ลามูลา 37
37
โยเซบ มีปี จะ_ นะ ฌาดี บือซัยํ
1ยาโกบ ดูโดะ เดะ โซะ นังฆรี คานาอัน_ นู ปะ เดะ ญา_ ดือละ ดูโดะ ปัจ อีตู ดัฮ. 2ตะเดะ อีนี_ ฌาดี ซูรัจ ปาซัน ลาฆู บือแนฮ นะ ยาโกบ.
กาลา โยเซบ อูมอยํ นะ ญา_ ตูโฌฮ บือลัซ ตาโฮด ดัฮ_ ญา ปี ปือบือลา ลูมอฮ กาวัด บือนาตัก_ บือซามา ฌางัน โกะ กากา เดะ ญา. ญา ฌาดี อูรัก มูดา_ นู อาดา ดูโดะ ฌางัน นานะ นะ บินฮา_ ฌางัน นานะ นะ ซินปา ฌูฆา_ นู ฌาดี บีนี มูดา_ นะ ปะ เดะ ญา. โยเซบ ปี มือเลา มือญาเระ กะ ปะ เดะ ญา_ ปาซัน ลาฆู ซาลัฮ นะ โกะ กากา เดะ ญา. 3โซะ ยาโกบ โปด_ ญา ซายัก กะ โยเซบ_ ลือเบฮ เดะ โกะ นานะ อาซิก นะ ญา ซือมูฮา_ ซาเบะ ญา ดูโดะ เดะ อาปี มาแรฮ_ วะตู ยาโกบ ตูฮา ดัฮ. ยาโกบ ญา บูวัจ บาฌู ซรือโกะ ตางัน ปาญัก_ บรี กะ โยเซบ. 4กาลา โกะ กากา_ กูญา ลีฮัจ จะ_ ปะ เดะ กูญา ซายัก กะ โยเซบ_ ลือเบฮ เดะ กาวัด ดัฮ_ กูญา บือชี กะ โยเซบ_ มือเลา บาฌิ ฌางัน ญา_ เตด บือเลฮ ดัฮ.
5อาดา ซืออารี_ โยเซบ ญา มีปี. ตานา ญา มือญาเระ ลาฆู มีปี_ กะ โกะ กากา_ กูญา บือชี กะ ญา_ พรัด บาญะ. 6โยเซบ มือเลา ฌางัน กูญา จะ_ “มาแรฮ เลอ_ มือนีงัย ลาฆู นู กู มีปี ซีงี_ จะ_ 7กีตา อาดา เดะ บือนัก_ ตืองัฮ อีกัจ บรือกัซ ปาดี_ ฌาดี ซือบรือกัซๆ. ดัดๆ อีตู บรือกัซ นะ กู_ ญา บีกัซ บือดีรี ตือปัจ_ ตาปี โกะ บรือกัซ นะ โกะ กากา เดะ กู_ ญา มาแรฮ กือลีลิก_ มือนูโนะ กะ บรือกัซ นะ กู.”
8โกะ กากา ตาญา โยเซบ จะ_ “เกา เลอ_ นะ ฌาดี ราฌา ปือบือลา กามี เฆอ? เกา เลอ_ นะ ฌาดี ซือมียา กรัจ ฮูโกบ กามี_ ซูโงฮ เฆอ?” กะฆีเตอ_ กูญา บือชี กะ โยเซบ_ พรัด บาญะ_ ซาเบะ ปาซัน ลาฆู นู ญา มีปี ดัฮ_ ปาซัน ลาฆู นู ญา มือญาเระ กะ กูญา ดัฮ.
9อารี อาซิก โยเซบ มีปี ปูลัก_ มือเลา มือญาเระ กะ โกะ กากา จะ_ “นี เลอ_ กู มีปี ปูลัก ดัฮ. ลีฮัจ เลอ_ อาดา มาตา อารี_ ฌางัน บูลัด_ ฌางัน บีตัก ซือบือลัซ บีฌี เตอ_ ญา ตืองัฮ มือนูโนะ กะ กู.”
