YASFADOCI LOKU 4
4
1Chena Jesise, uqihsi-noli nili Ufapi Ucvjrlvhqvli, ini Jrtane uci kutaqi, macimi ini belasgi si walaqi ini Ucvjrlvh-ku-fewa-nagi 2nyawr-pitvgi tfuku lrqvsi, u pami kuci myrsi-vshagoli nili mvci-mvnadoli. Macimi mvtv-wiahi u meci nala grsagiki : ia uqihfaki nili tfuku chena sqrlvwa. 3Macimi inv mvci-mvnatu, gelv qahqi u weyrwi-ivna nili u Qihfvli Mvnatu, tapimi yrmv sekunv wvhsi inv tvkuwhr-niwici, u talrli. 4Macimi ud rpvftv-wrli Jesise, Mahtvwi-gapi ini, Mvtv ilani tvkuwhv nrnsihkv wa huci lanvwa-wi, u talrli. 5Chena inv u kuqici-walrli nili, macimi u wrpvta-lrli jrivhki nili ugimrwi-drmqa-wvli ini ya-lakuqvh-kvmigigi ini nakuti maniti lrqvsi. 6Macimi, Nelv gah melala jrivhki yomv simakufewa, macimi ini nili si wvhfrci-makufewa : xvga ini naiah-kv ni mahci pvgfanvmr-gopi; macimi goqa-nafv-grci yasi tahaiv nelv ni melv ini. 7Qahqi gelv waciganvhi ga husvsilvwa ya-lvhfv-meiv nelv, ga huwelrmi ini jrivhgi, u talrli inv mvci-mvnatu. 8Chena Jesise rpvfsa macimi, Mahtvwi-gapi ini, Ga husvsilvwahv gelv inv Dabalamiwatv gi Mvnado-mv, macimi inv pahi gah ma-magini-lutvwv, u talrli. 9Chena inv Culosalame u tasi walrli, macimi ini vkuei-kvmi mvmrtumawi-kvmiqi u lamvtvp-hrli, macimi, Qahqi gelr-wivna nili u Qihfvli Mvnatu, yoci svhgigi ipv-gitvnu geiv : 10xvga ini mahtvwi-gapi,
Wah melvhi inv ut ancvle-mhi tapimofowa gelv isi, wvhsi gcitvwv-hahgi gelv :
11chena,
U laciwrgi nihki gah nema-goki,
Belabaga ga pgitahfatu gi fici sekunagi,
u talrli. 12Chena Jesise pami rpvfsa, Tagi gelv ga hustu u tapu-wrfowa inv Dabalamiwatv gi Mvnadomv, iupi ini, u talrli.
13Chena inv mvci-mvnatu iah mahci lutvgi jrgi kuci myrsi-vshadewa, srwa nili uci mrlrqvsi.
14Chena Jesise patagi ini u wesikvtuwewa-nagi inv Ucvjrl-vhqv hawv Galalegi : macimi u ta lrcimakufewa mafhega si luhfaiv srpwi ini gryrukv tvsi. 15Chena kvgahgimiwa u msi-kvmiku-mwrgi, u pami wvhfrci-makufiha-kuhi jrivhki.
16Chena Nrsalafi si biawv tvh mahci kvtano-fuci : macimi becfa, yasi nvkvtafewa-nici, ini msi-kvmiqi tv hini vlwrkvhsi-ge-sagigi, chena pvfaqi wvhsi Irbrtu-tvgi awigrdagi. 17Macimi ’n’-tvsi biaci pvgfanv-mrqi ini ud awigrdami inv mrmosigesqatv Visviv. Chena u pvhginv ini awigrdagi, macimi u mkv ini tvsi tv hini mahtvwi-gagi,
18Nili Ucvjrlvhku-mvli inv Dabalamiwatv vbeli usgici nelv,
Xvga inv ni lumgo-naqv wvhsi nvnvhimvgi uwasi-biadrcimo-wanv inv gitamrfv :
Ni mahci wrwenaqv wvhsi Ifwrtutvmv-wvki palhofowa nihki geganigr-fvki,
Macimi pami patagi-nvmowa inv ga-gabeqatv,
Wvhsi tabalatv-mafewvh-gaphvki nihki ga-gisho-fucki,
19Wvhsi lfwrtutvmv ini manwi-utvhpano-dagi u gikvdomi inv Dabalamiwatv.
