San Lucas 9
9
Jesú-mä̧ u̧wo̧juȩtä̧u̧ doce-nü̧ wotürü we'inü̧
(Mt 10.5-15; Mc 6.7-13)
1Jesú u̧wo̧juȩtä̧u̧ doce-nü̧ wotürü ka̧ka̧tä̧ji̧'ka̧, ttujuru iyinä̧u̧, epíritu-tu̧ suropätürü rä'epü ttikua pä'ü'i̧nä̧ ja̧'wa̧ta̧nü̧ ttumä̧richei na̧ttä̧chü̧ aditü ttikua pä'ü'i̧nä̧, jü̧nä̧. 2Ja̧'wa̧ta̧nü̧ Dio weü wȩnȩ jittäwa pä'ü'i̧nä̧, na̧'ä̧chä̧tü̧rü̧ aditü ttikua pä'ü'i̧nä̧ we'ümä̧, 3päinä̧u̧:
—Kui̧'chä̧tu̧kua̧'a̧ttü̧, kkorojueimä̧ kuȩpä̧tu̧kuä̧: kuittä'katuku'i̧nä̧, kusakuyutuku'i̧nä̧, ku̧kuȩtu̧ku̧'i̧nä̧, pärätä'i̧nä̧; ja̧'wa̧ta̧nü̧ ku̧'ka̧tä̧wä̧ti̧yu̧tu̧ku̧'i̧nä̧, jü̧nä̧mä̧. 4Kkorode jü̧ta̧'a̧nü̧, ttojusode kui̧rȩbȩwä̧tu̧kuodenä̧, juodenä̧tä̧ ku̧ja̧kuä̧tu̧kua̧jä̧, juorü räkuopächätukuomȩbü päi'ünä̧. 5Ja̧'wa̧ta̧nü̧ kkoromȩ kui̧'chä̧tu̧kuo̧mȩnä̧, juorü dottädü juiyüttümä̧, jua̧u̧ ütawiyättü rä'opächü kui̧jä̧pi̧yä̧tä̧ kuppüsäwätukuajä̧, jitütä ttu̧wo̧juä̧kua̧'a̧nü̧. 6Ja̧'wa̧nü̧ wȩä̧jä̧u̧, juorü rä'opächü ütawiyä jü̧'a̧kuä̧ ji'äu kue'ächinä̧tü̧, adiwä wȩnȩmä̧, na̧'ä̧chä̧tü̧rü̧ aditü ikuä'chü kkä̧nü̧.
Herode Jesú-ru ieruwinü̧ wȩnȩ
(Mt 14.1-12; Mc 6.14-29)
7Ru̧wa̧ Herode-mä̧ Jesú jȩü̧ o'kajuiyünä̧ ukuowa'a ä̧ju̧ku̧; ye'inü̧, kkorotümä̧ Ju̧a̧ ttoächäja'a ja̧'a̧ pä'ü ttukuokuiyäku. 8Kkorotümä̧ profeta Elía, i̧jȩkuä̧u̧jä̧ pä'ü amükuädinä̧tü̧; ja̧'wa̧ta̧nü̧ kkorotütä, mo̧ täbokü profetas winä̧tü̧ttü̧ ya̧tȩ tto'ächäji 'kua̧'ra̧'a̧ pä'ü ukuokuinä̧tü̧. 9Ja̧'wa̧nü̧ ji̧yä̧ku̧, Herode-mä̧ pä'inü̧:
—Jua̧u̧, Ju̧a̧-mä̧ ttü u 'kui'opü ttikunä̧ wedinä̧ku̧ ja̧'a̧. ¿Díjä̧ttü̧ ja̧'wa̧nü̧ pätta'a chä̧ju̧kuä̧ku̧mä̧?
Pä'ü Herode-mä̧, Jesú-ru toa pä'inü̧.
