مرقس 8

1وبهديك الأيامات صار في كمان مرة كتيـر ناس وم كنش عندهن أكل. فنادى يسوع تلاميذو وقلهن: 2أنا شفقان ع الناس لأنهن صارلهن معي 3 أيام وم ضلش معهن أكل. 3وإذا رَوّحتهن ع بيوتهن بدون أكل رَح يصفرنو في الطريق من الجوع لأنو في ناس منهن أجو من محلات بعيدة. 4جاوبوه التلاميذ وسألوه: مين بِقدر يِشبّع هدول الناس هون في البرية؟ 5سألهن يسوع: "أكم من خبـزة معكو؟ قلولو: 7. 6فطلب يسوع من الناس إنهن يقعدوا ع الأرض. وأخذ ال 7 خبـزات وشكر وبعدين قطّع الخبـز وأعطى تلاميذو عشان يوزعوها وُوزعوها ع الناس. 7وكان معهن أكم من سمكة صغيرة. باركها يسوع وقلهن وزعوها هي كمان. 8وأكلوا الناس وشبعوا. وزاد سبع سلال شُقف خبـز. 9وكان في تقريبا 4000 واحد. وطوالي بعد ما رَوّحهن يسوع 10ركب هو وُتلاميذو القارب وراحو ع منطقة دلمانوثة.

11وأجا لعند يسوع جماعة من الفريسيين وصاروا يجادلوه ويجربوه ويطلبوا منو آية من السما. 12فتنهد من أعماق روحه وقال: ليش هادا الجيل عم بطلب آية؟ عنجد بقلكو مش رَح تنعطى آية لهادا الجيل. 13وتركهن ورجع بالقارب على الجهة التانية.

14ونسيوا التلاميذ يوخذو خبـز وم كنش معهن في القارب إلا رغيف واحد. 15وكان يسوع يوصيهن ويقلهن: إطّلعوا منيح وانتبهوا من خميـر الفريسيين وخميـر هيـرودس. 16فصاروا يتناقشوا بين بعض إنهن م عندهنش خبـز. 17عرف يسوع فقلهن: ليش عم بتتناقشوا إنو فش معكو خـبـز؟ لحد إسه مش فاهمين ولا مستوعبين؟ ليش قلوبكو قاسية؟ 18ليش عندكو عيون بس مش شايفين وعندكو دينين بس مش سامعين؟ ومش متذكرين 19لما قطّعت ال 5 خـبزات عشان أطعمي 5000 واحد، قديش جمّعتو سلال ملانة شقف خبـز؟ قلولو: 12 سلة. 20ولما قطّعت ال 7 خبـزات لـ 4000 واحد، قديش جمّعتو سلات ملانة شقف خبز؟ قلولو: 7 سلات. 21فقلهن: لحد إسه مش فاهمين؟

22وراحو لبيت صيدا وجابوا الناس لعند يسوع واحد أعمى وترجوا يسوع إنو يلمسه. 23فمسك يسوع إيد الأعمى وأخذو بَريت القرية وبزق على عينيه وحط إيديه عليه وسألو: شو شايف؟ 24فاطّلع وقال: شايف الناس، شايفهن زي شجر عم بمشي. 25فرجع يسوع وحط إيديه على عينيه فصار يشوف وُنظره منيح وُبشوف كل إشي بوضوح. 26وُرَوَّحو ع بيتو وقالو مَ ترُحش على القرية.

27وراح يسوع وتلاميذو ع القرى اللي في قيصرية فيلبس وبالطريق سأل يسوع تلاميذو: بحسب حكي الناس، مين هو ابن الإنسان؟ 28جاوبوه وقلولو: في ناس بقولو عنو إنو هو يوحنا المعمدان وناس تانيه بتقول إنو هو إيليا وفي ناس بتقول إنو واحد من الأنبيا 29رجع وسألهن: وإنتو شو بتقولو عني؟ جاوبو بطرس وقلو: إنت هو المسيح. 30بس يسوع وصاهن إنو م يحكوش إنو هو المسيح.

31وبدي يسوع يعلمهن إنو ابن الإنسان لازم يتألم كثيـر ويرفضوه الشيوخ ورؤسا الكهنة وجماعة الكتبة ولازم ينقتل ويقوم بعد 3 أيام. 32وكان عم بِحكي بصراحة فأخذو بطرس وصار يوبخو. 33فلف يسوع راسو وشاف تلاميذو وُصار يوبخ ببطرس ويقول: ابعد عني يا شيطان لأنك مش عم بتفكر بفكر الله وبتفكر بأفكار الناس. 34ونادى يسوع الناس وتلاميذو وقلهن: إذا أي واحد بدو يكون من أتباعي لازم يحكم ع نفسو بالموت ويحمل صليبو ويتبعني. 35لأنو اللي بدو يكسب حياتو لازم يخسرها واللي بضحي بحياتو عشاني وُعشان الإنجيل رح يكسبها 36وشو رَح يستفيد الإنسان لو كسب كل العالم وخسر نفسو؟ 37شو بِقْدر الإنسان يعطي عشان يفدي نفسو؟ 38واللي بِستحي في وُبكلامي في هادا الجيل الخاين والخاطي رَح يستحي فيه ابن الإنسان لما بيجي بمجد أبوه مع الملايكة القديسين.

Currently Selected:

مرقس 8: CGB

Highlight

Copy

Compare