लुका 13
13
पस्ताप अथबा बिनास
1ओउबेलाहाङ केहि मान्तालम हुम्ति येसुकाय तोआकानि, “परमेस्वरकाय भोक बइतिमुओ बेलाहाङ पिलातसइ गच्युक जना गालिलिलमकाय साताकान र ओउमयको वुइ भोक बयो वुइकुस ल्याह्वाकान!”
2येसुइ ओउमयकाय तोसास्यावा, “ओउतहाइति सातो ओउ गालिलिलम दोह गालिलको अरु जुदा मान्तालमसय नाःतो पापि खेइतो त निङ म्हर्तेनय? 3ओउत जुगाङमा खेल, ङाइ निङकाय तोनेनाङ्स, ल-लयको पापकाय चिःति फेतेनिलि त खेया, निङमा ओउतले म्हेत्ति वाइतेनय। 4जब सिलोम त तोओ थाउहाङ धरहरा ओल्ति अथार जना मान्तालमकाय साताथास, ओउमयको बारेहाङखे दोह तोसा त? ओउ सिओ मान्तालमखे यरुसलेम सहरहाङ याको अरु मान्तालमसय नाःतो दुस्त खेइतो त दाह्य्ति दोह निङइ दाह्य्सा खाइतेनानि र? 5ओउतमा जुगाङले खेल, र ङाइ निङकाय तोनेनाङ्स, यदि निङ लयको पाप चिःति द्याह्न्तेइलि त खेया, निङ जुदा ओउमय सिओ लेखाले सितेनय।”
साय साइमालो न्याम्सि सिङको ल्हाकराय
6ओहाङसय येसुइ ओउमयकाय यातज्यो ल्हाकराय तोसास्यावा, “यातचाक मान्ताइ लयको राङहाङ यातबोत न्याम्सि सिङ सुकाकान। ओउ बर्सयपिछि न्यामसाय साया खेचा त म्हर्ति योलाङ वाङ्तो, तर दोहमा दोःआक्ल। 7ओउतझ्यान्ते ओउइ राङहाङ काम जाह्ङो मान्ताकाय तोआकान, ‘इहाङ योउ! इ न्याम्सि सिङहाङ न्यामसाय साया खेचा त दाह्य्ति ज्यालो सुम बर्सहाङसय देङेसम्म योआलाङ, तर यातज्यो न्यामसाय सायोमा ङाइ च्यउङल। इ सिङकाय खाह्म्ति ओल्ति वायु! दोह सायमा साइल त खेया, सालाङ्खा धइति इ सिङ स्यास्ति गम्सा र?’
8 तर ओउ मान्ता त्याङा, ‘मालिक, न्याम्पुकसम्म मुआक्पा या। ङाइ इ सिङको वेःसय-ङोइसय द्याःउति मल काति बइनाङ। 9यदि न्याम्पुकसम्महाङ साय साइना त खेया, पेतोले स्याउना। तर खेल, दोह सायमा साइल त खेयाकायखे नाङइ तोओलेखाले तात्ति वाइचाङ।’”
येसुइ यहुदि धोओ दिनहाङ गिङ गोङो मोम्चोकाय स्याक्ताक्सास्यावो
10यातपल्त यहुदि धोओ दिन, यातज्यो सभाकिमहाङ येसुइ मान्तालमकाय स्यान्सास्याउधय खेतो। 11ओहाङ अथार बर्सहाङसय दुस्त ग्वालामइ ङाइति बिरामि स्यावो यातचाक मोम्चो खेतो। ओउतझ्यान्ते ओउको गिङ गोङो खेतो र ओउइ धेङतो चिङसा खायाकुलु। 12येसुइ ओउ मोम्चोकाय च्यउति, लयको ङ्हा गोत्ति तोसास्यावा, “मोम्चो, नाङ देङे लयको रोगसय स्याक्तेआ।” 13अनि येसुइ ओउको गिङहाङ लयको क्रुतइ धिन्सास्यावा र धिन्नातासले ओउ धेङतो चिङा, र ओउइ परमेस्वरको प्रसङ्सा जाह्ङ्सा फाःङाकान।
14तर यहुदि धोओ दिनहाङ ओउ मोम्चोकाय स्याक्ताको च्यउति सभाकिमको हाकिमि रिस वाङा। स्याक्ताको कुरामा कामले खेना त दाह्य्ति ओउइ मान्तालमकाय तोआकान, “निको यहुदि नेम-कानुन अनुसार काम जाह्ङ्साको लागि यात साताहाङ छ दिन मुलेना! यदि निङ स्याक्सा चाहओ खेयाकाय ओउ दिनलमहाङ वाङ्न र स्याक्न। तर निको यहुदि धोओ दिनहाङ वाङ्तिखे स्याक्ताको काम जाह्ङ्लाम!”