Jesú rekuätürü ttu̧kuȩ iyinü
(Mt 14.13-21; Mc 6.30-44; Jn 6.1-14)
10Jesú u̧wo̧juȩtä̧u̧ apótore wȩä̧jä̧u̧ ppa̧tä̧chi̧'o̧mȩnä̧mä̧ jȩttä̧ji̧mä̧ o'kajuiyünä̧ jittäwinä̧ku̧. Jua̧u̧ o'ka'a, juätürü i̧mi̧ku̧nä̧ wopo'ü, ttü̧ja̧ toächomȩ Betsaida ütawiyära̧'a̧ku̧ oipächinä̧u̧. 11Ja̧'wa̧nü̧ ja̧'a̧ ttü̧ja̧mä̧ wo̧jui̧'ü̧, o'ka'anä̧ 'chä̧jä̧tü̧rü̧; Jesú-mä̧, yawokuoka'a Dio weü wȩnȩ jiäwinä̧u̧ ja̧'wa̧ta̧nü̧ na̧nȩpä̧tü̧rü̧'i̧nä̧ aditü ikuinä̧u̧. 12Ja̧'wa̧nü̧ ja̧'a̧nä̧ mo̧ro̧ ni̧pä̧chi̧yä̧u̧, u̧wo̧juȩtä̧u̧ doce-nü̧ wotümä̧, Jesú-ru ichi'ü pä'inä̧tü̧:
—Ttü̧ja̧rü̧mä̧ we'ü ikuitü, ütawiyära̧'a̧ttü̧'i̧nä̧, odewiyä tü'künä̧nü̧ wȩjo̧mȩku̧ ttu̧kuȩ ttȩmä̧ja̧, pȩnȩtä̧ tü'künä̧nü̧mä̧ ttü̧ja̧ tomȩ ja̧'a̧. 13Pättäku Jesú-mä̧ päinä̧u̧:
—Ukututä ttu̧kuȩ iyätukuitü.
Päomȩnä̧, ttädätinä̧ku̧:
—Ujutumä̧, pan-mä̧ ji̧mü̧tȩnü̧ o̧si̧tä̧ ja̧'wa̧ta̧nü̧ po̧i̧mä̧ ta̧ju̧ru̧tä̧ kku̧nä̧rä̧tü̧jä̧, pa̧ja̧kuä̧cho̧ko̧mȩtä̧. Ja̧'wa̧nü̧ jo̧ka̧'a̧ jü̧ttü̧'i̧nä̧, pitü ttü̧ja̧ o'katoi'ünä̧ ttu̧kuä̧kuȩmä̧ mitäu ȩmü̧'i̧nä̧ ti̧'chü̧'a̧nü̧ ja̧'a̧.
14Ja̧'wa̧nü̧ ja̧'a̧, u̧mä̧tü̧tä̧mä̧ cinco mil-nü̧ jo̧mȩnä̧ ji̧na̧'a̧. Ja̧'wa̧nü̧ ja̧'a̧ u̧wo̧juȩtä̧u̧rü pä'inü̧: Cincuenta-nü̧ wotü pünä̧, ttü̧'ä̧mä̧da̧ we'itü. 15Weäjita'anü̧, jȩpi̧nä̧tü̧ u̧wo̧juȩtä̧u̧mä̧.
16Ja̧'wa̧nü̧ ja̧'a̧mä̧, pan o̧si̧ to̧si̧rȩ ȩmo̧po̧'ü̧ kkä̧nü̧, po̧i̧rü̧'i̧nä̧ ȩmo̧po̧'ü̧, ju'tojuku topü, Dio-rü ukuoku kä'ädü, 'toropo'ü, u̧wo̧juȩtä̧u̧rü iyinü̧, ttü̧ja̧rü̧ ttiyä'cha pä'ümä̧. 17Ja̧'wa̧nü̧ ja̧'a̧, ttü̧ja̧mä̧ o'katoi'ünä̧tä̧ suttädäkuäunä̧ kuinä̧tü̧. Ja̧'wa̧nü̧ ttukuäji o'ka'a kka̧kui̧pä̧ji̧ttü̧'i̧nä̧, uru'tiyumä̧ doce-nü̧ o'ta jo̧mȩnä̧ ka̧ka̧ti̧nä̧tü̧.
