انجیلِ مرقس 13
13
عیسی معبده خرابی پیش گویی کره
1وختی که عیسی معبدِش ترک کردی ای نفر از چو شاگردِ اجو بِوات: «استاد، دِدِس! چه باشکوه سِگونی، چه با شکوه بناهونی!» 2عیسی بِوات: «اَم پیله بنایون وینی؟ بزون که سِگی، سِگه سر نِمونه، بلکم همه ایبی.»
3وختی عیسی زیتون کوه سر معبده رو به رو نشته به، پِطرُس و یعقوب و یوحنا و آندریاس خلوتَ دَ چو کودَ آپرسسنده: 4«اَجَما بوا کِی اَم اتفاقه دگنه و وختی نزدیک بی که همه اَم چییه اتفاق دگننده چون نشونه چیه؟» 5عیسی اَجون بِوات: «ویراجون ببا که کسی شَما گمراه مکره. 6خیلیه چمن نومییم آینده، وانده، ”از مسیح موعود اِسیم “ و خیلیون گمراه کَرِنده. 7وختی جنگون خَوَره اَشنوا و جنگون شایعَه شَما گوش آرسه، مترسا. اَم چییه گَوَن اتفاق دِگننده، ولی هنوز دِنیا آخِر نِرَسِسه. 8چون قومی علایدَه قومی سر و مملکتی علایدَه مملکت سر جنگ کرنده. و قحطی و زمین لَرزه جورواجورَ یقاعون دَ آ. امّا اَم همه فقط زَنتَنه درد شروع بیینِ شارینِ که دردون فاصله کمتر و کمتر بینده.
9«ولی شَما اِشتن ویراجون ببا، چونکه اَوه شَماهون دادگاهون تحویل دینده و عبادتگاهون دَ شَماهون زننده. شَما چِمن خونین، فرمانداران و پاتشاهون روبه رو وندرا تا چون پیش شهادت بیدیا. 10اول گَوَن خدا پاتشاهی شاده خَوَر همهی قومون را اعلام بیبی. 11هر وقت شَماشون بِگَت و محکمه ببردِنده، نگران مبا که چِه گون بوایا بلکم هر چه که به شَما عطا بی، اَجو بوایو چون شَما نییا که لاوه کرا، بلکم روح القدوسِ که لاوه کره. 12برا، اِشتن برا و په، اِشتن خُردِگه مرگِ تسلیم کَره. خُردِگِ اِشتن په ما ضد بینده، و اَجون کوشتن دینده. 13همَهی مردم چِمن نومه خونین شَما کودَ بیزار بینده. امّا هر که تا آخِر تاو بایره نجات پیدا کره.
14«امّا وختی اَ ’ویرانه کرار زشت و نجسه‘ اَ یقایی که گَوَن مبی، وینو، اَ موقع اَوه که یهودیه منطقه دَ اِسنده، دِوزنده کوهون طرف 15و اَوی که کییه بونه سر بیبی، ای چی اوگَتَنه را، اشنیوَ ما و کییه دله مَشی؛ 16و اَ کسی که زمین سر بیبی، اِشتن ابا اوگَتَنه را اومَگَرده کییه. 17وای به حال زَنَکونی که اَ روزون آوِرِنده و اَ زَنَکونی که خُردِگ شت دینده! 18دِعا بکرا که اَم اتفاق زمسونَ دمَگِنه. 19چون که اَ روزون هِمنَه مصیبتی اتفاق دگنِه که چُو شارین اول خلقتَ تا هاروین روز اتفاق دِنِکَته و هرگزَنی اتفاق دِنِگنه. 20و اگم خداوند اَ روزون کوتاه نِکَردَه به، هیچ بشری جان سالم به در نبردَی، امّا کسونی خونین که اشتن اجونش انتخاب کرده که اِشتن اَجونش انتخاب کردِه، خداوند اَ روزون کوتاه کردِشِه. 21اَ لَحظَه، اگم کسی شَماش بوات: دِدِس مسیح موعود بیا اسه یا ”دِدِس اَو بِر اسه!“ باور مکرا. 22چون دروغییه مسیحون و دروغییه پیغَمبره آینده، نشونه هونی آیرنده و معجزونی کرنده که اگم بتوننده اونی که انتخاب ببنده گمراه بکَرِنده. 23پس ویراجون ببا، چون پیش تر، همهی اَم چیم شَمام واتَه به.
24«امّا اَ روزون اَ مصیبته پَش،
«”آوتاو تاریک بی
و ماهَنی دِ نور نِدیی.
25ستارَه عون آسمان دَ ایگیننده
و اَ قدرتانی که آسمانش محکم نییا دردشه لرزنده.“
26اَ موقه مردم، انسان زا ویننده که پِر قدرت و شکوه و جلالییَم، اَبرون دلَ دَ آ. 27اُخُری اَو، فرشته عون خرسه و دِنیا چهار گوشَه، زمین اَم سَر تا آسمانه اَ سر، کسونی که اشتن انتخاب کردشه جمع کَرِنده.
28«اَنجیله دارَ دَ ام درسه بِگیرا: وختی که چُو لاخه عه جوونه زنه لیو دینده و شَما البحل زونو که تاوِسون نزدیکه. 29هِمنَه، وختی وینا که اَم اتفاقه دگننده، بزونو که انسان زا اومیین نزدیکه، بَره پِشتَ اسه. 30حقیقتا، شَما را وام که تا همهی ام چیه اتفاق دمگننده، اَم نسل از بین نیشی. 31آسمان و زمین از بین شینده، امّا چِمن لاوَعه هرگز از بین نیشینده.
هیچکس اَ روز و اَ ساعته نزونه
32«هیچکس اَ روز و ساعته نِزونه جز آسمانیه په؛ حتی آسمانه فرشته عون و زا نی نزوننده. 33پس ویراجون و بیدار ببا، چون شَما نِزونو که اَ زمُون کی آرَسه. 34اَ روزِ اومییَن، ای مردکی شارینِ که شی سفر و اِشتن کییه اختیاره آدی اِشتن نوکرون دس و هر کومینِ ای وظیفه ای آدی و دربانَ نی دستور آدی بیدار وِندَرِه. 35پس شَما هم بیدار ببا، چون نِزونو کییه صاحاب کی آ، شَو یا نصفه شو، سوکوله خونتَنِه موقع یا صبح تولو. 36مبادا که اَو ای دَفَه با و بوینه که شَما خواوییا. 37اَ چی ای که شَمارا وام همُّنِ را وام: بیدار ببا!»
Currently Selected:
انجیلِ مرقس 13: KTT
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
