มาระโก 13
13
เยซู ตูโดฮ ลาฆู โซะ ฮือลด
(มัดทัย 24.1-2; ลูกา 21.5-6)
1ตานา เยซู ตืองัฮ ตรือเบะ_ เดะ รูมัฮ มือญือมัฮ ตูฮัด_ อาดา มูเระ นะ ญา ซืออูรัก_ มือเลา ฌางัน ญา จะ_ “บูมอยํ เออ_ ลีฮัจ เลอ. โกะ รูมัฮ อีนี บือฆาจะ โตระ_ บูวัจ ฌางัน บาตู นู บาฌิ ซูโงฮ เลอ.”
2ตาปี เยซู มือเลา ฌางัน ญา จะ_ “เกา ลีฮัจ โกะ รูมัฮ บือซัยํ อีนี เฆอ? อีนี ซือมูฮา_ นะ กือนา ปรูโตฮ ฮาบิฮ. ฮอย บาตู ซือกือโตน โปด_ นู นะ บือซูโซดซูโซด กะฆีนี เลอ.” ญา จะ.
ลาฆู ซูซัฮ_ ลาฆู ปรือกัด_ นู นะ มาแรฮ
(มัดทัย 24.3-14; ลูกา 21.7-19)
3ตานา เยซู ดูโดะ เดะ บูเกะ กือดูโนด_ รือมัก ฌางัน รูมัฮ มือญือมัฮ ตูฮัด_ อาดา เปโตร_ ยากอบ_ โยฮัน_ ฌางัน อันดรู_ ปัจ อูรัก_ มาแรฮ ซารี ญา_ ตาญา จะ 4“มือญาเระ เลอ_ ลาฆู อีนี นะ บือฌาดี กาลา? อาดา ปือนานา นามา_ นู นะ บรี ลีฮัจ จะ_ ลาฆู อีนี ซือมูฮา_ นะ รอจ ดัฮ?”
5กะฆีเตอ_ เยซู มือเลา ฌางัน กูญา จะ_ “กือนา ฌาฆา บรี บาฌิ เลอ_ ฌางัน บรี ซาปาๆ บาวา กาเญา_ ปี ซือซัจ ฌาลัด เลอ. 6กรานา อาดา ซือมียา บาญะ_ นู นะ อาเกะ ซือโบจ ปือนามา นะ กู_ มาแรฮ มือเลา จะ_ ‘กู นี ฌาดี ซือมียา อีตู เลอ’. กะฆีเตอ_ กูญา นะ บาวา โกะ ซือมียา บาญะ_ ปี ซือซัจ ฌาลัด. 7กาลา กาเญา ดืองัยํ จะ_ อาดา นังฆรี บือปรัก โซะ อีนี_ โซะ อีตู เตอ_ ฌางัน นะ ฆาโดฮ ฮาตี เลอ. ซาเบะ ฆาโดฮ ฌาดี กะฆีเตอ ดัฮ_ ตาปี ฮอย เตด รอจ กะ วะตู ปือญูดัฮ ลาฆี. 8อาดา ฌูฆา ลูมอฮ อีนี_ นะ บือลาวัด ฌางัน ลูมอฮ อีตู. นังฆรี โซะ อีนี_ นะ บือลาวัด ฌางัน นังฆรี โซะ อีตู. ญา นะ ฌาดี ตานัฮ บรีเงาะ_ บาญะ ตือปัจ. บาญะ ซือมียา นะ บือตาฮัด ซือบารัก มากัด. ลาฆู กะฆีเตอ_ นะ ฌาดี ซือรูปา ลาฆู ลามูลา_ เดะ วะตู นู ซูซัฮ โตระ.” ญา จะ.
