انجیلِ لوقا 12
12
فریسیان خمیر مایه د دوری بکرا
1اُخُری هزارون نفر بِر جمع ببنده، هَندَه بِنده که همدیگره سَر شَینده. عیسی اول اِشتن شاگردانییَم لاوش بِکه و بِوا: «فریسیان خمیرمایه دَ که دِدیمیه دوری بِکَراه. 2هیچ مخفیونه چی ای نی که آشکار مَبی و هیچ پوشونِسَه چی نی که معلوم مَبی. 3اَ چی ای که تاریکیه دَ بواتَیو روزِ روشنایی دَ اَشنوِسَ بی، و اَ چی ای که دِبَستَ بَرون پِشتَ بواتَیو بُنِ سر اِعلام بی.»
چه که کودَ گَوَن بترسوم
4«رِفقون، شَمارا وام کسونیه دَ که توننده شَما جانه ایگَتَن و غیر از اَم چیزی نِتوننده کردن، مترسا 5شَمارا وام چه کسیه دَ گَوَن بترسا: اَ کسیه دَ گَوَن بترسا که شَما جانه ایگَتَن پَش، قدرت داره شَماهون جهندم دِراینه. ها، شَمارا وام که چونَ دَ گَوَن بِتَرسا. 6مگم پنج کیجِکِ دِ قِرون نِخروشنده؟ ام حالییم هیچ کومین خدا ویر ابر نیشی. 7حتی شَما سَره مویم همَه شون اَشمارده. پس مَترسا، چون شَما ارزش هزارون کیجِک دَ ویشتره.
8«شَمارا وام هر که اَمِن مردمِه وَرَ اِقرار بِکره، انسان زا، نی اَجو خدا فرشته عون وَرَ اِقرار کَره. 9امّا هر که مردم وَرَ اَمِن هاشا بکره، خدا فرشته عون وَرَ هاشا بی. 10هر که لاوَیی انسان زا ضِد بوا بَخشِسه بی، امّا هر که روح القدوسِ کفر بوا بَخشِسه نیبی. 11وختی شَماهون عبادتگاهان و حاکمانِ ور و اوُنی که قدرت چون دَستِ، بَرِنده، نگران مبا که چه طَرَه اِشتنَ دَ دفاع بِکَراه یا چِه بوایا 12چون هَه ساعت روح القدوس شَمارا وا که چه بوایا.»
نادان ثروتمند مثل
13ای دَفَه جماعته دل ای نفر اَجو بوات: «استاد، چِمن برا بوا که چَما په اِرثه اَمِن بِبَخشه.» 14عیسی جواو بدا: «ای مردک، که اَمِن شَما میون داورِش کرده که شَما را ارث تقسیم بکرم؟» 15پس مَردمِش بوات: «ویراجون ببا و هَر جور حرص و طمعَ دَ دور ببا، چون انسانه زندگی چُو ثروت پِر بییَنه خونین نی.» 16اُخُری ام مثلش چون را بایرد: «ای ثروتمنده مَردکی اِشتن مزرع دَ پِر محصولیش جمع بکه. 17پس اِشتنییَم فکر بکه، ”چه بکرم، چون چِمن محصول نیا دَردَنه را یقا ندارم؟“ 18اُخُری بِوات:
”بزونِسِمه چِه گَوَن بکرم! چِمن انبارون خراو کَرم و پیله انبارونی رَچ کَرم، چمن گندِم و همه ی امواله بِر ذخیره کَرم. 19اُخُری اِشتنییَم وام: ای چمن جان، پِر سالونِ را پِر اموالِم جمع بکه. هَنِنه آسوده ببه و بخَه و آخَه و کیف بِکَه.“ 20امّا خدا اَجو بوات: ”ای نادان! هَم آشون اِشته جان ایگیرم. پس هر چیر که جمع کرده چه که را گَوَن بِبی؟“ 21ام کسی آخِر و عاقبتِ که اِشنا ثروت جمع کره امّا خدا وَر چو دس خالی بی.»
22اُخُری عیسی اِشتن شاگردونش بوا: «بس شَمارا وام شَما زندگی خونین نگران مَبا که چِه بخَرا، نگران مبا چِه دِکَرا. 23چون زندگی غذا دَ مهمتره و بدن خَلاوَ دَ مهمتره. 24کلاغون دِدِسا: نه کارِنده و نه دِرِنِنده نه اَنبار دارنده و نه یقایی دارنده که اَجون ذخیره بکرنده؛ هنی خدا اَجون روزی دی. و شَما چَنده پرنده هونَ دَ با ارزش تَریا! 25شَما دلَ که تونه نگرانییَم ای ساعت اِشتن عمر ایضافه بِکَره؟ 26پس، اگم نِتونو ام وِلِگِ کاره بکرا، چرا بقیه چیونِ را نگرانیو 27صحرا گُلون دِدِسا چه طَرَه پیله آبینده نه زحمت کَشنده و نه وَجنده. پَس شَمارا وام که حتی سلیمان پاتشاهَ نی اِشتن شکوه و جلالییَم اَم گُلون شارین بَزک نِبِه. 28پس اگم خدا علَفون که هارو بیابانَ دَ اَبَرآینده و صبا تَند دَ سوجسَه بینده هِمنه پوشونِه، چنده ویشتر شَماهون پوشونه ای کم ایمانون! 29پس چِمه پَش مَبا که چه بُخَرا یا چه آخرا؛ چِمون نگران مبا. 30چون اَم دِنیا بی ایمانه مردم هِمنَه چیون پَش گَردنده، اما شَما پِه ای دارا که زونه شَما همه ی اَم چیون احتیاج دارو. 31بَلکَم شَما خدا پاتشاهی پَش ببا، که همَّه ی اَمِه شَماهون آدایه بی.