Peduru-mä̧, Jesú-ru ukumä̧ Crito-jä̧ pä'inü̧
(Mt 16.13-19; Mc 8.27-29)
18Ja̧'wa̧nü̧ ja̧'a̧, ya'utenä̧ Jesú-mä̧ u̧wo̧juȩtä̧u̧kutä i̧mi̧ku̧nä̧ Dio-rü ukuoku 'chä̧ji̧'ka̧, u̧wo̧juȩtä̧u̧rü jä'epü ä̧ju̧kui̧nü̧:
—¿Ttü̧ja̧mä̧, ttürümä̧ disädo pättä'ijä̧ttü̧? 19Pä̧u̧ ttädätinä̧ku̧:
—Yotukunä̧mä̧, bautizo jȩä̧kuä̧wä̧ i̧sa̧ Ju̧a̧ pinü̧ pä'ä'ijätü, kkorotümä̧ Elía-jä̧do pä'ä'ijätü, ja̧'wa̧ta̧nü̧ kkorotütä, mo̧ täbokü profetas winä̧tü̧ttü̧, tto'ächinü̧jä̧do pä'ä'ijätü. 20Ja̧'wa̧nü̧ ja̧'a̧, ukuturumä̧, ¿dí cha'ajä̧ttü̧? —pä'ü jäepomȩnä̧.
—Peduru-mä̧ ädätinü̧:
—Ukumä̧, Dio wȩ'ä̧wa̧jä̧, jü̧nä̧.
Jesú-mä̧ to̧ȩ'ä̧chä̧kuȩ wȩnȩ ji'äwinü̧
(Mt 16.20-28; Mc 8.30—9.1)
21Ja̧'wa̧nü̧ ja̧'a̧nä̧, Jesú-mä̧ pi̧yȩ tü'kümä̧, ya'utekutä ya̧tȩrü̧'i̧nä̧ jittäu juiyünä̧tä̧ weinä̧u̧. 22Pa̧'a̧nü̧ pä'ünü̧:
—Ttü Ubo I̧tti̧ rü̧ȩnä̧ usurä chȩmä̧wa̧ pä'ü rekuä rü̧ja̧'a̧, judío-ttü a̧ci̧a̧nu̧ wotüttü'i̧nä̧, sacerdote wotü tturuwotüttü'i̧nä̧, weäwä wȩnȩ wo̧juȩkuä̧ isotüttü'i̧nä̧, weäwänä̧ usurä ȩmä̧wi̧'i̧pü̧, kuä'ü'i̧nä̧ ttiku o'ka'a, wäbodäkuä mo̧ro̧ päi'omȩnä̧ tto̧dä̧chä̧kua̧sä̧.
23Ja̧'wa̧ta̧nü̧ o'katoi'ünä̧rü̧ pä'inü̧:
—Ttü cho'ka'anä̧, ya̧tȩ icha päüttümä̧, a̧mü̧nä̧ pa̧ja̧tü̧ repeü kä'ädi'ü, mo̧ro̧ ji̧nü̧ a̧'u̧kuä̧, ü̧jo̧kä̧nü̧ jäi, (cruz) pättäi ȩmi̧pü̧, cho'ka'anä̧ ichí. 24Isopäi'ünä̧ a̧'kua̧rü̧ toe'ächa pä'okümä̧, to̧ȩ'ä̧chä̧kua̧; ja̧'wa̧nü̧ ja̧'a̧nä̧ ttü jäwänä̧ a̧'kua̧rü̧ to'e'ächümä̧, a̧'kua̧rü̧ ȩmä̧kua̧. 25Ja̧'wa̧nü̧ ja̧'a̧ttü̧ ¿Däjenä̧tä̧ ü̧ji̧pä̧kua̧'a̧jä̧ttü̧, pi̧jä̧ jäwä o'kajuiyünä̧ ȩma̧ja̧ pä'ü'i̧nä̧, a̧'kua̧rü̧ toe'ächomȩnä̧mä̧? 26Ja̧'wa̧ta̧nü̧ ya̧tȩ ttü chütü'kü'i̧nä̧, chi̧wȩnȩ'i̧nä̧ udäpekuttümä̧ ja̧'wa̧ta̧nü̧ Ttü ubo I̧tti̧'i̧nä̧ jua̧u̧ ütü'kümä̧ chü̧dä̧pȩkuä̧kua̧, Chä'o ujuruku, uruwoku, á̧gȩrȩ-ku̧ chichomȩnä̧. 27Ja̧'wa̧nü̧ ja̧'a̧nä̧ isopäi'ünä̧ pä'üsä, jitä pȩnȩ́ kka̧kuä̧tü̧ttü̧ ya̧ku̧nä̧mä̧, wa'aremä̧ ttüjü'kokäkuotü, ru̧wa̧ Dio weü tottomȩbü päi'ünä̧.
