มาระโก 11
11
เยซู มาโซะ กะ นังฆรี เยรูซาเลม_ ซือรูปา ฌาดี ราฌา
(มัดทัย 21.1-11; ลูกา 19.28-40; โยฮัน 12.12-19)
1กะฆีเตอ_ กูญา อีตู มาแรฮ ดาปิก นังฆรี เยรูซาเลม_ รอจ กะ ตูโปะ เบดฟายี_ ฌางัน ตูโปะ เบดทานี_ เดะ บูเกะ กือดูโนด ดัฮ. วะตู อีตู เยซู ซูโรฮ มูเระ ดูวา อูรัก ปี ดูลู_ 2ปือซัด กะ กูญา จะ_ “มาโซะ เลอ_ กะ ตูโปะ โซะ ฮือลด อีตู. มาโซะ ดัฮ_ ดัดดัด กาเญา นะ ดาปัจ อานะ กูดา ซืออีโกยํ_ นู กือนา อีกัจ ดัฮ. อานะ กูดา อีตู เตอ_ ฮอย ซาปา ดือละ ญาแญะ. อูฆัย เลอ_ อาเมด มาแรฮ ปัจ อีนี. 3ดัฮ ซือมียา ดีฮา ตาญา จะ_ ‘บูวัจ นามา กาเญา บูวัจ กะฆีนี?’_ กือนา ตีกัฮ จะ_ ‘ซาเบะ ตูฮัด นะ อาเมด ซูโรฮ_ ซัจ นะ อาตัจ ปาเระ เลอ.’ ”
4กะฆีเตอ_ มูเระ ดูวา อูรัก อีตู_ กูญา ปี ดัฮ_ ปี ดาปัจ อานะ กูดา_ อาดา อีกัจ เดะ ปีตู เดะ บีดิก ฌาลัด. กะฆีเตอ_ กูญา อูฆัย กูดา อีตู. 5กะฆีเตอ_ อาดา ซือมียา ซือตืองัฮ_ นู บือดีรี โซะ อีตู_ กูญา อูจะ โกะ มูเระ อีตู จะ_ “บูวัจ นามา เลอ_ กาเญา อูฆัย อานะ กูดา อีนี?”
6กะฆีเตอ_ กูญา ดูวา อูรัก ตีกัฮ กะ โกะ ซือมียา_ บือกะ ลาฆู เยซู มือญาเระ กะ กูญา ดัฮ. กะฆีเตอ_ โซะ ซือมียา อีตู_ กูญา ปือบียัยํ บรี อูฆัย อานะ กูดา บือปี. 7กะฆีเตอ_ กูญา อาเมด อานะ กูดา อีตู มาแรฮ_ อาตัจ กะ เยซู. กูญา อาเมด บาฌู นะ กูญา_ อาปัยํ เดะ บลากัก กูดา อีตู. กะฆีเตอ เยซู ญาแญะ ดูโดะ. 8บาญะ ซือมียา อาเมด โกะ บาฌู นะ กูญา มาแรฮ_ อาปัยํ เดะ ฌาลัด. ซือมียา อาซิกๆ เตอ_ กูญา ปี กะ ปาดัก_ ลือกับ โกะ รือบา ดาโวด ลือบัจ_ อาเมด มาแรฮ อาปัยํ ฌูฆา. 9อาดา ซือมียา ปี โซะ ฮือลด ซือตืองัฮ_ ตูโรจ โซะ บลากัก ซือตืองัฮ_ กูญา บือซูระ จะ “ โฮซันนา ปูฌี กะ ตูฮัด เลอ. ซือลามัจ เลอ_ ซือมียา นู มาแรฮ เดะ ปือนามา นะ ตูฮัด เดะ อาตัซ#มปต 118.25 . 10ซือนัง ซือลามัจ เลอ_ นังฆรี นะ ราฌา ดาวิด อาโปก นะ กีตา_ นู นะ กือนา ตืองะ ดัฮ. โฮซันนา_ ปูฌี เลอ_ กะ ตูฮัด นู ตีงี เดะ อาตัซ ซูโงฮ#มปต 118.26.” กูญา จะ.
11กะฆีเตอ_ เยซู มาโซะ กะ นังฆรี เยรูซาเลม_ ญา ปี มาโซะ รอจ กะ รูมัฮ มือญือมัฮ ตูฮัด ปี ฌือเงาะ ลีฮัจ ราตา_ เดะ รูมัฮ อีตู. ตาปี ซรือปะ นะ มาลับ ดัฮ_ กะฆีเตอ_ ญา ตรือเบะ ปี_ ฌางัน โกะ มูเระ ดูวา บือลัซ อูรัก อีตู_ ปี กะ ตูโปะ เบดทานี.
