San Lucas 21

Xuꞌun ta̱xi yá ndi̱ndoo ndaa

(Mt. 12:41-44)

1Tá ndíkaa Jesús veꞌe ñuꞌu ta xíto ra yáꞌa naꞌa kuaꞌan na, táan na xuꞌun ini ñaꞌa nuu kée xuꞌun. Ta na kuika kuaꞌa ni xuꞌun táan na. 2Saa xi̱ni tu ra ndi̱yaꞌa iin yá ndi̱ndoo ndaa chíkaa yá uvi xuꞌun, ta loꞌo ni ndáka ya. 3Ñaa ndi̱kaꞌan ra xiꞌin na ndóo yati xiꞌin ra, káchi ra saa:

―Ya ndaa káꞌan i xiꞌin ndo, kuaꞌa ni ka ya ta̱an yá yóꞌó nuu ndiꞌi ya ta̱an na kuika. 4Chi na kuika ra, vani kuaꞌa ni xuꞌun táan na ta ya ndóo ndoso ndaꞌa va na kua táan na. Sundi yá yóꞌó, ta ta̱an ndiꞌi yá xuꞌun ya kúu mií yá táku yá ―káchi Jesús xiꞌin na.

Káꞌan Jesús xaꞌa veꞌe ñuꞌu kaꞌnu ya ndiꞌi xaꞌa ya

(Mt. 24:1-2; Mr. 13:1-2)

5Saa káꞌan sava na xaꞌa veꞌe ñuꞌu ikán, ya latun ni yu̱ú ndi̱kuaꞌa ya, ta kuaꞌa ka vi ñaꞌa luvi táxi naꞌa ndaꞌa Ndioxi kúu mií ya, káchi na. Ta saa ndi̱kaꞌan Jesús xiꞌin na, káchi ra saa:

6―Luvi ni veꞌe ñuꞌu yóꞌó, káchi ndo, sundi vaxi kivi ta ndiꞌi xaꞌa ndiꞌi ya. Ni ñaꞌa luvi kúu mií ya vitin ta ndiꞌi yaa xaꞌa ya. Nda iin yu̱ú xaꞌa ya ndöꞌo ka ―káchi Jesús xiꞌin na.

Ya kuu tá xa ku̱yati ndiꞌi xaꞌa ñuu ivi

(Mt. 24:3-28; Mr. 13:3-23)

7Saa ndi̱ndakan tuꞌun sava na ra, káchi na saa:

―Tata Maestro, ¿maa kua kuu saa? ¿Unku ya koo seña kuni nde tá xa ku̱yati ti̱ndaa tiempo ndiꞌi xaꞌa veꞌe ñuꞌu yóꞌó? ―káchi na xiꞌin ra.

8Ta saa ndi̱kuiin Jesús, káchi ra saa:

―Kuenta ni koo ndo ya ná sïndaꞌvi naꞌa ndóꞌo̱. Saa chi kixi sava taa sindaꞌvi nda ndóꞌo̱, kaꞌan nda xiꞌin ndo, nda ikán ku nda ti̱ꞌvi Ndioxi vaxi sikaku na ñuu ivi yóꞌó, kachi nda. Ta saa kaꞌan tu nda, xa yati ni ti̱ndaa tiempo, kachi nda xiꞌin ndo. Ta kündikun ndo nda. 9Tá xa̱á xíni soꞌo ndo íyo kuachi yóꞌó tin kaá, ta ku ïꞌvi ndo, saa chi nduxa koo ndiꞌi ya yóꞌó, sundi täꞌan vi tindaa kivi ya ndiꞌi xaꞌa ñuu ivi.

10’Kuaꞌa ni ñuu koo kuachi, kani taꞌan na ñuu naꞌnu xiꞌin inka na ñuu naꞌnu, ta saa tu ñuu nuu íyo nda rey, kanitaꞌan nda xiꞌin inka nda rey. 11Ta ìyo ni kuu, kuaꞌa ni ñuu taan, saa koo tu tama va, koo kuaꞌa ni tu nuu kueꞌe va. Saa koo tu seña nuu ndivi va, ìyo ni kuu ku iꞌvi ni naꞌa.

