انجیلِ مرقس 16
16
عیسی زنده آبیین
1وختی مقدسه شنبه روز آوِرد، مریمِ مَجْدَلیّه و مریمِ که یعقوب ما بِه و سالومَه، عطریه روعن بخِرییِشونه تا بشینده و عیسی جنازه عطریه روعن بزننده. 2پس هفته اولین روز، صبح تولو، آوتاوِ اَبَر اومییَن موقع، مقبره طرف راه دکَتِنده. 3اَوُن هندیگرِشون واتَی: «کِه گَوِه اَ پیله سگه مقبره پیشَ چَما را کنار بزنه؟» 4امّا وختی بِر آرسسنده، بیوینتشونه اَ پیله سِگَ مقبره پیشَ دَ کنار زَیِشون بِه. 5وختی بِشنده مقبره دله، ای جوونیشون بیوینت که راست طرف نشته بِه و سیبیه خلاویش دکرده به. زنکون چو وینَتَنییم بترسِسِنده. 6اَ جوون، زَنکونش بِوات: «مَتَرسا. شَما عیسای ناصری پَش گردا که اَوشون صلیب سر ببه. اَو زنده آبه؛ بییا نی. یقایی که چو جنازشون نایه به، بوینا. 7هَنِنَه، بِشا و چو شاگردون و پِطرُسه بوایا که عیسی شَما پیش شی جلیل منطقه؛ شَما بِر، اَجو وینا، همنه که پیش تر شَماش واته بِه.» 8پس زَنکِ اَبَر بِشنده، مقبره دَ دِوشتنده، چون چون جان لرزِسَی و مات آبِنده. اَون هیچکه را چیزی نِواتنده، چون که تَرسِسَه بِنده. 9وختی عیسی، هفته اولین روز، صبح تولو زندَه آبه، اوّل مریمِ مَجْدَلیّه را ظاهر ببه، که چو دَ هفت دیوِش اَبَر کرده به. 10مریمِ بِشه و عیسی یارونش که ماتم و زاریَ دَ بنده، خَوَر آدا. 11امّا اَوُن وختی بَشنوسِشونه که عیسی زنده آبیاسه و مریم اَجو وینته باورشون نکه.
12چو پَش، عیسی عَلایده ظاهرییَم دِ نفرِ را که شَینده ای دهی آشکار آبه 13اَ دِ نفر آگردِسِنده و بقیه شاگردونِشون اَم ماجرا دَ خَوَر دارشون بکه، امّا اَوُن هنی چون لاوعونشون باور نِکَه.
14اُخُری عیسی اَ یازده شاگرده را، لحظَه ای که غذاشون خُوردَی، ظاهر آبه و چون بیایمانی و سَت دلی خونین چون را غَیضش بکه، چون لاوعون کسونی که اوِشون زنده آبینِ پَش وینتشون به، باورشون نِکَرده به. 15و اَجونِش بِوات: «همه ی دِنیا بشا و خدا پاتشاهی خوشه خَوَرِ همهی خلایقه را اعلام بِکَراه. 16هر که ایمان بایره و غسل تعمید بیگیره، نجات پیدا کره. امّا هر که ایمان مایره محکوم بی. 17و کسانی که اَمِن ایمان دارنده ام نشانه و معجزه عون انجام دینده: اَوه چمن نومییم دیون، آدمون دَ اَبَر کَرِنده و تازه لفظیم لاوه کرِنده 18اَوُن مارون اِشتن دسونییَم گیرنده، اگم کوشَنده زهری آخرنده، هیچی شون نیبی، اَوُن مریضون سر دس اونینده و اَ مریضه شفا گیرنده.»
19پس عیسای خداوندشون بعد اَم که اَم لاوَعونش اَجون بوات، ببردشونه آسمون و خدا راسَه دسَ بِنِشتشه. 20شاگرده اَبَر بِشِنده همه یقاشون تعلیم آدا. خداوند چونییم کارِش بِکَه و نشانه و معجزه آنیییَم که شاگردون کردَی، چون پیغامش ثابت کردَی.
Currently Selected:
انجیلِ مرقس 16: KTT
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