9“ตาปี กาเญา กือนา ฌาฆา ฮาตี ตะอาซิก บรี บาฌิ เลอ_ ซาเบะ กูญา นะ รีฆะ กาเญา_ อาตัจ ญาแญะ กะ ซัน. กาเญา นะ กือนา รือเปะ_ เดะ โกะ รูมัฮ บือมุน. กาเญา นะ กือนา บือดีรี_ โซะ ฮือลด โกะ ซือมียา ซัยํบือซัยํ_ โกะ ราฌา โปด_ กรานา กู. กะฆีเตอ_ กาเญา นะ ฌาดี ซะซรี กะ กูญา เลอ. 10บรีตา นู บาฌิ อีนี_ กือนา มือญาเระ กะ ลูมอฮ ซือมียา_ ราตา บักซา ดูลู. 11กาลา กูญา นะ รีฆะ กาเญา_ อาตัจ กะ ซัน_ ฌางัน ฆาโดฮ ฮาตี ดูลู เลอ_ นู กาเญา นะ ตีกัฮ มือเลา ลาฆู นามา เตอ. ปือมือเลา นามา_ นู ตูฮัด นะ บรี_ เดะ วะตู อีตู เตอ_ กือนา มือญาเระ เลอ. ซาเบะ บูกัด ปือมือเลา นะ กาเญา_ ตาปี ฌาดี ปือมือเลา นะ ซือมืองัจ นะ ตูฮัด. 12กากา ซือตืองัฮ นะ อาตัจ อาดี_ บรี กือนา ฮูโกบ ฌู มาตี. อาโปก ซือตืองัฮ โปด_ นะ อาตัจ นานะ กะฆีเตอ ฌูฆา. โกะ นานะ นะ บูวัจ กือบลากัก_ กะ โกะ เอด อาโปก เตอ_ บรี กือนา ฮูโกบ ฌู มาตี ฌูฆา. 13ซือมียา ซือมูฮา นะ บือชี กะ กาเญา_ กรานา กาเญา ตูเฮะ กะ ปือนามา นะ กู เลอ. ตาปี ซือมียา ดีฮา_ นู ลาวัด ตาฮัด รอจ กะ นู ปือญูดัฮ เตอ_ ซือมียา อีตู เลอ_ นะ ฮีโดะ ลือปัซ บาฌิ ดัฮ.” ญา จะ.
วะตู นู ซูซัฮ ปายัฮ โตระ
(มัดทัย 24.15-28; ลูกา 21.20-24)
14เยซู มือเลา ลาฆี จะ_ “ตาปี อาดา ซืออารี_ กาเญา นะ ลีฮัจ บือนา นู รูบือฮีรู โตระ_ นู บูวัจ บรี ตะอารัฮ เตอ_ ญา นะ ตืองะ_ เดะ ตือปัจ นู เตด ปาโตจ นะ ตืองะ เลอ#13.14 ลีฮัจ ดนย 9.27; 11.31; 12.11. นู ดาเนียน บือเลฮ มือเลา ตูโดฮ เตอ_ ญา ตูโญะ กะ ลาฆู นู โกะ ซือตรู นะ บาวา บราลา มาโซะ ปี กะ ดาลับ บาลัย นะ ตูฮัด_ บูวัจ บรี ญา ตะอารัฮ ดัฮ. ตาปี ตูฮัด เยซู มือเลา ตูโดฮ กะ ลาฆู นู นะ บือฌาดี_ วะตู โกะ กาวัด ตาฮัน นังฆรี โรม นะ บือปรัก ฌางัน นังฆรี อิซราเอน เดะ ตาโฮด คศ 70. ลีฮัจ ลก. 21.20-24 (ซือมียา นู บาจา_ บรี ลาฆู อีนี มาโซะ เดะ ฮาตี เลอ). ตานา ลีฮัจ ดัฮ_ บรี โกะ ซือมียา เดะ นังฆรี ยูเดีย_ ลารี ปี กะ โซะ บูเกะ เลอ. 15ซือมียา นู ดูโดะ เดะ อาตัซ ลอเตง_ ฌางัน บรี ญา ตูโรด มาโซะ กะ รูมัฮ_ อาเมด โกะ ซือบารัก บือปี ดูลู. 16ซือมียา นู อาดา เดะ บือนัก_ ฌางัน บรี ญา ปาเระ มาแรฮ_ ซีงัฮ อาเมด บาฌู ซรือโกะ บือปี เลอ. บรี กูญา ลารี บูวัก ซือมูฮา. 17เดะ กาลา อีตู_ ซูซัฮ ปายัฮ โตระ เลอ_ โกะ นีบีนี นู บือโปรจ_ โกะ นีบีนี นู อาดา นานะ มูดา_ นู มากัด ดาดา ลาฆี เตอ. 18กือนา บือซาโวจ เลอ_ บรี ลาฆู อีนี นะ เตด บือฌาดี_ เดะ มูเซด บือแฌะ. 19กรานา กาลา อารี อีตู_ นะ อาดา ลาฆู ซูซัฮ ปายัฮ โตระ_ นู โกะ ซือมียา เตด ดือละ ดาปัจ. ตะเดะ ลามูลา นู ตูฮัด บือฌาดี ดือนียา_ รอจ กะ ฮาดัจ อีนี_ เตด ดือละ ลีฮัจ_ นะ ซูซัฮ ปายัฮ โตระ กะฆีเตอ. เดะ วะตู โซะ ฮือลด เตอ_ นะ ฮอย เตด อาดา กะฆีเตอ ปูลัก เลอ. 20ดัฮ ตูฮัด เตด บูวัจ บรี วะตู อีตู_ ซีกัจ ปานะ ดัฮ_ ฮอย ซือมียา ซืออูรัก โปด_ นู นะ ฮีโดะ ลือปัซ เลอ. ตาปี ตูฮัด ญา ลีฮัจ_ กะ โกะ ซือมียา นู ญา ปีเลฮ ดัฮ_ กะฆีเตอ_ ญา บูวัจ บรี วะตู อีตู_ ซีกัจ ปานะ ดัฮ.” ญา จะ.