ลาฆู นะ ปูโฮด กรายา บูดี
(มัดทัย 21.18-19)
12จรัฮ ปาฆี_ ตานา กูญา ตืองัฮ มาแรฮ ดาตัก เดะ เบดทานี_ เยซู ญา ลาปัยํ ดัฮ. 13ญา ลีฮัจ ตะเดะ ฌาโวฮ_ อาดา ปูโฮด กรายา บูดี_ ซา ปูโฮด_ นู อาดา ดาโวด ลือบัจ. กะฆีเตอ_ ญา บราดู ปี ลีฮัจ จะ_ อาดา บูวัฮ เฆอ เตด? ตานา มาแรฮ รอจ ดัฮ_ ญา ลีฮัจ จะ_ ปูโฮด กายู อีตู_ อาดา ซา ดาโวด. ญา เตด รอจ มูเซด นะ บือบูวัฮ ลาฆี. 14กะฆีเตอ_ เยซู มือเลา กะ ปูโฮด กายู อีตู จะ_ “ตะเดะ อีนี ปี_ ฮอย ซาปา นะ บือเลฮ มากัด บูวัฮ นะ เกา_ ซือมาญัก รอจ เลอ.”
โกะ มูเระ นะ ญา_ กูญา ดืองัยํ ลาฆู อีนี ดัฮ.
เยซู เดะ รูมัฮ มือญือมัฮ ตูฮัด
(มัดทัย 21.12-17; ลูกา 19.45-48; โยฮัน 2.13-22)
15กะฆีเตอ_ กูญา ปี รอจ กะ นังฆรี เยรูซาเลม ดัฮ. เยซู มาโซะ ปี กะ รูมัฮ มือญือมัฮ ตูฮัด. อาดา ซือมียา ฌูวัน โกะ ซือบารัก_ ซือมียา บือลี โกะ ซือบารัก_ เดะ ลามัน รูมัฮ มือญือมัฮ เตอ. โกะ ซือมียา อีตู_ เยซู โปรฮ ฮาบิฮ. ปาปัด โตะ นะ ซือมียา ฮูโระ ดูเวะ_ ฌางัน ตือปัจ ดูโดะ นะ ซือมียา ฌูวัน บูโรก ปาตี_ ญา ปือจือเกาะ บูวัก ดัฮ. 16ญา บลารัก โกะ ซือมียา_ ตีเมา บรี บาวา โกะ ซือบารัก บือมาแรฮ_ ลาลู เดะ ลามัน รูมัฮ มือญือมัฮ ตูฮัด. 17กะฆีเตอ_ ญา อาฌัยํ ลูมอฮ กูญา_ มือเลา จะ_ “อาดา ฆาแรฮ ดัฮ_ เดะ ซูรัจ ปือมือเลา นะ ตูฮัด_ บูกัด เฆอ_ นู จะ ‘รูมัฮ นะ กู เตอ_ นะ กือนา บลาโลก จะ_ รูมัฮ ตือปัจ นู ซือมียา ราตา บักซา นะ มาแรฮ_ บือซาโวจ กะ ตูฮัด#อซย 56.7; ยรม 7.11.’ ตาปี กาเญา บือเลฮ บูวัจ_ บรี ฌาดี บือกะ ซารัก ลูมอฮ อูรัก ปือญามุน เลอ.”
18ตานา โกะ ลูมอฮ ซามี ซัยํบือซัยํ_ ฌางัน โกะ ซือมียา อาฌัยํ ลาฆู ปือมือซัด นะ ตูฮัด กูญา ดืองัยํ ลาฆู อีนี ดัฮ_ กูญา บือกีรา ซามา กูญา จะ_ นะ บูนอฮ เยซู กะฮามี. ซาเบะ กูญา ตาโกจ เดะ เยซู_ ลีฮัจ จะ_ นู เยซู อาฌัยํ ลาฆู กะฆีนี_ บูวัจ บรี โกะ ซือมียา บาญะ_ ปือและ ฮาตี ซูโงฮ.
19โซะ ปะฮือญา_ เยซู ฌางัน โกะ มูเระ นะ ญา_ ตรือเบะ ปี กะ ลูวัยํ นังฆรี.
ลาฆู ปูโฮด กายู กรายา บูดี ลายู ดัฮ
(มัดทัย 21.20-22)
20จรัฮ ปาฆี_ กูญา ฌาลัด ลาลู ปี_ ลีฮัจ ปูโฮด กรายา บูดี อีตู_ ญา ลายู ตูโฮยํ ฮาบิฮ_ รอจ กะ ฌากัยํ. 21กะฆีเตอ_ เปโตร จับ บือเลฮ ดัฮ_ มือเลา จะ_ “ บูมอยํ เออ_ ลีฮัจ เลอ_ ปูโฮด กายู นู เกา อาโบยํ เตอ_ ฮาบิฮ ลายู ดัฮ.” 22กะฆีเตอ_ เยซู มือเลา กะ กูญา จะ_ “ปือจายา เลอ_ กะ ตูฮัด เดะ อาตัซ. 23กู มือเลา ฌางัน กาเญา_ ลาฆู นู ซูโงฮ จะ_ ซือมียา ดีฮา นู ปือซัด กะ บูเกะ อีนี จะ_ ‘กือนา อาเกะ ปี_ ปือตาลับ เดะ ลาโวจ เลอ’_ กะ ซือมียา อีตู เตด บรูบัฮ ฮาตี_ ตาปี ปือจายา จะ_ บือกะ นู ญา ปือซัด ดัฮ_ นะ ฌาดี ซูโงฮ เตอ_ กะฆีเตอ_ ลาฆู อีตู นะ ฌาดี ซูโงฮ เลอ.” เยซู ญา จะ.
