ST. LUKE 11
11
1Kepuhgummeähyah dush, magwah ningooche kenahkoowa‐ahnuhmeäud, uhpe kahishquahtaud, oo‐oo oogeëgoon pazhik enewh ookekenooähmahgunun, Tabaningayun, kekenooähmahweshenaum cheähnuhmeähyaung, debishkoo kuhya owh John kahezhekekenooähmahwaud enewh ookekenooähmahgunun.
2Oo‐oo dush oogeënaun, Uhpe anuhmeähyagoon, oo‐oo ekedoog, Wayoosemegooyun keche‐kezhegoong ayahyun, Tahkecheähpetandahgwud kedezhenakahzoowin. Tahtuhgwishenoomahgud kedoogemahwewin. Azhenunduhwanduhmun tahdoodaum oomah uhkeeng, debishkoo ewede keche‐kezhegoong.
3Meezheshenaum anduhsoo‐kezheguk menik kaoonje-bemahdezeyaung buhquazhegun.
4Ahbwayanemeshenaum enewh kahmujje‐doodahgooyunin; nenuhwind muh newabenuhmahwahnahnig kuhkenuh egewh mazenuhahmahweyummingejig. Kagoo kuhya ezhewezheshekaunkan emuh kuhgwatebanedewining; ekooneshenaum atuh mujje‐uhyeewishing.
5Oo‐oo dush oogeënaun, Ahwanan kenuhwah anduhcheyag, kaähyahwaud enewh wejekewaün, kaëzhaud dush nebah‐tebik, oo‐oo kaënaud, Neeje ahweëshin neswe buhquazhegunug.
6Ningeoodessik muh pazhik neejekewa, pabahmahdezid, kah dush nindahyaunseen cheähshummug.
7Owh dush peendig ayaud oogahnuhquatauhwaun, oo‐oo akedood, Kagoo oondumeëshekan, ahzhe muh kebahquahegahda ishquaundam, kuhya newepamegoog nindahbenoojeëmug, kahween nekushketooseen cheoonishkahyaun chemeenenaunbaun dush.
8Kedenenim suh, Ahnuhween goo enanduhsig cheoonishkaud kuhya chemeenaud ooweejekewaëdewinewah oonje, ahpeche‐wedabwanid tahoonjeoonishkah chemeenaud menik egoo muhnazenid.
9Kedenenim kuhya, Nundoodahmahgayook, kegahmeenegoom dush; nundooneëgagook, kegahmekaunahwah dush; pahpahgesuhgeëgayook, kegahnesahkoonahmahgoom edush.
10Kuhkenuh muh nandooduhmahgajig meenahwug; kuhya owh nandooneëgad oomekaun; kuhya owh puhyahpahgesugeëgad tahnesahkoonahmahwah.
11Ahwanan kenuhwah wanejahneseyag, kishpin nundoodahmahgood enewh oogwissun ewh buhquazhegun, kameenaud ahsin? gamuh kishpin gegooyun nundooduhmahgood, mujje kenabegoon nuh mashquud oogahmeenaun?
12Gamuh kuhya kishpin nundooduhmahgood ewh wahwun, oogahmeenaun nuh ookahde‐kenabegoon?
13Kishpin dush kenuhwah ahnahween goo maje‐ezhewabezeyag, kekanduhmag chemeenagwah egewh kenejahnesewaug enewh wanesheshingin meegewawinun; ahwahshema suh owh keche‐kezhegoong duhzhe‐Koosewah oogahmeenaun enewh Keche Oojechaugun enewh nandoodahmahgoojin.
14Oosahgeje‐wabenahmahgoobunan mujje‐muhnedoon, kahnetuh‐kekedoosenegoon. Kepuhgummeähyahmahgud, uhpe owh mujje‐mnhnedoo kahsahgahung, own kahnetuh‐kekedoosig kekekedoo; egewh dush ahnishenabbag kemahmahkahdanduhmoog.
15Ahnind dush keëkedoowug, Wedookahgood enewh Beëlzebubun mujje‐muhnedoog oodoogemahmewah, oodoonje‐sahgeje‐wabenaun enewh mujje‐muhnedoon.
16Ahnind dush kuhya oogeguhgwajeëgoon, nunduhwanduhmahgood ewh kezhegoong duhzhe kekenoowahjechegun.
17Ween kekandung e‐ewh ananduhmenid, oo‐oo oogeënaun Anduhchid mahgahdezoomahguk oogemahwewin tahnishwahnahdud, kuhya mahgahdezoomahguk wegewaum kahwesamahgud.
18Kishpin dush owh Satan megahdezood, ahneen kaëzheminjemoosenenig oodoogemahwewin? Kedekedoom mahween, owh Beëlzebub wedookahwid, wanjesahgeje‐wabenugwah egewh mujje‐muhnedoog.
19Kishpin dush ween neen Beëlzebub wedookahwid wanje‐sahgeje‐wabenugwah egewh mujje‐muhnedoog, ahwanan dush wanje‐sahgechewabenahwaud egewh kegwissewaug? medush kaöonjetebahkoonenagwah.