Jesú ü'ärowächi'inü̧ wȩnȩ
(Mt 17.1-8; Mc 9.2-8)
28Pi̧yȩ ukuokuäji o'ka'attümä̧, kko̧ro̧mü̧ttü̧nü̧ wäbodäkuä mo̧ro̧ päi'omȩnä̧, mü̧ä̧'ka ju'toju jä'kara̧'a̧ Dio-rü ukuoku 'chä̧nü̧, Peduru-rütä, Sa̧ti̧a̧ku̧rü̧tä̧, Ju̧a̧-rü̧tä̧ o'ipächü 'chi̧nü̧. 29Ja̧'wa̧nü̧ Dio-rü ukuokua'a jakuänä̧, ü'ämä̧ pärowächinü̧ ja̧'wa̧ta̧nü̧ ü̧'ka̧tä̧wä̧ta̧'i̧nä̧ teä̧ta̧tä̧ pä'i'ü, kkȩdȩpü̧nä̧tä̧. 30Ja̧'wa̧nü̧ päi'a'attü ttü̧ja̧ ta̧ju̧ chutäku ukuoku kka̧kui̧nä̧tü̧. Juätümä̧ Moisé'i̧nä̧, Elía'i̧nä̧ ji̧na̧'a̧; 31Tȩya̧wo̧mȩ jakuättü, Jesú-ru Jerusarȩ́ ütawiyättü 'kuäopä̧kuȩ wȩnȩ'i̧nä̧, i̧wä̧kuȩ wȩnȩ'i̧nä̧ ukuokuinä̧tü̧. 32Peduru-mä̧, awaruwäkumä̧ rü̧ȩnä̧ pü̧di̧ri̧ja̧'a̧nä̧, ttä'i'oka'a to̧ttä̧ra̧'a̧ttü̧ Jesú ujuru jäwä'i̧nä̧, ja̧'wa̧ta̧nü̧ u̧mä̧tü̧ ta̧ju̧ chutäku ukuokuäjätürü'i̧nä̧ topinä̧tü̧. 33Ja̧'wa̧nü̧ ja̧'a̧ juätü u̧mä̧tü̧ Jesú-ttü 'kȩtti̧pä̧cha̧'a̧nä̧, Peduru-mä̧ Jesú-ru pä'inü̧:
—Chu̧ru̧wa̧, ¡Pȩnȩ́ tü̧ja̧ pä'ü, juiyo adiwomȩ jä̧ttü̧! odewiyä ppo̧ü̧, wäbodekuä aditätüjä̧: Yodetemä̧ uku ku̧jä̧kuode, kkorodemä̧ Moisé ü̧jä̧kuode, kkorodetä Elía ü̧jä̧kuode, jü̧nä̧.
