مرقس 6

1وطلع من هناك وراح ع بلدو ولحقوه تلاميذو. 2ولما أجا يوم السبت صار يعلم في الكنيس. سمعوه ناس كتيـر وتعجبوا من كلامه وصاروا يقولو: مِنّلو ها الحكمة وها القدرة إنو يعمل معجزات؟ 3مش هادا ابن النجار؟ مش هو ابن مريم وإخوتو يعقوب ويوسي ويهوذا وسمعان؟ مش خياتو كلهن ساكنات في البلد؟ ورفضوه. 4قلهن يسوع: النبي بنهانش إلا في بلدو وبين أهلو وفي بيته. 5وم قدرش يعمل هناك ولا معجزة مع إنو حط إيديه على أكم من مريض وشفاهن. 6وتعجب يسوع لإنهن م عندهنش إيمان بالمرّه. وراح يعلّم في القرى القريبة. 7وعمل اجتماع لل 12 تلميذ وصار يبعـتهن كل 2 لحال واعطاهن السلطة على الأرواح النجسة 8ووصاهن إنهن م يخذوش معهن في المشوار أكل أو شنطة وم يحطوش في الجيبة مصاري. يوخذوا بس عصاي للسفر. 9ويلبسوا صندل وم يلبسوش أواعي زيادة. 10وقلهن: البيت اللي برحب فيكو نامو فيه لحد م تتركو البلد. 11واتركو المحل اللي برحبش فيكو وُبسمعش كلامكو وكتو الغبـرة عن إجريكو علامة على غلطتهن. 12وطلعوا يوعظو عن التوبة. 13وطردوا كتير شياطين ودهنوا كتير مرضى بالزيت فشفوهن. 14وانشهر اسم يسوع فسمع فيه هيرودس الملك. وُصارت الناس تقول: هادا هو يوحنا المعمدان. قام من بين الأموات وعشان هيك عم بِعمل أعمال عظيمة. 15وفي ناس تانية صارت تقول هادا هو إيليا وفي ناس صارت تقول هو نبي زي بقية الأنبياء. 16وُلما سمع هيـرودس صار يقول: هادا هو يوحنا اللي أنا قطعت راسو. وهياه قام. 17وهيـرودس هو اللي أمر باعتقال يوحنا، وحبسو بالسجن كُرمال هيروديا اللي كانت متجوزه اخوه فيلبس. 18وكان يوحنا يقول لهيـرودس: بنفعش تتجوز مرة أخوك. 19وكانت هيروديا قلبها ملان ع يوحنا وبدها تقتلو بس مش طالع بإيدها 20لأنو هيـرودس كان يحتـرم يوحنا ويحميه عشنُّو عارف إنو هو إنسان حقاني وقديس. وكان بحب يسمعو مع إنو كان يتضايق كتيـر من كلامو. 21وأجا الوقت المناسب في عيد ميلاد هيـرودس لما عمل عزيمة وعزم القادة تبعونو وُرؤسا الجيش وجاهة منطقة الجليل. 22وفاتت بنت هيروديا ورقصت. وانبسطوا هيرودس والمعازيم منها. فقال الملك للصبية: اطلبي إيش بدك ورَح أعطيكي إياه. 23وَحَلَف وْوَعد أكتـر من مرة إنو رَح يعطيها إيش بتطلب حتى لو طلبت نُص مملكتو. 24راحت الصبية وسألت إمها: شو أطلب؟ قلتلها: اطلبي راس يوحنا المعمدان. 25رجعت طوالي وبسرعة لعند الملك وطلبت وقالت: بدي إياك إسه تعطيني راس يوحنا المعمدان على صينية. 26حزن الملك كتيـر بس بسبب المعازيم وحلفانو أكتـر من مرة م كنش بدو يكسر وعدو. 27فطوالي بعت جندي وأمرُه يجيب راس المعمدان. راح الجندي وقطع راسو في السجن. 28وجاب راسو عَ صُنيّة واعطاه للصبية وهي اعطتو لإمها 29لما سمعوا تلاميذ يوحنا الخبـر أجو وأخذوا الجثة ودفنوها في قبر. 30والتقوا الرسل مع يسوع وحكولو كل اللي عملوه وعلموه. 31فقلهن: تعالو نروح ع محل بعيد عن الناس عشان نستريح شوي. ومن كتـرة الناس اللي رايحين جايين م كنش في وقت يوكلو. 32فراحو في القارب ع محل منعزل. 33وشفوهن الناس رايحين ففهموا وُرَكضوا بإجريهن وسبقوهن وأجت الناس من كل المدن. 34ولما طلع يسوع من القارب شاف كتير ناس فشفق عليهن لإنهن زي الغنم اللي م إلهنش راعي. وصار يعلمهن عن كتيـر أشياء. 35وبعد ما مَرؤو ساعات كتيـرة أجو التلاميذ ليسوع وقلولو: صرلنا كتيـر ساعات في الخلا 36خلي الناس تروّح عشان يرُوحوا لقرية أو مزرعة قريبة ويشترولهن إشي يوكلوه. 37فقلهن يسوع: إنتو طعموهن. فقلولو: بدك نروح ونشتـري خبـز بـمعاش 200 يوم شغل عشان نطعميهن؟! 38فقلهن يسوع: روحو شوفو أكم من خبزة معكو؟ فلما شافو قلولو: في 5 ترغفة وسمكتين. 39فطلب منهن يقعّدوا الناس ع العشب الأخضر وفي مجموعات. 40فقعدوا صفوف صفوف، صفوف خمسينات وُصفوف ميات. 41وحمل يسوع ال 5 خبـزات والسمكتين وإطّلع ع السما وشكر وقطّع الخبـز وُأعطاه لتلاميذو عشان يوزعوه على الناس. وقسّم السمكتين للكل. 42والكل أكل وشبع. 43ولـمّو التلاميذ 12 سلة شُقف خبـز زيادة. كانوا السلال معبيين ع الآخر. ولـمّوا السمك الزيادة. 44وأكل من الخبز 5000 زلمة.

