مرقس 10

1وقام من هناك وراح ع جبال اليهودية ع الجهة التانية من الأردن ورجعوا الناس وتجمعوا عندو. وزي عادتو قعد يعلمهن. 2وأجوا لعندو جماعة من الفريسيين عشان يوقعوه وُسألوه: بِنفع الزلمة يطلّق مرتو؟ 3جاوبهن وقلهن: بشو وصّاكو موسى؟ 4قلولو: سمح موسى إنو يكتب الزلمِه ورقة طلاق ويطلق مرتو. 5فقلهن يسوع: هو كتبلكو هاي الوصية لأنو قلبكو قاسي. 6من أوّل م انخلقت الدنيا عمل الله البشر ذكر وأنـثى. 7وعشان هيك بِـترك الزلمة أبوه وإمو وبـِرتبط بمرتو. 8وبتحولو ال 2 لجسد واحد فهنّي جسد واحد وبطلو 2. 9واللي جمّعهن الله بلاش يفرقهن الإنسان. 10ولما فاتوا ع البيت رجعوا التلاميذ وُسألوه عن نفس الموضوع. 11فقلهن: اللي بطلق مرتو وبتجوز غيرها بكون عم بِزني. 12واللي بتطلق جوزها وبتتجوز غيرو بتكون عم تزني.

13وجابت الناس الولاد لعند يسوع عشان يحُط إيدو عليهن. بس التلاميذ حكوا معهن كلام ناشف. 14غضب يسوع لما شاف اللي صار وقلهن: اتركو الولاد ييجو لعندي. تمنعوهِنّش لأنو ملكوت الله للناس اللي مِتِلهن. 15عنجد بقلكو، مستحيل تفوتوا ع ملكوت الله إلا إذا بترحبوا بالملكوت مِتِل ولد زغيـر. 16وعبط الولاد وحط إيديه عليهن وباركهن.

17ولما طلع يسوع على الشارع في واحد زلمة ركض لعندو وسجدلو وقلّو: يا معلم يا منيح شو أعمل عشان أورث الحياة الأبدية؟ 18فقلو يسوع: ليه بتقول عني منيح؟ فش حدا منيح إلا واحد وهو الله. 19وإنت عارف الوصايا: تقتلش، تزنيش، تسرقش، تشهدش ع حدا بالكذب، تُكنش غشّاش، اِكرم أبوك وامك. 20فقلو: يا معلم، من زُغري وأنا بطيع كل هاي الوصايا. 21اطّلع عليه يسوع بمحبة وقلو: ناقصك إشي واحد، روح وبيع كل اللي عندك وأعطي الفُقرا ورَح يكونلك كنز في السما وبعدين تعال وُصير من تلاميذي. 22انضغط الزلمة من جواب يسوع وروّح حزين لأنو غني كثير.

23واطّلع يسوع حوليه وقال لتلاميذو: اللي مصرياتهن كتار كتيـر صعب إنهن يفوتو على ملكوت الله. 24استغربوا التلاميذ من حكي يسوع. فكمان مرة جاوبهن يسوع وقلهن: يا ولادي كتيـر صعب إنو الواحد يفوت على ملكوت الله. 25أسهل للجمل إنو يفوت من خزق الإبرة من إنو يفوت الغني على ملكوت الله. 26انصدموا التلاميذ ع الآخر وُحكو لبعض: واو مين بِقدر يِخْلَص؟! 27إطّلع عليهن يسوع وقلهن: عند الناس مستحيل بس مش عند الله لأنو الله قادر على كل شي 28فبدي بطرس يقلو: لاحظ إنو إحنا تركنا كل إشي وُصرنا من أتباعك. 29فقال يسوع: تأكدوا إنو فش حدا ترك بيت أو إخوة أو خيات أو إم أو أبو أو ولاد أو أراضي عشاني وعشان الإنجيل 30إلا ورَح يوخذ إسه وفي هاي الدنيا 100 ضعف من البيوت والإخوة والخيات والإمَّيات والأولاد والأراضي وبوخُد معهن اضطهادات. وبوخد الحياة الأبدية في العالم الجاي. 31بس كتار من الأوائل رَح يكونوا بالأواخر واللي بالأواخر أوائل.

32وكانوا طالعين في طريق أورشليم وسبقهن يسوع وكانو التلاميذ متحيـرين وأتباع يسوع خايفين. وأخذ يسوع ال 12 لحالهن كمان مرة وصار يحكيهلن شو رَح يصير معو. 33وقلهن: هيّانا طالعين ع أورشليم ورَح ينحط ابن الإنسان بإيدين رؤسا الكهنة وجماعة الكتبة. ويحكمو عليه بالإعدام ويحطوه بإيدين الأمم. 34ورَح يتمسخروا عليه ويبزقوا عليه ويجلدوه ويقتلوه بس رَح يقوم بعد 3 أيام.

35وأجو ولاد زبدي، يعقوب ويوحنا، لعند يسوع وقلولو: يا معلم، في طلب بدنا إياه منك. 36فسألهن: شو بدكو أعمل عشانكو؟ 37قلولو: خلي واحد فينا يقعد ع يمينك في عرش مجدك والثاني ع شمالك 38فقلهن يسوع: إنتو مش عارفين شو بتطلبو. بِتقدرو تشربو الكاس اللي عم بشربها وتتعمدوا بالمعمودية اللي عم بتعمدها؟ 39فقلولو: منقدر. فقلهن يسوع: رَح تشربو الكاس اللي بشربها وُتتعمدوا بالمعمودية اللي بتعمدها. 40بس بقدرش أوافق ع طلب مين يقعد ع يميني ومين ع شمالي لأنو المحل محجوز للي اختارهن أبوي.

41لما سمعوا ال 10 رسل هذا الكلام غضبوا ع يعقوب ويوحنا. 42فناداهن يسوع وقلهن: بتعرفو إنو حكام الشعوب الوثنية بِتْحَكَّمُو بالناس والعظماء عندهن هني اللي بِتسلطو غصبن عن راس الناس 43إنتو مش لازم تكونو هيك وإذا واحد فيكو بدو يكون عظيم لازم يكون الخدام بيناتكو 44واللي بدو يكون أعلى واحد لازم يكون عبد للكل. 45لأنو ابن الإنسان م أجاش عشان الناس تخدمو. أجا عشان هو يخدمهن ويضحي بنفسو عشان يحرر ناس كتار.

46ووصلوا ع أريحا ولما كان يسوع طالع من أريحا كان حوليه تلاميذو وعدد كبير من الناس. وكان بارتيماوس الشحاد الأعمى قاعد في الشارع. وهو ابن تيماوس. 47ولما سمع إنو يسوع الناصري موجود صار يصيح ويقول: يا يسوع ابن داود ارحمني. 48وكتار من الناس صيحوا عليه عشان يسكتوه. بس هو صار يصيح أكتـر ويقول: يا ابن داود، ارحمني. 49فوقّف يسوع وقال: نادوه لعندي، فنادوا الأعمى وقلولو: تشجع وقوم لأنه عم بناديك. 50رمى عبايتو وقام وراح لعند يسوع. 51حكى معو يسوع وسألو: شو بدك مني؟ قالو الأعمى: يا معلمنا، بدي أشوف. 52فقلو يسوع: رُوْح إيمانك نجّاك. وطوالي صار يشوف وصار يمشي ورا يسوع في الطريق.

Currently Selected:

مرقس 10: CGB

Highlight

Copy

Compare