Ja̧'wa̧nü̧ ja̧'a̧nä̧, Peduru ukuokumä̧, u̧wo̧jui̧po̧ka̧'a̧nä̧tä̧ ukuokuinü̧. 34Ja̧'wa̧nü̧ ukuokua'a jakuänä̧, ajiya isoppa ttu̧wä̧mȩku̧ttü̧ juättokuächünä̧ mȩyȩwi̧'a̧'a̧ttü̧, rü̧ȩnä̧ ye'inä̧tü̧. 35Ja̧'wa̧nü̧ päi'omȩnä̧, juoppattü ya̧tȩ i̧wȩnȩ rä̧mi̧pi̧na̧'a̧: «Pidemä̧ ttü chi̧tti̧, rü̧ȩnä̧ rȩni̧'a̧; jua̧u̧ru̧ ä̧ju̧kuä̧tu̧kui̧,» jü̧nä̧. 36Ja̧'wa̧nü̧ rä̧mi̧pä̧ji̧ o'ka'a, Jesú-mä̧ kkatätä kki̧'i̧nü̧. Ja̧'wa̧ta̧nü̧ pi̧yȩ 'kuäopa'a tottäjimä̧, yoriso ya̧tȩrü̧'i̧nä̧ ji'äwokotü pinä̧tü̧ jua̧u̧ tü'küwäinä̧mä̧.
Jesú-mä̧, mü̧ä̧ya̧rü̧ epíritu su̧ro̧pa̧ ü̧jä̧ku̧ru̧ aditü ikuinü̧
(Mt 17.14-21; Mc 9.14-29)
37Kkoro mo̧ro̧mä̧, müä'kara̧'a̧ttü̧ tti̧mȩyȩwi̧'o̧mȩnä̧ ttü̧ja̧ rekuätü Jesú-ru totta pä'ü ichi'inä̧tü̧. 38Ja̧'wa̧nü̧ ja̧'a̧ ttü̧ja̧ rekuätü ttü̧'kä̧tȩttü̧, pä̧i̧ku̧nä̧ wopi'inü̧:
—Chu̧ru̧wa̧, chi̧tti̧ chu'ä̧kua̧rü̧ topiyittü, ppäkuädiyattü. 39Ja̧'wa̧nü̧ ja̧'a̧ epíritu su̧ro̧pa̧ ujuru jȩo̧mȩnä̧, rü̧ȩnä̧ wopi'ä'ijü, i̧mȩrokuächa'attü änä̧ tteyuwoppa päi'ünä̧, usurä ȩmä̧u̧nä̧ jȩpü̧ räopächa päokoku pä'ijü. 40Ja̧'wa̧nü̧ ji̧yä̧ku̧, ku̧wo̧juȩtä̧u̧rü epíritu su̧ro̧pa̧ räopächünä̧ rä'epü ttikua pä'ü wȩdä̧jä̧u̧mä̧ weyekuäjätü. 41Jesú-mä̧ ädätinü̧:
—¡Isoo, ukutu ttü̧ja̧mä̧, surojütä jȩpü̧ esetokotüjä̧! ¿Ti̧yȩnü̧bü päi'ünä̧, ukuturumä̧ cha̧mi̧ 'kidächi'äkua'ajä̧ttü̧? Kui̧tti̧rü̧ poku i'kächi. 42Ja̧'wa̧nü̧ päiyäku, mü̧ä̧ya̧mä̧ i̧'chi̧'a̧'a̧nä̧, epíritu su̧ro̧pa̧mä̧, rȩjȩ ma̧'ä̧mü̧ juei'ünä̧ jȩi̧nä̧ku̧; ja̧'wa̧nü̧ päi'iyäku Jesú-mä̧ räopächünä̧ we'ü iku, mü̧ä̧ya̧rü̧mä̧ aditü iku, jä'orü ppa̧wä̧di̧nä̧ku̧. 43Ja̧'wa̧nü̧ aditü ikuiyä̧u̧mä̧, o'katoi'ünä̧ Dio ü̧rü̧ä̧ rü̧ȩnä̧ eseäkuäwinä̧tü̧. Jesú jȩä̧ji̧ rü̧ȩnä̧ tteseäkuäwa'anä̧, u̧wo̧juȩtä̧u̧rü pä'inü̧:
Jesú to̧ȩ'ä̧chä̧kuȩmä̧ todärenä̧ päi'ünä̧ ji'äwinü̧
(Mt 17.22-23; Mc 9.30-32)
44Pi̧yȩ adiu 'chu'ädi'ü ä̧ju̧kuä̧tu̧kui̧: Ubó I̧tti̧rü̧mä̧ ttü̧ja̧ ttu̧mü̧nä̧ iyü tti̧kuä̧kua̧.
