انجیلِ لوقا 13
13
توبه بکرا
1چند نفر بومِنده عیسی وَر و چواَم درباره جلیلیونی لاوشون بکه که پیلاتُس چون خون، قربانیون خونِییَم پَشیش بکه. 2عیسی چون جواوَ بِوا: «هِمنَه فکر کرا که جلیلیونی که ام اتفاق چون را دِکَت علایده جلیل اهالیه دَ گناهکار تر بِنده که هِمنَه عذابشون بِکَشِس؟ 3شَما را وام که هِمنَه نی. بَلکَم اَگم توبه مَکرا، شَما همُّن هلاک با. 4هِمنَه فکر کرا که اَ هجده نفر که سیلوان بُرج چون سر ایکَت و بِمَردنده، اورشلیم علایده اهالیه دَ گناه کار تَر بِنده؟ 5شَمارا وام که هِمنَه نی. بلکم اَگم توبه مکرا، شَما نی همُّن هَلاک با.»
بی بَهره انجیله داره مَثل
6اُخُری عیسی ام مَثَلِش چون را بِزِه: «ای مردکی اَنجیلَه داریش اِشتن انگوره باغ دلَ بِکاشتِشه. اَو وختی میوه چیَنه را بومه، هیچیش دارِ سر نیوینت. 7پس اِشتن باغبانش بوا: ”سه سالِ که از میوه چیَنه را آم اَما چیزی نوینم. اَ داره ایبِر، چرا خاکه هدر دی 8اَمّا اَ باغبان جواو بدا: ”ای آقا، بارز ای سال دیگم بمونه. از چُو دویرَه کَنِم و اَجو کود دیم. 9اَگم ای سال پَش میوِش بایرد که خاب؛ اگم نایردِشه اُخُری اَ دارِه ایبِر.»
علیل زَنکی شفا
10ای روز اَ یهودیان مُقدسه شنبه روز عیسی یهودیان عبادتگاه دلَ تعلیمِش دایَی. 11بِر ای زَنَکی بِه که ای روحی اَجو هجده سال علیل کرده بِه. کمرش دِ قاط آبییه بِه و نِتونسَی دیک وندرییَه. 12وَختی عیسی اَ زنکش بوینت اَوِش اِشتن وَر وُنگ بِکه و بوا: «ای زَنَک ته اِشته علیلیه دَ خلاص آبَیش!» 13اُخُری اِشتن دَسِش اَ زَنَک سَر بناشه و اَ زَنَک اَلبَحَل دیک وِندرد خداش شکر بِکَه. 14اَمّا یهودیون عبادتگاه رئیس، چِمه خونین که عیسی مقدسه شنبه روزَ شفا دایِش به، پِر عصبانی ببه و مردمِش بوا: «شش روز کار کردن را اِسه. اَ روزون بایو و شفا بیگیرا، نه شَنبه روزَ.» 15عیسی خداوند چُو جواوَ بِوات: «ای دِدیمون! شَما دَلَ کسی نی که شنبه روزَ اِشتن گاو یا خر آخور دَ اَبَر بکره تا اَجو آو داینه را ببره؟ 16پَس چه بی اگم ام زَنَک که چَما شارین ابراهیم پیغَمبره نَسلِه و هیجده سال شیطانِ دَستَ اسیر به شنبه روزَ ام بندَ دَ آزاد آبییَه؟» 17وَختی عیسی امش بوات چو مخالفه همه خجالتشون بکشس اما مردم همُّن چو عجیب کارون خونین شاد بِنده.
خردل دانه مثل و خمیرمایه مثل
18عیسی هنی بوات: «خدا پاتشاهی چیه آشی؟ اَجو چی ام تشبیه بکرم؟ 19ای خَردله دانه ای شارین که مَردکی اَجو اِشتن باغ دل کاشتِشه. اَ دانه پیله ببه و داری ببه و پرنده عه بومِندِ و چو اوشه سر لونَشون رچ بکه.
20عیسی هنی بِوات: «خدا پاتشاهی چی ام تشبیه بکرم؟ 21خمیرمایهای شارین که ای زَنَکی اَجو سه کیسه آردییَم پشیش بکه وخمیر ببه.»
تنگ بَر
22عیسی اورشلیم راه دَ شهرون و دِهان شی اَی و تعلیمش دایَی. 23راه دَ اینفری چو کودَ آپرسس: «ای آقا، فقط کَمَکی اَ مردم نجات پیدا کرنده؟» عیسی اجو بوات: 24«پِر تَقَلا بِکَرا تا تنگه بَر دَ دِله بشا چون شَمارا وام پِر آدَمه تقلا کَرنده تا دِله بِشینده، اَما نتونِنده. 25وختی کییه صاحاب اوپاب بی بَر دِبَنده، بَرَسَرَ دَ وِندَرا، بَرِ ایکوعا و وایا:”ای آقا، بَر چَمارا آکه!“ اما اَو جواو دی:”از شَماهون اونزونم؛ نِزونم از کا اومَیا.“ 26اُخُری شَما وایا: ”اَما اِشتَه خمنا ای سِفره سَر خُردمونه و آخَردمونه، ته چَما کوچه هانَ دَ تعلیمِر دایَی.“ 27اَما اَو جواو دی: ”از وام که شَماهون اونزونم و نِزونم از کا اومَیا. ای بد کارون چِمِن چَشم پیشَ دور آبو.“ 28اُخُری بِر بِرَما و تَرسَ دَ شَما دندانان، دندانون سَر فشار دییا، چون ابراهیم و اسحاق و یعقوب و همه ی پیغبمره، خدا پاتشاهی دِله وینا، ولی وینا که شماهون اَبَر کرنده 29مردم شرق و غرب و شمال و جنوبَ دَ آینده و خدا پاتشاهی سِفره سَر نِشِنده. 30دِدِسا بعضی که هَنِنه آخرینِنِده اولین بینده و بعضیه که هَنِنه اوّلیننده آخرین بینده.»
ماتم اورشلیم را
31اَ موقع، چَند فَریسیان فِرقه علمان بومِنده عیسی وَر و بواتشون: «بییا دَ دِوَز، چون هیرودیس پاتشاه گوِه اَته بوکوشه.» 32عیسی چون جواوَ بوات: «بِشا و اَ شالِ بوایا: ”هارو و صَبا از دیون اَبَرکَرم و مردمِ شفا دیم و سومین روز چِمِن هدفه آرَسم. 33امّا هارو و صَبا و پَشَرا چِمِن راه ادامه دیم، چون نیبی که نبی جز اورشَلیمَ علایده یقایی کوشته بیبی.“ 34ای اورشلیم، ای اورشلیم، ای شهری که پیغمبرون کوشی و اَ کسی که اِشته وَر خرسِنده سِگسار کری! چند رام بگوس ای کَرگی شارین که اِشتن کیجِکون اِشتن پر و بال بِن جمع کَرییَه اِشته خُردگون چِمن دویر جمع بِکرم اما تَه نِگَوِسَیش! 35شَما کییه بَر تاسیون بی. و شَمارا وام دِ هرگز اَمِن نِوینا تا اَ روزی که بوایا: ”مُوارک اِسه اَ کسی که خداونده نومییم آ.“»
Currently Selected:
انجیلِ لوقا 13: KTT
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
