Jěnisis 11
11
1He yěhěpi e diyakite etomba yâkâ, n‘ ukalo umbâkâ.
2E diyakindi, o bâ‐ba tamwakidi o mbuhwa, ka bâ‐ba duwa uhanjiboka o ehe ya Shainar; ka bâ‐ba diya omě.
3Ka bâ‐ba kala upâkwě n‘ upâkwě, na, Okani, ho hakeni brik, na hwě‐hwa tumba beâ bwamu. Brik be diyakindi mabâdâ o bâ‐ba jadi.
4Ka bâ‐ba vâ, na, Okani, ho longakiyeni hwě mětě mboka eněně, na elongo ya hâkâ ’aju e didi e kâbâkidě oba, na hwě‐hwa ha hwě dina, o banga hwa vanjangana o ibati ja he yěhěpi.
5Ka Jěhova a huba ka yěně mboka tě eněně, na elongo tě ya bana ba bato e longakidi.
6Ka Jěhova a vâ, na, Umbwakiyate, bato ba te umbâkâ, na bâ běhěpi ba te ’tomba yâkâ; na ekae ndi eabu e yalidě o ha; o ’bě na elombo e ka himbidě bâ nyang‘ ’abu e vahakě o ha.
7Okani, ho hubakeni ka jukě ukalo muabu, ovaně nd‘ o bâ‐ba ka měndě bà yokane pě ukalo.
8Ka Jěhova a vanjanganě bâ oviya omě, o boho bwa he bwěhěpi; ka bâ‐ba dika ilonga ja mboka tě eněně.
9Ovaně nd‘ o dina jaju i tubakwě, na, Bebal; ikabojana omě nd‘ o Jěhova a jukakidě ukalo mua he yěhěpi: ka oviya omě Jěhova a vanjanganě bâ o boho bwa he bwěhěpi.
10¶ Mbamba ja Shěm nd‘ ekadi: Shěm a diyakindi kama ya mepuma pâkâ utodu, ka mâ‐a ja Arfaxad, ujambě tombango mepuma mebale.
11Ka Shěm a diya, o mâ‐a běkidi Arfaxad jango, kama ja mepuma itano; ka mâ‐a ja babamo na babajo.
12Ka Arfaxad a diya mabo ma mepuma malalo na mepuma metano, ka mâ‐a ja Sela.
13Ka Arfaxad a diya, o mâ‐a běkidi Sela jango, kama ja mepuma inai na mepuma melalo, ka mâ‐a ja babamo na babajo.
14Ka Sela a diya mabo ma mepuma melalo, ka mâ‐a ja Eber.
15Ka Sela a diya, o mâ‐a běkidi Eber jango, kama ja mepuma inai na mepuma melalo, ka mâ‐a ja babamo na babajo.
16Ka Eber a diya mabo ma mepuma malalo na mepuma menai, ka mâ‐a ja Pelěg.
17Ka Eber a diya, o mâ‐a běkidi Pelěg jango, kama ja mepuma inai na mabo malalo, ka mâ‐a ja babamo na babajo.
18Ka Pelěg a diya mabo ma mepuma malalo, ka mâ‐a ja Ru.
19Ka Pelěg a diya, o mâ‐a běkidi Ru jango, kama ja mepuma ibale na mepuma ibuwa, ka mâ‐a ja babamo na babajo.
20Ka Ru a diya mabo malalo na mepuma mebale, ka mâ‐a ja Sirug.
21Ka Ru a diya, o mâ‐a běkidi Sirug jango, kama ja mepuma ibale na mepuma hěmbwědi; ka mâ‐a ja babamo na babajo.
22Ka Sirug a diya mabo ma mepuma malalo, ka mâ‐a ja Nehâr.
23Ka Sirug a diya, o mâ‐a běkidi Nehâr jango, kama ja mepuma ibale; ka mâ‐a ja babamo na babajo.
24Ka Nehâr a diya mabo ma mepuma mabale na mepuma ibuwa, ka mâ‐a ja Tira.
25Ka Nehâr a diya, o mâ‐a běkidi Tira jango, kama ya mepuma pâkâ na jomu na mepuma ibuwa; ka mâ‐a ja babamo na babajo.
26Ka Tira a diya mabo ma mepuma hěmbwědi, ka mâ‐a ja Ebream, na Nehâr, na Heran.
27¶ Nandi ekadi ndi mbamba ja Tira: ka Tira a ja Ebream, na Nehâr, na Heran; ka Heran a ja Lât.
28Ka Heran a ta o wa o pwanja ya hangwě Tira, o ehe ’aju e jakudwě, o Ur ya Kaldi.
29Ka Ebream na Nehâr ba nângâ bajo o pěl‘ ’abu: dina ja mwada wa Ebream ndi Sera: na dina ja mwada wa Nehâr ndi Milka, mwana wa Heran, hangwě ya Milka, na hangwě ya Iska.
30Ndi Sera a diyakindi ekomba; a‐u diyaka na mwana.
31Ka Tira a nângâ mwan‘ ’aju Ebream, na Lât mwana wa Heran, mwana wa mwan‘ ’aju, na ubâmbi muaju Sera, mwada wa mwan‘ aju Ebream; ka bâ‐ba věngěmě na bâ oviya o Ur ya Kaldi, na ’la o ehe ya Kenean: ka bâ‐ba pâ o ehe ya Keran, ka bâ‐ba diya omě.
32Hwi ja Tira i diyakindi kama ja mepuma ibale na mepuma metano: ka Tira a wa o Keran.
Currently Selected:
Jěnisis 11: BNG1895
Highlight
Share
Compare
Copy
Want to have your highlights saved across all your devices? Sign up or sign in
Published by the American Bible Society in 1895, 1926.