32«ای ولِگِ رَمَه مترس چون شَما پِه خوشی، اَمِ که پاتشاهی شَما بیدی. 33اَ چِه که دارو بِخروشا و چو پولِ فقیران بدیا؛ شَما را کیسههونی تهیه بِکرا که نِپوسِنده، وَ گنجی که تموم نبی آسمان دَ شَما را جمع بکَرا یقایی که نه دِزد آ و نه پِت تونه اَجو بِزَنه. 34چون شَما گنج هر یقا بیبی، شَما دلَ نی بِر اِسِه.
حاضره خادمِه
35«شَما کَمر خدمت را دِبَندا و شَما چراوِ روشن نیا بدارا. 36کسانی شارین ببا که منتظرنده چون ارباب عروسیه دَ آگَرده، و حاضرنده هر وقت آرَسس و برش بکوعِس، اَلبَحل بَر چُو را آکَرِنده. 37خُش به حال اَ نوکرونی که وختی چون ارباب آگَرده، اَجون بیدار بِوینِه. حقیقتن، شَما را وام که، اَو اِشتَن کمره خدمت را دِبَنده، اَجون بَرِه سِفره سَر نشونه و پیش آ و چونَ دَ پذیرایی کَرهِ. 38خُش به حال اَ نوکرونی که وختی چون ارباب راه دَ آرَسه، چِه غروو بیبی، چه نصف شو بیبی، اَجون بیدار بِوینِه.
39«بِزونو که اگم کییَه صاحابه زونِسَی دِزد چه ساعتی آ ناشتشَی چُو کییه دَ دِزی بِکَره 40پس شَما آماده ببا، چون انسان زا، ساعتی آ که شَما چُو انتظاره ندارا.»
41پِطرُس آپرسس: «ای آقا، ام مثالِر چَما را بِزه یا همُّن را؟» 42عیسی خداونده چُو جواو بوات: «پس اَ اَمین و دانا خدمتکار کیه که، چُو ارباب اَجو اِشتن کییَه نوکرون سرپرست کره تا چون غذا سَهمه وقَتییَم آدی؟ 43خُش به حال اَ نوکری که وختی چو ارباب آگرده، اَجو کاره سَر بوینه. 44یقین بِزونا که چُو اَرباب اَجو اِشتن همه ی دارایی سرپرست کَره. 45اما اَگم اَ نوکر اِشتنییَم فکر بکره که ”چِمن ارباب دیرتر آ“ و نوکرون و کنیزون، آزار و اَذیت بکره و بُخَره و آخَره و سر خوشی بکره، 46اَ موقع که چُو ارباب اَ روز و ساعتی که اَو خَوَردار نی آ اَجو وسطَ دَ اوزارونه، و اَجو خیانت کارون یقا دِراینه. 47نوکری که اِشتن اَربابه خواسته زونه امّا اِشتن آماده نکره و یا چو لاوَعون عمل نِکَره، پِر چو خره. 48امّا اَ کسی که اِشتن اربابه خواستَه دَ بی خَوَره و کاری کره که تنبیه لایقه، کمتر چو خُره. هر که اجو ویشتر آدایه ببی، چو کودَ ویشتر انتظار شی؛ و هر که اجو ویشتر اوس برده ببی، چُو جواو داین ویشتر بی.
49«اَز بومَیم تا زمین سر آتشی آگیرم و کاشکی تا هننه روشن آبیه به! 50از ای تعمیدی دارِم که گون اجو بیگیرِم و تا اَو انجام بیبی، از پِر پریشونِم 51هِمنَه زونو اومَیم تا زمینَ دَ صلح بِکَرم؟ نه، بلکم اومَیم تا جدایی دِراینِم. 52چِمِه پَش، ای کییهَ دَ که پنج نفر اِسنده جِدایی دِگِنه؛ سه نفر دِ نفرِ ضد بینده و اَ دِ نفر اَ سه نَفرِ ضد بینده. 53پِه اِشتن زا ضد و زا اِشتن پِه ضد بی، ما اِشتن کِلِگِ ضد و کِلِگ اِشتن ما ضد بی، خُسِرگ وَیه ضد و وَیِه اِشتن خُسِرگ ضد بی.»
54اُخُری عیسی اَ جماعتش بوات: «وختی شَما وینو مَغرِبَ ای اَبری آ اَلبَحَل وایا: وارون گَوَن بواره، و وارون واره. 55و وختی جنوب دَ گرمه باد دَمه وایا: ”هوا گَوَن پر گرم ببی“ و هِمنَه نی بی. 56ای دِدیمان شَما که تونو آسمان و زمینه دِدِشتَنیَم بوایا هوا چه طره عه پَس چه طَرَه عه که ام زَمُونَه تعبیر کردنِ را عاجزیا؟
57«چرا شَما اِشتن حکم نِکرا که چه چاکه؟ 58وختی که اِشته شاکی اییَم مَحکَمه را شا تَقلا بِکَه تا چواَم راه دَ آشتی بکری، اگم نه اِشته شاکی اَته بره قاضی وَر و اَته آدی نگهبان دس و اَ نگهبان اَته زندان دِراینِه. 59بزون که اگم تا قرون آخِرِه مَدی، زندانَ دَ اَبَر نای.»
Currently Selected:
انجیلِ لوقا 12: KTT
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
