انجیلِ مرقس 15
15
محاکمه پیلاتُس پیش
1صبح تولو، البحل، سران کاهنان، شیخانییم و تورات معلمیییک و همَّهی یهود شورا اعضاییم مشورتشون بکه. اَون عیسی شان دبَسَه دستیم ببه و رومه فرماندار، پیلاتُسشون تحویل آدا. 2پیلاتُس، عیسی کودَ آپرسس: «تَه یهودیان پاتشاهیش؟» عیسی جواو بدا: «ته هِمنَه وای!» 3سران کاهنون، عیساشون پِر تُیمت زَیَی. 4پیلاتُس هنی عیسی کودَ آپرسس: «هیچ جواوی نِداری؟ دِدِس چنده اَته تُیمت زَنِندِه!» 5عیسی هنی هیچ جواویش ندا، هِمنَه که پیلاتُس تعجبِش بِکَه.
6پیلاتُس رسمِش دَ که هر سال پسخ عیده موقع، ای زندانی مردمه انتخاب ییَم چون را آزاد بِکَره. 7ای گروه یاغیان زندانَ بِنده که شورشون کرده به و آدمشون کوشته به. چون میون ای مردکی به که چو نوم بارْاباس به. 8جماعت بومِندِ پیلاتُس وَر و چو کودَ بِگَوسِنده که هَه رسمی که همیشَه چون را انجام دایَی، به جا بایره. 9پیلاتُس چون کودَ آپرسس: «گَوا یهودیون پاتشاه شَما را آزاد بکرم؟» 10پیلاتس اَمش بوات چون چاک زونسَی که سران کاهنون، پَخیلی سَرَ عیسی تسلیم کرنده. 11امّا سران کاهنون جماعتشون تحریک بکه تا پیلاتُس کود بگوند که عیسی عوض، بارْاباسه چون را آزاد بِکَره. 12اُخُری پیلاتُس هنی چون کودَ آپرسِس: «پس مَردکییَم که شَما اَجو یهودیون پاتشاه وایو، چه بکرم؟» 13جماعت هنی جیکیلِشون بِکَه که: «اَجو صلیب سر بکوش!» 14پیلاتُس چون کودَ آپرسس: «چرا چه بدی ایش کرده؟» امّا اَوُن بِلندتر جیکیلشون بِکَه: «اَجو صلیب سر بوکوش!» 15پس پیلاتُس که گوِسَی جماعتِ راضی نیا بداره، بارْاباسش چون را آزاد بِکَه و دستورش آدا تا عیسی شلاق بزنِنده، اُخُری اجونش اوس ببه که اجو صلیب سر بکوشنده.
عیسی مسخره کرن
16اُخُری سربازه، عیسی شون ببه فرماندار کاخه حیاطه دله، و همَّهی سربازونشون وُنگ بِکَه. 17چو پَش ای اَرغوانیه اَبایی اَجوشون دِکَه و تاجی تیکییَم بوَتشونه و عیسی سر اوناشونه. 18اُخُری عیسی پیش تعظیمشون بکه، و بواتشون: «سلام بر یهودیون پاتشاه!» 19اَوُن چوعییَم عیسی سر زَیَشونه و چو سر لَش آوشون ایکَردَی و چو پیش زانوشون زیَی و اجوشون احترام نایَی. 20عیسی مسخره کردنه پَش، اَ ارغوانیه اَباشون چو جانَ دَ اُوَتِنده و اِشتن خلاوشون اَجو دکردِنده. اُخُری اوِشون ببه تا صلیب سر بکوشنده.
عیسی مصلوب کردن
21سربازه راه دَ ای نفرشون بوینت که چو نوم شمعون به و قیرَوانه اهالی به. اَو اِسکندر و روفُسه پِه به و مزرعه سرَ دَ آگردِسی. سربازه شمعونشون مجبور بِکَه تا عیسی صلیبه چُو پش ببره. 22پس عیسیشون ببه یقایی که چو نوم جلجتا به. و چو معنی جمجمه یقا اِسه. 23اَوُن ای شراوی که مُرییَم به آداشونه عیسی تا آخره، امّا عیسی نُخَردشه. 24اُخُری عیسیشون صلیب سر ببه و چو خلاوشون اِشتن میون تقسیمشون بکه و قرعه شون دراینت تا بویننده هر تیکه چه که سهم بی.
