Kuboka 20
20
Miilu komi
Kukomboka 5:1-21
1Bambu Sapanga jwalongila malobi goha aga, 2“Nepani ndi Bambu Sapanga, Sapanga waku, nenukupia ku nndema juku Misili kogwabi mu utumwa. 3Wiikuba ni isapanga yengi ila nepani pena, 4walilenganake imong'umong'u yi isapanga yiisoli au kimong'umong'u sokapi sekilengana na sindu sekibii kunani kwaka Bambu Sapanga au punndema au mu masi pai ju nndema. 5Wajijinami wala kujilumbali ndaba nepani Bambu Sapanga waku ndi Sapanga nemii na wipu. Naalapu bana kwa ndaba ja mahakau ga atati babu mbaka kibeleku sa tatu na sunsesi sa bandu baanzukila 6Lakini naajangati maelupu gi ibeleku kupete upali waku wanga kujomoka nu kukamu miilu jango.”
7Waalilogo bwaka liina langu Bambu Sapanga, Sapanga waku ndaba nga ngotoki kwaalapu, baatumi liina langu liya.
8Walikombuka Lisoba lu Kupomulela nukuhenga lisoba leheli kuba laka Bambu Sapanga pena. 9Masoba sita guhenga mahengu na gaku goha. 10Lakini lisoba la saba ndi Lisoba lu Lukupomule kwa ndaba ndi lisoba lukundumbali Bambu Sapanga, Sapanga waku. Lisoba heli wiihenga lihengu lokapi, wehapa wala bana baku au aka kamwali baku, wala ntumwa waku mwanalomi au mmbomba, wala kinyama sekitama wala nngeni jojuhikiki mmusi wii. 11Ndaba nepani ndi Bambu Sapanga nabomba kunani nu nndema nu nhanga na yoka yeibii momu kwa masoba sita ndienu napomulia lisoba la saba. Henu, nepani Bambu Sapanga nilipengila lisoba heli ili libiya lukunumbali nepani.
12Waatendila isima anyongo baku na atati baku ili gutama masoba gingipi mu nndema gonugupeke nepani Bambu Sapanga, Sapanga waku.
13Wiikoma.
14Wiitenda ugoni.
15Wiijiba.
16Wankopake nzaku kwiisoli. 17“Wiitokule nyumba juku nzaku wala nhwanu waki wala ntumwa waki mwanalomi au mmbomba wala ng'ombi jaki wala liponda laki wala sokapi suku nzaku.”
Bandu atenda kujogopa
Kukomboka 5:22-33
18Bandu pabajowania kutulami nu kugubona umemi wi kitobi wakanyaka nu kujowane sauti ji imbata panani ji kitombi sesabia sakahuka liyoi, boti bajogupa nu kubagaja. Boti bajema kutali, 19bunndalukia Musa, “Longila na twepani wamwete na twepani twiitenda kugujowane lakini Bambu Sapanga jwiilonge na twepani ndaba ana julongi na twenga twiitenda kuwa.” 20Musa jwaapwagila, “Mwiijogopa ndaba Sapanga juhikiki kunndenga ili nhwesa kunzowane jombi masoba goti na mwiihenga mahakau.”
21Bandu boha babiajemiki kutali, kipindi Musa pajwahegali lihundi lelitopiki lela mo jwabii Bambu Sapanga.
Malagalaki ga pandu pukupiiki matambiku
22Bambu Sapanga ampwagila Musa, “Waapwagila Aizilaeli, ‘Mwabeti mmbweni ana nongi na mwanganya kuhuma kunani kwaka Sapanga. 23Mwiinumbalia nepani kajika jango wala mwaalilenganake isapanga kwa madini ga feza wala ya zaabu. 24Ila mwanganya mwiinzengila kuluombi pandu pukupiiki litambiku, panani jaki mwiimbiikia litambiku li likondoo linu na ng'ombi inu kuba litambiku lukutinyi pa mwotu au litambiku lu lukwali. Mwiihenga hela kila pandu paniitenda kupahagu ili mwanganya nndumbalia nepani nanepani nihika papu ili kumpenge. 25Ana pandu peehapa nzengi kwa malibu, mwiilenganake kwa malibu guku basa ndaba ana ntumi yombu yukubasa malibu ngajikubi jejijetakeka kutumii palongi. 26Wala mwiilenganake pandu pukupiiki matambiku papabii na ngasi jukukwele ili mundu jwajibona heu ja mundu jojukwela panani jaki.’
Currently Selected:
Kuboka 20: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
