San Lucas 10
10
Jesú setenta-nü̧ wotü u̧wo̧juȩtä̧u̧rü̧ we'inü̧
1Jua̧u̧ jä̧ji̧ o'ka'a, Tu̧ru̧wa̧mä̧ kkorotü setenta-nü̧#10.1 Kkoro wȩyu̧kuä̧ wȩnȩnä̧mä̧ (mss-nä̧mä̧) setenta y do-nü̧ wotü pä'a, pi̧yȩ vesíkurunä̧mä̧. wotürü pojopü we'inü̧, chutä i̧'chä̧kuo̧mȩ pünä̧mä̧ o'kajuiyünä̧, ä'kanä̧ ta̧ju̧pü̧nä̧ tti̧'chi̧ya̧rü̧ pä'ü. 2Ja̧'wa̧nü̧ ja̧'a̧ juätürü pä'inü̧: Isopäi'ünä̧ u̧wä̧ju̧ ka̧ka̧kuä̧kuȩmä̧ rü̧a̧'a̧nä̧, ka̧ka̧tä̧tü̧mä̧ a̧'u̧kuo̧tü̧tä̧ ja̧'a̧. Ja̧'wa̧nü̧ ja̧'a̧ttü̧, ukutumä̧ ka̧ka̧kuä̧kuȩ u̧wä̧ju̧ u̧ru̧wa̧rü̧ jä'epätukui, ttü̧ka̧ka̧tä̧kuo̧tü̧rü̧ weäkua'anü̧. 3Tätukui; to̧pä̧rä̧kuä̧u̧ ku̧ja̧kuä̧tu̧kua̧jä̧, oweja-tü̧rü̧, de'a ä̧wi̧ri̧tü̧ ttü̧'kä̧tȩ jo̧mȩ wettajü'anü̧ wȩdä̧u̧jä̧. 4Pärätä'i̧nä̧, ku̧kuȩtu̧ku̧'i̧nä̧, ku̧jä̧pü̧tu̧ku̧ obi'i̧nä̧ kuȩpä̧tu̧kuä̧; ja̧'wa̧ta̧nü̧ mä̧nä̧nä̧ to̧'kuä̧tu̧kuä̧u̧ru̧'i̧nä̧ tekuäwätukuä. 5Yodete dokuächi'ätukuodemä̧, ä̧kuo̧mȩnä̧mä̧, päkuätukuajä̧: «podenä̧ wȩnȩ juiyü jäwä kka̧ pä'ätüjä̧.» 6Ja̧'wa̧nü̧ ja̧'a̧ juodenä̧ wȩnȩ juiyü jäwänä̧ kka̧kuä̧tü̧ ttü̧ja̧ku̧ttü̧mä̧; ukutu ku̧jä̧tu̧ku̧ wȩnȩ juiyü jäwämä̧ juätünä̧'i̧nä̧ päi'äkua'a; ja̧'wa̧nü̧ jü̧ juiyüttümä̧ jua̧u̧ ja̧jü̧ jueimä̧ pä'äji jä̧ji̧ta̧'a̧nü̧ ukutunä̧tä̧ kki̧'ä̧kuȩ. 7Ja̧'wa̧ta̧nü̧ juodettütä, au'i̧nä̧, ku̧kuȩtu̧ku̧'i̧nä̧ ttiyütä kuä̧nü̧ ku̧ja̧kuä̧tu̧kua̧jä̧, isopäi'ünä̧ adikuä i̧sa̧mä̧ ttimitarü pä'ü rekuä rü̧jä̧ku̧. 8Kkoro ütawiyä jü̧ta̧'a̧nü̧ dode'kuätukuomȩnä̧ juorü ttiyütä kukuätukuajä̧, dottädüttümä̧; 9Juȩnȩ na̧nȩpä̧tü̧ ttü̧ja̧ku̧ttü̧mä̧ aditü kuikuätukuajä̧ ja̧'wa̧nü̧ jȩpü̧mä̧ pa̧'a̧nü̧ päkuätukuajä̧: «Ru̧wa̧ Dio weü wȩnȩmä̧ ukuturu tü'kü kka̧'a̧,» jü̧nä̧. 