15तर प्रभु येसुइ ओउकाय जवाफ बइसास्यावा, “निङ गनमार्यालम! दोह निङइ यहुदि धोओ दिनहाङ निङको स्याः अथबा गधाकाय गोथसय फान्ति तिः तुङताक्लाङ आःल्तेनिलि र? 16इ मोम्चो निको पुर्खा अब्राहामको सन्तान खेना। ओउ अथार बर्सहाङसय सय्तानको बन्धनहाङ खेतो। दोह यहुदि धोओ दिनहाङ इ मोम्चोइ सय्तानको बन्धनसय छुत्कारा दोःसा खायुलु र?” 17जब येसुइ एतताह्ङो जवाफ बइसास्यावा, येसुकाय बिरोत जाह्ङो जुदा मान्तालम रास्सितो स्यावाकाय। र ओहाङ मुओ अरु मान्तालमखे येसुइ जाह्ङ्सास्यावो ग्याह्ङ्सिओ काम च्यउति आसआकाय।
परमेस्वरको राज्यको बारेहाङ निसज्यो ल्हाकराय
(मति १३:३१-३३; मर्कुस ४:३०-३२)
18अनि येसुइ तोसास्यावा, “परमेस्वरको राज्य दोह लेखा मुना? ङाइ इकाय दोहकुस दान्जचाङ? 19इखे यातचाक मान्ताइ लयको राङहाङ सुको रायोको मयो बिया लेखा खेना। ओउ बिया ताह्ङ्ना अनि मयो सिङ लेखा स्याउना र बन वाःलम वाङ्ति ओउको दालालमहाङ छ्युत जाह्ङ्नानि।”
20येसुइ फेरि तोसास्यावा, “परमेस्वरको राज्यकाय ङाइ दोहकुस दान्जचाङ? 21इखे यातचाक मोम्चोइ लाङ कार्धार्ना गहुङको ओय्कहाङ ल्याह्वो खमिर लेखा खेना। ओउइ नाःतो ओय्कहाङ मइतो खमिर ल्याह्उनउ, र जुदा ओय्क फति वाङ्ना।”#मति १३:३३
साङ्रो खादोक
(मति ७:१३-१४)
22येसु नाःतो सहरलम र गाउलमको ल्याम स्याउति मान्तालमकाय स्यान्धय यरुसलेमताङ आल्सास्यावा। 23कुनय यातचाक मान्ताइ येसुकाय ह्वताथय, “प्रभु, दोह परमेस्वरइ मइतो मान्तालमकाय मात्र दल्ताक्सास्याउना र?”
24येसुइ ओउमयकाय जवाफ बइसास्यावा, “लाङका पाह्य्साखेओ ल्यामखे साङ्रो खादोक लेखा खेना। ओउतझ्यान्ते ओउ खादोकसय भित्र पोक्सा बल जाह्ङ्नु, धइतिदाह्य्सा ङाइ निङकाय तोनेनाङ्स, नाःतो मान्तालमइ दोङ्सिले परमेस्वरको राज्यभित्र पोक्सा बोःङ्नानि, तर ओउमयइ पोक्सा खाइनिलि। 25जब किमको मालिकइ खादोक राक्नउ, अनि निङइखे बाहिरसय चिङ्ति खादोक ध्याक-ध्याक त हाइति तोतेनानि, ‘प्रभु, निको लागि खादोक फोल्ति बइसास्याउपा।’
तर मालिकइ निङकाय तोतेनय, ‘ङाइ इ खादोक फोल्ङल, धइतिदाह्य्सा ङाइ निङकाय तह्य्नेङसल र निङ गाहाङसय वाङो ओउमा ङाइ चिःङल।’
26 अनि निङइ तोतेनानि, ‘निइपाय नाङकुस ब्रकले मुति जेःआलाङ्सु र तुङालाङ्सु, र नाङइ निको गाउ-थाउको ल्यामलमहाङ मान्तालमकाय स्यान्सास्यावो खेतो।’
27 तर ओउइ फेरि तोतेनय, ‘ङाइ निङकाय तोनेनाङ्स, निङ सु खेतेनय ङाइ दोङ्सिले तह्य्नेङसल, र निङ गाहाङसय वाङो ओउमा ङाइ चिःङल। निङ जुदा दुस्त मान्तालम, इहाङसय ग्ल्युह्ङ्ति पाह्य्न!’
