مرقس 5

1وُصلوا ع الجهة التانية من البحر ع منطقة الجراسيين. 2وأوَّل م طلع يسوع من القارب أجا لعندو واحد طلع من المقبـرة وكان راكبو روح نجس. 3وهو كان عايش في المقبـرة وُولا واحد قدر يخليه مربوط ولا حتى بجنزير. 4ربّطوه كـتيـر بجنازير على إيديه وإجريه وكان يكسّرها ويقطّعها. فش ولا واحد قدر يسيطر عليه. 5وكان يصيّح ليل نهار في المقبـرة وفي الجبال. وكان يئذي حاله بالحجارة. 6ولما شاف يسوع من مسافة بعيدة ركض لعندو وركع قدامو. 7وصيّح بأعلى صوته: يا يسوع ابن الله العلي، شو بدك مني؟! منشان الله م تعذبنيش. 8وحكى هيك لأنو يسوع أمر الروح النجس إنو يطلع منو. 9وسألُه يسوع: شو اسمك؟ فقلو: اسمي جيش لأنو إحنا كتار. 10وترجاه كثير إنو م يطردُش من هديك البلد.

11وكان فيه جنبهن جبل وفي عدد كبيـر من الخنازير عم توكل هناك. 12فقالت الأرواح النجسة ليسوع: خلينا نفوت في الخنازير 13وبعد م سمحلهن طلعوا وفاتوا في الخنازير. وركضت كل الخنازير بسرعة من حفة الجبل لجوات البحيرة وغرقت. وكان في 2000 خنزير. 14وهربوا اللي بِرعوا الخنازير وحكوا القصة للبلد وللقرى فأجت الناس تشوف شو اللي صار. 15وأجت الناس لعند يسوع وشافوا الزلمة اللي كان ملبوس بجيش شياطين قاعد ولابس أواعيه وُبعقله. فخافوا. 16وحكولهن الشهود شو اللي صار مع اللي كان ملبوس بشياطين وحكولهن عن الخنازير. 17فصاروا يطلبوا من يسوع إنو يرحل عن بلدهن. 18وبعد م فات يسوع على القارب طلب منو الزلمة اللي ركبتو الشياطين إنو يروح معه. 19م وافقش يسوع على طلبو وقّلو روح ع بيتك واحكي لعيلتك شو عمل الرب معك وكيف رحمك. 20فراح الزلمة وصار يبشر في منطقة المدن العشرة ويحكي شو عمل يسوع معاه. وتعجبت كل الناس.

21ولما رجع يسوع بالقارب ع الجهة التانية من البحيـرة أجو ناس كتار لعندو ع الشط. 22وأجا لعندو واحد من رؤساء الكُنُس اسمو يايرُس، لما شاف يسوع ركع قدام إجريه 23وترجاه كثيـر وقلّو: بنتي الزغيـرة عم بتنازع، تعال وحط إيديك عليها عشان تشفى وتعيش. 24راح يسوع معه. ولحقوه ناس كتار وكانوا عم بدافشو حوليه 25وكان في مَرَة عندها مشكلة نسويه صرلها 12 سنة بتنـزف 26تعذبت من الدكاترة وصرفت كل مصرياتها وبدال م تتحسن صار وضعها أسوأ. 27سمعت عن يسوع ففاتت بين الناس من وراه ومسكت أواعيه. 28قالت: لو مسكت حتى طرف أواعيه رح أشفى. 29وأوّل م مسكت أواعيه وقف عندها النزيف وحست في جسمها إنها صارت منيحة. 30وطوالي حس يسوع بالقوة اللي طلعت منو فلف ع الناس وراه وسأل: مين مسك أوعِيـي؟ 31قلولو تلاميذه: الناس عم بتتدافش حوليك وبتسأل: مين مِسِكْنِي؟ 32فإِطّلع حوليه عشان يشوف المَرَة اللي لمسته. 33كانت المرَة بترتجف من الخوف وهيي فاهمه شو صار معها فأجت وركعت قدامه وُحَكَتْلو كل قصتها. 34قلها، يا بنتي إيمانك شفاكِ فكوني بعافيتك بدون مرض. وروحي بالسلامة. 35ولما كان يسوع بعدو بِحكي معها أجو ناس لعند رئيس الكنيس وقلولو بنتك ماتت فليش إتَعِّبْ المعلم؟ 36تجاهل يسوع كلامهن وقال لرئيس الكنيس: م تخفش وبس آمن. 37وم خلاش حدا ييجي معو إلا بطرس ويعقوب ويوحنا أخو يعقوب. 38وراحو على بيت رئيس الكنيس وشافوا هناك العجئه عم بِندبو وعم بِبكو كثيـر. 39فات يسوع ع البيت وقلهن: ليش العجئه والبِكى؟ البنت نايمه مَمتتش. 40استهزأوا فيه فطلّعهن كلهن بره. وفات لعند البنت وأخذ معاه أبو البنت وإمها والتلاميذ اللي كانو معو. 41مسك إيد البنت وقلها: يا طليثا قومي ومعنى الجملة هو: قومي يا صبية. 42فقامت البنت طوالي وصارت تمشي لأنو كان عمرها 12 سنة وتعجبو الناس كتيـر. 43وصّاهن يسوع كـتيـر إنهن م يحكوش لحدا شو صار وطلب منهن إنهن يعطوها توكل.

Currently Selected:

مرقس 5: CGB

Highlight

Copy

Compare