10ตาปี กาลา ญา มือญาเระ_ ลาฆู มีปี อีนี_ กะ ปะ เดะ ญา_ ฌางัน โกะ กากา เดะ ญา_ ปะ เดะ ญา_ อูจะ กะ ญา จะ_ “ลาฆู นู เกา มีปี_ ฌาดี ลาฆู นามา เลอ? ปะ ฌางัน มะ เดะ เกา_ ฌางัน โกะ กากา เดะ เกา_ นะ มาแรฮ มือนูโนะ รอจ กะ ตานัฮ_ โซะ ฮือลด เกา เฆอ?” 11โกะ กากา ดือกี กะ โยเซบ_ ตาปี ปะ เดะ ญา_ บรีงัจ กะ ลาฆู อีนี_ เดะ ฮาตี.
โกะ กากา ฌูวัน โยเซบ_ บรี ฌาดี ปราโซฮ
12อาดา ซืออารี_ โกะ กากา เดะ ญา บาวา กาวัด บือนาตัก นะ ปะ เดะ กูญา_ ปี ปือบือลา_ ดาปิก ตูโปะ เซเคม. 13อิซราเอน#37.13 ปือนามา “อิซราเอน” ฌาดี ปือนามา บารู นะ ยาโกบ. ซือตืองัฮ มือเลา จะ “ยาโกบ”_ ซือตืองัฮ มือเลา จะ_ “อิซราเอน.”_ ญา มือเลา ฌางัน โยเซบ จะ_ “โกะ กากา เดะ เกา_ ตืองัฮ ปือบือลา กาวัด บือนาตัก_ เดะ ตูโปะ เซเคม_ บูกัด เฆอ?_ ปะ นะ ซูโรฮ เกา_ ปี บือดาปัจ ฌางัน กูญา.”
โยเซบ ตีกัฮ จะ_ “ปะ เออ_ กู ซียะ ดัฮ.”
14ยาโกบ มือเลา ฌางัน ญา จะ_ “ปี เลอ_ ลีฮัจ จะ_ โกะ กากา เดะ เกา_ กูญา ดูโดะ ซือนัง ซือลามัจ เฆอ เตด? ลูมอฮ กาวัด บือนาตัก_ อาดา บาฌิ เฆอ? กะฆีเตอ เกา บาลิ มาแรฮ_ มือญาเระ_ บรี กะ ปะ ตาฮู เลอ.”
กะฆีเตอ_ ปะ เดะ ญา ซูโรฮ ญา ตรือเบะ ปี_ กะ ตานัฮ ราตา_ เดะ เฮโบรน. ญา โปด_ มาแรฮ รอจ กะ ตูโปะ เซเคม. 15อาดา ซือมียา ซืออูรัก_ ดาปัจ โยเซบ_ ตืองัฮ ปี มาแรฮ_ เดะ ปาดัก โซะ อีตู_ ญา ตาญา จะ_ “เกา ซารี นามา?”
16โยเซบ ตีกัฮ จะ_ “กู ซารี โกะ กากา เดะ กู. ดัฮ เกา ดาปัจ กูญา_ มือญาเระ กะ กู เลอ_ กูญา ปี ปือบือลา กาวัด บือนาตัก นะ กูญา_ ปัจ ดีฮา?”
17ซือมียา อีตู มือเลา จะ_ “กูญา ตรือเบะ เดะ โซะ อีนี ดัฮ. กู ดืองัยํ กูญา จะ_ นะ ปี กะ ตูโปะ โดทัน.” กะฆีเตอ_ โยเซบ ปี ตูโรจ โกะ กากา เดะ ญา. ญา ดาปัจ กูญา เดะ ตูโปะ โดทัน.