45وطوالي أمر يسوع تلاميذو إنهن يطلعو ع القارب ويسبقوه ع الجهة التانية لبيت صيدا لحد م يروّح الناس. 46وبعد م روّحهن طلع ع الجبل عشان يصلي. 47ولما عتّمت الدنيا كان القارب صار في نُص البحر وكان يسوع ع البَـر لحالو. 48وشافهن متعذبين وهنِّ بجدفو في القارب لأنو الهوا كان عكسهن. وقبل م يطلع الفجر أجا لعندهن ماشي ع المي وكان بدو يُمرء عنهن. 49فلما شافوه ماشي ع المي فكروه شبح فصيحو. 50لأنهن كلهن شافوه وارتعبو. وطوالي حكى معهن وقلهن: قوّو قلبكو، أنا هو. م تخافوش. 51ولما طلع عندهن ع القارب هديت الريح. وكانو مصدومين ع الآخر. 52لأنهن م فهموش معجزة الخبـز وكان قلبهن قاسي.

53وُراحو لأرض جنيسارت وُوقَّفوا القارب ع الشط. 54وأوَّل م نزلوا من القارب عرفوا الناس يسوع. 55وأجت الناس في كل هديك البلاد وكانو عم بِحملو المرضى على الفراش للمحل اللي سمعوا إنو موجود فيه. 56ولوين م راح إذا كانت قرية أو مدينة أو مزرعة كانوا عم يحطو المرضى في مركز البلد ويطلبوا منو إنهن يلمسو حتى لو دناديش أواعيه. وكل اللي مسكوها شفيو.

Currently Selected:

مرقس 6: CGB

Highlight

Copy

Compare