ลูกา 9

เยซู ซูโรฮ โกะ มูเระ ปี มือญาเระ บรีตา นู บาฌิ

(มัดทัย 10.5-15; มาระโก 6.7-13)

1กะฆีเตอ_ เยซู ญา ปาเงน โกะ มูเระ นะ ญา_ ดูวา บือลัซ อูรัก_ บรี บือมุน ซือกาลี. ญา บรี ลาฆู ซีดี กะ กูญา_ บรี กูญา อาดา มือฆัฮ_ นะ บือเลฮ โปรฮ โกะ ฮาตู แนฮฌือแนฮ_ นะ บือเลฮ ปือบือลา โกะ ปือญาเกะ บรี ลือฆา ฌูฆา. 2กะฆีเตอ_ เยซู ญา ซูโรฮ บรี กูญา ปี มือญาเระ_ ปาซัน นู ตูฮัด เดะ อาตัซ_ ญา นะ มาแรฮ ฌาดี ราฌา นะ โกะ อูมัจ ซือมียา บรี กูญา ปือบือลา โกะ ซือมียา ซาเกะ บรี ลือฆา. 3เยซู ญา มือเลา ฌางัน กูญา จะ_ “วะตู กาเญา ตืองัฮ บือฌาลัด ปี เตอ_ ฌางัน อาเมด โกะ ซือบารัก นามา บือปี ซูโรฮ_ บือกะ โกะ ตูกัจ_ โกะ กือพัย_ โกะ ซือบารัก มากัด_ โกะ ดูเวะ เตอ. ฌางัน บาวา บาฌู_ ซอก ดูวา กรัจ. 4ดัฮ กาเญา นะ มาโซะ ปี มือนูปัก รูมัฮ ดีฮา_ กือนา ดูโดะ เดะ รูมัฮ อีตู เลอ_ ฌางัน อูบัฮ_ ตือดะ กาเญา นะ ตรือเบะ ปี เดะ ตูโปะ อีตู. 5ดัฮ โกะ ซือมียา ตูโปะ ดีฮา_ ฮอย เตด ซาโมจ ลูมอฮ กาเญา เตอ_ วะตู กาเญา นะ ตรือเบะ เดะ ตูโปะ นะ กูญา_ กือนา กีปัซ โกะ ตานัฮ_ โกะ ฮาบู_ เดะ ตาปะ กากี นะ กาเญา บรี ฮาบิฮ_ ฌาดี ลาฆู ตูโดฮ ซาลัฮ นะ กูญา.” เยซู ญา จะ.

6กะฆีเตอ_ โกะ มูเระ ตรือเบะ ปี_ มือญาเระ บรีตา นู บาฌิ นะ ตูฮัด_ ราตา ตูโปะ. กูญา ปี ปือบือลา โกะ ซือมียา ซาเกะ_ ราตา ตือปัจ_ บรี ลือฆา.

ราฌา เฮโรด บรีงัจ บาญะ_ ปาซัน เยซู

(มัดทัย 14.1-12; มาระโก 6.14-29)

7โซะ ราฌา เฮโรด ตานา ญา ดืองัยํ ลาฆู กะฆีเตอ ซือมูฮา ดัฮ_ นู เยซู บือเลฮ บูวัจ เตอ_ ญา บรีงัจ บาญะ_ เตด ตาฮู จะ นะ บูวัจ กะฮามี_ กรานา จะ_ ซือมียา ซือตืองัฮ มือเลา จะ_ โยฮัน ฮีโดะ ปาเระ เดะ มาตี ดัฮ. 8ซือตืองัฮ จะ_ เอลียา ญา มาแรฮ ปลีฮัจ ดัฮ. ซือมียา อาซิก จะ_ ฌาดี ซือมียา ตูโดฮ ลาฆู นะ ตูฮัด กาลา นูตู_ มาแรฮ บือฌาดี ปูลัก. 9โซะ เฮโรด ญา จะ_ “โบะ โยฮัน_ กู บือเลฮ กรัจ ปาลา นะ ญา ดัฮ. ตาปี ซือมียา อีนี_ นู กู บือเลฮ ดืองัยํ ลาฆู นะ ญา กะฆีนี_ ฌาดี ซาปา เลอ?” กะฆีเตอ_ เฮโรด ญา มียา จือลัฮ นะ ปี ลีฮัจ เยซู.