45Ja̧'wa̧nü̧ pä'anä̧ juätümä̧, pi̧yȩ tü'kümä̧ yoriso wo̧jui̧'o̧ko̧tü̧ pinä̧tü̧, jua'amä̧ ttu̧wo̧jui̧pü̧ juiyünä̧ jȩpü̧ kku̧nä̧wa̧'a̧ttü̧; ja̧'wa̧ta̧nü̧ pi̧yȩ tü'kümä̧ ye'eku jä'epü ttä̧ju̧kuo̧ko̧mȩtä̧mä̧.
¿Díjä̧ttü̧ ji̧nä̧so ukuo i̧sa̧mä̧?
(Mt 18.1-5; Mc 9.33-37)
46Ja̧'wa̧nü̧ ja̧'a̧ u̧wo̧juȩtä̧u̧mä̧ pä'ä'chäkuäwinä̧tü̧, ujututtümä̧ dí jä̧kua̧'a̧jä̧ttü̧ ji̧nä̧so tu̧wä̧mȩnä̧ jä̧kua̧mä̧ pä'ü. 47Ja̧'wa̧nü̧ ja̧'a̧ Jesú-mä̧, jakuänä̧ tta̧mü̧kuädü wo̧juö̧, ji̧'ki̧cha̧wa̧rü̧ ȩmo̧po̧'ü̧ ippeyänä̧ kku̧nä̧wo̧'ü̧, 48päinä̧u̧:
—Ttü chi̧mi̧nä̧ pide ji̧'ki̧cha̧wa̧rü̧ do'ädümä̧, ttürü'i̧nä̧ do'ädü; ja̧'wa̧ta̧nü̧ ttürü do'ädürümä̧, ttürü we'inü̧rü̧'i̧nä̧ do'ädü. Ja̧'wa̧nü̧ ja̧'a̧ttü̧ ukutu o'katoi'ünä̧ttü̧ ji̧'ki̧cha̧wa̧mä̧, jua̧u̧ jä̧kua̧'a̧ ku̧wä̧mȩtu̧ku̧nä̧ ukuo i̧sa̧mä̧.
Ujuturu to'ija̧'a̧ku̧ pä'okümä̧, ujuturu ppä'ädü
(Mc 9.38-40)
49Ju̧a̧-mä̧ jua̧u̧ru̧ pä'inü̧:
—Wo̧juȩkuä̧ i̧sa̧, ya̧tȩ uku kui̧mi̧nä̧ epíritu-tu̧ suropätürü rä'epe'ü ikuiyä̧u̧; jȩü̧ juiyünä̧ pätäjäku, ujutuku kueächiyo̧ko̧u̧.
50Päiyäku, Jesú päinä̧ku̧:
—Jȩü̧ juiyünä̧mä̧ päkuätukuärü, ujuturu to'ija̧'a̧ku̧ wokümä̧, ujuturu ppä'ädü jȩpü̧ ja̧'a̧.
