Los Hechos 15

Ndi̱kitaꞌan na kándixa Jesús ndóo ñuu Jerusalén ya ndituꞌun taꞌan na

1Suvi tiempo ndi̱xiyo ra Pablo xiꞌin ra Bernabé ñuu Antioquía kua ndi̱xaa sava nda ndíkun Jesús, nda ke̱e estado Judea. Ndi̱kaꞌan nda xiꞌin nda kándixa Jesús ya xíniñuꞌu ndikunuu tuni Ndioxi nda tá káꞌan ya ta̱a ra Moisés, chi tá ná ïkan nda saa ta küchiñu nda kaku nda.

2Ta saa xa̱á ra Pablo xiꞌin ra Bernabé ndáꞌi ni nda xiꞌin nda ikán, chi süvi ya ndaa kua sínaꞌa nda. Ñaa ndi̱taꞌnda chiñu kuꞌun ra Pablo xiꞌin ra Bernabé xiꞌin inka ka nda ndíkun Jesús ya kuꞌun nda ñuu Jerusalén xaa nani nda chiñu ikán xiꞌin nda apóstol tin na xikuaꞌa veꞌe ñuꞌu ikán.

3Saa ti̱ꞌvi na veꞌe ñuꞌu Antioquía nda kuaꞌan nda ñuu Jerusalén. Tá kuaꞌan nda ta ndi̱yaꞌa nda estado Fenicia xiꞌin estado Samaria. Iin iin ñuu ikán ndi̱yaꞌa nda ndítuꞌun nda xiꞌin na ndíkun Jesús ya xa kuaꞌa ni na köo kúu judío ndíkundikun ichí Ndioxi. Saa kúsini ni na ikán xaꞌa ya xíni soꞌo na káꞌan nda xiꞌin na.

4Ñaa ndi̱xaa ra Pablo xiꞌin ra Bernabé tin nda kuaꞌan xiꞌin ra. Ndi̱xaa nda ñuu Jerusalén, ta ndiꞌi na ndíkun Jesús xiꞌin nda apóstol tin na xikuaꞌa veꞌe ñuꞌu vaꞌa ka vi ndi̱kuiso ñaꞌa na. Ta ndi̱tuꞌun ndiꞌi ra Pablo xiꞌin na ya i̱kan Ndioxi xiꞌin nda nuu ndi̱xaꞌan nda xa̱a súvi nda chiñu ra. 5Ta saa ndóo sava nda fariseo nda ndíkun Jesús ta ndi̱kundita nda káꞌan nda, káchi nda saa:

―Na köo kúu judío ta xíniñuꞌu na ndikunuu tuni Ndioxi na, saa xíniñuꞌu na xaa súvi na ya ta̱a ra Moisés xinaꞌa ―káchi nda.

6Saa ndi̱kitaꞌan nda apóstol xiꞌin na xikuaꞌa, xa̱á xáa nani vaꞌa na ndá kuꞌva íyo xaꞌa ya ikán. 7Naꞌá ka vi ndi̱tuꞌun taꞌan na, ñaa ndi̱kundichi ra Pedro xa̱á ra káꞌan ra xiꞌin na, káchi ra saa:

―Ndóꞌo̱ na taꞌan yo, xa xíni mií ndo ndá kuꞌva ndi̱kaxin Ndioxi yeꞌe kaꞌan ndoso i tuꞌun vaꞌa xaꞌa Jesús xiꞌin na köo kúu judío ya kuni soꞌo na ya, ta saa kandixa na ra. 8Ta Ndioxi ku ra xíni ndiꞌi ya íyo nima ivi, ta iin káchi ta̱xi ra Tachi I̱í ra ndaꞌa yo na kúu judío xiꞌin na köo kúu judío. Tá kuꞌva i̱kan ra xiꞌin yoo saa i̱kan tu ra xiꞌin na ikán va. 9Chi nuu Ndioxi ta iin ndáa yaꞌvi ndiꞌi va yo. Tá kúꞌva nda̱sa yaa ra nima yoo saa nda̱sa yaa tu ra nima na ikán va, xaꞌa ya ndáa ini na xíni na ra. 10Ta ¿ndachu tuun ni ini ndo köo xíin ndo kandixa ndo Ndioxi ya ndi̱kuiso ra na, saa káꞌan ndo xaa súvi na ley Ndioxi. Ta nda ni mií yo xiꞌin xii sikua yo ta köo ndikuchiñu yo xaa súvi yo ley ikán. 11Ta xa xíni yo süvi ya ikán kua ndi̱sikaku yoo, chi xaꞌa ya kándixa yo Tata yo Jesús va kua síkaku uun ra yoo ta saa síkaku tu ra na ikán va ―káchi ra Pedro xiꞌin na.

