انجیلِ مرقس 12
12
شروره باغبانان مثال
1اُخُری عیسی مثَلونییَم چونییم لاوِش بِکَه و بِوات: «ای مردکی به که انگوره باغش رچ بکه و چو دویر حصارش بِکَشِس. اَو، انگوره آو ایگَتَنه را باغ دلَ حوضیش رَچ بکه و نگهبانی داینه را ای برجیش بِر رَچ بکه. و انگوره باغش چند باغبانِش اجاره بِدا و اِشتن بِشه علایدَه مملکتی. 2انگوره چینی وقت ای نوکَریش بِخِرسا باغبانون وَر تا ایکه اِشتن انگوره باغه محصول چون کودَ ایگیره. 3امّا باغبان اَ نوکرشون بگَت بِزِشونه و خالیه دسییَم آگاردونِسشونه. 4اُخُری اَنگوره باغ صاحاب ای عَلایده نوکریش بِخِرسا چون ور، امّا باغبانه چُو کَلِشون نی بِشکِس و اَجوشونَم بی حرمتی بکه. 5باغ صاحاب هنی ای عَلایده نوکریش بِخِرسا، امّا باغبانه اَوِشون بوکوشت. و علایدَه نفرونییَم هِمنِشون رفتار بکه؛ بعضی شون بِزِه و بعضیونشون بوکوشت. 6باغه صاحاب فقط ای نفر دیگه ایش دَ که اَجو بخرسه و اَو، چو عزیز گرامیه زا بِه. آخرسر اَوِش بخرسا باغبانون ور و اِشتنییَم بوات: ”چمن زا حرمته نیا دارنده. 7امّا اَ باغبانه همدیگرِ بواتشون: ” انگوره باغه وارث اَمه؛ بایا اَجو بوکوشوم تا اَم ارث و میراث اَجَما آرسه.“ 8پس اَ کولشون بگَت بوکوشتنده و انگوره باغ دَ اَبَرِشون بِکَه. 9باغ صاحاب چه کَره؟ اَوی آ، باغبانون نابودکره و انگوره باغه آدی علایدَه نفرون دس. 10مگم داوود زبورَ دَ نِخونتَیو که:
«” هَه سِگی که بَنایون رَدشون بکه و فرشون بدا،
بنا اصلیه سِگ آبییَه؛
11خداوند اَم کارش کَرده
و ام چَما نظرَ دَ عجیبه“؟»
12سران کاهنان و تورات معلمین و شیخون، گَوِسَینده عیسی دستگیر بکرنده، چون بِزونسشونه که اَم مثالش دربارَه چون واتِش به امّا مردمَ دَ ترسِسَیندِه. پس عیسیشون ول بکه و بِشنده.
مالیات آدینه درباره سوال آپرسِسَن
13اُخُری چن نفر از فَریسی فرقه و چن نفر از هیرودیسه طرفدارِ، بخرساشون عیسی ور تا اَجو اِشتن لاوَعونیَم تَلَه دِراینِنده. 14اَوُن بومِندِ عیسی ور و بواتشون: «استاد، اَما زونوم تَه صادقِ مردکی اِسیش و هیچکسیَ دَ نِترسی، چون که ظاهره توجه نکری، بلکم خدا راهِ دِرِست تعلیم دی. رومِ امپراتوره مالیات آداین شرعاً دِرِسته یا نه؟ گَوَن اَجو مالیات آدیوم یا نه؟» 15امّا عیسی که چون دِدیمیش زونسَی اَجون بِوا: «چرا اَمِن امتحان کرا؟ ای ای دیناریه سکه ای بایرا چِمن ور تا اَجو بِوینم.» 16اَوُن ای سکَهایشون بایرد. عیسی چون کودَ آپرسس: «چه که نقش و نوم اَ سکه سرَ اسه؟» جواوشون بدا: «روم امپراتور.» 17عیسی اَجون بِوات: «پس امپراتور ماله، امپراتور آدییا و خدا ماله، خدا آدییا.» اوُن چو لاوَعونَ خونین تعجبشون بکه.
