Matai 14

Yaheiyani Alazho

(Mak 6:14-29; Luj 9:7-9)

1Hhe xienzide Hherode on Ersai shiqinyi sonosudene 2kha dourashiku kunlade kieliewo, "Eneshi xili gieghasan Yaheiya wo. Hhe fugudene aminne oluwo. Ingiese ene nenlitu shiqinla hhei jierese khizhezho."

3Eneshi Hherode jiu biereine Xilojini yenyinghala Yaheiyai bareidene banlasenu bafanzide khazho. Hherodei jiushi Feili wo. 4Yaheiya Hherodede, "Chi hhei agise ese oluzho." giezhi kieliezho. 5Ingiese Hherode Yaheiyani alane giezhoma, bexinla hhei xienzhi wo giese hhelase ayizho. 6Hherodeni olusan udu kuzhese xi beilazhi Xilojini oqin kunlai melie wu jiulizho. Hherode hende bayasuzho, 7ingiese fayen giezhi oqinde yan kerese yan ogiye giezhi dain giewo. 8Anani oqinne, "Xili gieghasan Yaheiyani qiorunyi hhamusade teidene made iregha." giezhi kielieghase oqin kieliewo. 9Hherode hende munan giezho. Ingieliuzhe olon kunlai melie fayen giese fenfulazhi hhende ogine giewo. 10Ingie kun peidene bafanzide Yaheiyai qiorunyi chizhighawo. 11Qiorunyini hhamusade agi ire oqinde ogiwo. Oqin pse anadene ogiwo. 12Yaheiyai tujila iredene beyeini linlasenu buladene Ersade echi kieliewo.

5000 Kunde Chudughazho

(Mak 6:30-44; Luj 9:10-17; Yah 6:1-14)

13 Ersa enei mejiedene chon souzhi hhense likai gie niezheghan hontande echiwo. Olon kunla Ersa yolasei mejiedene chenshilase yozhi hhei daghazho. 14Ersa chon jierese bouzhese tebieji olon kunlai chanladene ubali xiiwo. Hhelai giemeresan kunlai goudaghawo. 15Khara olukude tujilani hhei shida ire kieliewo, "Eneshi hontan wo. Shihou eqie widawo. Kunlai sandaghazhi hhela goyalane aghinlade agizhi ijiele echigieba." 16Ersa kieliewo, "Hhelai echighaku biyo uwo. Ta hhelade ogizhi ijiegha." 17Tujilani kieliewo, "Matai enende zi tawun ginanji ghua zhaghasun wo." 18Ersa kieliewo, "Mii enende agizhi iregha." 19Ingie olon kunlai fenfulazhi osuntu oronde soughawo. Pse tawun ginan, ghua zhaghasunyi barei, asimanyi uzhe Hudade mafan kieliedene ghulusenu tujilade ogise tujila kunlade ogiwo. 20Dajiala man ijiedene chuduwo. Tujila feiliesan zhazhai hhantulaghase 12 gie lanzi zhonlowo. 21Ijiesan kun dunda bierei kewosilai ulie sanase chabudu 5000 ere kun wo.

Hai Jiere Yozho

(Mak 6:45-52; Yah 6:15-21)

22 Ersa deigo tujilai biizhi chon jiere khighadene xien hai duimiende daogha goyane olon kunlai sandaghawo. 23Kunlai sandaghadene ulade niezheghan onxian giele echiwo. Khara oluse hhende niezheghan wo. 24Qingiekude chon haibienzise gholo wo. Kei shun wise lan chonni eghizhi yuqighazho. 25Xieni 3 jiense 6 jienni shihoude Ersa tujilai hhende echine giezhi haini usu jiere yozho. 26Tujila hai jiere hhe yosei chanladene jindazhi ayidene waradawo, "Perei wo!" 27Ersa deigo hhelade kieliewo, "Ta zhughelane tei. Bi wo. Bu ayi!" 28Beduru kieliewo, "Ezhan, chi enbese minlin xiaizhi mii hai jiereghun goyane hhende yozhi echigha." 29Ersa, "Chi ire." giezhi kieliese Beduru chon jierese boudene Ersai hhende echine giezhi hai jiereghun yo qiiwo. 30Kei fugiede feiliesei chanla ayidene haide anda boune giese waradazhi kieliewo, "Ezhan, mii jiui!" 31Ersa deigo khaghalane laidene kieliezho, "Chi ene xianxin gieku zhughe gajitu kun. Yangiezhi inxin giezho?" 32Ersa Bedurughala chon jiere khise kei beiwo. 33Chon jieredu kunla Ersai beiizhi kieliewo, "Chishi shuhua Hudai kewon enbene!"

Genisalededu Gientui Goudaghazho

(Mak 6:53-56)

34Hhela haini daodene Genisale oronde irewo. 35Hhendedu kunla Ersai tanidene hhe iresan xioxini go oronlade chonjizhi giemeresan kunlai man udurudene Ersai hhende irewo. 36Hhela Ersai xiahua giezhi jien ghizhane nie maqigha giezho. Maqisan kunla man goudawo.

Currently Selected:

Matai 14: sce

Highlight

Copy