Kuboka 16
16
Mana na ngwali
1Likundi loka la Aizilaeli laboka ku Elimu baika ku lukoba luku Sinai pikilanda ja Elimu nuku Sinai lisoba la komi nu nhwanu ja mwei wa pili baada jukuhuma ku nndema uku Misili. 2Kulukoba likundi loka la Aizilaeli laalalamikia Musa na Aloni, 3bapwaaga, “Nambanga Bambu Sapanga jukutukomiki pa twabia ku nndema juku Misili kotwatemi kola twakula inyama ni mabumunda mbaka kutupi. Lakini mwanganya mutuletiki kulukoba koni ili mutukoma twaboa ni inzala!” 4Ndi Bambu Sapanga ampwagila Musa, “Nzowania! Nepani naaletila mabumuda gagihabuka kuhuma kunani ngati iyula. Kila lisoba bandu biipita nuku kusanya posu ji lisoba heli kupete indela heji niitenda kwaalenga ili mona ana mbaka biipwata malagalaki gangu au ngabiipwati. 5Lakini lisoba la sita pabiiandia posu jeakusinyi, heji kiibia mala pabeli ja posu ja kila lisoba.” 6Ndi Musa na Aloni baapwagila bandu boha buku Izilaeli, “Pakamii jaalelenu mwiimanya kubanga Bambu Sapanga ndi jojummboiki kuhuma ku nndema uku Misili! 7Kabe kilabu pulukela mwagubona ukolongu waka Bambu Sapanga ndaba jukujowini kung'ong'oteka komunng'ong'atake. Twepani twabani mbaka mutung'ong'otikiaje?” 8Kabe Musa jwapwaga, “Bambu Sapanga jwampekia inyama nkula kila pakamii nu lukela jwampekia mikati nkula nntupila, ndaba jombi jujoini namuna heng'ong'oteka. Twepani twabane mbaka mutung'ong'otikiaje? Mwatulele twepani ila munndelila Bambu Sapanga.”
9Ndi Musa ampwagila Aloni, “Lipwagila likundi loti la Aizilaeli likusanyika palongi jaka Bambu Sapanga ndaba jujowini kung'ong'oteka kwino.” 10Kipindi Aloni pajwabia julonge ni likundi la Aizilaeli, bandu boti balinga ku lukoba na pala pee ukolongu waka Bambu Sapanga watenda kubonikana kumaundi. 11Bambu Sapanga ampwagila Musa, 12“Nukujowini kung'ong'oteka kwa Aizilaeli. Nala waapwagila pakamii biikula inyama nu lukela biikula mabumunda gabagapala. Hapa ndi pa mwiimanya nepani ndi Bambu Sapanga wino.”
13Ndienu pakamii yaika ngwali yingipe iliyekali likundi la Aizilaeli. Pulukela lwaki wapitila ulumi kuyongolota likambi pababiya atemi. 14Ulumi gola pawaboka kulukoba kola yabonikana hindu ipepandau na yanga kutopa. 15Aizilaeli pababona sindu hesi basangaia nukulalukani, “Oo! Senihesi kyane?” Ngasebamanyiki sabia sindu boo. Ndi Musa jwaapwagila, “Ganiaga mabumunda gajummpeki Bambu Sapanga ili nkulaje. 16Bambu Sapanga julagalaki nhenga ana, kila mundu jukusanya posu sesantosa kula. Kila mundu jutondula kutwelake na bandu bajubii nabu nyumba jaki.”
17Ndi Aizilaeli bahenga hela na bangi batondula hingipi na bangi batondula kidogu. 18Lakini boti pabapema kipemu sa dumula bagundua jojutondwi jingi ngase jabia sekijonzukiki na jojutondwi kisokopi ngasesapongwie. Kila jumu jwabia jutondwi posu jejuntosa kula.
19Musa jwaapwagila bandu, “Mundu jokapi jwiigaki posu heji mbaka lukela.”
20Lakini bandu bangi ngasebunnzowania Musa. Bangi baigaki posu jela mbaka pulukela. Lakini pulukela posu heji jabia jiboi nukupia imbeku. Ndi Musa jwaayomila ngamaa bandu. 21Ndi kila pulukela bakusanya posu kila mundu sejwawesa kula. Lioba palakwela kunani na kuba likali posu jengi jela jatenda kunyumanyuka.
22Mulisoba la sita, Aizilaeli bakusanya posu heji mala pabeli dumula ibeli kwakila mundu. Ndi aseja boti bilikundi la Aizilaeli bunzendila Musa nu kunndandi lijambu leheli. 23Musa ampwagila, “Ganga ndi malagalaki gaka Bambu Sapanga, kilabu ndi liibia lisoba lukupomule lejubei Bambu Sapanga kwa ndaba ja bandu kunndumbali. Henu mwakatelika posu jakula lelenu na mwakajosa jengi mkatunza posu jeheji ili mwiikula kilabu.” 24Ndienu, bahenga ahelahela nukujileka posu jengi mbaka kilabu ngati hejwapwaga Musa. Lukela lwaki babona ngasekihalabiki wala kuba ni imbeku. 25Ndi Musa jwaapwagila, “Nkula posu jejaigali lisu ndaba lelenu Lisoba lukupomule lejubei Bambu Sapanga ili kunndumbali. Lelenu nga mpati posu kunza hoku. 26Kwamasoba sita mwiikuba nkusanya posu heji, lakini lisoba la saba yaani Lisoba lukupomule ngakiikube.”
27Lisoba la saba bandu bangi baboka kujenda kutondo posu, lakini ngasebijipatike. 28Ndi Bambu Sapanga ampwagila Musa, “Mwiikana kujetake malagalaki ni miilu jangu mbaka lile? 29Mmanya Bambu Sapanga jumpeki mmbanganya lisoba lukupomule ndi mana lisoba la sita ampeki mikati ja masoba mabeli. Kila jumu kupalika kutama pajubii mu lisoba la saba. Hata jumu ngase jupalika kuboka.” 30Henu, bandu bapomulia lisoba la saba.
31Aizilaeli bijikema posu jejela, “Mana.” Sabia ngati imbeju ya mapemba nhuu nu kunoga kwaki kwabia ngati libumunda lipepandau leajegi busi. 32Musa jwapwaga, “Lende ndi lilagalaki laka Bambu Sapanga, nzukua dumula jimu ja mana na kwaabeke banabii baabiisaliwa, ili awesa kubona posu jenumpekia pa mwabii kulukoba kipindi senummboa ku Misili.” 33Musa ampwagila Aloni, “Jukua nndundu ujegala nkati dumula jimu ja mana nukujibeka palongi jaka Bambu Sapanga, jibia ndaba ja banabii bamwiibeleka.” 34Ndi ngati Bambu Sapanga heanndagalakia Musa, Aloni jwabeka nndundu gogubii na mana gola pandu paasapi palongi jilisanduku li lilagiili ili mana heji bijitunza. 35Aizilaeli bakula mana kwa yaka alubaini, mbaka pabahika pambipi nu mpaka gu nndema juku Kanani kobaaketania bandu atenda kutama. 36Kipemu sa mana dumula nnsesi, na dumula jimu sawa ni kipemu sa efa sekijingi mala komi.
Currently Selected:
Kuboka 16: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
