ลามูลา 36
36
บือแนฮ นะ เอซาว
(1 จรือตา 1.34-36)
1ตะเดะ อีนี ฌาดี บือแนฮ นะ เอซาว (ฌาดี จะ เอโดม) 2เอซาว บือเลฮ นีบีนี ลูมอฮ คานาอัน_ ฌาดี บีนี นะ ญา_ ปือนามา จะ_ อาดัฮ_ นานะ นะ เอโลน_ ซือมียา ลูมอฮ เฮด_ ฌางัน โอโฮลีบามา_ นานะ นะ อานัฮ_ นู ฌาดี นานะ นีบีนี นะ ซีเบโอน_ ซือมียา ลูมอฮ ฮีวี_ 3ฌางัน บาเซมัด_ นานะ นีบีนี นะ อิซมาเอน_ ฌาดี จะ_ อาดี นีบีนี นะ เนบาโยด. 4โซะ อาดัฮ_ บือเลฮ นานะ กีลากี ฌางัน เอซาว_ ปือนามา เอลีฟัด. บาเซมัด บือเลฮ นานะ กีลากี_ ปือนามา_ เรอูเอน. 5โอโฮลีบามา บือเลฮ นานะ_ ปือนามา จะ_ เยอูชะ_ ยาลาม_ ฌางัน โครา. กูญา อีนี ฌาดี นานะ นะ เอซาว_ นู ดูโดะ เดะ อาปี เดะ นังฆรี คานาอัน.
6เอซาว บาวา โกะ อานะ บีนี_ ฌางัน โกะ ซือมียา ซือมูฮา เดะ รูมัฮ นะ ญา_ ฆือนะ ฌางัน โกะ กาวัด บือนาตัก_ โกะ ซือบารัก นู ญา บือเลฮ_ ดาตัก มาแรฮ เดะ นังฆรี คานาอัน_ บราเกะ ปี ดูโดะ นังฆรี อาซิก_ ฌาโวฮ ดีกิ_ เดะ ยาโกบ_ นู ฌาดี อาดี เดะ ญา_ 7ซาเบะ โกะ ซือบารัก นะ กูญา ดูวา อูรัก_ อาดา บาญะ_ นะ ดูโดะ ซือกาลี เตด บือเลฮ. ตือปัจ นู กูญา ดูโดะ เตอ_ เตด ฆะ นะ ปือบือลา โกะ กาวัด บือนาตัก นะ กูญา. 8กะฆีเตอ_ เอซาว ญา ปี ดูโดะ เดะ ตือปัจ ตานัฮ ตีงี_ โซะ บูเกะ เซอีระ. เอซาว เตอ ฌาดี เอโดม เลอ.
9ตะเดะ อีนี ฌาดี บือแนฮ นะ เอซาว_ นู ฌาดี ญังมูญัง นะ ลูมอฮ เอโดม_ ซือมียา โซะ บูเกะ เซอีระ. 10ปือนามา นานะ กีลากี นะ เอซาว_ ฌาดี จะ_ เอลีฟัด_ นานะ นะ อาดัฮ_ บีนี นะ เอซาว_ เรอูเอน_ นานะ นะ บาเซมัด_ บีนี นะ เอซาว.
11โซะ นานะ กีลากี นะ เอลีฟัด_ ปือนามา จะ_ เทมาน_ โอมา_ เซโฟ_ กาทาม_ ฌางัน เคนัด. 12(ทิมนา ฌาดี บีนี มูดา นะ เอลีฟัด_ นู ฌาดี นานะ นะ เอซาว. ญา บือเลฮ นานะ ฌางัน เอลีฟัด_ ปือนามา จะ_ อามาเลก.) กูญา อีนี ฌาดี นานะ กีลากี นะ อาดัฮ_ บีนี นะ เอซาว.
13ตะเดะ อีนี_ ฌาดี นานะ กีลากี นะ เรอูเอน_ ปือนามา จะ_ นาฮาด_ เซรัฮ_ ชัมมา_ ฌางัน มิดซา. กูญา อีนี ฌาดี นานะ กีลากี นะ บาเซมัด บีนี นะ เอซาว.
14ตะเดะ อีนี ฌาดี นานะ กีลากี นะ บีนี นะ เอซาว นู ปือนามา จะ_ โอโฮลีบามา_ นานะ นีบีนี นะ อานัฮ_ นู ฌาดี นานะ นีบีนี นะ ซีเบโอน. ญา บือเลฮ นานะ กีลากี ฌางัน เอซาว_ ปือนามา จะ_ เยอูชะ_ ยาลาม_ ฌางัน โครา.