18ตานา โกะ กากา ลีฮัจ โยเซบ_ ตะเดะ ฌาโวฮ_ เตด รอจ กะ กูญา ลาฆี_ กูญา ปาคัจ อีงัจ_ นะ บูนอฮ ญา. 19กูญา มือเลา บือซามา จะ_ “ซือมียา มีปี มาแรฮ ดัฮ. 20บอฮ เลอ_ บรี กีตา บูนอฮ ญา_ บูวัก บาดัด นะ ญา_ เดะ ตลาฆา_ ซา บีฌี. กะฆีเตอ_ กีตา นะ มือญาเระ จะ_ บือนาตัก เดะ ฮูตัด_ บือเลฮ ซรือโกะ มากัด ญา ดัฮ. กะฆีเตอ_ กีตา นะ ลีฮัจ จะ_ โกะ ลาฆู มีปี อีตู_ นะ ฌาดี กะฮามี.”
21ตาปี รูเบน_ กากา นะ ญา นู ซืออูรัก_ กาลา ดืองัยํ ลาฆู กะฆีเตอ ดัฮ_ ญา โปด_ อีงัจ นะ บรี โยเซบ ลือปัซ_ เดะ ตางัน นะ โกะ กากา_ มือเลา จะ_ “กีตา ฌางัน บูนอฮ อาดี เลอ.” 22รูเบน มือเลา ฌางัน กูญา จะ_ “ฌางัน บูวัจ บรี ดารัฮ นะ มือนีแลฮ ตรือเบะ เลอ. บรี กีตา บูวัก ญา_ เดะ ตลาฆา เดะ ฮูตัด_ โซะ อีนี_ ตาปี ฌางัน บูวัจ นามา กะ ญาวา นะ ญา โปด.” รูเบน มือเลา กะฆีนี_ อีงัจ นะ บรี ญา ลือปัซ_ เดะ ตางัน นะ โกะ กากา_ บีดา นะ อาตัจ ญา บาลิ ปี_ กะ ปะ เดะ ญา ปาเระ.
23ตานา โยเซบ รอจ กะ กูญา ดัฮ_ กูญา รีฆะ ญา_ ราปัซ บาฌู ซรือโกะ ลืองัน ปาญัก_ บือปี ดัฮ. 24กูญา บาวา ญา ปี บูวัก_ เดะ ตลาฆา กริก_ ซา บีฌี.
25กูญา ดูโดะ มากัด_ ตาปี_ ซือฌูรุซ_ กูญา ลีฮัจ บือฆารี_ อาดา ลูมอฮ ซือมียา_ บักซา อิซมาเอน_ บือฌาลัด มาแรฮ_ ดาตัก เดะ นังฆรี กิเลอาด. ลูมอฮ อูตัย นะ กูญา_ ปือโดะ กือมียัน_ ฌางัน บารัก บาวู บือมาจับ-มาจับ_ นะ บาวา บือปี_ กะ นังฆรี อียิบ. 26กะฆีเตอ_ ยูดา มือเลา ฌางัน โกะ อาดี บราดี จะ_ “นู กีตา นะ บูนอฮ อาดี นะ กีตา เตอ_ นะ บูนี ลาฆู อีตู_ นะ บือเลฮ อูโตก นามา เลอ? 27บรี กีตา ฌูวัน ญา_ กะ ลูมอฮ บักซา อิซมาเอน อีนี เลอ. ฌางัน บรี กีตา บูนอฮ อาดี เดะ กีตา. ญา ฌาดี ซา ดารัฮ ฌางัน กีตา ฌูฆา เลอ”_ ญา จะ.