12Ñaa vaꞌa ka ku̱taxin yuꞌu nda, ta xa̱á nda xíni soꞌo nda ya káꞌan ra Pablo xiꞌin ra Bernabé. Ndítuꞌun nda xiꞌin na xaꞌa yatuꞌun ndee ni i̱kan Ndioxi xiꞌin naꞌa tá ndi̱xaꞌan nda ndi̱kaꞌan ndoso nda tuꞌun ra xiꞌin na köo kúu judío. 13Tá sindiꞌi nda ndi̱kaꞌan nda, ta saa xa̱á inka ra Jacobo káꞌan ra xiꞌin na, káchi ra saa:

―Na taꞌan yo, kuni soꞌo ndo ná kaꞌan i xiꞌin ndo. 14Xa xi̱ni soꞌo yo ya ndi̱kaꞌan ra Simón Pedro xiꞌin yo xaꞌa na köo kúu judío ndá kuꞌva kua ndi̱kuiso Ndioxi na tá núnu̱ú ya kundikun na ra, saa ndu̱u na ñuu ra, ndi̱kunuu kivi ra xiꞌin na. 15Tuꞌun ya ndi̱kaꞌan ra xiꞌin yo ta iin káchi káꞌan ya xiꞌin ya ta̱a nda ndi̱kaꞌan ndoso tuꞌun yuꞌu Ndioxi xinaꞌa, káchi ya saa:

16Vaxi tiempo ta iin kivi ndiko koo i,

ndasa xa̱á tuku i veꞌe ra David ya xa ndi̱ꞌi xaꞌa.

Saa sindaꞌa ndiꞌi i ya xa ndi̱ꞌi xaꞌa.

Ta sikuaꞌa tuku i veꞌe xa̱á ndikundichi ya.

17Saa ikan i ya vaꞌa nduku ndiꞌi na judío yeꞌe,

Ta saa tu ndiꞌi na köo kúu judío va, na ndi̱kaxin i xiꞌin ndee kúu mií kivi i.

18Soꞌva káchi Iva yo Ndioxi ndi̱kaꞌan ra xaꞌa ya yóꞌó xinaꞌa chi mií ra ku ra táxi kundaa ini naꞌa xaꞌa ndiꞌi ñaꞌa ―káchi ra Jacobo xiꞌin na.

19Saa ndi̱kaꞌan ka ra xiꞌin na, káchi ra saa:

―Xi̱ni soꞌo ndo unkua ndi̱kaꞌan Ndioxi xinaꞌa, ta saa tu yeꞌe va káꞌan i xiꞌin ndo: Köo xíniñuꞌu ka yo sindiꞌi yo ini na köo kúu judío, na ndíkundikun ichí Jesús. 20Vaꞌa ná taa yo iin tutu kuꞌun ndaꞌa na nuu kaꞌan yo xiꞌin na ya küvi kuxi na ñaꞌa ya táxi naꞌa ndaꞌa naꞌna ya káꞌan na kúu ndioxi. Ta ni iin taa ta küvi kiꞌvi ra xiꞌin inka ñaꞌa tá tu süvi yá síꞌi ra ku yá, saa tu ná ñaꞌa va tá tu süvi ií ná ku iin taa, ni kiti ndíxita na sukun küvi kuxi na, ni nií ri küvi kuxi na, kachi yo xiꞌin tutu tiꞌvi yo kuꞌun ndaꞌa na köo kúu judío. 21Saa kaꞌan yo xiꞌin na chi xa kuaꞌa ni na xíni unkua káꞌan ley ya ta̱a ra Moisés, saa chi xinaꞌa vi íyo ya ikán, káꞌvi na ya veꞌe ñuꞌu sinagoga ndiꞌi saa kivi i̱í ya ndíkundee yo ―káchi ra Jacobo xiꞌin na.