28 जब निङइ अब्राहाम, इसाक, याकुब र जुदा अगमबक्तालमकाय परमेस्वरको राज्यभित्र च्यउतेनानि, अनि निङ लयखे बाहिर वाइधार्ना सय्क हिक्धय र्यातेनय। 29अनि नाःतो मान्तालम ल्हाउदयबाङको जुदा थाउलम दाहन्याम, ब्लकन्याम, उत्तर र दखिनसय वाङ्ति परमेस्वरको राज्यहाङ मुति भोस जेःनानि।#मति ८:११-१२ 30साइनु, सुखे देङे मइतो महत्वको मुतेनय ओउखे लोन्हे ताह्ङो महत्वको स्याउलेना, र सुखे देङे ताह्ङो महत्वको मुतेनय ओउखे लोन्हे मइतो महत्वको स्याउलेना।#१३:३० कुनय-कुनय सङ्सकरनलमहाङखे, “योनु, देङे लोन्हे स्यावोलमखे ङ्हा स्याउलेना, र देङे ङ्हा स्यावोलमखे लोन्हे स्याउलेना” त दाह्य्ति तोओ मुना (मति १९:३०; २०:१६; मर्कुस १०:३१)।”
यरुसलेमकाय येसुको रापमय
(मति २३:३७-३९)
31ओउबेलाहाङ केहि फरिसिलमइ येसुकहाङ वाङ्ति तोआकानि, “इ थाउ फेति नाङ अरु कुनय थाउताङ पाह्य्सा स्याउपाना, धइतिदाह्य्सा हेरोद एन्तिपासइ नाङकाय सात्सा बोःङ्धय मुना।”
32येसुइ ओउमयकाय जवाफ बइसास्यावा, “निङ पाह्य्न र ओउ स्यालकाय तोनु— ‘तेन र स्याह्ङ ङाइ लानलमकाय रुःन्ति ल्होको काम जाह्ङ्नाङ अनि मान्तालमकाय स्याक्ताक्नाङ, र चित्सयखे ङाइ लयको काम दपनाङ।’ 33तर तेन, स्याह्ङ र चित्सय ङा लयको ल्यामहाङ वाह्साले परनाङ। धइतिदाह्य्सा यरुसलेमबाहेक अरु थाउहाङ परमेस्वरको अगमबक्ताकाय सात्निलि।
34 अ यरुसलेमको मान्तालम, निङइ अगमबक्तालम र परमेस्वरको खबरदुतलमकाय बाङइ आप्ति सात्तेनानि। आइरोक वाःइ लयको चोःलमकाय लयको पापइ बोःम्ति ओमपाइति गमोलेखा ङाइ गच्युक पल्त निङकाय हुम्ति ओमपाइति गम्सा बोःङालाङ, तर निङइ ङाकाय ओउत हाइसा बइतेनिलि! 35ओउतझ्यान्ते साइनु, निङको किमकाय #१३:३५ किम किमको मानेखे यरुसलेमको मन्दिर अथबा परमेस्वरको मन्दिर, या यरुसलेमको सहर अथबा यहुदिको जुदा जातिलम त दाह्य्ति चिःसा खाइना।त्यागओ मुना। ङाइ निङकाय तोनेनाङ्स, ‘प्रभु परमेस्वरको मय्ङहाङ वाङ्सास्यावो ओउ गच्युक धन्नेको खेसास्याउना’#भजन ११८:२६ त दाह्य्ति तोमाच्युकसम्म निङइ ङाकाय फेरि च्यउतेनिलि।”
Currently Selected:
लुका 13: CHEP
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
