Yohaannisi 20
20
Yesuusi akka tootoppaayye xa'e
Maati 28:1-8; Maari 16:1-8; Luqa 24:1-12
1Mekdelitteetase Maariyaami ka sampata teykantanne, a para in qinnin turanne, hawla Yesuusi kapopa ante. Ka ete eeyye kayteeyye, dakase a hawla tura dufame a hawla tura alle' maysame akkite. 2Ka Simoon-Peetiroosi isho tamaarittase a pila a Yesuusi' jaalanno kapopa keerittan ante ka ishootta' kiite, “Ha hawla karaayye, iPoqalla qeeden, umma pora a oppa' xaayen an upno.”
3Sitiiyyi Peetiroosi isho tamaarittase a pila ka ollin sooken ka hawlase kapopa aanen. 4Ishootta lamattiiyyi ollinni hirri, ma tamaarittase a pila Peetiroosi qaranne keeritta' qatte ka paayyota' hawlase kapa kaye. 5Ete xata kide ka hawwlase kara tooynooyye, ohaatase pukka qudan marene eyye ca. Ikka akke diisheey, hawlase karopa in kulline. 6Simoon Peetiroosi ka isha kamma de'e ka hawlase karopa kulle ka ohaatase pukkan maren a eyye kitto akke. 7Ka ohaatase mattopeela Yesuusi qara' maren a dakinta a taakka quda maren kapaayye a xawwi' desa marramte ka eyye kitto akke. 8Kamma' desa tamaarittase a pila, paayyota qaraayye eyye kaye ka hawlase karopa kulleew ka akke ka amane. 9Ma xoori, qaaletase a mataafa qulqulloota' kiinitto, “Tootoppa xaana isha parpaaccisni” ishootta in kalle. 10Se kammaayye tamaarewwasene lakki itiitaawen ka tikkaasso opa kalen.
Yesuusi akka mektelitteetase Maariyaami akkaade
Maati 28:9-10; Maari 16:9-11
11Mekdelitteetase Maariyaami ipooyni ka hawleeyye laka tulan qa'atte ka pooytan xata kiite ka hawlase kelan desa tooyyatte. 12Ka porase a turan pukka Yesuusi oppa co oppaayye, erkampattowwa a Waaqa lakki a mehadda a'ata kalsade, a takka mattaanne takka ka loqqaan kute'e akkite. 13Ishootta ka Mariyaami' kidene, “Atti iskatteetayti, maana malla' pooyni?”
Isheetta ka kiite, “Ha Poqallaayyo qeeden, umma pora a oppa' xaayen anti an upo.”
14Ka ete asse kiite, iskamman desa tiitaawte ka Yesuusi a eyye' qa'anno akkite. Umma akkima Yesuusi kodde in upnaanne. 15Yesuusi ka isheetta' kide, “Iskatteetayti, maana'e' pooyni? Ka ayno faani?”
Isheetta qaraayye aappase a dulaseti, ikka ishi' kiite, “Poqallaay, oton ke qeedeeyye, pora a oppa' xaayte ana' lele, an ka teyyado.”
16Yesuusi ka isheetta' kide, “Maariyaami!”
Isheetta ka ishopa desa tiitaawte ka afa Iprutin ishi' kiite, “Rapuuni!” Se kideese nefo, kollissampayto kideeta.
17Yesuusi ka isheetta' kide, “Anti ata Aappinno kapopeela an anneey, ana quda in kokan ma hellaanno kapopa aane ka ishootta' kide, ‘Yesuusi ikiini, anti isase Aappinno ka Aappaayshin kodde ka Waaqiyyo ka Waaqaayshin kodde kapopan moontopa fayyada.’”
18Mektelitteetase Maariyaami ka tamaarewwasene a Yesuusi kapopa ante ka akkima Poqalla akkite, ikka asse ishi' haasawade ishootta' lelte.
Yesuusi tamaarewwa tura'e akkaade
Maati 28:16-20; Maari 16:14-18; Luqa 24:36-49
19Torpoosen oppaayyeew kuyyaata paayyotatiiyyi sampata, kalakalaayye, tamaarewwaadi ukkumampaya Yihuta fuura minanne, xarrada dufaden ka tika karopa ollopa ooren; a xarrada dufamaan caaneeyye, Yesuusi tikase a tamaarewwaadi kelopa ollopa ooren kelopa kulle ka otantaaysho oppa' qaade ka ishootta' kide, “Nakayta a ishina' koddo!” 20Ka asse kide ka harkaadi isho qinittaadi ishootta akkishe. Tamaarewwasene, ete Poqalla akkeneeyye, ixasooden. 21Sekkammaayye Yesuusi ka a lammattati ishootta' kideewwe, “Nakayta a ishina' koddo! Akka Waaqa Aappa ana erke mina'e anti nefo, ishin erkaaw.” 22Ka asse kide ka ishootta qara “uf” kide ka kide, “Hapura Qulqulloota' teyyada. 23Ishina oton ijuppoota orra' diinnittaneeyye, i'ishootta diisamta; oton xoori juppoota orra a diinni a kinniniiyyi, ishootta in diisamto.” #Maati 16:19; 18:18
Yesuusi isho Toomaasi
24Yesuusi ete tamaarewwaadi kapopa de'eyye, Toomaasise Didimoosi kidammo, tamaarewwasene kudanka lakkippa takka kodde, sitiiyyi ishootta olli in co. 25Tamaarewwa a taakane ka Toomaasi' kidene, “Ha Poqallan akkine.”
Isha' xoori i'ishootta' kide, “Hakan harkoosen xaadi mismaaran toommame akko ka qupittiyyo porroosen mismaaran toommame karopa kullisho ka harkiyyo faykitteetase a qinittaadi karopa kullisho maliiyyi, an amano.”
26Kuyyaata sette kammaayye tamaarewwaadi a lammattati tikase kela caaneew. Toomaasi kuli ka ishootta olliiyyiiw ca. A xarrada dufamaan caaneeyye, Yesuusi ka otantaaysho oppa'e qa'ade ka kide, “Nakayta a ishina' koddo!” 27Ka se kammaayye, Toomaasi' kide, “Qupittaaytin xooye ka harkaayyo tooyye ka harkaayti daashe ka qinittiyyo karopa kullishe ka amane diisheey, nama amanteeta in qapnin in koddan.” 28Toomaasi ka ishi oorshe ka kide, “Poqallaayyo ka Waaqiyyo!”
29Yesuusi ka Toomaasi' kide, “Atti' qoota ana akkite malla amante, ma orra a ana in akkinin maliiyyi ana amanno, sakame.”
Mataafose wa malla taafame
30Yesuusi wa orra qawwanna lekaya a mataafoose kara in taafammini'i tamaarewwaadi tura' kode. 31Ma xoori Yesuusi akkiman Kiristoosi kodde akka amanttan ka amanteetan maxxaadin caatta parapara akkattan malla sede taafamte.
Currently Selected:
Yohaannisi 20: MaQu
Highlight
Share
Copy
Want to have your highlights saved across all your devices? Sign up or sign in