20Chena u giboleqanv ini awigrdagi, macimi ini patagi u tah me-lrli nili ya-kvwrfelici, chena lamvtvpiwv : macimi nili u sgesa-kuwv jrivhki ini msi-kvmikugi u mvmyadr-wrpvmr-wrli nili. 21Chena ut vlami ilvhi nihi, Hinugi grsagigi yomv tapilo awigrdagi mahci uqrufadota ki tvwvgr-wrgi. 22Macimi jrivhki u pvhginv-mvwr-wrli dabwawa, u lvkuqa-latvmvwr-wrli nili gisrjelafewa uci kvlvwewanv wa-moyrki u donagi : chena nihki, Hv mvtv yrmv Jose u qihfvli? iwvki. 23Chena inv, Qelvini gelvwv yomv pamr-tuwawa, Nrnvtvuci-gatv, gegahdolu geiv : goqa-nahi-grci mviahci notvmrga yasi lvwegi Gahbrnivmegi si lvwelu nahfrpi utvsi nahvlwrkv gitvsisge-magi, ga hisipwv u talvhi. 24Macimi, Tapilo gi talapwv nelv, Mvtv-lrqv mrmosigesqatv manwa-lamofu nahvl-wrkv ut vsisge-magi. 25Pvyaqv svpkvhi dabawa gi talapwv, Maci ’n’tvsi vbeki sekvwi-iqaki Ir Iswelv ina u kvgesakvna-migi Elvicv, ina ini manqvtwi gibhota nfwi gikvtu gita nakutwvhfwi gesvhfu, ina ’n’tvsi biaiv msrwi sa-sqrlvwawa-nigi mafhega ini vsisgegi; 26macimi mvtv wiyafvli nihi lasgofu Elvicv, wakv Salifali pahi, ini Srtvnewi vsisgegi, iqali sa-sekvwi-iqawilici. 27Chena maci ’n’tvsi vbeki wasgilhvga-magicki lr Iswelv ina u ta lrqrfewa-nagi Elvicv inv mrmosigesqatv; macimi mvtv wiyafv nihki ufapi-ludofu, wakv Namvne pahi inv Siliawi-lani, isiwa. 28Macimi jrivhki nihki ini msikvmikugi uqrwafeki mvci-gidawa, yasi notvmu-wrci yolumv wiahi; 29chena pvfaqeki nihki, macimi ini udawa-nagi uci luhfa-lkvwr-wrli nili, chena ini waci giskvh-gigi ini maqvhgefigi tv hupvtano-dagi udawa-nwv u tasi walr-wrli, wvhsi manvwvhga welagi uci pvgilr-wrci lwrmagi isi. 30Pvyaqv inv pami srpwi pamfa ini alaghi nihi wapfa ya-hrci.
31Chena Gahbrnivme si biaci brlvcsinwv, Galale uci udawa. Macimi bami kvgahgimrci nihi tv hvlwrkvhsi-gesagigi : 32chena u cihfa-latvmr-kuhi nihi u kvgahgimiwawa; xvga gilagi wiahsi-makufewa inwili u kvlvwewa. 33Chena ’n’tvsi msi-kvmikugi vpiwv ilani, ba-bonrtv ucvj rivhku-m vli wivgi-wvninahfi; macimi inv wivkvhotvmwv kvlvwawih-simowa, 34Hr ! nahiwa ni bonrpa wv ipanvla-lrga gelv, Jesise Nrsalafi-lani? hv gi bir wvhsi mvci-lutvwi-yrga? Gi wrku-mala gelv waci-wivni, inv Ufapi Wiyafv Mvnatu uci, isiwa. 35Macimi Jesise u kutalrli nili, Nola-wilu, macimi inv uci luhfrlu, u talrli. Macimi inv wvninahfi iah mahci svhgigi ipvgilrci nili ini alaghi, biaci nili uci luhfa, mvtv u pami gisinrli. 36Macimi utfaku-nrwv qvqahdrni-tahawa jrivhki, che-na mrwvtwi kvlola-deki nihki, Nahiwa yomv kvlvwewa? yasi gilagi wiahsi-makufewa macimi wrsikvgi inv tapimrci nihi wivgi-lahfihi, macimi nihki biaci luhfaki, iwvki. 37Chena ’n’tvsi wapfaiv lrcimowa inv isi jrgi tvsi ini mrlaghi-drmqa gryrukv haiv.
38Chena inv uci pvfaqi ini msi-kvmikugi, macimi ini wegiwv si becfa ya-drci Svimvne. Macimi Svimvne wewvli u gali bami fogina-kuci msi gisifowa; macimi nili uci nvnvhbrci-makuhi nihi. 39Chena nili si nepvwi, u kutatv ini gisfowa; macimi inv u nv-kvlaku ini : chena walanv unskv macimi u mesvmv-wvhi nihi.
40Chena inv gesagi-gesfwv iah pvximuci, jrivhki nihki ba-bonrcki wiyafhi ya-qilu-galici qvqatvgi si lugawanv nili u biatvwr-wrli nihi; macimi inv usgici jrgi wiyafvli nihi u tah bonrnv u laci-wvli, macimi u gegahvhi. 41Chena wvninahfeki nahfrpi maci nihi uci biaci luhfaki, wivkvhotv-moki, macimi Gelv inv nili u Qihfvli Mvnatu, isiwaki. Macimi u pami kutalvhi nihi, mvtv welrni u ta la-lamvhi wvhsi kvlvwilici, xvga nihki u wrkudrnrwv yasi nili Klvisde-wilici.
42Chena ini iah whrpvgi grsagigi, biaci luhfa macimi lr pvpsqvhgi tvsi hawv : chena nihki mahsa-lagiki u tah nvtunawhr-wrli nili, macimi utfr-wrli, chena u mahci wesv nvginr-wrli nili, wvhsi bur inv nihi uci wapfaci. 43Pvyaqv, Qelvhi nili uwasi-biadrcimowanv ini Mvnatu ugimrwi-drmkumi uci nahfrpi nah nvnvhidrnv nili kutvkvli udawanv : xvga ini waci wrwenigi, u talvhi.
44Macimi pami nvnvhi-miwa betiga nili Galalewi msi-kvmiku.
Currently Selected:
YASFADOCI LOKU 4: SJW
Highlight
Share
Copy
Want to have your highlights saved across all your devices? Sign up or sign in
Published for Thomas Wildcat Alford in 1929