เยซู บรี มากัด กะ ซือมียา ลีมา รีบู อูรัก

(มัดทัย 14.13-21; มาระโก 6.30-44; โยฮัน 6.1-14)

10โกะ ปือญูโรฮ กูญา บาลิ มาแรฮ_ มือญาเระ กะ เยซู_ บือกะ ลาฆู นู กูญา บือเลฮ บูวัจ ดัฮ เตอ. กะฆีเตอ เยซู บาวา กูญา_ บือปี กะ ตือปัจ นู ซืองะ ซา กูญา_ เดะ ตูโปะ เบดซัยดา. 11ตาปี โกะ ซือมียา บาญะ เตอ_ ตานา ตาฮู จะ_ เยซู ปี โซะ ดีฮา_ กูญา ตูโรจ ปี ฌูฆา. เยซู ญา ซาโมจ กูญา_ มือเลา อาฌัยํ กูญา_ ปาซัน ลาฆู นู ตูฮัด เดะ อาตัซ ฌาดี ราฌา_ นู ปือบือลา อูมัจ ซือมียา. โกะ ซือมียา ดีฮา_ อาดา ปือญาเกะ_ ญา ปือบือลา บรี ลือฆา.

12รอจ วะตู มาตาอารี ดาปิก นะ มาโซะ ดัฮ_ โกะ มูเระ ดูวา บือลัซ อูรัก_ มาแรฮ มือเลา ฌางัน เยซู จะ_ “บรี โกะ ซือมียา บาญะ อีนี_ ปี กะ โกะ ตูโปะ_ โกะ รูมัฮ_ นู ปิกดาปิก_ ซารี ซือบารัก มากัด_ มียา ตือปัจ บราดู ตีโนะ ซามา. ซาเบะ จะ_ ตือปัจ อีนี ฌาดี ฮูตัด_ ฮอย ซือมียา ดูโดะ เลอ.”

13ตาปี เยซู ญา มือเลา กะ กูญา จะ_ “ลูมอฮ กาเญา เลอ_ ปี อาเมด โกะ ซือบารัก บรี กะ กูญา มากัด.”

กูญา ตีกัฮ จะ_ “กามี ฮอย นามา บาญะ เลอ. อาดา ซา ตือโปก โรตี_ ลีมา กือโตน_ ฌางัน อีกัด ดูวา อีโกยํ. ดัฮ เตด ปี บือลี โกะ ซือบารัก มากัด_ บรี กะ โกะ ซือมียา บาญะ อีนี_ ฮอย นามา อาซิก เลอ.” 14ซาเบะ จะ_ กีรา ซา โกะ กีลากี_ ฆามะ จะ ลีมา รีบู อูรัก บือเลฮ.

ตาปี เยซู ญา มือเลา ฌางัน โกะ มูเระ นะ ญา จะ_ “บรี กูญา ดูโดะ บือกาวัดกาวัด เลอ. ซือกาวัด ลีมา ปูโลฮ อูรัก.”

15โกะ มูเระ กูญา บูวัจ ตูโรจ_ บรี โกะ ลูมอฮ ซือมียา ซือมูฮา ปาคัจ ดูโดะ. 16กะฆีเตอ_ เยซู ญา อาเมด ตือโปก โรตี ลีมา กือโตน_ ฌางัน อีกัด ดูวา อีโกยํ อีตู_ ญา ลางอฮ ลีฮัจ กะ ลาแงะ_ บรี ซือลามัจ กะ ตูฮัด เดะ อาตัซ. กะฆีเตอ_ ญา ลือแปะ ตือโปก โรตี_ ฌางัน อีกัด_ อูโญะ กะ โกะ มูเระ_ บรี กูญา นะ ฮาฆิ กะ โกะ ซือมียา นู บาญะ อีตู. 17กูญา ซือมูฮา_ ปาคัจ มากัด กือญัง ฮาบิฮ ดัฮ. โกะ กรือดะ นู ลือเบฮ เดะ มากัด เตอ_ โกะ มูเระ กูญา มูงอจ_ บือเลฮ ดูวา บือลัซ ซูเปะ.

เยซู ฌาดี ซาปา?

