مرقس 4

1ورجع يسوع يعلّم كمان مرة عند البحر وتجمعوا كتيـر ناس حوليه فطلع وقعد في قارب عشان يعلّم وكانت الناس واقفة ع الشط. 2وعلّمهن كتيـر أشياء بالأمتال، فقلهن: 3اسمعوا وانتبهوا، مرة طلع المزارع يزرع حبوب 4فلما كان يرمي الحبوب وقع شوي منها ع الطريق وأجت الطيور بلعتها 5ووقعت حبوب ع حجار عليها شوية تراب وشرشت بسرعة بس فش تراب كفاي 6فلما طلعت الشمس انحرقت النبتة وذبلت لأنو شروشها مش غميقه 7وفي حبوب وقعت ع أرض الشوك فلما طلع الشوك خنقها وم طلعتش ثمر 8بس في حبوب وقعت ع الأرض المنيحة فشرشت وكبـرت وأثمرت وحملت إشي 30 وإشي 60 وإشي 100 ضعف. 9اسمعو منيح وانتبهو لشو بقلكو.

10ولما كان يسوع لحاله سألوه أتباعه والرسل ال 12 عن معنى الأمتال. 11فقلهن: إنتو بتنكشف إلكو أسرار ملكوت الله بس الناس اللي بره الحكي معهن بس بالأمتال عشان 12يتطلعو بعينيهن بس بشوفشوش وبِسمعوا بدنيهن بس بفهموش عشان م يتوبوش وينغفرلهن. 13وقلهن: إذا مش فاهمين هادا المتل كيف بدكو تفهموا باقي الأمتال؟ 14الزارع بِزرع كلمة الله 15والناس اللي زي الزرع اللي ع الطريق أول م بِسمعوا كلمة الله بيجي الشيطان وبُسرق الكلمة المزروعة فيهن. 16والناس اللي زي الزرع في أرض صخرية أول م بِسمعوا كلمة الله بِقبلوها وبِفرحوا فيها 17بس تأتـيـر الكلمة وقتـي، مش متعمقين فيها، عشان هيك أول م الكلمة بتسببلهن ضغط أو اضطهاد بتخلو عنها. 18وفي ناس زي الزرع بين الشوك بِسمعوا كلمة الله 19بس انشغالات الدنيا وأوهام الغنى وبقية الشهوات بتدخل لقلوبهن وُبتخنق كلمة الله فبتصير حياتهن بدون ثمر. 20بس في ناس مِتل الزرع في الأرض المنيحة بِسمعوا كلمة الله وبِقبلوها وبتثمر حياتهن إشي 30 وإشي 60 وإشي 100 ضعف.

21وقلهن: في حدا بضوي الضو وبحطه تحت كيلة أو تحت التخت؟ مش بحطه في محل عالي؟ 22لأنو فش إشي مخبى إلا راح يبين وفش إشي مغطى إلا راح ينكشف. 23اسمعو منيح وانتبهو لشو بقُلكو. 24وقلهن: تأملوا باللي بتسمعوه. راح تنقاسوا بالمسطرة اللي بتقيسوا فيها وتوخذو أكثـر م بتتوقعوا 25لأنو اللي عندو رح ينزدلو زيادة واللي معندُش رح يخسر اللي عندو.

26ملكوت الله زي إنسان زرع الحبوب في الأرض الزراعية 27وبعدين نام في الليل وقام في الصبح وكانت الحبوب منَبْتِه وكبـرانة، م فهمش كيف 28لأنو الأرض قاعدة بتكبّر النباتات لحالها بالأول بتنبّت وبعدين بتطّلع سنابل وبعدين بِطلع قمح بعبي السنابل. 29وأول م بيجي وقت الحصاد وبِجهز الثمر بجمّع الزارع الحصاد.

30وقلهن: كيف نشبه ملكوت الله وأي متَل نستعمل؟ 31هو مِتِل بزرة خردل لما منـزرعها بتكون أزغر بزرة في الأرض 32بس لما بتطلع بتصير أكبـر من كل نباتات البستان وبِطَّلِعْ أغصان كبيرة فبتيجي طيور السما تعشش في الظل تبعها.

33وكان يسوع يكثّـر من استعمال زي هاي الأمتال ع قد م الناس كانت تقدر تسمع. 34وم كنش يحكي مع الناس إلا بالأمتال وبعدين مع تلاميذه كان يفسرلهن كل إشي.

35في الـمسا هداك اليوم، قلهن: تعالوا نروح ع الجهة التانية من البحيـرة. 36وبعد م طلبوا من الناس إنهن يروّحوا ع بيوتهن ركبوا مع يسوع في القارب اللي كان فيه مع إنو كان في معه قوارب تانية. 37وهاج البحر وماج والمي عبت القارب 38وكان يسوع في آخر القارب نايم وحاطط راسه ع مخدة ففيقوه وقلولو: يا معلم، مش فارقه معك إنو عم منموت؟ 39فقام وانتهر الريح وأمر البحر أنو يهدا ويسكت. فوقفت العاصفة وصارت الدنيا هادية ع الآخر. 40وقلهن: ليش خايفين؟ فش عندكو إيمان؟ 41ارتعبوا ع الآخر وصاروا يقولوا لبعض: مين هادا الشخص اللي حتى البحر والريح بيخضعولو؟

Currently Selected:

مرقس 4: CGB

Highlight

Copy

Compare