قیامته روزِ درباره سوال آپرسن
18اُخُری صَدّوقیان فرقه عالمون که قبول نِدارنده مَردَعه زنده آبیینده، بومِندِ عیسی وَر و سؤالی چو کودَ آپرسِسِندِه، بواتشون: 19«استاد، موسی پیغمبره چَما را نیویشتشه که اگم ای مردکی بِرا بمره و چو زنِگ خُوردِگی مدارییَه، اَ مردک گَوَن اَ بیوه زَنَکِ ببره تا اِشتن بِرار را نسلی بِنییَه. 20هفت برا بِنده. اوّلین بِرا ای زنگیش بِبَه، و بی اُویلاد بِمَه. 21اُخُری دوّمیه برا اَ بیوه زَنگش ببه، امّا اَوی بی اُویلاد بِمَه. سوّمیه برا نی هِمنَه ببه. 22همنه هیچ کومین اَز اَ هفت برا، خُردِگِ دار نبنده. آخِر سر، اَ زَنِگَم بمَه. 23قیامتَ روز، وختی که اَون هنی زنده آبینده، اَ زَنَکِ کوم برا زنِگ بی، چون که هر هفت برا اَوِشون بردَه به؟»
24عیسی اَجون بِوات: « شَما گمراهی چمه خونَین نی که نه مقدسه نیویشته هونَ دَ خَوَر دارو و نه خدا قدرتَ دَ؟ 25چون اَ زمُون که مَردَه عه زنده بینده، نه زنِگ برنده و نه شِو کَرِنده؛ بلکم آسمانه فرشته عون شارین بینده. 26امّا مَردعون زنده آبیینه درباره، موسی پیغمبره کتابَ دَ نِخونتَیو که، بوته ماجراعه دَ، چه طَرَه خدا اجو بوات: ”ازیم ابراهیم خدا و اسحاق خدا و یعقوب خدا“ ؟ 27خدا، مَردعون خدا نییِه، بلکم زِندِعون خداعه. شَما پِر اشتباه فکر کرو!»
پیله ترین حکم
28ای نفر تورات معلمان پیش بومه و چون بحثش بشنوس. وختی بیوینتِشه عیسی چاکه جواویش اجون بدا، عیسی کودَ آپرسس: «کومین حکمَه، همّنَ دَ مهم ترِ؟» 29عیسی اجو بِوات: «مهمترین حکمه اَمه: ”بَشنَو، ای اسراییل قوم، خداوندْ چَما خدا، خداوند یکتا اِسه. 30خداوندْییم اِشته خداییَم، تمام اِشته دل و تمام اِشته جان و تمام فکر و تمام اِشته قوتییَم خُش ببه.“ 31دوّمین حکمه اَمِه: ”اِشته قانشییم اِشتن شارین خُش ببه.“ اَم دِ حکمَ دَ پیله ترَ حکمی نییه.» 32تورات معلم عیسیاش بِوات: «تَه راست وای استاد! دِرِستِر بوا که خدا ایوِ و جز اَو خدایی نییه، 33 و اَجو، تمام دل و تمام فهم و تمام قوتییَم خُش بیین و اِشتن قانشیَیم اِشتن شارین خُش بیین، همهی سوجانسنیه هدیه هان و قربانیونَ دَ مهم تر اِسه.» 34وختی عیسی بیوینتِشه که اَ مردک چنده عاقلانه جواوش بدا، اجو بوات:«ته خدا پاتشاهیه دَ دور نیش.» چو پَش، دِ هیچ که جرائتش نکه عیسی کودَ چیزی آپَرسه.
مسیح موعود چِه کِه زاعه؟
35وختی که عیسی معبدَ دَ تعلیمِش آدایَی آپرسسشه: «چه طره عه که تورات معلمِ واندِه مسیح موعود، داووده پاتشاه زاعه؟ 36داوود اِشتن، خدا مقدسه روحه الهامییَم اعلامش بکه که:
”خداونده چِمن خداوند بوات:
«چمن راسِ طرف بنش
تا وختی که اِشته دِشمنون اِشته پا بِن دِراینِم.»“
37اگم داوود پاتشاه اِشتن، اجو خداوند وا، پس چه طَرَه مسیح موعود تونه داوود زا بیبی؟» اَ جماعتی که بِر بِنده شادیییَم عیسی لاوعونشون گوش آدایَی.
تورات معلمان دوری بکرا
38پس عیسی اِشتن تعلیمون دَ بِوات: «تورات معلمونَ دَ دوری بکرا، که خُشِنده بِلند اَباییم راه بِشِنده و خُشنده مردم کوچه و بازارونَ دَ چون را سلام بکرنده، 39و عبادتگاهان دَ چاکترین یقا چون را بیبی و جشنون دله مجلسه سَرون ور بنشنده. 40اَوُن ای طرف بیوه زنَکون کییه غارت کرنده و اَ ای طرف تظاهرِ خونین، طولانیَ دِعا کرنده. چِمون مجازات پِر چتین بی.»
بیوه زَنَک هدیه
41عیسی اَ یقایی رو به رو نشته به که معبده صندوقه بِر بِه و مردمیش دِدِشتَی که صندوق دِلَ پول دراینتَینده. پِر ثروتمنده پِر پولی شون دراینتَینده. 42اُخُری ای فقیر بیوه زَنِکی بومه و دِ ناچیزه مِسیه سکِش دراینت صندوق دله. 43ای دفعه عیسی اِشتن شاگردونش وُنگ بکه و اَجونِش بِوات: «حقیقتن، شَمارا وام اَم فقیره بیوه زَنَک همَّهی کسونیه دَ که صندوقه دِلَ پول دراینتِنده ویشترِش آداعه. 44چون اَون هَمُّن اِشتن مال و ملالِ اضافه شون آدا، امّا اَم زَنَک اِشتن خالییَه دَسییَم هر چیش که دَ آداشه، یعنی هر چیش که زندگی کردنه را دَردشه.»
Currently Selected:
انجیلِ مرقس 12: KTT
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