กะฆีเตอ_ ลูมอฮ อาดี บราดี_ อีงัจ นะ บูวัจ กะฆีเตอ. 28อาดา ลูมอฮ ซือมียา ฌูวัน บารัก_ บักซา มีเดียน_ ลาลู ปี. โกะ อาดี บราดี ปี รือฆัก โยเซบ_ ปือญาแญะ เดะ ตลาฆา_ ฌูวัน ญา_ กะ ลูมอฮ ซือมียา บักซา อิซมาเอน อีตู_ รือฆา ดูวา ปูโลฮ รีเงะ ปีระ. กูญา อีตู_ บาวา โยเซบ บือปี_ กะ นังฆรี อียิบ.
29ตานา รูเบน บาลิ มาแรฮ กะ ตลาฆา_ ลีฮัจ จะ_ โยเซบ ฮอย ดัฮ_ ญา โปด_ ซูซัฮ ฮาตี_ จูลัด กาเยด นะ ญา บรี จีแจะ. 30ญา มาแรฮ มือเลา ฌางัน โกะ อาดี บราดี จะ_ “อาดี เดะ กีตา ฮอย ดัฮ. กะฆีเตอ_ กู นะ บูวัจ กะฮามี เลอ?”
31กะฆีเตอ_ โกะ อาดี บราดี บูนอฮ แบะ บาปา ซืออีโกยํ_ รือนับ บาฌู ซรือโกะ นะ โยเซบ_ เดะ ดารัฮ นะ แบะ อีตู. 32กูญา อาเมด บาฌู ซรือโกะ ตางัน ปาญัก อีตู ปี_ บรี กะ ปะ เดะ กูญา ลีฮัจ_ มือเลา ฌางัน ปะ เดะ กูญา จะ_ “กามี ดาปัจ บาฌู อีนี ดัฮ. มีตา มือญาซัจ ลีฮัจ จะ_ ฌาดี บาฌู ซรือโกะ นะ นานะ นะ ปะ เฆอ เตด.”
33ยาโกบ ญา จับ บาฌู อีตู_ มือเลา จะ_ “เออ_ ฌาดี บาฌู นะ นานะ นะ กู เลอ. ตาโกจ จะ_ บือนาตัก เดะ ฮูตัด_ มาแรฮ ซรือโกะ มากัด ญา ดัฮ. ซูโงฮ เลอ_ โยเซบ_ นานะ นะ กู_ กือนา ฆรูมง ฆีเฆะ จูลัด ญาวา_ บรี มาตี ดัฮ.”
34ยาโกบ ซูซัฮ ฮาตี โตระ_ ญา จูลัด กาเยด บาฌู นะ ญา_ จีแจะ ดัฮ_ อาเมด กาเยด ฆูนี มาแรฮ บือปากัย_ บือปาโตด ซูซัฮ ฮาตี_ ปาซัน นานะ นะ ญา_ บาญะ อารี. 35ลูมอฮ นานะ กีลากี_ นานะ นีบีนี นะ ญา_ ซือมูฮา_ มาแรฮ นะ ปูโฌะ ฮาตี นะ ญา_ ตาปี ญา ตีเมา. ญา มือเลา จะ_ “บูกัด กะฆีเตอ เลอ. กู นะ บาฮาตี ปาซัน นานะ นะ กู_ ตือดะ กู นะ ตูโรจ ญา_ ปี กะ นังฆรี ฮาตู.”
กะฆีเตอ_ ปะ เดะ โยเซบ มือนาแงฮ ซือซูโงฮ_ มือญือซัน ปาซัน นานะ นะ ญา.
36ตาปี เดะ นังฆรี อียิบ_ ลูมอฮ ซือมียา นังฆรี มีเดียน อีตู_ บือเลฮ ฌูวัน โยเซบ_ บรี ฌาดี ปราโซฮ นะ โปทิฟา_ นู ฌาดี ฮูลู บาลัก นะ ราฌา ฟาโร_ ฌาดี กือปาลา ตาฮัน_ ฌาฆา ฮัจลีฮัจ ราฌา.
Currently Selected:
ลามูลา 37: ULBIBLE
Highlight
Share
Copy
Want to have your highlights saved across all your devices? Sign up or sign in