10Ja̧'wa̧ta̧nü̧ ütawiyä jü̧'a̧kuä̧ dokuächätukuomȩnä̧, dottädü juiyüttümä̧, jua'attümä̧ ttu̧mä̧ni̧yä̧ra̧'a̧ku̧ rä'opächü pa̧'a̧nü̧ päkuätukuajä̧: 11«¡Ukutu kuidepiyutukuttü, tü̧jä̧pü̧nä̧ rü̧ji̧pä̧ja̧ppȩ rȩjȩ i̧sa̧ppȩ'i̧nä̧ tu̧ppü̧sä̧wä̧u̧jä̧! Ja̧'wa̧nü̧ ja̧'a̧nä̧'i̧nä̧, ru̧wa̧ Dio weümä̧ tü'kü ja̧'a̧ tä̧jí̧, pä'ü ku̧wo̧juä̧tu̧kuä̧kua̧'a̧nü̧. 12Ja̧'wa̧nü̧ ja̧'a̧ttü̧ pädäu̧jä̧, ji̧yȩnü̧ mo̧ro̧, suronä̧ jȩtti̧na̧'a̧ ro̧ȩkuä̧ mo̧ro̧ päi'omȩnä̧mä̧, jua̧u̧ ütawiyä ttü̧ja̧rü̧mä̧ Sodoma ütawiyä ttü̧ja̧rü̧ ro̧ȩpi̧no̧mȩttü̧'i̧nä̧ abonä̧nü̧ ro̧ȩkuä̧kua̧'a̧.
Esetokotürü, Jesú woäkuäwinü̧ wȩnȩ
(Mt 11.20-24)
13¡Isottü̧, ukutu Corazín ütawiyä ttü̧ja̧we! ¡Isottü̧ ukutu Betsaida ütawiyä ttü̧ja̧we! Isopäi'ünä̧ ukuturu jü̧'a̧nü̧, jȩtto̧kü̧ juei jäwä Tiro ütawiyä ttü̧ja̧rü̧'i̧nä̧, Sidón ütawiyä ttü̧ja̧rü̧'i̧nä̧ ttä'kattü ji̧nü̧ttü̧mä̧, juätümä̧ ttü̧'ka̧tä̧wä̧ti̧yu̧ surojü o'pi 'ka̧tä̧wi̧'ü̧, okurä i̧sa̧ppȩttü̧ jiwäwi'ü surojü jȩttä̧'i̧jü̧ttü̧mä̧ kä'ädäkuäu Dio-ku ppa̧'a̧cha̧ja̧tü̧. 14Ja̧'wa̧nü̧ ja̧'a̧ttü̧, ji̧yȩnü̧ ro̧ȩkuä̧ mo̧ro̧ päi'omȩnä̧mä̧, Tiro ütawiyä ttü̧ja̧ttü̧'i̧nä̧ ja̧'wa̧ta̧nü̧ Sidón ütawiyä ttü̧ja̧ttü̧'i̧nä̧ abonä̧nü̧ ro̧ȩkuä̧kua̧'a̧ ukuturumä̧. 15Ja̧'wa̧ta̧nü̧ ukutu Cafarnaúm ütawiyä ttü̧ja̧mä̧ ¿Mo̧ro̧jä̧ra̧'a̧bü päi'ünä̧ kui̧rȩbȩwä̧tü̧kua̧'a̧ tä̧jí̧? ¡Ja̧'wa̧nü̧mä̧ ja̧'a̧nä̧, wa'inä̧tü̧ ttü̧ja̧kua̧'abü päi'ünä̧ jui'ädü ikuäwäkuotüjä̧! 16«Ukuturu ä̧ju̧kuä̧tü̧mä̧, ttürü'i̧nä̧ ä̧ju̧kuä̧tü̧; ja̧'wa̧ta̧nü̧ ukuturu kkü'kokotümä̧, ttürü'i̧nä̧ kkü'kokotü; ja̧'wa̧ta̧nü̧ ttürü kkü'kokotümä̧, ttürü we'inü̧rü̧'i̧nä̧, kkü'kokotü.»
