JONA 1
1
1Nandi ndaga ya Jěhova e pâkindi o Jona ja mwana wa Amitai a jadi, na,
2Umwaka, kěkě o Niniva, mboka tě eněně yâně, wa yamiya yâ; jambojana bobe bwabu bo betindi o boho bwamě.
3Ndi Jona a těměkindi o bokweyakiya pwanja ya Jěhova na‐’la o Tarshish; na mâ na hubaka na‐’la o Jophish; ka mâ‐a duwa bwalo‐bu‘‐’tangani bo kěkě o Tarshish; oviya‐’vaně ka mâ‐a vě ivě ja ’kěndâ, na vamaka bwâ, o bokěkě na bâ o Tarshish oviya o pwanja ya Jěhova.
4¶ Ndi Jěhova A lomakindi upupě uněně o manga, na ukudi mua ngudi na diyaka o manga, ovaně nd‘ o bwalo‐b‘ utangani bo diyakidi bwa bě ona bo ka pěhiyě.
5Jâ ndi ja baduki‐ba‐manga ja banga, na moto wěhěpi na dakakiya eaju anyambě; ka bâ‐ba uhwa jumba i diyakidi o bwalo‐b‘‐utangani o manga, ipanga ja na bo‐hadivake bâ. Ndi Jona a diyakindi a huba o bwalo‐b‘‐utangani o utema mětě; ka mâ‐a nangiya, na yaka viyâ vi‘ ’bihi.
6Ovaně‐nd‘ o ngâwě ya bwalo a vakidi o mâ‐a jadi, na vâkâ na mâ, na, Hi! uyayi viyâ ngâvě‐e! o pikilakiya lě mětě, na? emwaka! dakakiya Anyambě ’âvě, ipě e te e diyaka, na, Anyambě A t‘ A pikilakiya hwě, na hò ninake.
7Na bâ na vâkâ moto wěhě n‘ ugangano muaju, na, Vakani, ho ’hwakeni kwayi, ovaně‐nd‘ o hwě‐ho ka yowě a duwě tina ya njuke tě e jadi o hwě‐ho jadi ekaně. Ba uhwaki kwayi nonaně, na kwayi na kwaka na Jona.
8Jâ ndi jabu ja vâ na mâ, na, Hwa hâhâliděndi âvě, langwakiya hwě, njuke těkaně e lě o hwě‐ho jadi tina na nja? ehavu ’âvě e lě nde? wa viya lě na nja pělě? ehiki ’âvě e lě eve? na nâvě o lě wa nja ’tomb‘ ě?
9Ka mâ‐a vâ na bâ, na, Mbi ndi wa‐Hibru; ndi mbi bangi Jěhova, Anyambě ya oba, e velaki manga na he ya yaheyahe.
10Jâ ndi ja bamo tě ja banga na ngudi eitě, ka bâ‐ba vâ na mâ, na, Eâvě e hadi ekae e lě nde? Jambojana bamo tě ba yowakiděndi na a kweyakiyendi pwanja ya Jěhova, ikabojana a diyakindi a languwa bâ.
11¶ Jâ ndi jabu ja vâ na mâ, na, O pělě ya na manga ma kwake hwě uděmbě, ho hake lě âvě, na? jambojana manga ma lolwakindi n‘ ukudi bo‐lolwaka.
12Ka mâ‐a vâ na bâ, na, Hěhěki ’mba ni, wa ’hwi ’mba ni o manga; vâkâna manga ma kwend‘ inyěni uděmbě; ’kabojana mbi yowuděndi, na, ukudi tě uněně u pândi o inyěni‐o jadi na tin‘ ’amě.
13Nandi‐tombekete, bamo tě ba dukakindi na‐ngudi, itimba jabu o he; ndi ba‐bu yâlâkě; jambojana manga ma lolwaki na bâ n‘ ukudi bo‐lolwaka.
14Ovaně‐nd‘ o bâ‐ba dakakiyedi Jěhova, na vâkâ, na, Jěhova‐O! ho hâhâlâkiděnd‘ âvě, ho hâhâlâkiděnd‘ âvě, hò pelake o pělě ya eměnâ ya momo těkaně, na ò langake hwě makiya ma ha ibě patango: Jěhova‐O!, jambojana Âvě t‘ O hadi ka yâ‐e tândâkid‘ Âvě.
15Ba nângâki Jona nonaně, na uhwaka mâ o manga: na manga na dâkâ ibumba jaju.
16Jâ ndi ja bamo tě ja banga Jěhova na ngudi eitě; na bâ na yambakiya Jěhova mwambo, na haka panga.
17¶ Na Jěhova na kenjakě ejaka eněně e miyakě Jona; na Jona na diyaka o ihuhu ja ejaka tě myehe melalo na mebulu melalo.
Currently Selected:
JONA 1: BNG1895
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1895, 1926.