ลามูลา 35
35
ยาโกบ บาลิ ปี กะ ตูโปะ เบดเอน
1ตูฮัด เดะ อาตัซ มือเลา ฌางัน ยาโกบ จะ_ “บีกัซ เลอ_ บาลิ ปี กะ ตูโปะ เบดเอน_ ดูโดะ ปัจ อีตู เลอ. โซะ อีตู_ เกา กือนา บูวัจ ตือปัจ มือญือมัฮ กะ ตูฮัด_ นู ปลีฮัจ กะ เกา_ วะตู เกา ลารี เดะ เอซาว_ กากา เดะ เกา”_ ตูฮัด ญา จะ.
2กะฆีเตอ_ ยาโกบ มือเลา ฌางัน ลูมอฮ นะบรานะ นะ ญา_ ฌางัน ลูมอฮ ซือมียา นู ดูโดะ บือซามา ฌางัน ญา จะ_ “กาเญา กือนา ตีงัน บูวัก เลอ_ โกะ บราลา นะ บักซา อาซิก_ นู กาเญา อาดา. กือนา บาโซฮ ญาวา ตะอาซิก_ บรี จรัฮ บาฌิ. กือนา ซาเลด กาเยด บาฌู นะ กาเญา เลอ. 3บรี กีตา ปี กะ ตูโปะ เบดเอน_ บรี กู นะ บูวัจ ตือปัจ มือญือมัฮ กะ ตูฮัด เดะ อาตัซ. เดะ อารี อีตู_ นู กู ซูซัฮ ฮาตี โตระ_ ตูฮัด ตีกัฮ กะ กู ดัฮ. กู บือเลฮ ปี โซะ ดีฮา โปด_ ญา เลอ_ บือเลฮ ปี บือซามา ฌางัน กู ดัฮ”_ ญา จะ.
4กะฆีเตอ_ กูญา ปาคัจ บรี กะ ยาโกบ_ อาเมด โกะ บราลา นะ บักซา อาซิก_ นู กูญา อาดา_ ฌางัน โกะ ซูบัก_ นู อาดา เดะ ตือลีงา นะ กูญา. ยาโกบ เตอ_ ญา กาลี ลูบัก_ ตานัม ซือบารัก อีตู_ เดะ บาวัฮ ปูโฮด กายู กรามัจ_ นู อาดา ดาปิก นังฆรี เซเคม.
5ตานา กูญา บือฌาลัด ปี_ ตูฮัด บูวัจ บรี ลูมอฮ ซือมียา_ เดะ โกะ นังฆรี ซิกอาซิก นู ดูโดะ กือลีลิก_ ตาโกจ เดะ กูญา โตระ. กะฆีเตอ_ กูญา อีตู เตด อูเซ ตูโรจ กะ โกะ นานะ นะ ยาโกบ. 6กะฆีเตอ_ ยาโกบ_ ฌางัน ลูมอฮ ซือมียา นู อาดา บือซามา เตอ_ กูญา มาแรฮ รอจ กะ ตูโปะ ลูด_ ฌาดี จะ_ ตูโปะ เบดเอน_ นู อาดา เดะ นังฆรี คานาอัน. 7ปัจ อีตู_ ยาโกบ บูวัจ ตือปัจ มือญือมัฮ กะ ตูฮัด_ ซา ตือปัจ. ญา บรี ตือปัจ อีตู_ ปือนามา จะ_ เอน-เบดเอน#35.7 ปือนามา “เอน-เบดเอน”_ ฌาดี จะ_ “ตูฮัด นะ ตูโปะ เบดเอน.”. กรานา ตือปัจ อีตู เลอ_ กาลา ญา ลารี_ เดะ กากา นะ ญา_ ตูฮัด เดะ อาตัซ มาแรฮ ปลีฮัจ กะ ญา ดัฮ.