20Kishpin dush neen weedookahgooyaun Kesha‐Muhnedoo ooneenj, wanjesahgeje‐wabenugwah mujje‐muhnedoog, kagate ewh Kesha‐Muhnedoo oodoogemahwewin ahzhe kepeödessigoonahwah.
21Uhpe mashkahwezid enene ashweed guhnuhwandung oowegewaum, pezaunahtane ooduhyeemun.
22Uhpe dush nahwuj mashkahwezenejin peöodissegood, mahmahzheëgood edush, oomuhkummegoon kuhkenuh oodushwewin enewh kahahpanemoojin, kuhya oomahdahookenun kuhkenuh ooduhyeemun.
23Owh wahjewesig nemegahnik suh; owh dush mahyahdahmahwesig chemahwundoonegayaun suhswa‐wabenega.
24Uhpe owh wahnezid muhnedoo kahsahgahunzetahwahjin enenewun, pahbahmoosa emuh pangookummegahnig, nunduhwahbundung ewh aunwabewin; mekunsig edush oo‐oo ekedoo, Nayaub ningahkewa emuh newegewauming kahoonje‐sahguhmaun.
25Uhpe dush tagwishingin, oomekaun kecheguhduhe-gahdanig kuhya kewahwazhechegahdanig.
26Uhnemahjaud, oodoodahpenaun neezhwahswe muhnedoon ahwahshema kagwahnesuggandahgoozenejin ewh ween azheähyaud, peendegawug dush, medush emuh andahwaud: ewh ishquauj azhewabezid wah‐owh enene ahwahshema koopuddeze ewh dush ween netum kahdid.
27Kepuhgummeähyahmahgud, oo‐oo uhyekedood, pazhik equa egewh mahyahmahwenoojig anegook kekekedoo, oo‐oo dush keënaud, Shahwandahgwud emuh kahoonjenegeyun, kuhya shahwandahgwudoon enewh doodooshun kahnooneëgooyun.
28Oo‐oo dush keëkedoo, Kagate ahwahshema shahwandahgoozewug egewh nwaundungig Kesha‐Muhnedoo oodekedoowin, kuhya ganuhwandungig.
29Uhpe egewh ahnishenahbag kahpekechemahoonjeëdewaud, kemahje‐ekedoo, Mujje‐ëzhewabezewug oogoo noongoom bamahdezejig: oonunduhwandahnahwah ewh kekenoowahjechegun, kahween gagoo kekenoowahjechegun tahmeenahsewug, me atuh ookekenoowah echegun owh Jonah aunwahjega‐wenene.
30Debishkoo muh kahahwid owh Jonah ookekenoowahjechegunewah egewh Ninevitug, mesuh kaähwid owh Enene Oogwissun ookekenoowahjechegunewah egewh enenewug noongoom bamahdezejig.
31Owh shahwuhnoong duhzhe oogemahqua, uhpe tabahkoonegang oogahweeje‐puhsegwemaun enewh enenewun noongoom bamahdezenejin, kuhya dush oogahnahneboomaun; ahpeche muh wahsahwakummig kepeöonjebah chebezindung oonebwahkahwin owh Solomon; benuh dush, ahwahshema ahpetandahgooze owh oomah ayaud, dush ween owh Solomon.
32Egewh dush Nineveh duhzhe enenewug uhpe tebahkoonegang oogahweeje‐puhsegwemahwaun oonoo noongoom bamahdezenejin oogahnahneboomahwaun dush: keäunwanindezoowug muh, uhpe kahkuhgequanid Jonahun; benuh dush ahwahshema ahpetandahgooze owh oomah ayaud dush ween Jonah.
33Kahween ahweyah, kahsuhkuhungin ewh wahsuhkoonanjegun, emuh kemoodezewining oodahtooseen, gamuh ahnaumuheëe tebahega‐muhkukoong, emuh suh oogejeëe wahsuhkoonanjegun‐ahbikoong, egewh paundegajig chewahbunduhmoowaud wahsayahzewin.
34Ewh weyowing duhzhe wahsayahzewin me ewh ooshkinzhegoomah; kishpin kuhyundahwezemahguk keshkinzhik, kemooshkenashkahgoon anegookwaug keyow ewh wahsayahzewin; kishpin dush mahkezemahguk keshkinzhik, kemooshkenashkahgoon anegookwaug keyow ewh puhsuhgishkezewin.
35Nahnahgahdahwanindezoon koonemah ewh wahsayahzewin ayahmun puhsuhgishkahmahgud.
36Kishpin dush kuhkenuh anegookwaug keyow wahsayahmahguk, kuhnuhga ahtasenook ewh puhsuhgishkezewin, kuhkenuh tahwahsayahmahgud debishkoo uhpe ewh wahsuhkoonanjegun‐ahbik azhewahsuhkoonamahguk chewahsashkahgooyun.
37Magwah dush kekekedood, pazhik Pharisee‐wenenewun oogenundoomegoon cheweedoopuhmegood; kepeendega dush kuhya kenuhmuhduhbe chewesenid.