21“วะตู อีตู_ กะ อาดา ซือมียา มือเลา ฌางัน กาเญา จะ_ ‘ลีฮัจ เลอ_ ราฌา นู บรี ซือลามัจ ญา อาดา โซะ อีนี.’ เฆอ จะ_ ‘ญา อาดา โซะ อีตู.’ กาเญา ฌางัน ปือจายา กะ กูญา เลอ. 22กรานา อาดา โกะ ราฌา นู บรี ซือลามัจ วัจบูวัจ_ ฌางัน โกะ ซือมียา ตูโดฮ วัจบูวัจ นะ บือฌาดี_ บาญะ อูรัก_ กูญา นะ บูวัจ บรี ลีฮัจ ปือนานา นู มือฆัฮ_ นู ปือและ ซูโงฮ. ดัฮ ฌาดี บือเลฮ_ กูญา นะ มืออูปัย_ บรี โกะ ซือมียา นู ตูฮัด ปีเลฮ ดัฮ_ นะ ซือซัจ ฌาลัด ฌูฆา เลอ. 23ตาปี กาเญา เลอ_ กือนา ฌาฆา บรี บาฌิ. ลาฆู ซือมูฮา อีนี_ กู บือเลฮ มือญาเระ กะ กาเญา ดัฮ_ บรี กาเญา ตาฮู ดูลู.” ญา จะ.
ลาฆู นู เยซู นะ บาลิ ปาเระ
(มัดทัย 24.29-31; ลูกา 21.25-28)
24“ตาปี ลือปัซ เดะ วะตู นู ซูซัฮ ปายัฮ โตระ อีตู ดัฮ_ เดะ วะตู อีตู_ มาตาอารี นะ กือลับ_ บูลัด นะ ฮอย เตด ซูโลฮ จรัฮ ลาฆี ดัฮ.#อซย 13.10; อซค 32.7; โยล 2.10,31; 3.15; ปล. 6.12-13 25ลูมอฮ บีตัก นะ ฆูโฆยํ เดะ ลาแงะ. โกะ ลาฆู ปือมือฆัฮ เดะ โซะ ลาแงะ_ นะ บรีเงาะ บือฆาญะ#อซย 34.14; โยล 2.10; ปล. 6.13. 26วะตู อีตู เลอ_ กูญา นะ ลีฮัจ กู_ นู นานะ นะ อูมัจ ซือมียา เตอ_ กู นะ มาแรฮ เดะ โซะ กือมูวัง#ดนย 7.13-14 นะ มาแรฮ ฌางัน นู มือฆัฮ บาญะ ซูโงฮ_ ฌางัน นู บือซรี บือซายา เลอ. 27กะฆีเตอ_ กู นะ ซูโรฮ โกะ ฮูลู บาลัก ปี ปือมุน บือซามา_ โกะ ลูมอฮ ซือมียา นู ตูฮัด ปีเลฮ ดัฮ_ นู ดาตัก เดะ ปัจ บือดาฮะ_ ตะเดะ ตือกอซ ปือญูดัฮ เดะ ดือนียา_ ฌู รอจ กะ ตือกอซ ปือญูดัฮ เดะ ลาแงะ เลอ.” ญา จะ.