Jesú-mä̧, Sa̧ti̧a̧ku̧rü'i̧nä̧ Ju̧a̧-rü̧'i̧nä̧ wopi'inü̧
51Jesú-mä̧ mo̧ro̧jä̧ra̧'a̧ käekuächäkua'a tü'küwächäku, Jerusarȩ́ ütawiyära̧'a̧ ujuruku 'chi̧nü̧. 52Ja̧'wa̧nü̧ ja̧'a̧, ä'kanä̧ yotüterü we'ü ikuinü̧, Samaria ttü̧ja̧ ttidepiyu a̧'u̧kuo̧mȩ, ä'äkua'a aditü ttu̧ju̧ni̧ya̧rü̧ pä'ü. 53Ja̧'wa̧nü̧ ja̧'a̧nä̧, Samaria ttü̧ja̧mä̧ dottäda pättokoku pinü̧, Jerusarȩ́-ra̧'a̧ icha'a wo̧juö̧. 54Ja̧'wa̧nü̧ jȩtta̧'a̧ topü u̧wo̧juȩtä̧u̧mä̧, Sa̧ti̧a̧ku̧'i̧nä̧, Ju̧a̧'i̧nä̧ pä'inä̧tü̧:
—Chu̧ru̧wa̧, ¿mo̧ro̧jä̧ra̧'a̧ttü̧ okurä ma̧ü̧nä̧ jȩta̧tü̧? [Elía jȩi̧nü̧ta'anü̧] Ya'utettü kuo'ü ttikua. 55Ja̧'wa̧nü̧ pättiyäku Jesú-mä̧, kkärächi'ü wopi'ünä̧nü̧ päinä̧u̧: Ukutumä̧, ku̧jä̧tu̧ku̧ epíritu jäwämä̧ jerupätüjä̧. 56Isopäi'ünä̧ Ttü ubo I̧tti̧mä̧, ttü̧ja̧ tta̧'kua̧rü̧ totte'ächa pä'ümä̧ ichokü pinü̧sä̧; pärokua'aku ttü̧ji̧pü̧nä̧tä̧ ppä'ädü ichinü̧sä̧. Jua̧u̧ o'ka'amä̧, kkoro ütawiyära̧'a̧ku̧ 'chi̧nä̧tü̧.
Jesú-ku 'chä̧kuä̧wä̧ wȩnȩ
(Mt 8.19-22)
57Mä̧nä̧nä̧ tti̧'cho̧mȩ kkä'kottü, ya̧tȩ Jesú-ru pä'inü̧:
—Chu̧ru̧wa̧, uku kuekuächomȩmä̧ ukutäku, kuȩdä̧chä̧kua̧sä̧.
58Päku, Jesú-mä̧ ädätinä̧ku̧:
—A̧wa̧ri̧tü̧mä̧ ttäjuwiyä kku̧nä̧rä̧tü̧ ja̧'wa̧ta̧nü̧ ppi̧yu̧'i̧nä̧ ttä̧'ti̧yu̧ kku̧nä̧rä̧tü̧; ja̧'wa̧nü̧ ja̧'a̧nä̧, ttü Ubo I̧tti̧mä̧ Chu kuä'epü chü̧'o̧mȩ'i̧nä̧ jui̧'a̧sä̧. 59Ja̧'wa̧ta̧nü̧ Jesú-mä̧ kka̧ra̧rü̧ pä'inü̧:
—Ttüku ichi.
Päku ädätinä̧ku̧:
—Chu̧ru̧wa̧, mä̧kuä̧tó ä'kanä̧mä̧ chä'orü 'turu iku 'chü̧sä̧.
60Päku, Jesú-mä̧ päinä̧ku̧:
—Wä̧i̧nä̧ wa'inä̧tü̧tä̧, ttuwaparemä̧ ttu'tura'anä̧ ja̧'a̧tä̧ topi. Ja̧'wa̧nü̧ ja̧'a̧nä̧ ukumä̧ ru̧wa̧ Dio weü wȩnȩtä̧ ji'äwäji. 61Ja̧'wa̧ta̧nü̧ kka̧ra̧mä̧ päinä̧ku̧:
—Chu̧ru̧wa̧, ukuku kuedächa pä'üsä; ja̧'wa̧nü̧ ja̧'a̧nä̧, mä̧kuä̧tó, ä̧kuo̧mȩnä̧mä̧ chojusodera̧'a̧ chawaruwärü te'äwo'ü 'chü̧sä̧. 62Ja̧'wa̧nü̧ päiyäku Jesú-mä̧ päinä̧ku̧:
—Ya̧tȩ rȩjȩ kkiäwäkä u̧mü̧nä̧ 'chu̧'ä̧di̧'ü̧'ka̧ o'ka'aku kkärächü topümä̧, Dio weomȩ adita pä'ümä̧ weyekua'a.
Currently Selected:
San Lucas 9: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