22Saa ndi̱xinu ini nda apóstol xiꞌin na xikuaꞌa tin ndiꞌi ka na ndíkun Jesús, ñaa ndi̱kaxin nda sava nda taꞌan nda ya kuꞌun nda xiꞌin ra Pablo tin ra Bernabé ndaka nda tutu ikán ndaꞌa na köo kúu judío ndóo ñuu Antioquía. Ta nda ndi̱kaxin na ikán ku ra Judas, ra káꞌan na xiꞌin Barsabás, xiꞌin inka ra Silas. Nda kúnaꞌnu nuu na ndíkun Jesús ku nda ikán. 23Ta tutu ya ti̱ꞌvi nda kuaꞌan xiꞌin nda ikán káchi ya saa:

“Ndeꞌe apóstol xiꞌin na xikuaꞌa tin ndiꞌi ka na taꞌan yo na ndíkun Jesús chíndee ni nde ndóꞌo̱ na taꞌan yo, ndóꞌo̱ köo kúu judío ndóo ñuu Antioquía estado Siria tin Cilicia. 24Ku̱ndaa ini nde xaꞌa sava nda taꞌan nde ndóo ñuu Jerusalén yóꞌó ya ndi̱xaꞌan nda kéꞌe nda ndóꞌo̱, sáka nda ini ndo, káꞌan nda xiꞌin ndo ya xíniñuꞌu ndo ndikunuu tuni Ndioxi ndóꞌo̱, ta xaa súvi ndo ley ya ta̱a ra Moisés, káchi nda xiꞌin ndo. Ta kúni nde kundaa ini ndo, chi ndeꞌe ta köo ndi̱taxi nde ichí ndaꞌa nda xaa nda kaꞌan nda xiꞌin ndo. 25Xaꞌa ya ñaa kua ndi̱kitaꞌan nde ndi̱tuꞌun taꞌan nde xaꞌa ya ndi̱kaꞌan nda xiꞌin ndo. Ta ndi̱kani ini nde tiꞌvi nde sava nda taꞌan nde xaa nda xiꞌin ra Pablo tin ra Bernabé chi kúꞌvi ni ini nde xíni nde nda yóꞌó. 26Ta nda yóꞌó xa ndi̱taxi ndiꞌi nda mií nda xaꞌa kivi Tata yo Jesucristo, ta köo íꞌvi nda kuvi nda xaꞌa ra. 27Ta tíꞌvi tu nde ra Judas xiꞌin ra Silas xaa nda nuu ndo. Ñaa kaꞌan nda xiꞌin ndo, ndíkani nda nuu ndó nda kuꞌva káꞌan tutu yóꞌó. 28Iin yuꞌu ku nde xiꞌin Tachi I̱í Ndioxi ya sïkuiso vee nde ndóꞌo̱ xiꞌin inka ka chiñu, ndisaa ya yóꞌó kua xíniñuꞌu ndo xaa súvi ndo: 29küxi ndo ñaꞌa ya táxi na ndaꞌa naꞌna ya káꞌan na kúu ndioxi. Ni ni̱í kiti küxi ndo. Ni ri ndíxita na sukun küxi ndo. Ta ni kïꞌvi ndo xiꞌin ñaꞌa tá tu süvi yá síꞌi ndo ku yá, ta saa tu ná síꞌi va tá tu süvi ií na ku taa. Tá xáa súvi ndiꞌi ndo ya yóꞌó ta vaꞌa ni íkan ndo. Ta ya yóꞌó ku ndiꞌi ya káꞌan nde xiꞌin ndo, ná koo vaꞌa ni ini ndo”, káchi nda apóstol xiꞌin tutu ikán.