U̧wo̧juȩtä̧u̧ setenta y do-nü̧ wotü ppa̧ttä̧chi̧nü̧ wȩnȩ
17U̧wo̧juȩtä̧u̧ setenta y do-nü̧ wotü wȩä̧jä̧u̧mä̧ ppa̧'ä̧chü̧ eseäkuäu pä'inä̧tü̧:
—¡Chu̧ru̧wa̧, epíritu-tu̧ suropätü'i̧nä̧, kui̧mi̧nä̧mä̧ ttukuotä̧jä̧u̧jä̧! 18Pättiyäku, Jesú-mä̧ päinä̧u̧:
—Ttümä̧ topinü̧sä̧, Satanás-rü̧, ku'upä ürowa'a jä̧'i̧nü̧'a̧nü̧, mo̧ro̧jä̧ra̧'a̧ttü̧ ma̧'ä̧chü̧ juiächa'a. 19Ukuturu kujurutuku iyüsä, kkorottü'i̧nä̧ abonä̧nü̧mä̧ kua̧bo̧i̧ya̧tu̧ku̧ ujuru abo 'kuä'o'ü, ä̧ka̧tü̧rü̧'i̧nä̧, i̧di̧yu̧tu̧ru̧'i̧nä̧ kkȩdü̧ kuikuätukua pä'ü. Ja̧'wa̧ta̧nü̧ kkoro juei'i̧nä̧ surojuoepo̧ko̧u̧ kuäkuotüjä̧. 20Epíritu-tu̧'i̧nä̧ ukuturu wekuätuku ttukuota'amä̧ kueseäkuäwätukuä, ji̧nä̧somä̧ mo̧ro̧jä̧ra̧'a̧ kui̧mi̧tu̧ku̧ pa̧'a̧tä̧ eseäkuäwätukui.
Jä'orü wo̧jua̧mä̧ I̧tti̧tä̧ ja̧'a̧
(Mt 11.25-27; 13.16-17)
21Ji̧yȩnü̧ pä̧nä̧, Jesú Epíritu Sa̧tu̧ jäwänä̧ jo̧mȩnü̧ eseu kkä̧nü̧ pä'inü̧: Chä'o, ukuru eseusä, mo̧ro̧jä̧'i̧nä̧, pi̧jä̧'i̧nä̧ u̧ru̧wa̧rü̧. Isopäi'ünä̧ pi̧yȩmä̧ rü̧ȩnä̧ wo̧juä̧tü̧ttü̧'i̧nä̧, rü̧ȩnä̧ amükuädätüttü'inä̧ dajü iku pärokuotü ppo̧'ä̧tü̧rü̧ kui̧jȩpi̧na̧'a̧ttü̧. A̧, Chä'o isopäi'ünä̧ ja̧'wa̧nü̧tä̧ kuesewomȩnä̧ ja̧'a̧ttü̧.