ปูโฮด กรายา บูดี ตูโญะ บรี ตาฮู ลาฆู นามา
(มัดทัย 24.32-35; ลูกา 21.29-33)
28“กาเญา กือนา บลาฌัยํ เลอ_ เดะ ลาฆู นู ปูโฮด กรายา บูดี ตูโญะ บรี ลีฮัจ. ตานา ญา บือปูโจะ_ นะ ตรือเบะ ดาโวด_ กะฆีเตอ กาเญา นะ ตาฮู จะ_ มูเซด ฮางัจ ดาปิก นะ รอจ ดัฮ. 29กะฆีเตอ ฌูฆา_ ตานา กาเญา นะ ลีฮัจ ลาฆู ซูซัฮ กะฆีเตอ_ บือฌาดี มาแรฮ_ กาเญา นะ ตาฮู จะ_ วะตู อีตู ดาปิก นะ รอจ ดัฮ_ ฆามะ จะ อาดา เดะ ปีตู ดัฮ เลอ. 30กู มือเลา ฌางัน กาเญา ลาฆู นู ซูโงฮ จะ_ โกะ ซือมียา ฮาดัจ#13.30 ปือมือเลา “ฮาดัจ” อีนี นะ ซาเลด ฌาดี “บักซา” บือเลฮ ฌูฆา. อีนี_ นะ ฮอย เตด มือนีงัน ปี ดูลู_ เดะ ลาฆู อีนี ซือมูฮา นะ บือฌาดี มาแรฮ. 31ลาแงะ ฌางัน ดือนียา นะ ลือแงะ ปี ฮาบิฮ ดัฮ_ ตาปี ปือมือเลา นะ กู_ นะ ฮอย เตด ลือแงะ ลาลู เลอ.”
ฮอย ซาปา นะ ตาฮู อารี ดีฮา_ วะตู ดีฮา
(มัดทัย 24.36-44)
32“ตาปี นะ ฌาดี อารี ดีฮา_ วะตู ดีฮา_ ฮอย ซาปา นะ ตาฮู. มีเซ ลูมอฮ ฮูลู บาลัก เดะ ลาแงะ โปด_ กูญา เตด ตาฮู. นู นานะ นะ ตูฮัด โปด_ ญา เตด ตาฮู ฌูฆา. อาดา ซา อาโปก เดะ อาตัซ_ ญา เลอ นู ตาฮู. 33กือนา ตูงู ฌาฆา เลอ_ ซาเบะ กาเญา เตด ตาฮู_ วะตู อีตู นะ รอจ กาลา.” ญา จะ.
34“กะฆีเตอ_ ซือรูปา ตูฮัด รูมัฮ ซืออูรัก_ ญา นะ บือฌาลัด ปี ฌาโวฮ. วะตู ญา นะ ตรือเบะ เดะ รูมัฮ ปี โปด_ ญา กีเรบ เดะ โกะ ปราโซฮ นะ ญา_ บรี กูญา บือกรือฌา_ ตูโรจ บือกะ กรือฌา นะ กูญา ซิกมาซิก. ญา ปือซัด ซือมียา นู ฌาฆา ปีตู เตอ_ บรี ญา อาดา ฌาฆา บรี บาฌิ เลอ. 35กะฆีเตอ_ กาเญา ฌาฆา เลอ_ กรานา กาเญา เตด ตาฮู จะ_ ตูฮัด รูมัฮ นะ มาแรฮ กาลา. วะตู มาลับ เฆอ_ วะตู ตืองัฮ มาลับ เฆอ_ วะตู ฮายับ มูเกาะ_ เฆอ จะ_ วะตู ซียัก ดัฮ? 36กะฆีเตอ_ ฌาฆา เลอ_ ตาโกจ จะ_ ญา นะ บาลิ งูฆางู_ มาแรฮ ดาปัจ กาเญา ตืองัฮ ตีโนะ ลีนา. 37นู กู มือเลา ฌางัน กาเญา_ กู มือเลา ฌางัน ซือมียา ซือมูฮา จะ_ ฌาฆา เลอ.” ญา จะ.
Currently Selected:
มาระโก 13: ULBIBLE
Highlight
Share
Copy
Want to have your highlights saved across all your devices? Sign up or sign in
