มาระโก 16
16
เยซู ฮีโดะ ปาเระ เดะ มาตี ดัฮ
(มัดทัย 28.1-8; ลูกา 24.1-12; โยฮัน 20.1-10)
1วะตู อารี บราดู กรือฌา ลือปัซ ปี ดัฮ_ มารียา_ ซือมียา ตูโปะ มักดาลา_ ฌางัน มารียา มะ เดะ ยากอบ_ ฌางัน ซะโลเม เตอ_ กูญา ปี บือลี ซือบารัก บือบาวู_ นะ ซาปัก บาดัด นะ เยซู. 2กะฆีเตอ_ จรัฮ ปาฆี อารี มีงู อีตู_ มาตาอารี บารู ญาแญะ_ กูญา อีตู ปี รอจ กะ ฆูฮา. 3กูญา อาดา บือกีรา เดะ ตืองัฮ ฌาลัด จะ_ “ซาปา นะ ตูโลก ฆรือลิก บาตู อีตู_ เดะ ลูบัก ฆูฮา?” 4กรานา บาตู อีตู บือซัยํ โตระ. ตานา กูญา ลางอฮ ลีฮัจ_ บือฆารี จะ_ บาตู อีตู เตอ_ ฆรือลิก บือตรือเบะ ดัฮ. 5ตานา กูญา มาโซะ เดะ ฆูฮา ดัฮ_ กูญา ลีฮัจ จะ_ อาดา อูรัก มูดา ซืออูรัก_ ปากัย บาฌู ปาญัก นู ปูเตฮ_ ญา ดูโดะ โซะ กานัน. นีบีนี อีตู เตอ_ กูญา ตือกือฌุจ โตระ. 6ตาปี ซือมียา อีตู มือเลา ฌางัน กูญา จะ_ “กาเญา ฌางัน ตือกือฌุจ เลอ. กาเญา มาแรฮ ซารี เยซู_ ซือมียา ตูโปะ นาซาเรด_ นู กือนา กาจิก เดะ กายู ปลีตัก. ญา เตอ_ ฮีโดะ ปาเระ เดะ มาตี ดัฮ. ญา ฮอย ปัจ อีนี ดัฮ. ลีฮัจ เลอ_ ตือปัจ นู กูญา บอฮ บาดัด นะ ญา. 7ตาปี กาเญา ปี เลอ_ มือญาเระ กะ โกะ มูเระ นะ ญา_ ฌางัน เปโตร ฌูฆา_ จะ_ ‘ญา นะ ปี กะ นังฆรี ฆาลิลี_ ดูลู เดะ กาเญา. ปัจ อีตู เลอ_ กาเญา นะ บือฆารี ญา_ บือกะ ญา มือเลา ฌางัน กาเญา ดัฮ.’ ” ญา จะ.
8กะฆีเตอ_ โกะ นีบีนี อีตู บลารี ตรือเบะ เดะ ฆูฮา ดัฮ_ กูญา ตือกือฌุจ ฌู ญาวา กือตัยํ. กูญา เตด มือเลา ฌางัน ซาปา โปด_ กรานา ตาโกจ.
ปือมือเลา ปือญูดัฮ นู ลามา#16.9 ซูรัจ ลามา ซือตืองัฮ_ ฮอย ตือนอซ 9-20. ซือตืองัฮ อาดา ปือมือเลา กะฆีนี ฆาตี ตือนอซ 9-20_ จะ_ “โกะ นีบีนี ปี มียา เปโตร ฌางัน ลูมอฮ นะ ญา_ มือญาเระ บรี ปานะๆ_ ลาฆู ซือมูฮา นู ฮูลู บาลัก บือเลฮ มือญาเระ บรี กะ กูญา ตาฮู. ลือปัซ อีตู_ เยซู ตะอาซิก บือเลฮ ซูโรฮ โกะ มูเระ นะ ญา ปี_ ตะเดะ โซะ ตีมอยํ_ รอจ กะ โซะ บารัจ_ มือญาเระ ลาฆู นู บาฌิ บือซรี_ ลาฆู นู อาดา ซือลาลู_ จะ_ อูมัจ ซือมียา นะ บือเลฮ ฮีโดะ ลือปัซ บาฌิ_ ซือมาญัก รอจ.” ซูรัจ ลามา ซือตืองัฮ ตามัฮ ปือมือเลา กะฆีนี_ ฌางัน ตือนอซ 9-20 ฌูฆา.