22Chä'omä̧ o'kajuiyünä̧tä̧ iyinä̧ku̧sä̧. Ya̧tȩ'i̧nä̧ Jua̧u̧ i̧tti̧rü̧mä̧ jerupätü, suro jä'otä ja̧'a̧ jua̧u̧ru̧ wo̧jua̧mä̧; ja̧'wa̧ta̧nü̧ ya̧tȩ'i̧nä̧ jä'orümä̧ jerupätü, suro jua̧u̧ I̧tti̧tä̧ ja̧'a̧ Jä'orü wo̧jua̧mä̧. Ja̧'wa̧ta̧nü̧ kkorotümä̧ I̧tti̧ i̧jȩpa̧ päomȩnä̧ i̧jȩpä̧u̧tä̧ ja̧'a̧ wo̧jui̧'ä̧tü̧mä̧. 23Pä'ü kä'ädü, suro u̧wo̧juȩtä̧u̧rütä kkärächi'ü pä'inü̧: Eseäkuäwä rü̧ȩnä̧ kka̧'a̧, ukutu jitä to'kuätuku topätürümä̧. 24Isopäi'ünä̧ pä'üsä, rekuätü profetas winä̧tü̧'i̧nä̧, rey jü̧nä̧ ruwotü winä̧tü̧'i̧nä̧ jitä ukutu to'kuätuku, tottamä̧ pätta'anä̧, topokotü pinä̧tü̧; kuä̧ju̧kuä̧tu̧ku̧mä̧, ttä̧ju̧kua̧ pätta'anä̧, ä̧ju̧kuo̧ko̧tü̧ pinä̧tü̧.
Samaria ttü̧ja̧sa̧ adiwä i̧sa̧nä̧ wȩnȩtü̧ ji'äwinü̧
25—¿Weäwä wȩnȩ wo̧juȩkuä̧ i̧sa̧, däje jȩpü̧tä̧, kkä̧kuä̧wä̧ i'komä̧ chȩmu̧'a̧nü̧ttü̧?
26Jäepäku, Jesú-mä̧ ädätinä̧ku̧:
—¿Weäwä wȩnȩnä̧mä̧, däjetä wȩyu̧tu̧ rütäwa'a jä̧'i̧jä̧ttü̧? ¿Tokutä kukuokuä'ijä̧ttü̧? 27Päku, weäwä wȩnȩ wo̧juȩkuä̧ i̧sa̧mä̧ ädätinü̧:
—«Ku̧ru̧wa̧ Dio-rü, Kuami'iso'ki'i̧nä̧, kua̧'kua̧rü̧'i̧nä̧, kujuru'i̧nä̧, kuamükuädü'i̧nä̧ o'kajuiyünä̧ esewi, Ja̧'wa̧ta̧nü̧ kua̧wa̧ru̧wa̧rü̧'i̧nä̧ kua̧mü̧nä̧ repekuäuta'anü̧ repe'i,» 28päiyäku, Jesú-mä̧ päinä̧ku̧:
—Adiu ädätüjä̧, jua̧u̧ jȩpü̧tä̧ ku̧ju̧nä̧rä̧kua̧jä̧ kkä̧kuä̧wä̧ i'komä̧. 29Ja̧'wa̧nü̧ ja̧'a̧nä̧, weäwä wȩnȩ wo̧juȩkuä̧ i̧sa̧mä̧ yabonü̧ u̧wo̧jua̧ pä'ü, Jesú-ru pä'inü̧: —¿Díjä̧ttü̧ cha̧wa̧ru̧wa̧mä̧? 30Päiyäku, Jesú-mä̧ ädätinä̧ku̧: —Ya̧tȩ Jerusarȩ́-ra̧'a̧ttü̧, Jericó ütawiyära̧'a̧ku̧ i̧mȩyȩwo̧mȩnä̧, nä̧u̧kuä̧rä̧kuä̧wä̧ ttü̧ja̧, iäre 'cho'ipü, kuäkuäpü ikuipü, na̧wä̧chä̧chä̧ji̧ o'ka'a ttikuipinä̧ku̧. 31Ja̧'wa̧nü̧ jä̧ja̧'a̧, juä̧mä̧nä̧tä̧ mȩyȩwi̧nü̧ ya̧tȩ sacerdote wa̧, jua̧u̧ru̧mä̧ toa'anä̧ wi̧sä̧ti̧'ü̧tä̧ 'kuä'o'inü̧. 