(มัดทัย 16.13-19; มาระโก 8.27-29)

18อาดา ซืออารี_ ตานา เยซู ญา ตืองัฮ บือซาโวจ_ ซา ญา เตอ_ โกะ มูเระ กูญา มาแรฮ ดูโดะ ฌางัน เยซู ซามา. กะฆีเตอ เยซู ตาญา กูญา จะ_ “โกะ ซือมียา บาญะ_ กูญา อาดา มือเลา จะ_ กู ฌาดี ซาปา เลอ?”

19โกะ มูเระ กูญา ตีกัฮ จะ_ “กูญา จะ_ เกา ฌาดี โยฮัน_ ซือมียา นู บรี ลาฆู ซือลับ เดะ อาเย เลอ. ตาปี ซือตืองัฮ จะ_ ฌาดี เอลียา. อาดา ฌูฆา ซือตืองัฮ_ นู จะ_ ฌาดี ซือมียา ตูโดฮ ลาฆู นะ ตูฮัด กาลา นูตู_ ซืออูรัก_ นู บือเลฮ ฮีโดะ ปาเระ เดะ มาตี เลอ.”

20เยซู ตาญา กูญา จะ_ “ตาปี โซะ ลูมอฮ กาเญา เตอ_ กาเญา มือเลา จะ_ กู ฌาดี ซาปา?”

ซีโมน เปโตร ญา ตีกัฮ กะ เยซู จะ_ “เกา ฌาดี ราฌา นู บรี ซือลามัจ_ นู ตูฮัด เดะ อาตัซ ซูโรฮ มาแรฮ เลอ.”

21เยซู บลารัก กะ โกะ มูเระ นะ ญา_ กือมัซๆ_ ตีเมา บรี กูญา มือญาเระ ลาฆู กะฆีนี_ กะ ซาปา เลอ.

เยซู ตูโดฮ ลาฆู นู นะ บือฌาดี ฌางัน ญา

(มัดทัย 16.20-28; มาระโก 8.30—9.1)

22เยซู มือญาเระ กะ กูญา ปูลัก จะ_ “กู_ นู นานะ นะ อูมัจ ซือมียา อีนี_ นะ ฆาโดฮ ลาวัด ซาเกะ ซูซัฮ บาญะ ฌือแนฮ. โกะ กือปาลา นังฆรี_ ฌางัน โกะ ลูมอฮ ซามี ซัยํบือซัยํ_ โกะ ซือมียา อาฌัยํ ลาฆู ปือมือซัด นะ ตูฮัด เตอ_ กูญา นะ กีปัซ กู บูวัก ดัฮ. กู นะ กือนา บูนอฮ บรี มาตี บูวัก. ตาปี เดะ อารี นู ตีฆา_ กู นะ กือนา บูวัจ บรี ฮีโดะ ปาเระ เดะ มาตี ปูลัก เลอ.” ญา จะ.

23กะฆีเตอ เยซู ญา มือเลา กะ กูญา ซือมูฮา จะ_ “ซือมียา ดีฮา นู อาดา ฮาตี นะ มาแรฮ ตูโรจ กะ กู เตอ_ บรี ญา บราดู บือฮีมัจ กะ ญาวา ตะอาซิก ดูลู. บรี กะ ญา อาเกะ ตาโงก กายู ปลีตัก นะ ญา_ บีลัก อารี เตอ_ ตูโรจ กะ กู มาแรฮ เลอ. 24กรานา จะ_ ซือมียา ดีฮา นู อาดา ฮาตี นะ ฌาฆา ญาวา นะ ญา_ บรี ซือนัง เตอ_ ญาวา ญา นะ ฌาฮานัม. ตาปี ซือมียา ดีฮา นู ซรัฮ ญาวา นะ ญา บูวัก_ กรานา ลีฮัจ กะ กู_ ซือมียา อีตู ญา นะ ดาปัจ ลาฆู ฮีโดะ ซูโงฮๆ เลอ. 25ดัฮ ซือมียา ดีฮา บือเลฮ โกะ ซือบารัก ซือมูฮา เดะ ดือนียา_ ตาปี อีซี ญา นะ ฌาฮานัม ดัฮ_ ซือมียา อีตู นะ บือเลฮ อูโตก นามา เลอ? ฮอย ลาลู. 26ซาเบะ จะ_ ซือมียา ดีฮา_ นู ปือจือและ กรานา กู_ ฌางัน ปือมือเลา นะ กู_ ซือมียา อีตู เลอ_ กู นะ ปือจือและ บาลัซ ปาเระ_ เดะ อารี บลากัก. เดะ อารี บลากัก อีตู เตอ_ กู นู นานะ นะ อูมัจ ซือมียา เตอ_ กู นะ มาแรฮ_ อาดา บือซายา บือซรี_ บือกะ บือซายา นะ อาโปก เดะ กู_ บือกะ บือซายา นะ โกะ ลูมอฮ ฮูลู บาลัก นู จรัฮ บาฌิ เลอ. 27ตาปี กู มือญาเระ บือซูโงฮ-ซูโงฮ กะ กาเญา จะ_ อาดา ซือมียา ซือตืองัฮ_ นู บือดีรี โตะ อีนี_ นู นะ ฮอย เตด มาตี ดูลู_ ตือดะ กูญา นะ ลีฮัจ ตูฮัด มาแรฮ ปือบือลา ฌาดี ราฌา ดัฮ เลอ.” เยซู ญา จะ.