เยซู ปลีฮัจ กะ มารียา_ ซือมียา ตูโปะ มักดาลา
(มัดทัย 28.9-10; โยฮัน 20.11-18)
9[ตานา ปาฆี อีตู_ ฌาดี อารี มีงู เตอ_ เยซู ญา ฮีโดะ ปาเระ ดัฮ_ ญา มาแรฮ ปลีฮัจ ดูลู_ กะ มารียา_ ซือมียา ตูโปะ มักดาลา อีตู. ซือมียา อีตู เตอ_ เยซู บือเลฮ โปรฮ ฮาตู_ ตรือเบะ เดะ ญาวา นะ ญา_ ตูโฌฮ ฮาตู. 10มารียา อีตู_ ญา ปี มือญาเระ กะ โกะ ซือมียา_ นู บือเลฮ ดูโดะ ฌางัน เยซู_ ตืองัฮ กูญา อาดา มือนาแงฮ_ บือปาโตด. 11ตานา กูญา ดืองัยํ ดัฮ จะ_ นู เยซู ฮีโดะ ปาเระ ดัฮ_ มาแรฮ ปลีฮัจ กะ มารียา_ กูญา เตด ปือจายา.
เยซู ปลีฮัจ กะ มูเระ ดูวา อูรัก
(ลูกา 24.13-35)
12เดะ บลากัก_ เยซู ปลีฮัจ ปูลัก_ กะ มูเระ ดูวา อูรัก_ ตืองัฮ กูญา บือฌาลัด ปี กะ ตูโปะ โซะ ลูวัยํ นังฆรี. ตาปี ญา ฌาดี ซือรูปา ซือมียา อาซิก. 13กูญา กือดูวา อูรัก บาลิ ปี_ มือญาเระ กะ โกะ มูเระ นู ฆีลาฆี_ ตาปี กูญา อีตู เตด บือเลฮ ปือจายา นามา โปด.
เยซู ปลีฮัจ กะ มูเระ 11 อูรัก
(มัดทัย 28.16-20; ลูกา 24.36-49; โยฮัน 20.19-23; ปือบูวัจ 1.6-8)
14เดะ บลากัก_ เยซู มาแรฮ ปลีฮัจ กะ โกะ มูเระ ซือบือลัซ อูรัก อีตู_ เดะ วะตู กูญา ตืองัฮ มากัด. ญา อูจะ กูญา_ กรานา กูญา ฮาตี กรัซ_ เตด บือเลฮ ปือจายา โกะ ซือมียา นู ลีฮัจ_ นู ญา ฮีโดะ ปาเระ เดะ มาตี ดัฮ. 15เยซู มือเลา ฌางัน กูญา จะ_ “กาเญา เลอ_ กือนา ปี ราตา เดะ ดือนียา. มือญาเระ เลอ_ บรีตา นู บาฌิ อีนี_ กะ ซือมียา ราตา. 16ซาปา นู ปือจายา_ ซาโมจ ลาฆู ซือลับ เดะ อาเย เตอ_ ญา เลอ_ นะ ฮีโดะ ลือปัซ บาฌิ. ตาปี ซาปา นู เตด ปือจายา เตอ_ ญา นะ กือนา กรัจ ฮูโกบ. 17โกะ ซือมียา นู ปือจายา เตอ_ กูญา นะ บือเลฮ บูวัจ ปือนานา นู มือฆัฮ กะฆีนี. กูญา นะ โปรฮ ฮาตู ตรือเบะ ปี_ เดะ ปือนามา นะ กู. กูญา นะ บือเลฮ มือเลา โกะ บาซา นู บารู. 18กูญา นะ ปือฆัก อูลัยํ เตอ_ นะ มากัด อูบัจ ราโจด เตอ_ ตาปี ฮอย เตด ฌาดี นามา. กูญา นะ ปือเตาะ ตางัน_ กือนา เดะ โกะ ซือมียา เตด ซือนัง ญาวา_ บูวัจ บรี กูญา ซือนัง บาฌิ.” ญา จะ.
เยซู บาลิ ปี กะ อาตัซ ลาแงะ
(ลูกา 24.50-53; ปือบูวัจ 1.9-11)
19ตานา ตูฮัด เยซู มือญาเระ กะ กูญา ซุจ ดัฮ_ ญา ปาเระ ปี กะ อาตัซ ลาแงะ_ ญา ปี ดูโดะ โซะ ซือบือลัฮ กานัน_ นะ ตูฮัด เดะ อาตัซ. 20โกะ มูเระ ตรือเบะ ปี ราตาๆ_ มือญาเระ ลาฆู นะ ญา. ตูฮัด เตอ_ ญา บือกรือฌา บือซามา ฌางัน กูญา_ บรี อาดา ปือนานา นู บรี ลีฮัจ จะ_ ลาฆู อีนี_ ฌาดี ลาฆู นู ซูโงฮ เลอ.]
Currently Selected:
มาระโก 16: ULBIBLE
Highlight
Share
Copy
Want to have your highlights saved across all your devices? Sign up or sign in