32Ja̧'wa̧ta̧nü̧ Rewí isotü i̧sa̧'i̧nä̧, juȩnȩnä̧tä̧ 'kuäopü toa'anä̧, jua̧u̧'i̧nä̧ wi̧sä̧ti̧'ü̧tä̧ 'kuä'o'inü̧. 33Ja̧'wa̧nü̧ ja̧'a̧nä̧, ya̧tȩ Samaria ttü̧ja̧sa̧, juä̧mä̧nä̧tä̧ 'kuäopa'a ja̧'a̧, jua̧u̧ru̧ to'omȩnä̧ rȩrü̧jä̧chi̧'i̧nä̧ku̧, 34Tü'künä̧nü̧ 'chä̧wi̧'ü̧, aceite isoyanä̧'i̧nä̧, vino isoyanä̧'i̧nä̧ tu'epü i̧sä̧sa̧nä̧ juä'ü jȩpä̧ji̧'ka̧, äji buro-nä̧ kä'epü wȩni̧pü̧, 'kuäokuä ttü̧ja̧ ä'äwodenä̧ tta̧wä̧ri̧nä̧ku̧. 35Kkoro mo̧ro̧ rä'opächümä̧, juodetä tta̧wä̧rä̧kuä̧wä̧ i̧sa̧rü̧, todäre denario jo̧mȩnä̧ ȩmä̧wo̧'ü̧, iyipü pä'inü̧: «Piderü tta̧'ä̧ri̧yi̧ttü̧, pi̧yȩ abonä̧nü̧ bekuekumä̧, ppa̧dä̧chi̧'o̧mȩnä̧ chi̧mi̧tä̧kua̧jä̧.» 36¿Uku päkumä̧, pitü wä̧mȩtukuä päjätüttümä̧, pide suronä̧ jȩtti̧nä̧ku̧ päji a̧wa̧ru̧wa̧mä̧, tide ji̧na̧'a̧jä̧ttü̧? 37Jäepäku weäwä wȩnȩ wo̧juȩkuä̧ i̧sa̧mä̧ ädätinü̧:
—Churutä rȩrü̧jü̧ topü ppä'ädinü̧ päjitä ja̧'a̧:
Ädätiyäku, Jesú-mä̧ päinä̧ku̧: Uku'i̧nä̧ ja̧'wa̧nü̧tä̧ jȩ'kua̧jä̧.
Jesú María-rü'i̧nä̧, Marta-rü'i̧nä̧ do'ächü 'chi̧nü̧
38Mä̧nä̧nä̧ tti̧'chä̧ja̧'a̧, Jesú-mä̧ ütawiyä a̧'u̧kuo̧mȩ doächi'omȩnä̧; yajute Marta pä'ü mi̧kuaju kkojusodenä̧ dojädinä̧ku̧. 39Ja̧'wa̧nü̧ ja̧'a̧ juäjumä̧ kkijäwaju María pä'ü mi̧kuajuru kku̧nä̧ri̧nä̧ju̧. Juäju María-mä̧ Jesú ü̧jä̧pü̧ jo̧mȩ pä̧mä̧di̧nä̧ju̧, ukuoku kkä̧ju̧kua̧ pä'ü. 40Ja̧'wa̧nü̧ ja̧'a̧nä̧, Marta-mä̧ kkaditäwä rekuäkua Jesú-ru 'chä̧wi̧'ü̧ pä'inä̧ju̧:
—«Chu̧ru̧wa̧ ¿Uku päkumä̧, kkatätä chadita'anä̧ chijäwaju ppäjädoka'amä̧ adiwa'a? ppäjädattü ji'äwiju.» 41Päjiyäku, Jesú-mä̧ ädätinä̧kua̧:
—Marta, Marta kuaditäwänä̧tä̧ kua̧'kua̧ ro'ekuäjujä̧. 42Ja̧'wa̧nü̧ ja̧'a̧nä̧, ji̧yȩtȩtä̧ kka̧'a̧ rekuä rü̧jü̧mä̧; ja̧'wa̧nü̧ ja̧'a̧ttü̧ María-mä̧ jua̧u̧tä̧ ȩmä̧jä̧ju̧, jua̧u̧mä̧ 'cho'ikuokoju jä̧kua̧ju̧.
Currently Selected:
San Lucas 10: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