เยซู ปลีฮัจ นู บือซายา ซูโงฮ

(มัดทัย 17.1-13; มาระโก 9.2-13)

28เดะ บลากัก เยซู บือเลฮ มือเลา ปือมือเลา อีตู_ ฆามะ ลาปัด อารี_ เยซู ญา บาวา เปโตร_ โยฮัน ฌางัน ยากอบ ปี ซามา. ญา ปี ญาแญะ กะ อาตัซ บูเกะ_ บีดา นะ บือซาโวจ. 29กะฆีเตอ_ ตานา เยซู_ ญา ตืองัฮ บือซาโวจ_ มูคา นะ ญา ซาเลด ดัฮ_ กาเยด นะ ญา โปด_ ฌาดี ปูเตฮ มรือแจว เลอ. 30นี เลอ_ อาดา ดูวา อูรัก มาแรฮ มือเลา บือซามา ฌางัน ญา. กูญา เตอ_ ฌาดี มูซา ฌางัน เอลียา. 31กูญา มาแรฮ ปลีฮัจ บือซายา เตอ_ มือเลา ฌางัน เยซู_ ปาซัน ลาฆู นู ญา นะ มือนีงัน ปี ดัฮ_ เดะ นังฆรี เยรูซาเลม. 32โซะ เปโตร_ ฌางัน กาวัด นะ ญา_ กูญา ตีโนะ ลีนา ดัฮ. ตาปี ตานา กูญา ดาฮานี ดัฮ_ กูญา ลีฮัจ บือซายา เดะ ญาวา นะ เยซู_ ลีฮัจ ดูวา อูรัก อีตู บือดีรี ซามา ฌางัน ญา. 33ตานา ดูวา อูรัก อีตู_ ตืองัฮ นะ ปี ดัฮ_ เปโตร ญา มือเลา ฌางัน เยซู จะ_ “จา เออ_ นู กามี อาดา โตะ อีนี_ โบะ บาฌิ ดัฮ เลอ. บรี กามี บูวัจ ซาเราะ โตะ อีนี_ ตีฆา บีฌี_ นะ เกา ซา_ นะ มูซา ซา_ นะ เอลียา ซา.” นู เปโตร ญา มือเลา กะฆีเตอ_ ญา ฮอย เตด ตาฮู ลาฆู เลอ.

34ตืองัฮ ญา มือเลา กะฆีนี ลาฆี_ อาดา กือมูวัง มาแรฮ ตูโดก เดะ อาตัซ กูญา. ตานา มาโซะ เดะ กือมูวัง ดัฮ_ กูญา โปด_ ตาโกจ เลอ. 35อาดา ซือวารา บูงี ดาตัก มาแรฮ เดะ กือมูวัง อีตู_ มือเลา จะ_ “ซือมียา อีนี เลอ_ ฌาดี นานะ นะ กู. ญา เตอ_ นู กู ปีเลฮ ดัฮ. กือนา มือนีงัย กะ ญา เลอ.”