12’Sundi xiꞌna ndoꞌo ni ndóꞌo̱, saa yaꞌa ya ñaa. Xaa nduvaꞌa ni na xiꞌin ndo. Taxi na kuachi xaꞌa ndo nuu na naꞌnu veꞌe ñuꞌu sinagoga, taan na ndóꞌo̱ veꞌe kàà tin taxi na kuachi xaꞌa ndo kuꞌun ndo nuu na veꞌe chiñu án nuu nda rey. Xaꞌa ya ndíkun ndo sata i kua ikan na saa xiꞌin ndo. 13Tá ndi̱xaa ndo nuu na chiñu ikán ta kuchiñu ndo ndituꞌun ndo tuꞌun vaꞌa xaꞌa i xiꞌin na. 14Kündiꞌi ini ndo xaꞌa tuꞌun kaꞌan ndo xiꞌin na, 15chi mií i chindee ndóꞌo̱, taxi i tuꞌun ndaꞌa ndo kaꞌan ndo xiꞌin na. Ndíchi ni koo tuꞌun taxi i ndaꞌa ndo kaꞌan ndo xiꞌin na ta ni küchiñu na ndikuiin na yuꞌu ndo, chi vaꞌa ni kaꞌan ndo. 16Nda na iva siꞌí ndo án na taꞌan ndo xiꞌin na veꞌe ndo tin migo ndo, taxi na kuachi xaꞌa ndo nuu na chiñu. Ta sava ndo kaꞌni na ndóꞌo̱. 17Kundasi ni nuu na kuni na ndóꞌo̱, xaꞌa ya ndíkun ndo yeꞌe. 18Sundi Ndioxi ta kundaa ni ra ndóꞌo̱, nda ixi xiní ndo täxi ra ndiꞌi xaꞌa. 19Yakan ndóꞌo̱ ta xaꞌa ndee ni ini ndo saa kuchiñu ndo sikaku ndo ya vaꞌa ndo.

20’Tá xi̱ni ndo iin ndi̱kava nduu ndiꞌi nda lapa nuu ñuu Jerusalén yóꞌó, ta saa kundaa ini ndo kama ni ndiꞌi xaꞌa ya. 21Tá ti̱ndaa kivi ikán, ta vaꞌa ka ná kunu na ndóo ñuu Judea kuꞌun na chí iku, ta na ndóo ñuu Jerusalén ta ná kunu na kuꞌu na, ta na ndóꞌni iku ta ná ndïko koo ka na ñuu. 22Saa chi ndee ni ìyo kuu koo kuachi, saa ndoꞌo ni ndóꞌo̱ ñuu Jerusalén ikan Ndioxi. Ta ikán ku nuu xinu ndiꞌi ya ta̱a nda ndi̱kaꞌan ndoso tuꞌun yuꞌu Ndioxi xinaꞌa. 23Saa ná ñaꞌa ñúꞌu seꞌe án ná chíchin seꞌe kivi ikán, ndaꞌvi ni ná chi ndee ni kuu. Saa chi yáꞌa ni ndee kuu ñuu ivi, ta saa ndee ni ndoꞌo na ñuu Jerusalén yóꞌó. 24Saa koyo sava na kuvi na xiꞌin i̱chi. Ta sava na tiin taku nda lapa na kuꞌun na xiꞌin nda ndiꞌi ni kúu ñuu. Ta na inka ñuu, na köo xíni Ndioxi ku na kixi sindiꞌi xaꞌa ñuu Jerusalén yóꞌó. Saa kuu ndakua xinu ndiꞌi ya ndi̱kaꞌan Ndioxi ―káchi Jesús xiꞌin nda.

