ivi; ka mâ‐a kaha, ka mâ‐a ja Ken, ka mâ‐a vâ, na, Mbi pahiyendi momo o Jěhova a jadi.
2Ka mâ‐a ja pě mwana‐nyangwě Eběl. Eběl a diyakindi utati mua medâmbe: Ken a diyakindi uliyi mua he.
3E diyakindi o egombe, ka Ken a vana bebuma bea he mwambo o Jěhova‐a jadi.
4Ka Eběl, a vana tepě njadi ja mwanga mwaju na mavângâ ma omě. Ka Jěhova a tangina Eběl na mwambo muaju:
5Ndi au tanginaka Ken na mwambo muaju. Ka Ken a linguwa malingwa maitě, ka boho bwaju bwa kwa.
6Ka Jěhova a vâ na Ken, na, O lingwaka lě nde? E lě nde ya boho bwâvě e kwakě?
7Oningě wa ha bwamu, wa věhěludwě? Oningě o haye bwam‘, bobe bo běmběkěndi o jâmbě; n‘ ivaha jaju i ka diyandi o âvě‐o jadi, na nâvě wa pangiya mâ.
8¶ Ka Ken a jila elâmbě na mwana‐nyangwě Eběl: e diyakindi o bâ‐ba diyakid‘ o pindi, ka Ken a betaně mwana‐nyangwě Eběl, ka mâ‐a weya mâ.
9Ka Jěhova a vâ na Ken, na, Mwana‐nyangwě Eběl a l‘ ove? Ka mâ‐a vâ, na, Mba ’wě: Umba ndi utati mua mwan‘‐ina?
10Ka Mâ‐a vâ, na, O ma ha lě nde? Joi ja makiya ma mwana‐nyangwě ma dakakiyi ’Mba o he.
11Nandi o ndi kâkwěngo oviya o he, e dubuwedi udumbu muaju inângâ ja makiya ma mwana‐nyângwě o en‘ ’âvě.
12O âvě‐o ka liyě he, oviya egombe těkae, ya pume pě ngud‘ ’aju o âvě‐o jadi: o ka diyandi ukweyi na ndalenga o he.
13Ka Ken a vâ na Jěhova, na, Ivomudwě jamě i boněně wa na nyang‘ ’amě e ka yâle.
14Umbwakiyate, o dumi ’mba o buhwa těkabo o boho bwa he: mbi ka kutwěndi oviya boho bwâvě: mbi ka diyandi ukweyi na ndalenga o he: e ka diyandi, o wěhěpi a ka yěně ’mba vâkâna a weyi ’mba.
15Ka Jěhova a vâ na ju, na, Wěhěpi a ka weyě Ken, ikundwě i ka nângwěndi o mâ‐a jadi njo hěmbwědi. Ka Jěhova a lěndě Ken epeho, o banga a ka duwě mâ wěhěpi a weya mâ.
16¶ Ka Ken a věngěmě o pwanja ya Jěhova, ka mâ‐a diya o ehe ya Nod, o mbuhwa ya Iděn.
17Ka Ken a yowě mwad‘ ’aju, ka mâ‐a kaha, na jaka Inok: ka mâ‐a longa mboka, ka mâ‐a vangidě mboka dina ja mwan‘ ’aju Inok.
18Ka Inok a ja Airad: ka Airad a ja Mahujeěl: ka Mahujeěl a ja Methuseěl: ka Methuseěl a ja Lemak.
19¶ Ka Lemak a nângâ mâ mětě bajo babale: dina ja umbâkâ ndi Ada, na dina ja upâkwě ndi Zila.
20Ka Ada a ja Jebal: mâ ndi a diyaki hangwě ya ba diyakě o myâkâ, na ba di na bembe.
21Dina ja mwana‐nyangwě ndi Jubal: mâ ndi a diyaki hangwě ya ba bomakě ngâmbi na mabeka.
22Ka Zila a ja tepě Tubal‐Ken, ukubi mua evolani a lenakě yěhěpi ya nyěnyě na ya ekěyi. Iluku ja Tubal‐Ken ndi Neema.
23Ka Lemak a vâ na bajo baju Ada na Zila, na, Yokakani joi jamě: inyěni bajo ba Lemak, yokolakiděni ukalo ’muamě: ikabojana mbi weyaki moto o pělě ya iluma jamě, na iwanja ja momo o pělě ya inyinga jamě.
24Oningě na Ken a ka kundwi njo hěmbwědi, pâkwěpâkwě Lemak a ka diyi mabo hěmbwědi na njo hěmbwědi.
25¶ Ka Adam a yowě mwad‘ ’aju epâkwě njo, ka mâ‐a ja mwa‐momo, ka mâ‐a vangidě mâ dina na Sěth; Kabojana Anyambě a kenjidi ’mba ibângâ ipâkwě o maihana ma Eběl, ikabojana Ken a weyaki ’mâ.
26Nandi, o pělě ya Sěth, ka mwa‐momo a jawě tepě o mâ‐a jadi.
Currently Selected:
Jěnisis 4: BNG1895
Highlight
Share
Compare
Copy
Want to have your highlights saved across all your devices? Sign up or sign in
Published by the American Bible Society in 1895, 1926.