30Saa ke̱e nda ikán kuaꞌan nda xiꞌin tutu nuu na köo kuu judío ndóo ñuu Antioquía. Tá ndi̱xaa nda xiꞌin ya ta xa̱kin nda iin junta nuu ndi̱kitaꞌan ndiꞌi na veꞌe ñuꞌu ya kaꞌvi na tutu ikán. 31Saa ka̱ꞌvi na ya. Tá ndi̱ꞌi xi̱ni soꞌo na ya káꞌan ya ta saa ku̱sini ni na. 32Ta ra Judas xiꞌin ra Silas ku nda káꞌan tuꞌun yuꞌu Ndioxi, yakan vaꞌa ndi̱kaꞌan nda xiꞌin na si̱ndiko nda ini na, ta vaꞌa ka vi ku̱ni na xiꞌin tuꞌun ya ndi̱kaꞌan nda, kúsini ka vi na. 33Ta nda ndi̱xaꞌan xiꞌin tutu ikán ndi̱ndoo nda ndi̱xiyo nda uvi ndaá kivi xiꞌin na. Sindiꞌi saa ndi̱kaꞌan ndioxi na ndíkun Jesús xiꞌin nda ya ndiko koo nda nuu ke̱e nda.

34Sundi ra Silas ta ndi̱kani ini ra ndoo ra ñuu ikán. 35Saa tu ra Pablo va xiꞌin ra Bernabé, ndi̱ndoo tu nda ikán va ñuu Antioquía, sínaꞌa nda tuꞌun Ndioxi, ta káꞌan ndoso nda tuꞌun vaꞌa xaꞌa Tata yo xiꞌin kuaꞌa ni naꞌa.

Ichí uvi ke̱e tuku ra Pablo kuaꞌan ra kaꞌan ndoso ra tuꞌun Ndioxi ta ndi̱taꞌvi taꞌan ra Bernabé xiꞌin ra

36Saa ku̱u ndi̱yaꞌa uvi ndaá kivi ta ndi̱kaꞌan ra Pablo xiꞌin ra Bernabé, káchi ra saa:

―Ná koꞌyo ñuu nuu ndi̱xaꞌan yo ndi̱kaꞌan ndoso yo tuꞌun Iva yo, koto yo án ndóo vaꞌa na taꞌan yo na ndíkun Tata yo ―káchi ra.

37Saa kúni ra Bernabé kuꞌun tuku ra Juan Marcos xiꞌin nda. 38Ta köo ndi̱xiin ra Pablo kuꞌun ra ikán xiꞌin nda, chi tá ndi̱xaꞌan núnu̱ú nda ta si̱ndoo ra nda estado Panfilia saa ndi̱ko koo ra kuanuꞌu ra, ta köo ndi̱xaꞌan ra xaa chiñu ra xiꞌin nda. 39Xaꞌa ra Juan Marco ikán ta xa̱á káni taꞌan nda xiꞌin tuꞌun, ta köo ndi̱kuchiñu xinu tuꞌun nda. Ñaa vaꞌa ka ta̱ꞌvi taꞌan nda. Ra Bernabé xiꞌin ra Juan Marcos nda̱a nda itun barco kuaꞌan nda ñuu Chipre ya ndíkaa ñuꞌú íchi maꞌñu nduta ñûꞌu. 40Ta inka ra Pablo ndi̱kaxin ra Silas kuaꞌan xiꞌin ra. Saa ndi̱kaꞌan na ndíkun Jesús xiꞌin Ndioxi xaꞌa nda ya ná kiꞌin ra kuenta xiꞌin nda, saa ndi̱kiꞌin nda kuaꞌan nda. 41Ndi̱yaꞌa nda estado Siria xiꞌin estado Cilicia ndi̱kaꞌan nda xiꞌin na ta̱xi nda ndee ndaꞌa na veꞌe ñuꞌu ndóo ikán.

Currently Selected:

Los Hechos 15: xta

Highlight

Copy