Kuaꞌa ni ya kuu tá xa ku̱yati ndiko koo Jesús ñuu ivi

(Mt. 24:29-35,42-43; Mr. 13:24-37)

25Ñaa ndi̱kaꞌan ka Jesús, káchi ra saa:

―Tá xa ku̱yati ndiꞌi xaꞌa ñuu ivi, ta koo seña nuu ñu̱ꞌù tin yoó xiꞌin kimi. Ndiꞌi na ivi ta ku iꞌvi ni na xaꞌa ndiꞌi ya kuu. Iin saka soꞌva ini na, ni kündaa ini na unkua ikan na chi kini ni ìyo ndaꞌi nduta ñûꞌu tin kandeta ni nuu rá. 26Sava na kuvi ndiuu na xaꞌa ya ìyo ni kuu ñuu ivi, chi nda kiti kimi ta kanda ni ri. Tá kúu nuu táan, saa kuu nuu ndivi. 27Tá sindiꞌi ikán, saa kuni ndiꞌi naꞌa yeꞌe, Taa ra xa̱a ñuu ivi yóꞌó, kuni na ndiko koo i kixi i xiꞌin viko kixi i, ta ndee ni koo ya yéꞌe̱ ná kixi i. Nda tá káa iin ra rey, ra chee, saa koo i kixi i, chi kixi ndee Ndioxi xiꞌin i. 28Tá xa̱á kúu ndiꞌi ya ndi̱kaꞌan i xiꞌin ndo ta kusini ndo ndikundita ndaku ndo ta ndaniꞌi xíni ndo chi xa ku̱yati ni tindaa kivi ya kixi i chindee i ndóꞌo̱ ta nda iin ka ya ndöꞌo ndo ―káchi Jesús xiꞌin na.

29Saa ndi̱kaꞌan ka ra iin tuꞌun ndíchi xiꞌin na káchi ra saa:

―Vaꞌa koto ndo ndaꞌa itun higo tá kúun kuiꞌi ndaꞌa nu án ndá ka itun. 30Tá xíto ndo vaxi nana iku nu ta káchi ndo: “Xa ku̱yati xaa savi”, káchi ndo. 31Tá vaꞌa kúndaa ini ndo ndá seña kua táxi itun, ta saa kundaa tu ini ndo xaꞌa seña ya kuu, kundaa ini ndo xa ku̱yati kivi kaꞌnda chiñu Ndioxi.

32’Ndixa káꞌan i xiꞌin ndo, na ndóo vitin ta kuni nduxa na seña ya koo nuu ndivi tin ñuu ivi. 33Vaxi tiempo ta ndiꞌi xaꞌa ndiꞌi ñuu ivi yóꞌó tin ndivi, sundi tuꞌun i ta nda iin ya ndïꞌi xaꞌa, xinu ndiꞌi ya.

34Yakan kuenta ni koo ndo xiꞌin mií ndo, ta kündiꞌi ini ndo xaꞌa viko nuu kuxi ndo tin koꞌo ndo, ni kündiꞌi ini ndo xaꞌa ñaꞌa ya ndíꞌi ni ini na köo xíni Ndioxi. Koo tuꞌva ndo saa chi iin kuu soꞌva ndikava kivi ikán sata ndo. 35Saa chi tá káa yoꞌó ya síkuikun na kiti, iin kúu soꞌva tíin na ri, ta saa koo tindoꞌo ya vaxi sata na ñuu ivi yóꞌó. 36Xíniñuꞌu ndo koo nduvi ndo, ndinuni kaꞌan ndo xiꞌin Ndioxi ndiꞌi saa tiempo ya ná ndöꞌo ndo saa, ta kuchiñu ndo kaku ndo nuu ndiꞌi tindoꞌo ya vaxi ñuu ivi. Ta saa kuchiñu ndo kundita ndo ndikuiso ndo yeꞌe, Ra xa̱a ñuu ivi yóꞌó ―káchi Jesús xiꞌin na.

37Ndiꞌi kivi sínaꞌa ra naꞌa. Nduvi sínaꞌa ra na ini veꞌe ñuꞌu kaꞌnu ñuu Jerusalén, ta ñûu kuaꞌan ra ndóo ra kíxi ra iku ya náni Olivo. 38Ta naꞌa ni ndíkoo naꞌa kuaꞌan na veꞌe ñuꞌu kuni soꞌo na káꞌan Jesús.

Currently Selected:

San Lucas 21: xta

Highlight

Copy