15ตะเดะ อีนี_ ฌาดี โกะ กือปาลา_ เดะ ลูมอฮ บือแนฮ นะ เอซาว. โกะ นานะ นะ เอลีฟัด_ นานะ ซูโลก นะ เอซาว_ อาดา โกะ กือปาลา นะ ลูมอฮ บือแนฮ นะ เทมาน_ โอมา_ เซโฟ_ เคนัด 16โครา_ กาทาม_ ฌางัน อามาเลก. กูญา อีนี ฌาดี ลูมอฮ บือแนฮ นะ เอลีฟัด_ เดะ นังฆรี เอโดม_ ฌาดี อานะ จูจู นะ อาดัฮ.
17ตะเดะ อีนี ฌาดี นานะ กีลากี นะ เรอูเอน_ นู ฌาดี นานะ กีลากี นะ เอซาว. อาดา โกะ กือปาลา บือแนฮ นู ปือนามา จะ_ นาฮาด_ เซรัฮ_ ชัมมา_ ฌางัน มิดซา. กูญา อีนี ฌาดี กือปาลา โกะ บือแนฮ นะ เรอูเอน_ เดะ นังฆรี เอโดม_ ฌาดี อานะ จูจู นะ บาเซมัด บีนี นะ เอซาว.
18ตะเดะ อีนี ฌาดี นานะ กีลากี นะ โอโฮลีบามา_ บีนี นะ เอซาว. อาดา กือปาลา โกะ บือแนฮ นู ปือนามา จะ_ เยอูชะ_ ยาลาม_ โครา. กูญา อีนี ฌาดี กือปาลา โกะ บือแนฮ_ นู ดาตัก มาแรฮ เดะ โอโฮลีบามา_ บีนี นะ เอซาว_ ฌาดี จะ_ นานะ นีบีนี นะ อานัฮ. 19กูญา อีนี ซือมูฮา ฌาดี นานะ กีลากี นะ เอซาว (ฌาดี จะ เอโดม.) โกะ ซือมียา อีนี ฌาดี กือปาลา ลูมอฮ บือแนฮ นะ กูญา.
20ตะเดะ อีนี ฌาดี นานะ กีลากี นะ เซอีระ_ ซือมียา ลูมอฮ โฮรี_ นู ฌาดี ซือมียา นังฆรี อีตู_ ปือนามา จะ_ โลทาน_ โชบาน_ ซีเบโอน_ อานัฮ_ 21ดีโชน_ เอเซอ_ ฌางัน ดีชาน. กูญา อีนี ฌาดี กือปาลา โกะ บือแนฮ นะ ลูมอฮ โฮรี_ นู ฌาดี นานะ นะ เซอีระ เดะ นังฆรี เอโดม. 22นานะ กีลากี นะ โลทาน_ ปือนามา จะ_ โฮรี ฌางัน เฮมาน. อาดี นีบีนี นะ โลทาน ปือนามา จะ_ ทิมนา. 23ตะเดะ อีนี ฌาดี นานะ กีลากี นะ โชบาน_ อาดา อาละวาน_ มานาฮาด_ เอบาน_ เชโฟ_ ฌางัน โอนัม. 24ตะเดะ อีนี ฌาดี นานะ กีลากี นะ ซีเบโอน_ อาดา อัยยา_ ฌางัน อานัฮ. อานัฮ เตอ_ ญา ฌาดี ซือมียา นู ดาปัจ มาตา อาเย ฮางัจ_ นู ซือบุยํ ตรือเบะ เดะ ตานัฮ ตูโฮยํ นู ลือฆา_ กาลา ญา ปือบือลา กาวัด กูดา ดือมิ นะ ซีเบโอน ปะ เดะ ญา. 25ตะเดะ อีนี ฌาดี นานะ นะ อานัฮ_ อาดา ดีโชน_ ฌางัน โอโฮลีบามา_ นู ฌาดี นานะ นีบีนี นะ อานัฮ. 26ตะเดะ อีนี ฌาดี นานะ กีลากี นะ ดีโชน_ อาดา เฮมดาน_ เอชะบาน_ อิดราน ฌางัน เคราน. 27ตะเดะ อีนี ฌาดี นานะ กีลากี นะ เอเซอ_ อาดา บินฮาน_ ซาวาน_ ฌางัน อากาน. 28ตะเดะ อีนี ฌาดี นานะ กีลากี นะ ดีชาน_ อาดา อูซะ ฌางัน อารัน 29ตะเดะ อีนี ฌาดี กือปาลา บือแนฮ นะ ลูมอฮ โฮรี_ ฌาดี กือปาลา นะ บือแนฮ นะ โลทาน_ โชบาน_ ซีเบโอน_ อานัฮ 30ดีโชน_ เอเซอ_ ดีชาน. กูญา อีนี ฌาดี กือปาลา นะ ลูมอฮ โฮรี_ ตูโรจ กะ บือแนฮ บักซา นะ กูญา_ เดะ นังฆรี เซอีระ.