36ตานา ซือวารา อีตู ญา ซืองะ ดัฮ_ อาดา เยซู ซืออูรัก เลอ. โกะ มูเระ ตีฆา อูรัก ซีงี_ กูญา ซืองะ ดัฮ. เดะ วะตู อีตู_ กูญา ฮอย เตด มือเลา_ มือญาเระ ลาฆู นู กูญา บือเลฮ ลีฮัจ บือฆารี_ กะ ซือมียา ดีฮา เลอ.

เยซู ปือบือลา นานะ อาดา ฮาตู ราโซะ

(มัดทัย 17.14-21; มาระโก 9.14-29)

37วะตู จรัฮ ปาฆี_ เยซู ฌางัน โกะ มูเระ นะ ญา_ ตูโรด มาแรฮ_ ดาตัก เดะ โซะ บูเกะ ดัฮ เตอ. อาดา โกะ ซือมียา บาญะ_ ปาคัจ มาแรฮ ดาปัจ เยซู. 38นี เลอ_ อาดา กีลากี ซืออูรัก_ เดะ ลูมอฮ ซือมียา บาญะ อีตู_ ญา บือซูระ จะ_ “ บูมอยํ เออ_ กู มีตา บรี เกา ฆาฆัฮ ลีฮัจ นานะ กีลากี นะ กู เลอ_ ซาเบะ กู อาดา นานะ แนฮ ซา อูรัก อีนี. 39ลีฮัจ เลอ_ อาดา ฮาตู มาโซะ ราโซะ ดัฮ_ รีฆะ นานะ อีตู_ บูวัจ บรี ญา บือซูระ ดัดดัด_ บูวัจ บรี ญา มืองือตัจ_ ฌู ตรือเบะ ฆือลือมา. ฮาตู อีตู_ ญา ปายัฮ นะ ตรือเบะ เดะ นานะ อีตู_ ตาปี บูวัจ บรี ญา บือซูซัฮ ญาวา ตือลาลู เลอ. 40กู มีตา ตูโลก เดะ โกะ มูเระ นะ เกา_ บรี โปรฮ ฮาตู อีตู_ บรี ญา ตรือเบะ บูวัก เดะ นานะ นะ กู. ตาปี กูญา บูวัจ เตด บือเลฮ เลอ.”

41กะฆีเตอ เยซู_ ญา ตีกัฮ จะ_ “ฮูระ_ โกะ ซือมียา ฮาดัจ อีนี_ ลาฆู ปือจายา ฮาบิฮ ปี กะ ดีฮา ดัฮ เลอ? กาเญา ซือซัจ ซาลัฮ ซูโงฮ เลอ. กะฆีเตอ_ กู นะ ดูโดะ ฌางัน กาเญา_ นะ ตาฮัด ลูมอฮ กาเญา_ บราปา ลามา เลอ? บาวา นานะ นะ เกา บือมาแรฮ กะ อีนี เลอ.”

42ตานา นานะ อีตู ตืองัฮ มาแรฮ_ ฮาตู บูวัจ บรี ญา รือบัฮ_ บรี ญา มืองือตัจ. ตาปี เยซู ญา โปรฮ ฮาตู_ ญา ปือบือลา นานะ อีตู บรี ซือนัง บาฌิ ดัฮ. กะฆีเตอ_ ญา บรี ปาเระ กะ ปะ เดะ ญา. 43โกะ ซือมียา ซือมูฮา_ กูญา ปาคัจ ปือและ ฮาตี_ เดะ ลาฆู มือฆัฮ นู บือซัยํ ซูโงฮ_ นะ ตูฮัด เดะ อาตัซ.

เยซู มือเลา ปูลัก_ ปาซัน ลาฆู มาตี นะ ญา

(มัดทัย 17.22-23; มาระโก 9.30-32)

ตาปี วะตู กูญา ซือมูฮา อาดา ปือและ ฮาตี ลาฆี_ กรานา ลาฆู ซือมูฮา นู เยซู บือเลฮ บูวัจ เตอ_ เยซู ญา มือเลา ฌางัน โกะ มูเระ นะ ญา จะ_ 44“ลาฆู นู กู นะ มือญาเระ อีนี_ กาเญา ฌางัน นะ ลูปา เลอ. กรานา จะ_ กู นู นานะ นะ อูมัจ ซือมียา เตอ_ กู นะ กือนา อาตัจ_ บรี กะ โกะ ลูมอฮ ซือมียา รีฆะ เตอ.” ญา จะ. 45ตาปี ปือมือเลา ลาฆู อีตู_ โกะ มูเระ นะ ญา_ ฮอย เตด มาโซะ เดะ ฮาตี. กรานา ปือมือเลา อีตู_ กือนา บูนี ตาโรฮ เดะ กูญา_ ตีเมา บรี กูญา นะ ตาฮู. กูญา โปด_ ฮอย เตด บรานี นะ ตาญา เยซู_ ปาซัน ปือมือเลา อีตู เลอ.

