مرقس 9

1وقلهن: عنجد بقلكو في ناس من الواقفين هون مش رَح يموتوا قبل م يشوفوا مجيء ملكوت الله بقوة. 2وبعد 6 أيام أخذ يسوع بطرس ويعقوب ويوحنا وطلع معهن لحالهن ع جبل عالي. وتغيـر شكلو قدام عينيهن. 3وصارت أواعيه تشع بلون أبيض لامع ع الآخر. وُفش منظف أواعي بالدنيا بِقدر يخلي اللون أبيض هيك. 4وُظهرلهن إيليا مع موسى وكانوا عم بِحكوا مع يسوع. 5وُقال بطرس ليسوع: يا معلم، منيح إنو إحنا هون، خلينا نعمل 3 عرايش. وحده إلك ووحده لموسى ووحده لإيليا. 6ومن الخوف اللي سيطر عليهن م كنش بطرس واعي شو عم بقول. 7وغطتهن غيمة وسمعو من الغيمة صوت بقول: هادا هو ابني المحبوب اسمعوا كلامو. 8وفجأة إطلعوا حوليهن وم شفوش حدا معهن غير يسوع.

9وهنـي نازلين من الجبل وصاهن يسوع إنهن م يحكوش لحدا شو شافو لحد م يقوم ابن الإنسان من بين الأموات. 10ردوا عليه . . . بس كانوا يتناقشوا شو المقصود "يقوم من بين الأموات". 11وسألوه: ليش جماعة الكتبة بقولو إنو إيليا لازم ييجي بالأول؟ 12فقلهن: إيليا بيجي بالأول وبرجّع كل إشي لمحلو بس ليش مكتوب عن ابن الإنسان إنو رَح يحتقروه ويتألم كتـيـر؟ 13وأنا بقلكو إنو إيليا صار جاي وعملو فيه اللي بدهن إياه متل ما انكتب عنو في الكتب.

14وأجوا لعند باقي التلاميذ وشافو حوليهن كتير ناس وكان في جماعة من الكتبة عم بِتناقشو معهن. 15وأوَّل م شافو الناس يسوع انعجئوا وركضوا كلهن عشان يسلموا عليه. 16وسألهن: عن شو عم تتجادلو؟ 17جاوبُه واحد من الناس وقلو: يا معلم، جبتلك ابني وهو لابسو روح خَرس. 18بُوقع في أي محل بكون الروح لابسو فيه وُبصير يبـزّق زبد من تمو ويعضّض بسنانو ويتشنج. طلبت من تلاميذك إنهن يطردوا الروح بس قوتهن بتكفيش. 19فقال يسوع: إنتو جيل كافر، لحد إيمتى بدي أضل معاكو؟ لحد إيمتى بدي أضل اتحملكو؟ جيبوه لعندي. 20فجابوه لعندو، وأوَّل م شاف يسوع أجتو نوبة شيطانية ووقع وصار يتقلب على الأرض ويبـزّق زبد من تمو. 21فسأل يسوع أبو الولد: من إيمتى عم بصير معو هيك؟ قلو: من لما كان طفل. 22وكتيـر مرات بجرو الروح ع النار أو ع المي عشان يقتلو. فإذا بِتقدر، ساعدنا واشفق علينا. 23قلّو يسوع: "إذا بتقدر!" . . . . كل شي ممكن عند الإنسان المؤمن. 24فصيّح أبو الولد وقال: أنا مآمن بس ساعدني اغلب عدم الإيمان. 25ولما شاف يسوع إنو الناس عم تتجمّع صيّح ع الروح النجس وقلو: يا روح يا أخرس ويا أطرش أنا بأمرك: اطلع من الولد وم تـرجعش تفوت فيه. 26صرّخ الروح وتشنج الولد كثيـر وُصار كأنو ميت وأغلب الناس قالو مات الولد. 27ومسك يسوع إيد الولد وقوَّمو فقام. 28ولما فات ع البيت وكان لحالو مع التلاميذ سألوه: ليش إحنا مقدرناش نطردو؟ 29فقلهن: هادا النوع بقدرش حدا يطلعو إلا بالصلاة.

30وطلعوا من هناك وراحو عن طريق الجليل وم كنش يسوع بدو حدا يعرف تحركاتو. 31لأنو كان بدو يعلّم تلاميذو ويحكيلهن إنو رَح يسلمو رقبة ابن الإنسان لأيدين الناس ورَح يقتلوه وبعد م ينقتل بــ 3 أيام رَح يقوم. 32بس هِنّ مفهموش كلامو وخافوا يسألوه.

33ووصلوا ع كفرناحوم ولما فات يسوع ع البيت سألهن: شو كنتو تتناقشو في الطريق؟ 34فسكتوا لأنهن كانوا عم بِتناقشو في الطريق على مين هو أعظم واحد فيهن. 35فقعد يسوع ونادى الـ 12 تلميذ وقلهن: اللي بدو يكون الأوَّل لازم يكون آخر واحد ويكون خدَّام الكل. 36وجاب يسوع ولد صغير وُخلاه يوقف بالنُص وُعبطو وقلهن: 37اللي بُعبُط طفل واحد من هَدول اِلولاد باسمي هو عم بُعْبُطني واللي بُعبطني هو عم بُعبط كمان اللي بعتني.

38وقلّو يوحنا، يا معلّم، شُفنا واحد بُطرد الشياطين باسمك ومنعناه لإنو مش من جماعتنا. 39فقلهن يسوع: تمنعوهُش لأنو فش حدا بِعمل معجزة باسمي وطوالي بِقدر يحكي ضدي. 40لأنو اللي مش واقف ضدنا بكون عم بدعمنا. 41واللي بعطيكو كباية مي عشانكو من جماعة المسيح بأكدلكو إنو مش ممكن يخسر مكافئتو.

42الإنسان اللي بضر إيمان واحد من هدول الزغار المؤمنين فيّ أحسنلو لو يرموه في البحر بعد م يعلقو ع رقبته حجر الطحن الكبير اللي بجرو الحمار. 43‏-44وإذا إيدك هي سبب خطيتك إقطعها، أحسنلك تفوت ع الحياة بإيد مقطوعة من إنو يكون عندك إيدتين وتروح ع جهنم لجوات النار اللي بتنطفيش. 45‏-46واقطع إجرك إذا هي سبب خطيتك. احسنلك تفوت على الحياة بإجر مقطوعة من إنو يكون عندك إجرتين وتِنـزَت في جهنم. 47واقلع عينك إذا هي سبب خطيتك. أحسنلك تفوت أعور ع ملكوت الله من أنو يكون عندك عينتين وتِنـزَت في جهنم، 48وين دودهن بموتش والنار بتنطفيش 49لأنو كل واحد رَح يتملّح بالنار. 50الملح منيح، بس إذا فقد الملح ملوحتو كيف نصلحُه؟ خلي في قلوبكو ملح وُسالموا بعض.

Currently Selected:

مرقس 9: CGB

Highlight

Copy

Compare