8โซะ เดโบรา นู ปือญูโรฮ นะ เรเบคา_ มาตี ดัฮ. กูญา ตานัม บาดัด นะ ญา_ เดะ บาวัฮ ปูโฮด กรามัจ ซา ปูโฮด_ ดาปิก ตูโปะ เบดเอน. กูญา บรี ปูโฮด อีตู ปือนามา จะ_ อาโลน-บาคุด.#35.8 อาโลน-บาคุดฌาดี จะ “ปูโฮด กรามัจ นู ซูซัฮ ฮาตี.”
9วะตู ยาโกบ มาแรฮ_ ดาตัก เดะ ปาดัน-อารัม_ ตูฮัด มาแรฮ ปลีฮัจ กะ ญา ปูลัก_ บรี ซือลามัจ กะ ญา_ 10มือเลา จะ_ “เกา อาดา ปือนามา จะ ยาโกบ_ ตาปี ตะเดะ อีนี_ กูญา นะ เตด ซือโบจ ปือนามา นะ เกา จะ_ ยาโกบ_ ตาปี กูญา นะ บลาโลก เกา ปือนามา อาซิก จะ_ อิซราเอน.” กะฆีเตอ_ ยาโกบ อาดา ปือนามา จะ_ อิซราเอน.
11ตูฮัด มือเลา ฌางัน ญา จะ_ “กู นี เลอ_ ฌาดี ตูฮัด นู มือฆัฮ. เกา นะ บือเลฮ อานะ จูจู บาญะ_ นะ บือตามัฮ บาญะ ซูโงฮ. บือแนฮ นะ เกา_ นะ ฌาดี ซา บักซา ซือตืองัฮ_ นะ ฌาดี บาญะ บักซา ซือตืองัฮ_ นะ ฌาดี ราฌา ฌูฆา. 12ตือปัจ ตานัฮ อีนี_ นู กู บรี กะ อับราฮัม_ ฌางัน อีซัก ดัฮ เตอ_ กู นะ บรี กะ เกา ฌูฆา_ นะ บรี กะ บือแนฮ นะ เกา_ ตูโรด มือนูโรด ซือมูฮา” ตูฮัด ญา จะ.
13กะฆีเตอ_ ตูฮัด ญา ญาแญะ ลือปัซ ปี_ เดะ ตือปัจ นู ญา มือเลา ฌางัน ยาโกบ. 14ยาโกบ ญา อาเมด บาตู_ ตืองะ ฌาดี ปือนานา_ เดะ ตือปัจ นู ตูฮัด มือเลา ฌางัน ญา_ อาเมด อาระ อางุน_ มือญือมัฮ กะ ตูฮัด_ อูแร เดะ อาตัซ บาตู อีตู_ อูแร มีญะ ซามา. 15ตือปัจ นู ตูฮัด มาแรฮ มือเลา ฌางัน ยาโกบ_ ยาโกบ ตืองะ ปือนามา จะ_ ตูโปะ เบดเอน.
ลาฆู บือฌาดี นะ เบนยามิน อารี มาตี นะ ราเชน
16กูญา บือฌาลัด ปี_ เดะ ตูโปะ เบดเอน. กาลา กูญา เตด รอจ_ กะ ตูโปะ เอฟราทา ลาฆี_ ราเชน นะ ดูโดะ เดะ อาปี ดัฮ_ โปรจ นะ ญา ซาเกะ โตระ. 17วะตู ญา ซาเกะ โตระ กะฆีเตอ_ นีบีนี นู ฌาดี บีดัด มือเลา ฌางัน ราเชน จะ_ “ฌางัน นะ ตาโกจ เลอ. เกา นะ บือเลฮ นานะ กีลากี_ ซืออูรัก ปูลัก.” 18ตานา ราเชน นะ ฮาบิฮ ญาวา_ (ซาเบะ ญา รอจ วะตู นะ มาตี)_ ญา บลาโลก ปือนามา นานะ อีตู จะ เบนโอนี#35.18 ปือนามา “เบนโอนี” ฌาดี จะ “นานะ นู ลาฆู ซาเกะ โตระ.”. ตาปี ปะ เดะ ญา_ ตืองะ ปือนามา นะ นานะ อีตู จะ_ เบนยามิน#35.18ปือนามา “เบนยามิน” ฌาดี จะ “นานะ นู ซือบือลัฮ กานัน.”. 19กะฆีเตอ_ ราเชน มาตี ดัฮ. กูญา ตานัม บาดัด นะ ญา เดะ บีดิก ฌาลัด_ นู ปี กะ ตูโปะ เอฟราทา_ (ฌาดี จะ_ ตูโปะ เบดเลเฮม). 20ยาโกบ ญา ตืองะ บาตู ฌาดี ปือนานา_ เดะ ตือปัจ ตานัม บาดัด บีนี นะ ญา_ ฌาดี ปือนานา บรี ลีฮัจ จะ_ ตือปัจ นู กูญา ตานัม ราเชน. อาดา โซะ อีตู_ รอจ กะ ฮาดัจ อีนี เลอ.