38Owh dush Pharisee‐wenene uhpe wahyahbuhmaud kesebegesenid chepwah wesenenid, kemahmahkahdandum.
39Owh dush Tabaningad oo‐oo oogeënaun, Noongoom kenuhwah Phariseeweyag kepeenetoonahwah ewh menequahjegun kuhya ewh oonahgun ahgwahjuheëeng, peenjenuh dush kemooshkenashkahgoonahwah kuhkenuh muhkundwawin kuhya mujjeëzhewabezewin.
40Kakebahdezeyag, kah nuh ween owh kahoozhetood ewh ahgwahjuheëeng atag kuhya oogeöozhetooseen ewh peenjenuh atag?
41Meegewayook dush enewh meegewawinun menik ayahmagoon; benuh dush, kuhkenuh keduhyeemewah tahpeeneähyahnoon.
42Kekuhgwahnesuhgandahgooseem kenuhwah Phariseeweyag! kedezhetebahahmahgam emuh ahnuhmeähwining ewh manoo‐mahgwuk ahnebeshun, kuhya pahbahmanduhsewag ewh tebahkoonegawin kuhya oosahgeëwawin owh Kesha‐Muhnedoo: kedahgeëzhechegam suh oonoo, enewh bakahnukkin dush ween kahween kedahkuhbekunsenahwaun.
43Kekuhgwahnesuggandahgoozeem kenuhwah Phariseeweyag! kesahgetoonahwah muh enewh kache‐ishpandahgwukin ahbeewinun emuh ahnuhmeä‐weguhmigoong, kuhya ahnahmekoodahdewinun emuh ahtaundewining.
44Kekuhgwahnesuhgandahgooseem kenuhwah wazhebeëga‐weneneweyag kuhya Phariseeweyag anuhmeäkahzooyag! debishkoo muh kedezhewabezeem enewh chebaguhmigoon kekandahgwuhsenoogin, ahnahween goo oogeejuheëe bemoosawaud egewh enenewug kahween oowahbunduhsenahwah.
45Me dush kenuhquatahgood pazhik enewh tebahkoonega‐wenenewun, oo‐oo keëgood, Kakenooähmahgayun, oo‐oo ekedooyun, nenuhwind kuhya goo kemujje‐guhnoozhemin.
46Oo‐oo dush keëkedoo, Kuhya këkuhgwahnesuhgandahgooseem kenuhwah tabahkoonega‐weneneweyag! kepemoonduhahwaug muh egewh enenewug enewh quasegwungin mewunekaunun, kah kuhnuhga pazhik keneenjewaun ketaungenunsenahwah enewh mewunekaunun.
47Kekuhgwahnesuggandahgoozeem! kedoozhetoonahwah enewh oochebaguhmigoowaun egewh aunwahjega‐wenenewug, koosewahbuneeg oogenesahwaun enewh.
48Kagate kedebahjemoom cheminwanduhmoowagwah koosewahbuneeg oodahnookewinewaun: oogenesahwaun muh, kenuhwah dush kedoozhetuhmahwahwaug oochebaguhmigoowaun.
49Mesuh kahoonje‐ekedoomahguk oonebwahkahwin owh Kesha‐Muhnedoo, Negahmahjenahzhahahmahwaug egewh aunwahjega‐wenenewug, kuhya egewh apostleüg, ahnind dush oogahnesahwaun kuhya oogahnoosoonawahwaun:
50Cheöonjenunduhwanduhmahwindwah egewh noongoom bamahdezejig, oomesqueemewah kuhkenuh aunwahjega‐wenenewug, kahsegwabenegahdag pahahkoo‐oozhechegahdag ewh uhkee;
51Ewh oomesqueem owh Abel nahnauzh edush oomesqueem owh Zacharias, kahduhpenad emuh nesuhwuheëeng anduhgoog ewh sahsahgewejegun‐ahbik kuhya ewh kechetwah‐ahnuhmeä‐weguhmig; kagate kedenenim, Tahnunduhwanduhmahwahwug oogoo noongoom bamahdezejig.
52Kekuhgwahnesuhgandahgoozeem kenuhwah tabahkoonega‐weneneweyag! kegemahjetoonahwah muh ewh kekanjegawine ahbahpekuhegun: kahween kegepeendegaseem kenuhwah tebenuhwa, kah dush kepuhgedenuhmahwahsewaug egewh wahpeendegabuneeg.
53Magwah dush oo‐oo keënaud, egewh oozhebeëga‐wenenewug kuhya egewh Phariseeg ahpeche oogemahje-wekoojeähwaun kuhya oogekuhquatebanemahwaun cheduhzhinduhmenid nebewah gagoo.
54Ahkahwahbuhmahwaud, kuhya nunduhwanemahwaud gagoo cheoonzekahnig emuh oodoonening, ewh kaöonje‐bahtahmahwaud.
Currently Selected:
ST. LUKE 11: OTW
Highlight
Share
Copy
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