ซาปา นะ ฌาดี บือซัยํ เดะ กาวัด?

(มัดทัย 18.1-5; มาระโก 9.33-37)

46กะฆีเตอ_ โกะ มูเระ กูญา ปาคัจ บือตือฆัฮ ซามา กูญา จะ_ เดะ ลูมอฮ กูญา อีตู_ ซาปา เลอ_ นู ซัยํบือซัยํ เดะ กาวัด? 47ตาปี โซะ เยซู_ ตานา ญา ตาฮู ลาฆู นู กูญา บรีงัจ เดะ ดาลับ ฮาตี นะ กูญา_ ญา บาวา นานะ ซืออูรัก_ มาแรฮ บือดีรี ดาปิก ญา. 48ญา มือเลา จะ_ “ซือมียา ดีฮา นู ซาโมจ นานะ ดือมิ อีนี_ กรานา ปือนามา นะ กู_ ซือรูปา ซือมียา อีตู ซาโมจ กู ดัฮ. ซือมียา ดีฮา ซาโมจ กู เตอ_ ซือรูปา ญา บือเลฮ ซาโมจ ตูฮัด_ นู บือเลฮ ซูโรฮ กู มาแรฮ เลอ. กรานา จะ_ เดะ ลูมอฮ นะ กาเญา_ ซือมียา นู ฌาดี ดือมิ เดะ กาวัด_ ซือมียา อีตู เลอ_ ญา ฌาดี ซัยํบือซัยํ ซูโงฮ.”

ซือมียา อาซิก นู โปรฮ โกะ ฮาตู

(มาระโก 9.38-41)

49โซะ โยฮัน_ ญา มือเลา กะ เยซู จะ_ “จา เออ_ ลูมอฮ กามี บือเลฮ ลีฮัจ ซือมียา ซืออูรัก_ นู ซือโบจ ปือนามา นะ เกา_ บีดา นะ โปรฮ โกะ ฮาตู ตรือเบะ เดะ ญาวา นะ ซือมียา. กะฆีเตอ_ กามี บือเลฮ บลารัก ญา บูวัก_ ซาเบะ ญา เตด ตูโรจ กะ เกา_ ซามา ลูมอฮ กามี เลอ.”

50ตาปี เยซู ตีกัฮ กะ ญา จะ_ “ฌางัน บลารัก ญา เลอ_ ซาเบะ จะ_ ซือมียา ดีฮา_ นู เตด บือลาวัด ฌางัน กาเญา_ ซือมียา อีตู ญา_ ฌาดี ซือมียา โซะ กาเญา เลอ.”

ตูโปะ เดะ นังฆรี ซะมาเรีย_ ตีเมา ซาโมจ เยซู

51ตานา ดาปิก นะ รอจ วะตู_ นู เยซู นะ กือนา ซาโมจ ญาแญะ ปี ดัฮ_ เยซู ญา ตือตู ฮาตี กือฌะ ดัฮ_ นู นะ ปี กะ นังฆรี เยรูซาเลม. 52กะฆีเตอ_ ญา ซูโรฮ โกะ ซือมียา ปี ดูลู เดะ ญา_ บรี กูญา มาโซะ ปี กะ ดาลับ ตูโปะ นะ ลูมอฮ ซะมาเรีย_ ซา ตูโปะ_ บีดา นะ ซียะ ตือปัจ มือนูปัก_ บรี กะ ญา. 53ตาปี โกะ ซือมียา เดะ ตูโปะ อีตู_ กูญา ฮอย เตด ซาโมจ เยซู_ ซาเบะ จะ เยซู_ ญา ตือตู ฮาตี นะ บือฌาลัด ปี กะ นังฆรี เยรูซาเลม. 54ยากอบ ฌางัน โยฮัน_ นู มูเระ นะ ญา เตอ_ ตานา กูญา ลีฮัจ กะฆีเตอ_ กูญา มือเลา กะ เยซู จะ_ “จา เออ_ เกา นะ บรี กามี ปือซัด อาปี_ บรี ตูโรด ดาตัก เดะ โซะ ลาแงะ_ มาแรฮ ตูนู กูญา บรี ฌาฮานัม#9.54 ซูรัจ ลามา ซือตืองัฮ ตามัฮ จะ “บือกะ เอลียา ดือละ บูวัจ”. ลีฮัจ 2รฌ 1.9-16 เฆอ?”