21อิซราเอน บือฌาลัด ปี ปูลัก_ ปี ตืองะ รูมัฮ กาฌัก กาเยด นะ ญา_ ลือปัซ รูมัฮ ฌาฆา นู ตีงี_ เดะ ตูโปะ เอเดอ.
22ตานา อิซราเอน ดูโดะ เดะ นังฆรี อีตู_ รูเบน_ นานะ นะ ญา_ มาโซะ ปี มียา บินฮา_ นู ฌาดี บีนี มูดา_ นะ ปะ เดะ ญา. อิซราเอน ญา ดืองัยํ ลาฆู อีตู ดัฮ.
ลูมอฮ นานะ กีลากี นะ ยาโกบ_ อาดา ดูวา บือลัซ อูรัก. 23นานะ นะ เลฮา_ ปือนามา รูเบน_ (นู ฌาดี นานะ ซูโลก นะ ยาโกบ)_ ซีเมโอน_ เลวี_ ยูดา_ อีซาคา_ ฌางัน เซบูลุน. 24นานะ นะ ราเชน_ ปือนามา โยเซบ_ ฌางัน เบนยามิน. 25บินฮา_ นู ฌาดี ปราโซฮ นีบีนี นะ ราเชน_ อาดา นานะ ปือนามา จะ_ ดาน_ ฌางัน นับทาลี. 26ซินปา_ นู ฌาดี ปราโซฮ นีบีนี นะ เลฮา_ อาดา นานะ ปือนามา จะ_ กาด_ ฌางัน อาเซอ. โกะ ซือมียา อีตู_ ฌาดี นานะ นะ ยาโกบ_ นู ดูโดะ เดะ อาปี_ เดะ โซะ ปาดัน-อารัม.
อีซัก มาตี ดัฮ
27ยาโกบ มาแรฮ ดาปัจ อีซัก_ ปะ เดะ ญา_ เดะ ตูโปะ มัมเร_ นู อาดา ปือนามา จะ_ คีริยาด-อาระบา_ ฌาดี นังฆรี เฮโบรน. โซะ อีตู_ อับราฮัม_ ฌางัน อีซัก_ กูญา ดือละ มือนูปัก ดูโดะ ดูลู ดัฮ. 28อูมอยํ นะ อีซัก_ ซือราตุซ ลาปัด ปูโลฮ (180) ตาโฮด ดัฮ_ 29ญา ตูฮา โตระ ดัฮ_ ญา บารู ฮาบิฮ ญาวา_ ปี บือมุน บือซามา_ ฌางัน ลูมอฮ ญังมูญัง นะ ญา. เอซาว ฌางัน ยาโกบ_ นานะ นะ อีซัก_ กูญา ตานัม บาดัด นะ ญา_ โซะ อีตู ดัฮ.
Currently Selected:
ลามูลา 35: ULBIBLE
Highlight
Share
Copy
Want to have your highlights saved across all your devices? Sign up or sign in