25ساعت نه صبح به که عیسیاشون ببه صلیب سر. 26چو تقصیر نومه سر بینیوشتشونه: «یهودیون پاتشاه.» 27دِ راهزنَ نی عیسی خمنا صلیب سر ببردشونه، ای نفر چو راسه طرف و اَ ایو چو چپه طرف. 28هِمنَه مقدّس نیویشته هون، اَ نیویشته اتفاق دکَت که وا: «اَو جنایت کارون دَسته حساب ببه.» 29رهگذره اِشتن سرشون تکان دایَی و دِشمون داییَنیم واتشونَی: «ته ای که گوسَی معبده خراو بکری و سه روزَ هنی اجو رچ بِکری، 30اِشتن نجات آده! صلیب سرَ بوره اشنیوَ!» 31سران کاهنان و تورات معلمه نی اِشتن دَلَ دَ عیسیشون مسخره بِکَه و بواتشون: «علایدَه آدمش نجات آدا، اما نتونه اِشتن نجات بیدی! 32بارز مسیح موعود، خدا قومه پاتشاه، صلیب سرَ دَ اَشنیوَ با تا اَما بیوینوم و ایمان بایروم.» اَ دِ نفرم که عیسی خمنا صلیب سر بِنده، اَجوشون دِشمون دایَی.
عیسی مرگ
33ساعت شش تا ساعت نه، تاریکی همَّهی اَ سرزمینش بگَت. 34ساعت نه به که، عیسی بِلَنده صَصییَم جیکیلِش بِکَه: «ایلویی، ایلویی، لَمّا سَبَقْتَنی؟» ینی «چِمن خدا، چِمن خدا، چرا امِنِر تَیناو باشت؟» 35بعضی از اَوه که بِر وندَردَ بِنده وختی اَمشون بَشنوس، بواتشون: «دِدِسا ایلیا پیغمبره وُنگ کره.» 36ای نفر البحل بدوس، ای اسفنجیش ترشسَه شراوییَم مَشت بکه و چویی سَر اوناشه، ببردشه عیسی گره پیش تا آخره، و بِوات: «وِندَرا بارزا بیوینوم ایلیا پیغمبر آ اَجو صلیبه سر اشنیوَ بایره» 37پس عیسی بِلَنده صصییَم جیکیلِش بِکَه و جانش بدا. 38اَ لحظَه، معبده پرده، اروازه تا اشنیوَ اوزَرِسِشُ و دِ تیکه ببه. 39وختی سربازون فرماندَه که عیسییم دیمادیم وندَرد به، بیوینتِشه که عیسی چه طَرَه جانش بدا، بِوات: «واقعا که اَم مردک خدا زا به.»
40چند زَنکِ دورَ دِدِشتَینده. مریم مجدَلیه، مریم که وِلِگِ یعقوب و یوشا ما به و سالومه، چون میون بِنده. 41اَم زنکون وختی که عیسی جلیل منطقه دَ به، چو دَ پیرویشون کردَی و چو را خدمتشون کردَی. پر علایدَه زَنکِ که عیسی خمنا اومییه بِنده اورشلیم، بِر بِنده.
عیسی خَشاردن
42اَ روز، ’تهیه‘ روز به که یهودیون اِشتن شون عَیدِ را آمادشون کردَی، یعنی ای روز پیش از مقدسه شنبه روز. پس غروو دم 43ای مردکی که چُو نوم یوسف به و رامه اهالی به، جراتش بِکَه بِشه پیلاتس ور و عیسی جنازش بگوس. یوسف، یهوده شورا ای محترمه اعضا به و خدا پاتشاهی را انتظارِش کَشِسَی. 44پیلاتُس که باورش نکردَی عیسی اَم زودیون مَردِ، سربازون فرماندِش وُنگ بِکَه تا آپرسه بِوینِه عیسی مَردِه یا نه. 45وختی پیلاتس اَ فرماندَه دَ بشنوسشه که عیسی مَردِه، اجازش آدا که یوسف، عیسی جنازه ببره. 46یوسفَ نی ای کتانه کفنی بخِرِییشُ و جنازش صلیب سر اشنیوَ بایرد. یوسف عیسی جنازش آپیت اَ کتانیه کفن، اوناشه مقبره ای دله که صخره دلَ دَ تاشِسِشون به. اُخُری ای پیله سِگی مقبره پیشِش اونا. 47مریمِ مَجْدَلیّه و مریم، یوشا ما، بیوینتشون که عیسی جنازشون کاشون اونا.
Currently Selected:
انجیلِ مرقس 15: KTT
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