24“กะฆีเตอ_ กู มือเลา ฌางัน กาเญา จะ_ วะตู กาเญา บือซาโวจ มีตา ลาฆู นามาๆ โปด_ ปือจายา เลอ_ นู กาเญา บือเลฮ ดัฮ. กะฆีเตอ_ กาเญา นะ บือเลฮ ลาฆู อีตู ซูโงฮ เลอ. 25-26กะฆีเตอ_ วะตู กาเญา อาดา บือดีรี บือซาโวจ กะ ตูฮัด_ ดัฮ อาดา ปาซัน ลาฆู นามา ฌางัน กาวัด เตอ_ กือนา อาเกะ ซาลัฮ นะ ญา ดูลู. กาเญา บูวัจ กะฆีเตอ ดัฮ_ อาโปก นะ กาเญา_ นู ดูโดะ เดะ อาตัซ ลาแงะ_ ญา นะ อาเกะ ซาลัฮ นะ กาเญา ฌูฆา.#11.25-26 ซูรัจ ลามา ซือตืองัฮ ตามัฮ ปือมือเลา กะฆีนี_ “ตาปี กะ กาเญา เตด อาเกะ ซาลัฮ นะ กาวัด_ อาโปก นะ กาเญา_ นู ดูโดะ เดะ อาตัซ ลาแงะ เตอ_ ญา ฮอย เตด อาเกะ ซาลัฮ นะ กาเญา ฌูฆา.”” ญา จะ.
ลูมอฮ ซือมียา บือตือฆัฮ ฌางัน เยซู
(มัดทัย 21.23-27; ลูกา 20.1-8)
27กะฆีเตอ_ กูญา มาโซะ ปี_ กะ นังฆรี เยรูซาเลม ปูลัก. วะตู เยซู บือฌาลัด ปี_ เดะ รูมัฮ มือญือมัฮ ตูฮัด อาดา โกะ ลูมอฮ ซามี ซัยํบือซัยํ_ โกะ ซือมียา อาฌัยํ ลาฆู ปือมือซัด นะ ตูฮัด ฌางัน ลูมอฮ อูรัก ตูฮา เตอ_ กูญา ปาคัจ มาแรฮ ดาปัจ ญา. 28กูญา ตาญา เยซู จะ_ “เกา บือเลฮ บูวัจ ลาฆู กะฆีนี_ ฌางัน ปือมือฆัฮ นู ดีฮา? จะ_ ซาปา บือเลฮ บรี กะ เกา บูวัจ ลาฆู กะฆีนี_ นู เกา บูวัจ ดัฮ เลอ?”
29เยซู ตีกัฮ กะ กูญา จะ_ “กู นะ ตาญา กาเญา_ ซา ลาฆู ฌูฆา. กาเญา ตีกัฮ เลอ_ กะฆีเตอ_ กู นะ มือญาเระ กะ กาเญา จะ_ กู บูวัจ ลาฆู กะฆีนี ฌางัน ปือมือฆัฮ นู ดีฮา เลอ. 30นู โยฮัน บรี โกะ ซือมียา ซือลับ เดะ อาเย#มก. 1.1-8 เตอ_ ฌาดี ลาฆู ดาตัก เดะ ลาแงะ_ เฆอ จะ_ ดาตัก เดะ โกะ อูมัจ ซือมียา?” ญา จะ.
31กะฆีเตอ_ กูญา บือตือฆัฮ ซามา กูญา จะ_ “ดัฮ กีตา มือเลา จะ_ ‘ดาตัก เดะ โซะ ลาแงะ’_ กะฆีเตอ_ ญา นะ ตาญา กีตา จะ_ ‘ซาเบะ นามา_ กาเญา เตด บือเลฮ ปือจายา กะ โยฮัน เลอ?’ 32ตาปี ดัฮ กีตา นะ มือเลา จะ_ ‘ดาตัก เดะ โกะ ซือมียา.’ อานู…” กูญา โปด_ ตาโกจ เดะ โกะ ซือมียา บาญะ_ กรานา โกะ ซือมียา บาญะ อีตู กีรา จะ_ โยฮัน เตอ_ ฌาดี ซือมียา ตูโดฮ ลาฆู นะ ตูฮัด ซูโงฮ เลอ. 33กะฆีเตอ_ กูญา ตีกัฮ กะ เยซู จะ_ “กามี เตด ตาฮู เลอ.”
เยซู มือเลา ฌางัน กูญา จะ_ “กะฆีเตอ_ กู โปด_ เตด มือญาเระ กะ กาเญา ฌูฆา_ จะ_ ลาฆู กู บูวัจ กะฆีนี_ บูวัจ ฌางัน ปือมือฆัฮ นู ดีฮา.”
Currently Selected:
มาระโก 11: ULBIBLE
Highlight
Share
Copy
Want to have your highlights saved across all your devices? Sign up or sign in