31ตะเดะ อีนี ฌาดี ราฌา นู ปือบือลา เดะ นังฆรี เอโดม_ ดูลู นู ลูมอฮ อิซราเอน นะ อาดา ราฌา ปือบือลา. 32อาดา เบ-ลา_ นานะ กีลากี นะ เบโอระ_ นู ฌาดี ราฌา ปือบือลา เดะ นังฆรี เอโดม. นังฆรี ลูวัก นะ ญา_ ปือนามา ดินฮาบา. 33กาลา เบ-ลา ญา มาตี ดัฮ_ โยบับ_ นานะ กีลากี นะ เซรัฮ_ ซือมียา ลูมอฮ นังฆรี โบซรา_ ฌาดี ราฌา ฆาตี ญา ปูลัก. 34กาลา โยบับ ญา มาตี ดัฮ_ ฮูชาม_ ซือมียา นังฆรี ลูมอฮ เทมาน โปด_ ฌาดี ราฌา ฆาตี ญา ปูลัก. 35กาลา ฮูชาม ญา มาตี ดัฮ_ ฮาดัด นานะ กีลากี นะ เบดัด_ ซือมียา นู บือปรัก ฌือนัฮ เดะ ลูมอฮ มีเดียน_ เดะ นังฆรี โมอับ_ ฌาดี ราฌา ฆาตี ฮูชาม ปูลัก. นังฆรี ลูวัก นะ ฮาดัด ปือนามา อาวีด. 36กาลา ฮาดัด ญา มาตี ดัฮ_ ซัมลา_ ซือมียา นังฆรี มาซะเรคา_ ฌาดี ราฌา ฆาตี ญา ปูลัก. 37กาลา ซัมลา ญา มาตี ดัฮ_ ชาอูน_ ซือมียา นังฆรี เรโฮโบด_ นู ดูโดะ เดะ โซะ ซูงัย ยูเฟรติด_ ฌาดี ราฌา ฆาตี ญา ปูลัก. 38กาลา ชาอูน ญา มาตี ดัฮ_ บาอัน-ฮานัน_ นานะ กีลากี นะ อักโบระ_ ฌาดี ราฌา ฆาตี ญา ปูลัก. 39กาลา บาอัน-ฮานัน_ นานะ กีลากี นะ อักโบระ_ ญา มาตี ดัฮ_ ฮาดา_ ฌาดี ราฌา ฆาตี ญา ปูลัก. นังฆรี ลูวัก นะ ฮาดา_ ปือนามา จะ_ ปาอู. บีนี นะ ญา ปือนามา จะ_ เมเฮทาเบน_ นานะ นีบีนี นะ มัดเรด_ นู ฌาดี นานะ นีบีนี นะ เมซาฮับ.
40ตะเดะ อีนี ฌาดี กือปาลา โกะ บือแนฮ นะ เอซาว_ ตูโรจ กะ บือแนฮ_ ตูโรจ กะ ตือปัจ ดูโดะ นะ กูญา_ อาดา กือปาลา บือแนฮ ปือนามา จะ_ ทิมนา_ อาละวา_ เยเทด 41โอโฮลีบามา_ เอลัฮ_ ปีโนน 42เคนัด_ เทมาน_ มิบซาระ 43มักดีเอน_ ฌางัน อิราม. กูญา อีนี ฌาดี กือปาลา โกะ บือแนฮ นะ เอโดม (ฌาดี จะ เอซาว_ ปะ นะ ลูมอฮ เอโดม) ตูโรจ บือกะ นู ญา ดูโดะ เดะ นังฆรี นู ฌาดี นะ ญา.
Currently Selected:
ลามูลา 36: ULBIBLE
Highlight
Share
Copy
Want to have your highlights saved across all your devices? Sign up or sign in
