مرقس 7
7
1واجتمعوا الفريسيين وناس كتبة أجو من أورشليم مع يسوع. 2ولاحظوا إنو في مجموعة من تلاميذ يسوع إيديهن نجسة والمقصود إنهن بوكلو بدون م يغسلوا إيديهن. 3والفريسيين وكل اليهود بوكلوش بدون م يغسلو إيديهن منيح لإنهن متمسكين بالتقليد تبع الأجداد. 4ولما برجعوا من السوق بوكلوش إلا إذا غسّلوا وهنـي متمسكين بشو تعلّموا: بِغسلو الكبايات والأباريق وطناجر النحاس والشراشف. 5وسألو الكتبة والفريسيين يسوع وقلولو: ليش تلاميذك بوكلو بإيدين نجسة وُبمشوش زي م علموُنا الأجداد؟ 6قلهن يسوع: إشعياء معو حق لما تنبأ عنكو يا موجهنين لأنو مكتوب: "هادا الشعب بكرّمني بالكلام بس قلبو بعيد كثير عنّي. 7وُعبادتهن مش نافعة لأنهن بعلمو تعاليم هي وصايا الناس". 8أهملوا وصية الله وتمسكوا بالتقليد اللي من البشر. 9وقلهن ما أشطركو في كسر وصية الله عشان تحافظو على التقليد تبعكو. 10قال موسى: "إكرم أبوك وإمك واللي بِحكي كلمة عاطلة لأبوه أو لإمو بكون عقابه الموت". 11بس إنتو بتقولو: إذا واحد بقول لأبوه أو إمو اللي بتستفيدو مني إسه صار مكرس لألله يعني صار تقدمة، 12فوقتها مش مجبور يساعد أبو أو إمو. 13وبتكسروا كلمة الله عشان تمَشو تقليدكو اللي ورثتو. وقاعدين بتعملوا هيك في كتيـر أشياء تانية.
14ونادى يسوع الناس كمان مرة وقلهن: اسمعوني وافهمو 15اللي بكون بره وبفوت جوّا مش هو اللي بِقدر ينجس الإنسان بس اللي بِطلع من جِوا هادا اللي بنجسو. 16-17ولما رجع يسوع ع البيت وُبَعَدْ عن الناس سألوه تلاميذو عن المتل. 18فقلهن: كمان إنتو لهدرجة مش فاهمين؟ مش فاهمين إنو الإشي اللي بره، بفوت لجوات الإنسان مش هو اللي بِقدر ينجسو 19لأنو بفتش على قلبه، بفوت ع بطنو وبعدين بطلع؟! فيسوع طهّر كل إشي بتّاكل. 20وقلهن: اللي بِنجّس الإنسان هو اللي بِطلع منو. 21بِطلع من جوات قلبُه: الأفكار الشريرة، والسفالة والسرقة والقتل 22والزنى والحسد والخباثة والغش والفجور والعين الشريرة والنميمه والتكبر وقلة الأدب. 23كل هاي الشرور بتطلع من جوات الإنسان وُبتنجسو.
24وراح من هناك وقعد في بيت في منطقة صور وهو بدُّش حدا يعرفو بس مزبطتش إنو يظلو متخفي 25لأنو أوَّل م سمعت فيه المرة، اللي كان عندها بنت ملبوسة بروح نجس، أجت وارتمت عند إجريه. 26والمرة كانت أممية عقلها يوناني هي من أصل سوري فينيقي. طلبت منو إنو يطرد الشيطان من بنتها. 27فقلها يسوع: خلي الولاد بالأول يشبعوا لأنو مش منيح يوخذوا خبز الولاد ويرموه للكلاب الزغيـرة. 28جاوبته المرة وقلتلو: يا محتـرم، والكلاب الزغيـرة بتوكل من الفتافيت اللي بوقعوها الأولاد الزغار تحت الطاولة. 29فقلها: روحي، عشنك جاوبتي هيك صار الشيطان طالع من بنتك. 30فرجعت المرة ع بيتها ولاقت بنتها متمددة على التخت. والشيطان صار تاركها.
31وطلع من منطقة صور وُمرء ع صيدا وكان راجع ع بحر الجليل عن طريق منطقة المدن العشرة. 32وجابولو واحد أطرش بقدرش يحكي منيح وترجوا يسوع إنو يُحط إيدو عليه. 33فأخذو يسوع ع جنب ولحالو وبعيد عن الناس وحط أصابعو في ذنيه وبزق ولمس لسانه. 34وُإطّلع لفوق للسما وتنهّد وقال بالآرامي: إفَّاتا ومعناها انفتح. 35وطوالي اختفى الطرش وانحلت مشكلة لسانو وصار يحكي منيح. 36فوصاهن يسوع إنهن م يحكوش لحدا. وكل ما وصاهن أكثـر فزعوا الدنيا أكتـر. 37وكانوا مُعجبين فيه ع الآخر وقالو: أعمالو كلها منيحة. خلى الطرشان يسمعو والخُرسان يحكو.
Currently Selected:
مرقس 7: CGB
Highlight
Copy
Compare
Share
Want to have your highlights saved across all your devices? Sign up or sign in
Colloquial Galilean Bible © 2025 The Arab Israeli Bible Society
ترجمة الكتاب المقدس باللهجة العامية الجليلية © 2025 دار الكتاب المقدس في الناصرة