55ตาปี เยซู ญา บือเลฮ อาเลฮ มาแรฮ บลารัก กูญา.#9.55 ซูรัจ ลามา ซือตืองัฮ ตามัฮ กะฆีนี จะ_ “ญา มือเลา จะ ‘โบะ กาเญา เตด ตาฮู จะ_ กาเญา ฌาดี ซือมียา ฮาตี กะฮามี. กู นี_ นู นานะ นะ อูมัจ ซือมียา เตอ_ กู เตด บือเลฮ มาแรฮ_ บีดา นะ บูวัจ บรี ซือมียา ฌาฮานัม_ ตาปี บีดา นะ ตูโลก กูญา บรี ฮีโดะ ลือปัซ บาฌิ.’ ญา จะ.” 56กะฆีเตอ เยซู_ ฌางัน มูเระ นะ ญา_ กูญา บือฌาลัด ปี ลือปัซ_ กะ ตูโปะ นู ซา.

ซือมียา ซือตืองัฮ_ นู อีงัจ นะ ตูโรจ เยซู

(มัดทัย 8.19-22)

57ตานา เยซู_ ฌางัน โกะ มูเระ นะ ญา_ ตืองัฮ บือฌาลัด ปี_ อาดา ซือมียา ซืออูรัก มือเลา ฌางัน เยซู จะ_ “เกา นะ ปี กะ ดีฮา_ กู นะ ตูโรจ ปี ซามา เลอ.”

58กะฆีเตอ เยซู ตีกัฮ กะ ญา จะ_ “โกะ อาซู ฮูตัด_ ญา อาดา ลูบัก. โกะ บูโรก เดะ ลาแงะ_ ญา อาดา ซารัก. ตาปี โซะ กู_ นู นานะ นะ อูมัจ ซือมียา เตอ_ กู ฮอย ตือปัจ นะ ตืองะ ปาลา ตีโนะ เลอ.”

59เยซู ญา มือเลา กะ ซือมียา นู ซืออูรัก ปูลัก จะ_ “กือนา ตูโรจ กะ กู เลอ.”

ตาปี ซือมียา อีตู_ ญา ตีกัฮ จะ_ “จา เออ_ มีตา บรี กู นะ ปี ตานัม บาดัด นะ ปะ เดะ กู_ ดูลู เลอ.”

60ตาปี เยซู มือเลา กะ ญา จะ_ “บรี ซือมียา มาตี_ ปี ตานัม ซือมียา มาตี ซามา. ตาปี โซะ เกา เตอ_ เกา กือนา ปี มือญาเระ บรี ตาฮู จะ_ ตูฮัด เดะ อาตัซ_ ญา มาแรฮ ฌาดี ราฌา_ นะ ปือบือลา อูมัจ ซือมียา เลอ.”

61โซะ ซือมียา นู ซา_ ญา มือเลา ฌางัน เยซู จะ_ “จา เออ_ กู นะ ตูโรจ เกา ปี. ตาปี บรี กู ปี จาเระ ซือมียา เดะ รูมัฮ นะ กู ดูลู.”

62เยซู มือเลา กะ ญา จะ_ “ซือมียา ดีฮา_ อาเมด ตางัน_ ปือฆัก ฆาลา ดัฮ_ ตาปี อาเลฮ บลากัก ปูลัก เตอ_ ซือมียา อีตู_ ญา ฮอย เตด บือฆูนา_ นะ อาดา ตูฮัด เดะ อาตัซ ฌาดี ราฌา_ นู ปือบือลา ญา.”

Currently Selected:

ลูกา 9: ULBIBLE

Highlight

Copy